Запорожьеда йод тарқатишяпти
Запорожье ҳукумати жума куни шаҳарнинг шарқий Хортицкий туманида йод препаратларини тарқатган.
Анастасия исмли маҳаллий фуқаро уруш бошланганидан бери иккинчи марта йод дори воситаларини харид қилганини айтди:
"Биз йод дори воситаларини биринчи марта қишда, атом электр станцияси ўққа тутилганда сотиб олган эдик. Бизда ўша фолий кислотаси билан тўлдирилган дорилар ҳали ҳам бор".
Россия мудофаа вазирлиги Украина артиллерияси томонидан отилган 9 та снаряд атом станцияси ҳудудига тушганини маълум қилди.
БМТ ва Киев завод нишонга олинмаслигига ишонч ҳосил қилиш учун ҳарбий техника ва аскарларни завод ҳудудидан олиб чиқиб кетишга чақирмоқда.
Запорожье шаҳри Россия томонидан ишғол қилинган Энергодардаги атом электр станциясидан 55 километр шимоли-шарқда жойлашган.
Атом станциясининг сўнгги ҳафталарда муттасил ўққа тутилиши, ядровий фалокат ҳақидаги хавотирларни уйғотди. Россия ва Украина бир-бирини заводни ўққа тутганликда айблаб келади.
Брайан Фогель Украина уруши ҳақида фильм ишлайди
Украина президенти офиси раҳбари Андрей Ермак Украинадаги уруш ҳақида фильм суратга олишни режалаётган америкалик кинорежиссёр Брайан Фогель билан видеоалоқа орқали сўзлашди. Бу ҳақда Украина президентининг матбуот хизмати маълум қилди.
Фогель Украинани ва унинг халқини қўллаб-қувватлашини билдирди, дея қайд этган матбуот хизмати. Режиссёр “асрларга татигулик” кенг қамровли фильм ишлаш ниятида эканини билдирган.
Брайан Фогель кинорежиссёрликдан ташқари, продюсер, сценарист, драматург ва ҳуқуқбон сифатида ҳам танилган. Унинг спортдаги допинг муаммосига бағишланган “Икар” номли киноасари 2018 йилда энг яхши ҳужжатли фильм сифатида “Оскар” мукофотини олган.
Энергодарда отишма бўлди
Энергодардаги отишма натижасида тинч аҳолидан 10 нафари турли даражада тан жароҳати олган, 2 нафари оғир аҳволда шифохонада.
Бу ҳақда шаҳар маъмурияти раҳбари Дмитрий Орлов маълум қилди.
Айни пайтда, Россия томони шаҳарга Украина ҳарбий кучлари ҳужум қилди, деб таъкидламоқда.
29 август куни Россия мудофаа вазирлиги матбуот котиби Игор Конашенков якшанба куни АЭС ёнида Украина ҳарбийларига қарашли дрон ва 2 та ҳарбий самолёт уриб туширилди, деб баёнот берди.
"Россия ҳаво кучлари Украина ҳаво кучларига тегишли 2 та Su-25 ҳарбий самолётини уриб туширди. Киев режими Запорожье станциясида техноген фалокатни келтириб чиқариш учун провокацияни давом эттирмоқда. 28 август куни Россия кучлари завод ҳудудидаги 1-рақамли махсус бинога яқинлашаётган учувчисиз ҳужумчи объектни қайд этди. Объект уриб туширилди”деди Россия мудофаа вазирлиги матбуот котиби Игор Конашенков.
Украина Херсон вилоятида қарши ҳужумга ўтганини билдирди
Украина армиясининг “Каховка” группировкаси расмий вакилининг билдиришича, 29 август куни бошланган қарши ҳужумда украин ҳарбийлари фронт чизиғининг бир қисмида Россия аскарлари мудофаасини ёриб ўтган. Қатор украин ОАВлари Украина армиясининг муваффақиятли ҳужуми ҳақида хабар берди.
Мавжуд маълумотларда таъкидланишича, қарши ҳужум бевосита Херсон шаҳрига эмас, балки Херсон вилояти шимоли-ғарбига йўналтирилган. Россиянинг қатор телеграм каналлари украин ҳарбийлари бу йўналишда Сухой Ставок қишлоғини эгаллаганини хабар қилди. Бироқ бу хабар ҳозирча расман тасдиқланмаган.
Россия Мудофаа вазирлиги 29 август куни кечқурун тарқатган маълумотда Украин ҳарбийлари Николаев ва Херсон вилоятларида уч йўналишда қарши ҳужумга ўтганини, аммо катта талафотларга учраганини ва ҳужумлар “жуда муваффақиятсиз” якунланганини билдирди. Украина Мудофаа вазирлигининг кечки баёнотида Херсон вилоятидаги жанглар тўғрисида маълумот берилмади.
Форум