ISW: россияликлар яна ялпи сафарликка салбий муносабатда
Американинг Урушни ўрганиш институти (ISW) маълумотига кўра, Россия ҳукумати урушга ялпи сафарбарлик эълон қиладиган бўлса, россияликлар бунга хийла салбий муносабат билдиришади.
Америкалик экспертлар “Фонтанка” нашрида эълон қилинган мақола остидаги изоҳларни таҳлил қилгач, шундай хулосага келишди.
Мақолада петербурглик мулозимлар урушга жўнатиш учун эркакларга “чақирув қоғози” юборилганини рад этган ва бу аслида “маълумотларни аниқлаштириш” мақсадида ҳарбий комиссариатга таклиф қоғози эканини иддао қилишган.
Изоҳларда ўқувчилар ўз ҳуқуқларини билишларини ва урушга чақирувдан бўйин товлаш учун барча усулларни ишга солишга ҳозир эканликларини баён қилишган.
ISW ҳисоботида тан олинмаган “ЛХР” аскарлари томонидан суратга олингани айтилаётган видео ҳам эсга олинган. Видеода аскарлар уруш қийинчиликларидан шикоят қилишади ва “ДХР” учун жанг қилишдан бош тортишади. Эркаклар айтишича, уларнинг иши якунланган, чунки Украинанинг бутун Луганск вилояти “қайтариб олинган”. ISW видео ҳақиқийлигини тасдиқламаган. Бироқ институт “ЛХР” тузилмаларида жанговар руҳ тушиб кетганига оид биринчи далил эмаслигини урғулаган.
Путин АҚШни Украинадаги урушни чўзяпти деб айблади
Россия президенти Владимир Путин Ғарб давлатлари “НАТОга ўхшаш тизим”ни Осиё-Тинч океани минтақасида ёйишга интиляпти, деб иддао қилди.
Москва халқаро хавфсизлик конференциясидаги нутқида Путин, Қўшма Штатларни Украинадаги можарони “чўзиш” ва АҚШ Вакиллар палатаси спикери Ненси Пелосининг шу ой бошида Тайванга ташрифини эса “режалаштирилган провокация”, деб айблади:
“Украинадаги вазият кўрсатяптики, АҚШ бу низони чўзишга уриняпти ва худди шундай улар Осиё, Африка ва Лотин Америкасида шунақа эҳтимолий низоларни қўзғатишга ҳаракат қиляпти. Американинг Тайвандаги бепарво ҳаракати шунчаки бир масъулиятсиз сиёсатчининг сафари эмас, балки Қўшма Штатларнинг минтақа ва дунёдаги вазиятни беқарорлаштириш ва тартибсизликка олиб келиш учун қилган мақсадли, онгли стратегиясининг бир қисмидир”.
Зеленский Россияга қарши янги санкциялар қўллашга чақирди
Украина президенти Владимир Зеленский Европадаги энг йирик Запорожье атом электр станциясидаги эҳтимолий фалокат хавфидан огоҳлантирар экан, Россияга қарши янги санкциялар қўллашга чақирди.
Ҳозирга қадар, Запорожье АЭС ҳудудини ўққа тутишда Украина ва Россия бир-бирини айблаб келмоқда. МАГАТЭ ташкилоти завод яқинида жанглар тўхтамаса, фалокат юз бериши мумкинлигидан огоҳлантирган.
Planet Labs ширкати томонидан эълон қилинган янги сунъий йўлдош тасвирларида Россия март ойида босиб олган завод яқинидаги отишма оқибатларини кўриш мумкин. Запорожьедаги россияпараст расмийлар ва Украина томони ҳужум масъулиятини бир-бирига юкламоқда.
Владимир Зеленский тунги видеомурожаатида Россия ядро секторига санкция қўллашга чақирди:
"Модомики, террорчи давлат халқаро ҳамжамиятнинг талабларини бутунлай менсимаётган экан, айниқса бундай нозик масалада, бу дарҳол чора кўриш зарурлигини англатади. Запорожье атом электр станциясида содир бўладиган ҳар қандай радиактив ҳалокат Европа Иттифоқи, Туркия, Грузия ва олис минтақалардаги давлатлар учун ҳақиқий фожиага айланиши мумкин. Ўшанда ҳаммаси биргина шамолнинг йўналиши ва кучи билан содир бўлади. Агар Россиянинг ҳаракатлари фалокатга олиб келса, оқибатлари ҳануз сукут сақлаётганларни ҳам четлаб ўтмайди”.
Қримда яна портлаш бўлди
Россия ишғол қилган Қримнинг Жанкой туманида портлаш содир бўлди. “Криминформ” телеграм-канали хабарига кўра, маҳаллий аҳоли портлаш товушларини эшитган ва турли нуқталарда ҳавога ўрлаётган қора тутунни кўрган. Воқеа Жанкой яқинидаги Майкой қишлоғида содир бўлгани тахмин қилинмоқда.
Жабрланганлар ҳақида ҳозирча маълумот берилмади.
Россия расмийлари воқеа бўйича изоҳ беришгани йўқ. Бироқ “РИА Новости” кучишлатар тузилмалардаги манбаларига таяниб, Майкой қишлода трансформатор станцияси ёнаётганини хабар қилди. Агентликка кўра, воқеа жойига Қрим губернатори Сергей Аксёнов етиб борган:
“Жанкой туманининг Азов қишлоғидаман. Бугун эрталаб бу ерда, Мудофаа вазирлиги маълумотига кўра, ҳарбий қисмнинг вақтинчалик ўқ-дори сақлаш жойи ҳудудида ёнғин чиқди. Айни пайтда снарядлар портлаши давом этмоқда. Тинч аҳолидан икки киши жабрланган, уларнинг ҳаётига ҳеч қандай хавф йўқ. Аҳоли эвакуация қилиняпти, хавфсизликни таъминлаш мақсадида одамлар беш километр нарига олиб чиқиб кетилмоқда. ФВВ, Мудофаа вазирлиги, Росгвардия кучлари ҳамда қутқарув хизматлари сафарбар қилинган”.
Форум