Россиялик ҳарбийлар қилган жиноятларини тан олмоқда
“Важние истории” Киев вилояти аҳолисининг ўлдирилишига алоқадор рус аскарларини топди. Нашр мухбири уларга қўнғироқ қилган, ҳарбийлардан бири барча айбларини тан олган.
Россия армияси ҳарбий хизматчиси улар Украина ҳудудига қандай бостириб киришганини, жинояткорона буйруқларни ким берганини, улар тинч аҳолини қандай талаганлари ва ўлдирганларини, шунингдек Россия бўлинмаларининг командирлари унвон ёки медаль олиш учун ўз жангчиларини ўлимга йўллаганини сўзлаб берган.
“Важние истории” журналистлари ушбу мудҳиш ҳарбий жино
ятлар гувоҳлари билан ҳам учрашганлар. Бу воқеалар биргина қишлоқда – Киев вилоятидаги Авдеевкада юз берган. Украинада бир ой ва ундан кўп вақт мобайнида Россия қўшинлари қўл остида бўлган юзлаб шунақа қишлоқлар бор.
Россия қўшинлари Украина мудофаасининг “олдинги қанотини разведка қилишга зўр бермоқда
Американинг Урушни ўрганиш институти (ISW) янги ҳисоботини Украинадаги Россия қўшинлари ва уларга тобе кучларнинг олти асосий географик гуруҳларига бағишлади. Экспертларга кўра, Харьков вилояти шимоли-шарқида – Ғарбий ҳарбий округ қўшинлари; Изюм – Славянск йўналишида – “кўнгиллилар” батальонлари ва Шарқий ҳарбий округнинг айрим бўлинмалари; Северск – Лисичанск участкасида – Марказий ҳарбий округга мансуб қисмлар, шунингдек тан олинмаган “ДХР” ва “ЛХР” кучлари; Бахмут атрофида – “Вагнер” ХҲШ, Ғарбий ҳарбий округ ҳамда “ЛХР”нинг алоҳида бўлинмалари; Авдеевка – Донецк участкасида – “ДХР” жангчилари; жанубда эса Жанубий ва Шарқий ҳарбий округлар жангчилари, ҳаво десанти қўшинлари ва Росгвардия ҳаракат қилмоқда.
Украина ҚК Бош штаби маълумотига кўра, Бахмут йўналишида Россия қўшинлари Украина мудофаасининг “олдинги қанотини разведка қилишга зўр бермоқда”, шунингдек Соледар ҳудудига авиазарбалар бермоқда. Россия ҳарбийлари ҳужумга ўтишга уринган, аммо бунга муваффақ бўла олмаган. Айни чоғда Россия армияси унга тобе “ЛХР” кучлари билан бирга Песков ва Первомайский йўналишида ҳам бесамар жанглар олиб борган.
Россиялик ҳарбий мухбир Юрий Котёнок Украина ҚК Попаснаядаги “Вагнер” ХҲШ аскарлари жойлашган бинони ўққа тутганини маълум қилди. Унинг айтишича, зарба HIMARS қуроли билан йўлланган. “Украина сейчас” нашри ҳарбийлар “Вагнер” ХҲШ қароргоҳини бошқа бир россиялик ҳарбий мухбир эълон қилган суратлар ёрдамида аниқлаганини таъкидламоқда. Бу ерда журналист Сергей Среда назарда тутилган бўлиши мумкин – бир ҳафта аввал у ижтимой тармоқларда “Попаснаяга келдим, “Вагнер” ХҲШ штабида бўлдим”, деган сўзларни илова қилган ҳолда бир неча сурат жойлаган эди. Ҳозирда бу пост ўчирилган.
15 августга ўтар кечаси Кировоград вилоятида ҳаво тревогаси эълон қилинди. Вилоят ҳарбий маъмурияти раҳбари Андрей Райкович маълумотига кўра, тревога соат 02:00 ларда бошланган. Яна Николаев вилояти аҳолиси ҳам ўтган кечада икки марта ҳаво тревогаси билан уйғонди. Виталий Км айтишича, бу 2:02 ва 5:43 ларга тўғри келади.
Харьков мэри Игорь Терехов Россия қўшинлари шаҳарнинг Слобода туманини ўққа тутганини билдирди. Унинг айтишича, снарядлардан бири маҳаллий корхона ҳудудига тушган. Жабрланганлар йўқ.
Россияпараст каналлар Украина “Вагнер ХҲШ”нинг Попаснаядаги штабига зарба берганини хабар қилмоқда
8 август куни россиялик журналист Сергей Среда ушбу “штаб”да бўлгани ҳақида ёзган эди. У Телеграмда шундай пост қолдирган: “Попаснаяга келиб, “Вагнер ХҲШ” штабига кирдим. Қадрдон биродар каби кутиб олишди. Мириқиб суҳбатлашдик”.
У эълон қилган фотосуратлардан бирида “Вагнер ХҲШ” эгаси деб ишониладиган тадбиркор Евгений Пригожин акс этган.
Среда Евгений Пригожин фотосурати илова қилинган бу постини кейинроқ ўчириб ташлаган.
Қизиғи, пост штаб жойлашган бинога Украина томонидан ракета зарбаси берилганидан сўнг ўчирилган. Штаб геолокацияси Среда ижтимоий тармоққа чиқарган фотосуратлар орқали аниқлангани йтилмоқда.
Бу орада Телеграмда гўё ракета зарбаси натижасида ярадор бўлган “вагнерчи” машинага ортилаётгани акс этган видео пайдо бўлди. Озодликнинг рус хизмати видеодаги жой геолокацияси аниқлади: бу кадрлар ростдан ҳам Попаснаядаги Мироновкая кўчасидаги 8-уйдан олинган бўлиб, камера “вагнерчилар” штаби бўлгани айтилаётган бинога қаратилган.
Россияпараст каналлар хабарича, Евгений Пригожиннинг ўзи тирик (бунинг ажабланарли ери йўқ – унинг Попаснаяда ҳарбий мухбир Среда олган фотосурати пайдо бўлганидан бери орадан 6 кун ўтди). Аммо, “Вагнер ХҲШ”га яқин манбаларга кўра, зарбадан жабрланган бор.
Бу орада Телеграмда портлашдан сўнг бино харобалари кўздан кечирилаётгани акс этган бошқа видео ёйинланди. Мазкур тасвирлар Мироновская кўчасидаги 12-уйда яшовчи киши томонидан олинган бўлиши мумкин.
Украина шаҳарларининг бирида шошилинч равишда кўмилган жасадлар қазиб олинмоқда
Жанглар тўхтагач, Украинанинг Рубижне (русча Рубежное) шаҳрида маҳаллий аҳоли Украина ва Россия кучлари ўртасидаги жанглар давомида шошилинч равишда кўмилган жасадларни қазиб ола бошлади.
50 минг одам истиқомат қиладиган Рубижне шаҳри март ойида бошланиб, узоқ давом этган жанглардан сўнг Россия дастаклаётган Луганск Халқ Республикаси қўшинлари томонидан қўлга олинган.
12 август куни шаҳарда вайрон қилинган иморатларнинг бири ёнида кўмилган жасадлар қазиб олинди.
Жорий йилнинг февраль ойида Россия президенти Владимир Путин Украинага қарши «махсус ҳарбий операцияси» бошлаган эди.
48 ёшли Лилия Ай-Талатини март ойида бошланган ҳужум давомида шошилинч тарзда дафн этилган онаси жасади қазиб олинишини кузатиб турди.
Ҳужумлар ортидан шаҳар иккига бўлинган. Ай-Талатинининг айтишича, у шаҳарнинг Украина назоратидаги қисмида қолган. Ота-онасининг руслар назоратидаги ҳудудда жойлашган квартирасига 10 кун деганда етиб борган.
«Онам аллақачон ўлаётган эди ... қўллари кўкарган, ранги оқарган, кўзлари остида ҳалқалар пайдо бўлганди», - деди у.
«Эртаси куни онам оламдан ўтди».
Ай-Талатини ва эри курак топа олмаган, шунинг учун снарядлар овози остида мурдани ердаги очиқ окопга судраб боришган.
«Энди мен учун бир оз осонроқ, чунки у кўчада, ... ғайриинсоний шароитда кўмилган эмас. Қабристонга олиб борамиз, у ерда жойимиз бор», - деди у.
Қабрларни қидиришда иштирок этиб келаётган Луганск Халқ Республикаси расмийси Анна Сороканинг айтишича, Рубижне шаҳрида 10 кундан бери ишлаган гуруҳ 104 та жасадни эксгумация қилган, яъни қазиб олган.
«Шрапнель яралари кўп экан, лекин ўқ жароҳатлари ҳам бор», - деди у жасадлар яралари ҳақида.
Расмийнинг тахминларига кўра, шаҳарда жами 500 та норасмий қабр мавжуд.
Ай-Талатинининг онаси яшаган иморат ёнида жами олти жасад қазиб олинган. Жасадлар қайта кўмилишидан олдин уларни кўздан кечириш учун шаҳарнинг бошқа қисмига олиб кетишган.
Россия жанубидаги Ростов вилоятида фаолият юритувчи суд-тиббиёт эксперти Борис Ковалёвнинг сўзларига кўра, номаълум жасадларни аниқлашга ёрдам бериш учун улардан генетик материал намуналари олинади.
Форум