Россияда Украина урушида қатнашишни истаган кўнгиллиларга ҳақ тўлаш тартиби ўзгарди
Россиянинг Новосибирск, Курган, Саратов ва Ульянов вилоятларида Украина урушида қатнашуш учун кўнгиллилар батальонлари ташкил этилмоқда. Уларга аскарликка ёлланганликлари учун 300 минг рубль миқдорида бир марталик тўлов берилмоқда. АҚШдаги урушни ўрганиш институти (ISW) нинг ёзишича, айни пайтда Россия регионларида кўнгиллиларга тўловларни бериш кечиктирилмоқда.
Масалан, Бошқирдистонда кўнгилли аскарларга берилиши лозим бўлган 200 минг рубллик бир марталик тўлов 90 кунга музлатиб қўйилмоқда. Кундалик ҳаражат учун бериладиган 2 минг рубллик тўлов бир ойда бир марта берилмоқда. Саратов вилоятидаги кўнгиллилар эса 150 минг рубль миқдоридаги бир марталик тўловни шартномани имзолаганларидан уч ой ўтиб олишлари мумкин.
ISW экспертларига кўра, ҳукумат кўнгиллилар бир марталик тўловларни олганидан сўнг Украина урушига боришдан бош тортиши мумкинлигидан ташвишланган ҳолда ҳақ тўлаш тизимни ўзгартирмоқда. Иккинчидан, регионларда кўнгиллиларга тўлаш учун маблағ етишмаётган бўлиши мумкин.
Нью йоркликлар “қизил Путинни ўққа тутди”
Россия президенти Владимир Путиннинг қип- қизил рангдаги ҳайкали АҚШнинг Нью Йорк шаҳри Марказий майдонига ўрнатилди.
Болалар майдончасига қўйилган ҳайкалда Путин танк минаётган ҳолда тасвирланган.
Нью йорклик болалар ўйинчоқ қуроллардан сув пуркаб, Путин ҳайкалини “ўққа” тутиш ўйинини ўйнашди.
Ҳайкал нафақат болалар балки катталар учун ҳам қизиқ кўринди. 39 яшар Мериям Ёқуб Путинга ушбу услубда ҳайкал қўйилишини олқишлашини айтади:
"Менимча, бу ўз фикрини дунёга билдириш ва содир бўлаётган воқеалардан норози кўплаб одамлар борлигини кўрсатишнинг яхши усули"
Ҳайкал француз рассоми Жеймс Коломинанинг иши бўлиб, у қизил ҳайкалларни яратиши ва уларни эълон қилмасдан жойлаштириши билан машҳур. Путиннинг ҳайкали шу пайтгача Париждаги Люксембург хиёбонида ҳам ўрнатилган.
Россия Азов полкини террорчи гуруҳ деб топди
Россия Олий суди Украинанинг Азов полкини террорчи гуруҳ деб ҳукм чиқарди.
Азов полки Украина шарқида Россияга қарши курашаётган энг кўзга кўринган украин ҳарбий тузилмаларидан биридир.
Россия мунтазам равишда ўз таъбирича, Азовни Украина “фашистлар” томонидан назорат қилинаётганининг исботи сифатида кўрсатиб келади.
Май ойининг ўрталарида таслим бўлган кўплаб Азов жангчилари Москва томонидан асирликда ушлаб турилмоқда. Россия расмийлари уларга қарши жиноий иш очиб, уларни тинч аҳолини ўлдиришда айблаган. Эндиликда террорчилик айбловлари қўшилиши асирдаги ҳарбийларнинг қамоқ жазосини ҳам узайтириши мумкин.
Террор ташкилоти етакчилари учун жазо 15 йилдан 20 йилгача, гуруҳ аъзолари учун эса 5 йилдан 10 йилгача бўлади, дея хабар берди Россия давлат матбуоти.
Олий суд ўз қарорида Россия ҳудудида Азов полкини тақиқлади. Бу, Украинанинг Россия ёки айирмачи кучлар томонидан босиб олинган ҳудудларида ҳам полк фаолияти таъқиқланиши мумкинлигини англатади.
Украина Миллий гвардияси таркибида бўлган Азов полки узоқ тарихга эга. Бўлинма 2014 йилда Украина шарқида Россия қўллаб-қувватлайдиган айирмачиларга қарши курашиш учун кўплаб кўнгиллилардан тузилган ва Азов баталони деб номланган.
Баталон дастлабки жангчиларни ўта ўнг доиралардан жалб қилган. Унинг ҳозирги аъзолари экстремизм ҳақидаги айбловларни рад этади.
ISW: HIMARS Россияни жиддий ташвишга туширди
Американинг Урушни ўрганиш институти (ISW) экспертлари Украина армиясининг HIMARS ялпи ўт очиш реактив тизимларидан Россия ҳарбий объектларига муттасил зарба бериши рус ҳарбийларини тушкунликка солмоқда, деган хулосага келишди.
Ташкилот маълумотига кўра, россиялик кўплаб блогер ва журналистлар HIMARSлар Россиянинг ҳаво ҳужумидан мудофаа тизими самадорлигини шубҳа остига қўйиб, таъминот йўлларига хавф солаётганидан жиддий ташвишга тушганлар.
Ҳисоботда айтилишича, Россия Мудофаа вазирлиги ўз навбатида, HIMARSлар йўқ қилинаётгани ҳақида ёлғон баёнотлар чиқариш билан бу хавотирларни тарқатишга уринмоқда.
Форум