Россияда ёзувчи Глуховский ва энергетика вазирининг собиқ ўринбосари Милов қидирувга берилди
Россия Ички ишлар вазирлиги ёзувчи Дмитрий Глуховский ҳамда мухолифатчи Алексей Навальнийнинг сафдоши бўлган Владимир Миловга нисбатан федерал қидирув эълон қилди. Милов аввалроқ Россия энергетика вазирининг ўринбосари лавозимида ишлаган.
Хабарларга кўра, Милов ва Глуховский Россия ИИВнинг маълумотлар базасида зикр этилмаган ЖК моддалари бўйича қидирилмоқда. Кейинроқ Глуховский Instagram тармоғидаги пости билан Россия Қуролли кучларини “обрўсизлантирганлик”да айбланаётганини маълум қилган.
Дмитрий Глуховский ва Владимир Милов Россияни тарк этишган, уларнинг иккаласи ҳам урушга қарши чиқишган ва Украинани дастаклашларини билдиришган.
Россиялик ҳарбий прокурор: Украинадаги "махсус амалиёт"га муддатли ҳарбий хизмат ўтаётганлар йўлланган
Украинага муддатли ҳарбий хизмат ўтаётганлардан 600 нафари жўнатилган. Бу ҳақда Россия Федерация кенгаши мажлисида Ғарбий ҳарбий округ прокурори Артур Егиев маълум қилди. Унга кўра, бу фақат Ғарбий ҳарбий округ бўйича маълумотлар, холос.
Маърузачи Егиев ўтган вақт мобайнида прокуратура бу иш учун масъул бўлган 12 нафар зобит жавобгарликка тортилгани, “махсус амалиёт”га қонунга зид равишда йўлланган аскарларнинг ҳаммаси эса ортга қайтарилганини қайд этган.
Ҳарбий прокуратура вакили ҳарбийларнинг ҳаммаси ортга соғ-саломат қайтган-қайтмагани ҳамда зобитларга қандай жазо берилганига аниқлик киритган эмас.
Россия қўшинлари Украинага бостириб кирганидан бери президент Владимир Путин Украинадаги ҳарбий ҳаракатларга фақат шартнома асосида хизмат қилаётганлар жалб этилгани ва у ёққа муддатли ҳарбий хизмат ўтаётганлар юборилмаётгани ҳақида бир неча бор баёнот берган.
Меркель Россия- Украина ўртасида воситачи бўлишдан бош тортди
Германиянинг собиқ канцлери Ангела Меркель Россия-Украина можаросини ҳал қилишда воситачи бўлмоқчи эмаслигини айтди.
Меркелга кўра, у Германия ҳукумати сўрамаган ишни қилмаслиги керак. Қолаверса, собиқ канцлер президент Путин билан музокара қлиш бефойда, деб ҳисоблайди.
ISW: Россиянинг Украина шарқидаги ҳаракатлари зое кетмоқда
Американинг Урушни ўрганиш институти Россия қўшинлари Украина шарқида бир неча жойда ҳужумларни давом эттираётганини, аммо уларнинг ҳаракатлари зое кетаётганини маълум қилди.
Экспертлар фикрича, Россия армияси украин қўшинларининг қарши ҳужумлари хавфи остида қолган мудофаа марраларини кучайтириш учун Запорожьедан Херсон вилоятига кўчиб ўтмоқда.
Бундан ташқари, РФ армияси Украинанинг кучли мудофаа позициялари жойлашган Северский Донецr дарёсини кечиб ўтмаган ҳолда жануб тарафдан Лисичанскни ишғол этишга уринмоқда.