“Азовстал”даги жангларда ҳалок бўлган ҳарбийлар жасадлари Киевга етказилди
Мариуполь шаҳрида жойлашган “Азовсталь” заводи ҳудудидаги жангларда ҳалок бўлган ҳарбийларнинг жасадлари Украина пойтахти Киевга етказилган. Бу ҳақда Associated Press хабар қилди.
Ўтган ҳафтада Украина ва Россия жангларда ҳалок бўлган 160 нафар ҳарбий жасадини бир-бирига топширишган. Бу алмашув Запорожье вилоятида бўлиб ўтган. Киевда жасадлар идентификацияси учун ДНК таҳлили ўтказилади.
“Азов” полки матбуот котиби Анна Головко агентликка жасадлардан камида 52 таси “Азов” полки ҳарбийларига оидлигини айтган.
Запорожьеда "энг таҳдидли вазият"
Душанба куни Украина президенти Россия қўшинлари мамлакат жануби-шарқидаги Запорожьени қўлга киритиш ниятида экани, бу эса уларга Украина марказига яқинлашиш имконини бериши ҳақида огоҳлантирди.
Владимир Зеленский журналистларга “энг таҳдидли вазият” Запорожье вилоятида юзага келганини, Россия вилоятнинг бир қисмини аллақачон босиб олганини айтди.
1,6 миллион аҳолига эга Запороже вилояти Украина жануби-шарқидаги энг йирик саноат марказларидан биридир.
Шаҳарнинг ўзида 722 минг киши истиқомат қилади.
Зеленский шунингдек, Украина қўшинлари мамлакатнинг шарқий қисми Донбасда ҳамон жанг олиб бораётганини ҳам маълум қилди.
Луганск вилоятидаги Россия қўлига ўтмаган минтақадаги икки муҳим шаҳардан бири Северодонецкда Украина қаршилиги давом этмоқда, деди у.
“Улар кўпроқ, улар кучлироқ, аммо бу йўналишда курашиш учун барча имкониятларимиз бор”, — дея қўшимча қилди у.
Шимолий Харков вилоятида Украина армияси “ерларимизни босқичма-босқич рус босқинчиларидан тортиб оляпти”, деди президент.
Россия элчиси БМТ тадбиридаги танқидларга чидолмай, чиқиб кетди
Душанба куни Европа Кенгаши президенти Россияни яқинлашиб келаётган глобал озиқ-овқат инқирозида айблаб, Москванинг Бирлашган Миллатлар Ташкилотидаги элчисини Хавфсизлик Кенгаши йиғилишини тарк этишга мажбур қилди.
"Ҳозирги озиқ-овқат инқирози учун фақат Россия жавобгар. Кремлнинг ёлғон ва дезинформация кампаниясига қарамай, айбдор фақат Россия бўлиб колади. Мен буни бир неча ҳафта олдин Одессада ўз кўзим билан кўрганман. Миллионлаб тонна дон ва буғдой контейнерлари ортилган кемалар Қора денгиздаги рус ҳарбий кемалари ва Россиянинг транспорт инфратузилмасига ҳужуми туфайли чиқиб кета олмаяпти. Россиянинг Украинани миналаштириши, бомбардимон қилиши оқибатида Украина ҳосил етиштира олмаяпти. Россия айбни бошқаларга ағдариб, ўзи дон сақланадиган объектларга ҳам зарба бермоқда. Бу қўрқоқлик, шунчаки кўриниб турган оддий пропаганда", деди Eвропа Кенгаши президенти Шарл Мишел.
Мишелнинг сўзларидан ғазабланган Россия элчиси Василий Небензия йиғилишни тарк этди.
"Сиз хонани тарк этишингиз мумкин. Балки ҳақиқатга қулоқ солмаслик осонроқдир, элчи жаноблари", деди Мишел.
Кейинроқ Россиянинг БМТдаги элчиси ўринбосари Telegram’даги рус каналида Мишелнинг сўзлари “ўта қўпол” эканлигини ва Небeнзия кетишга мажбур бўлгани ҳақида ёзди.
Украинадаги урушда 124 одам жинсий зўрланган
Бирлашган Миллатлар Ташкилоти Россия қўшинлари 24 февраль куни бостириб кирганидан бери Украинада 100 дан ортиқ жинсий зўравонлик билан боғлиқ ҳолат содир бўлганини маълум қилди.
БМТ шунингдек, одам савдоси хавфи “хавотирли даражада намоён бўлиши” ҳақида ҳам огоҳлантирди.
"Бирлашган Миллатлар Ташкилотининг Инсон ҳуқуқлари бўйича Олий комиссарлиги мониторинг гуруҳи 3 июнь ҳолатига кўра, аёллар, қизлар, эркаклар ва ўғил болаларга нисбатан содир бўлган 124 та жинсий зўравонлик ҳаракатлари ҳақида маълумот олди", деди Прамила Паттен, БМТ бош котибининг уруш ҳудудларидаги жинсий зўравонлик бўйича махсус вакили.
Россия элчиси Василий Неbenzиа айбловларни рад этиб, айбловлар асоссиз эканини айтди:
"Украинадаги махсус ҳарбий амалиётимиз бошланганидан бери Россия ҳарбий хизматчиларининг жинсий жиноят содир этганликда айбланиши Кийев режими ва ғарблик ҳамкасбларимизнинг севимли тактикасига айланди".