АҚШ Россия Украинадаги урушни яқин орада тўхтатишига ишонмайди
Украинада уруш тўхтамагунича АҚШ уни қўллаб-қувватлайди ва украин халқи ўзини ҳимоя қилиш учун самарали воситаларга эга бўлишига ҳаракат қилади. Бу ҳақда АҚШ давлат котиби Энтони Блинкен НАТО Бош котиби Йенс Столтенберг билан 1 июнь куни Вашингтонда ўтказган қўшма матбуот анжуманида маълум қилди.
Блинкеннинг айтишича, АҚШ Украинадаги уруш “кўп ойларга” чўзилиб кетиши мумкинлигини эҳтимолдан соқит қилмайди. “Агар Россия агрессияни тўхтатиш йўлини танласа, уруш эртагаёқ тўхтар эди. Афсуски, ҳозирда биз буни кўрмаяпмиз”,-деди Блинкен.
Аввалроқ АҚШ президенти Жо Байден Украинага HIMARS замонавий ракета тизимини етказиб берилиши ҳақида баёнот берган. Мазкур ёрдамнинг умумий қиймати 700 миллион долларни ташкил этади.
Энтони Блинкен матбуот анжуманида Украина томони АҚШ томонидан берилаётган ракета тизимларидан Россия ҳудудидаги нишонларга зарба беришда фойдаланмасликка ваъда берганини таъкидлади.
НАТО Бош котиби Йенс Столтенберг эса президент Владимир Путин “Украинада ўзи хоҳлаган стартегик мақсадга эриша олмади, бунинг ўрнига у НАТОни ўз чегараларигача кенгайтиришга эришди" деб айтди.
Reuters: АҚШ Украинага Gray Eagle учувчисиз бошқариладиган самолётларни сотиши мумкин
Президент Жо Байден маъмурияти Украинага 4 та MQ-1C Gray Eagle учувчисиз бошқариладиган самолётини сотиш имкониятини ўрганмоқда. БУ самолётларлар Hellfire ракеталари билан қуроллантирилган. Бу ҳақда Reuters ўз манбаларига таянган ҳолда хабар берди.
Агентлик манбаларидан бири Пентагонда бир неча ҳафтадан бери муҳокама қилинаётган бу масала Конгресс томонидан блокланиши мумкинлигини айтган.
Gray Eagle ҳавода 30 соатгача учиши ва катта миқдорда разведка маълумотларини йиғиши мумкин. Унинг Predator номи билан танилган жанговар версияси 8 та Hellfire ракетаси билан қуроллантирилган.
Россия Украинага бостириб кирганидан бери АҚШ Киевга 4 миллиард долларлик ҳарбий ёрдам кўрсатди.
Луганскда қақшатқич жанглар давом этаётгани билдирилди
Луганск вилоятининг Северодонецк шаҳрида вазият оғир, бу ерда кўча жанглари давом этмоқда, деб билдирди вилоят ҳарбий маъмурияти раҳбари Сергея Гайдай. Унга кўра, Украин ҳарбийлари шаҳарнинг бир нечта кварталидан рус аскарларини сиқиб чиқарган. Аввалроқ шаҳарнинг асосий қисми Россия қўшини назоратига ўтгани хабар қилинганди.
Гайдайнинг айтишича, Россия аскарлари Украина армиясининг Попасная, Камишеваха ва Белогоровка йўналишларидаги мудофаа чизиғини ёриб ўтишга ҳаракат қилмоқда.
Лисичанск туманида ҳам вазият мураккаб бўлиб турибди. Маҳаллий касалхона бомбардимонлар оқибатида зарар кўрган.
Афсонавий футболчи Пеле Путинни Украинадаги урушни тўхтатишга чақирди
Бразилиялик афсонавий футболчи Пеле (Эдсон Арантис ди Насименту) Россия президенти Владимир Путинни Украинадаги урушни тўхтатишга чақирди.
81 ёшли Пеле инстаграм саҳифасида эълон қилган Путинга очиқ хатида: “Давом этаётган зўравонликларни ҳеч нарса билан оқлаб бўлмайди. Бу конфликт жуда дахшатли, асоссиздир ва азоб-уқубат, қўрқув ҳамда нафратдан бошқа ҳеч нарса бермайди. 2017 йилда мен охирги марта сиз билан қўл ушлашиб саломашган эдим. Бу зўравонликни тўхтатиш сизнинг ўша қўлингиздадир”,-деб ёзди.
Пеле 2017 йилда ФИФАнинг 2018 йилда Россияда ўтувчи жаҳон чемпионатига тайёргарлик юзасидан тадбирида иштирок этган эди.
Time журнали версияси бўйича, Пеле жаҳондаги энг нуфузли ва таъсир кўрсатиш салоҳиятига эга бўлган шахслар юзлигидан ўрин олган.