Донбасс учун жанглар
Урушнинг дастлабки босқичида пойтахт Киевни қўлга кирита олмаган Россия Донбасснинг саноат ҳудудида ўз назоратини мустаҳкамлашга интилмоқда. Ҳудуднинг катта қисми аллақачон Москва дастаклайдиган айирмачилар назорати остида.
Рус армияси урушнинг олдинги босқичларидан фарқли ўлароқ катта ҳарбий кучини кичик ҳудудга ташлаган. Украинадаги уруш давомида рус ҳарбийлари асосан ингичка чизиқ бўйлаб жойлашиб артиллерия ва ҳаво ҳужумлари орқали шаҳарларни ўққа тутган.
Эртага Украинага босқин бошланганига 100 кун бўлади.
Северодонецк дарёси қирғоғидаги Северодонецк ва Лисичанск шаҳарларининг қўлга киритилиши Москвага Украинанинг стратегик аҳамиятга эга Луганск вилояти устидан самарали назорат қилиш имконини беради. Шунингдек, бу Кремлга уч ойдан ортиқ давом этган урушдан кейин қандайдир ғалаба ҳақида эълон қилишга ҳам замин яратади.
Украинани қуролсизлантириш ва фашистлардан тозалаш учун “махсус операция” деб аталган Москванинг босқини Европа хавфсизлик структурасига путур етказди. Киев ва унинг Ғарбдаги иттифоқчилари фашизм даъвоси беъмани босқинчилик уруши учун асоссиз баҳона эканлигини айтмоқда.
Гайдай: Тинч аҳолини эвакуация қилиш тўхтади
Чоршанба куни Украина кучлари шарқий Донбас ҳудудида олдинга силжиб келаётган рус қўшинларига қарши курашни давом эттирди.
Украина ҳарбий самолётларини пастлаб учаётгани ҳамда Бакмутда артиллерия овозлари билан биргаликда тутун кўтарилганини ҳам кўришган.
Луганск вилояти губернатори Сергей Гайдай чоршанба куни Telegram’даги саҳифасига жойлаштирган хабарида украин қўшинларнинг бир қисми шаҳарда руслар билан жанг қилаётганини, бошқалари эса ортга чекинганини айтди.
"Тинч аҳолини эвакуация қилиш тўхтаган. Гуманитар ёрдам олиб келишнинг имкони йўқ", - деди Сергей Гайдай.
Унинг сўзларига кўра, Луганск вилоятидаги Россия қўллаб-қувватлаётган айирмачилар назортига ўтмаган ягона шаҳар – Лисичанск ҳозир “тўлиқ” Украина назорати остида.
АҚШ Украинага 700 миллион долларлик қурол беряпти
Кеча кечқурин АҚШ Украинага ажратган қурол пакетининг миқдорини очиқлади. Бу 700 миллион долларлик пакет бўлиб, тўртта илғор ўрта масофали ракета тизими ва ўқ-дориларни ўз ичига олади.
Мудофаа вазирининг сиёсий масалалар бўйича ўринбосари Колин Калнинг айтишича, бу қурол Украинага шарқда Россияга қарши курашда ёрдам берадиган муҳим кучдир:
“Ушбу рухсат 2021 йил август ойидан бери АҚШ Мудофаа вазирлиги Мудофаа вазирлиги захирасидан Украина учун техниканинг ўн биринчи марта олинишидир. Ушбу пакет юқори даражада ҳаракатланувчи артиллерия ракета тизимлари ва 70 километргача масофага урувчи бошқариладиган ўқ-дорилар; бешта артиллерия радарлари; иккита ҳаво кузатув радарлари, 1000 та қўшимча жавелинлар ва 50 та қўмондонлик ва бошқарув мосламалари, 6000 та танкка қарши қуроллар, 15 000 та 155 мм.ли артиллерия снарядлари, тўртта МИ-17 вертолётлари, 15 та тактик машиналар, эҳтиёт қисмлар ва жиҳозларни ўз ичига олади - буларнинг барчаси шарқда рус ҳужумини қайтариш учун украиналикларга ёрдам беради."
АҚШ Украина ҳукуматидан ракеталарни Россия ҳудидига учирмасдан, ўз мамлакатини ҳимоя қилиш учун ишлатиш кафолатини олган. Ушбу шартнома шартлари АҚШнинг Украина кейинги вақтларда жиддий сўраётган қуролларни етказиб беришда Россия билан кенгроқ урушга сабаб бўлишдан хавотирини ҳам ифода этади.
Зеленский: Россия Украинадан 200000 болани «ўғирлаган»
Украинадан Россияга мажбуран кўчирилганлар орасида 200 минг бола бор. Бу ҳақда гапирган Украина президенти Владимир Зеленский болаларни депортация қилинишини ўғирликка қиёслади:
"Ҳозиргача жами 200 мингдан ортиқ украиналик болалар Россияга депортация қилинган. Улар меҳрибонлик уйлари тарбияланувчилари, ота-онаси билан олиб кетилган болалар ва оиласидан ажралган болалардан иборат. Россия бу одамларни ўз ҳудудида тарқатиб юбормоқда, фуқароларимизни олис ҳудудларга жойлаштирмоқда. Бу жиноий сиёсатдан мақсад шунчаки одамларни ўғирлаш эмас, балки депортация қилинганларни Украинани унутиб, қайтиб келмасликларига эришиш”.
Зеленскийнинг айтишича, Украина айбдорларни жазолайди, лекин биринчи навбатда жанг майдонида Россияга "Украинани босиб олиш мумкин эмаслигини, халқимиз таслим бўлмаслигини ва фарзандларимиз босқинчилар мулкига айланмаслигини" кўрсатамиз дея таъкидлади Зеленский.