Зеленский: Украина шарқида ҳар куни 60-100 нафар аскаримиз ўлмоқда
"Украина шарқидаги жангларда ҳар куни 60-100 нафар аскаримиз ҳалок бўляпти, яна қарийб 500 жангчи яраланмоқда", деди президент Владимир Зеленский Newsmax нашрига берган интервьюсида.
“Ҳозирча мудофаа периметрларини сақлаб турибмиз”, деди Зеленский.
Президентга кўра, айниқса Северодонецк ва Лисичанскда энг мураккаб вазият юзага келган.
Урушаётган томонлар ўз талафотлари ҳақида жуда кам маълумот беришмоқда. Россия Мудофаа вазирлиги сўнгги марта март ойида талафотларини очиқлаб, мамлакат Украинада бир ярим мингдан ортиқ аскар йўқотганини тан олганди.
Апрель ойи ўрталарида Владимир Зеленский CNN телеканалига интервью бераркан, Россия босқини бошланганидан бери Украинанинг 2500 дан 3000 нафаргача ҳарби хизматчиси ҳалок бўлганини, яна 10 мингга яқин аскар турли даражада яраланганини айтган эди.
Уруш шароитида Озодлик можаро томонларининг талафотларига доир маълумотларни мустақил манбалар орқали тасдиқлаш имконига эга эмас.
АҚШ: Путин Херсонда доимий ўйинини қиляпти
АҚШ давлат департаменти расмийларининг айтишича, Байден маъмурияти Владимир Путиннинг Украинадаги Херсон вилояти устидан “назоратни институтционаллаштириш”га уринишидан хавотирда.
"Россиянинг Украинага қарши урушининг юзинчи куни яқинлашар экан, биз Россиянинг суверен Украина ҳудуди, хусусан, Украинанинг Херсон вилояти устидан назоратни институтционаллаштиришга уринишидан хавотирдамиз. Кремль, Донецк ва Луганскда "халқ республикаси" номи билан аталмиш ҳудудлар тан олинишининг бир неча йўлини кўриб чиқмоқда. Худди Қрим билан бўлгани каби Владимир Путин Донетск ва Луганскда ҳам Украина фуқароларига Россия паспортларини беришни тезлаштирадиган фармонни имзолади.” Бу Россиянинг доимий ўйин қоидаси", деди АҚШ Давлат департаменти матбуот котиби Нед Прайс.
Россия давлат ахборот агентлиги РИА Новости сешанба куни Мелитополдаги одамларнинг Россия паспортини олиш учун ариза топшираётгани тасвирларини эълон қилди.
Агентлик маълумотларига кўра, Мелитопол аҳолиси Россия фуқаролигини олиш учун навбатда турган.
Россияда Украина шарқидаги икки минтақада яшовчи аҳолини тезда фуқароликка қабул қилиш дастури аллақачон мавжуд. Бу ҳудудларга Россия дастаклаб келаётган айирмачилар даво қилиб келмоқда.
Ўтган ҳафта Владимир Путин Украина жанубидаги, асосан, Россия қўшинлари қўлида бўлган Херсон ва Запороже вилоятлари аҳолисининг Россия фуқаролигини олишига рухсат бериш тўғрисида фармонга имзо чекди.
Кремль девори тагида украинча қўшиқ садолари янгради
Телеграм-каналларда Москва Кремли ёнидаги Александр боғида номаълум эркак “Ой, у лузі червона калина” қўшиғи куйини гармонда чалиб ўтиргани акс этган видео ёйилди.
Ушбу қўшиқ уруш бошланганидан сўнг Украинада энг кўп ижро этиладиган қўшиқлардан бирига айланди, уни хорижий мамлакатларда ҳам озодлик учун курашаётган украин халқи билан бирдамлик белгиси ўлароқ куйлашмоқда.
Видео иссиқ кунларда – баҳор ёки ёзда олинган, аммо бу урушдан олдин бўлганми, кейинми – аниқ эмас.
WSJ: Россия ҳарбий қисмида командирнинг буйруғини бажармаган юзлаб ҳарбий ишдан бўшатилди
Россия-Украина чегарасида жойлашган ҳарбий қисмда бир неча юз ҳарбий ишдан бўшатилган, улар командирнинг буйруғини бажаришдан бош тортган. Бу ҳақда Wall Street Journal хабар қилди.
Нашр ходимлари ишдан бўшатилишга оид буйруқ нусхаси билан танишишга муваффақ бўлишган.
“Россия ҳарбий қисми командири томонидан 4 март куни имзоланган ҳужжатда Украина билан чегара яқинида хизмат ўташ чоғида буйруқни бажаришдан бош тортган бир неча юз ҳарбийни ишдан бўшатиш буюрилган. Бу ҳодисадан кейин собиқ ҳарбийлар жазоланганми-йўқми – маълум эмас”, дейилган WSJ хабарида ҳарбий қисм рақами, буйруқ матни ва ишдан бўшатилган ҳарбийларнинг аниқ сони келтирилмаган.