Путин ғалла экспортини тиклаш учун ЕИдан санкцияларни бекор қилишни талаб қилмоқда
Агар Ғарб Украинадаги уруш туфайли жорий этилган санкцияларни бекор қилса, Россия жаҳон озиқ-овқат инқирозини бартараф этишга катта ҳисса қўшишга тайёр. Бу ҳақда Россия президенти Владимир Путин 26 май куни Италия бош вазири Марио Драги билан телефон орқали мулоқот чоғида айтган, деб хабар берди Reuters агентлиги.
Давлат раҳбарлари Украинадаги вазият, озиқ-овқат инқирози ва унинг қашшоқ мамлакатларга таъсирини муҳокама қилганлар. Путин, шартлар бажарилган тақдирда, ғалла ва ўғитлар экспорт қилишга ҳозирлигини урғулаган.
Ҳозирги кунда Украина портларида 4,5 миллион тонна дон қолиб кетмоқда, Россия олиб бораётган ғарбий ҳаракатлар туфайли ғаллани харидорларга етказиб бўлмаяпти. Gro Intelligence таҳлил ширкати раҳбари Сара Менкерга кўра, дунёда атиги 10 ҳафтага етарли буғдой захираси қолган.
Путин ва Драги суҳбатига оид бошқа тафсилотлар маълум қилинмаган.
Северодонецк ўққа тутилиши оқибатида 4 киши ҳалок бўлди
Украинанинг Луганск вилоятида жойлашган Северодонецк шаҳри ўққа тутилиши натижасида 4 киши нобуд бўлган. Вилоят ҳарбий маъмурияти раҳбари Сергей Гайдайнинг маълум қилишича, ўтган кеча-кундузда Россия армияси ҳужумлари туфайли минтақада элликка яқин уйга шикаст етган.
Бундан ташқари, мулозимнинг қайд этишича, сўнгги ҳафтада Горное қишлоғида икки аёл вафот этгани маълум бўлган.
Оккупацион ҳукумат Украинанинг Херсон ва Запарож вилоятларини Россия телефон коди +7 га ўтказмоқда
Бу ҳақда Россия томонидан 2014 йилда аннекция қилинган Қрим мухторияти раҳбарининг маслаҳатчиси Олег Крючков РИА Новости агентлигига маълум қилди.
Унга кўра, Херсон ва Запарож вилоятларининг Россия назоратига ўтган ҳудудларида янги мобил алоқа оператори иш бошлаган. Мазкур вилоятларда Россия телефон коди +7 билан бошланадиган sim-карталар сотила бошланди.
Россиянинг Приморск ўлкаси Думасининг қонун чиқарувчи палатасининг бир неча депутати Украинадаги урушни тўхтатишни талаб қилди
Приморск ўлкаси Думасининг қонун чиқарувчи палатасидаги КПРФ фракцияси аъзоси Леонид Васюкевич ўзи ва яна тўрт нафар ҳамкасби номидан президент Владимир Путиндан Украинадаги урушни тўхтатишни талаб қилди. У бу баёнотни ўлка парламентининг навбатдаги йиғилишида эълон қилди.
“Биз мамлакатимиз урушни тўхтатмаса етимлар сони янада кўпайиши мумкинлигини тушуниб турибмиз. Ҳарбий амалиётда асосан ёшлар ҳалок бўлмоқда ва ногиронга айланмоқда, ҳолбуки улар мамлакатимиз тараққиётига улкан ҳисса қўшиши мумкин эди”,-деди депутат.
Шундан сўнг ўлка губернатори Олег Кожемяко депутат Леонид Васюкевични хоин деб эълон қилди ва у билан биргаликда депутат Генадий Шульгуни йиғинар залидан ҳайдаб чиқаришга кўрсатма берди.
Ўлка губернаторининг айтишича, депутатларнинг бу баёноти “нацизмга қарши курашаётган ва мамлакатни ҳимоя қилаётган Россия армиясига тухматдир”.
Шунингдек, Леонид Васюкевич ва Геннадий Шульгу мазкур йиғилишда овоз бериш ҳуқуқидан маҳрум этилди. Ўлка Думасидаги КПРФ фракцияси раҳбари Анатолий Долгачев партиядошларининг бу баёнотини “демарш” сифатида баҳолади ва “улар бу баёнот билан КПРФ партияси обрўсини туширмоқда” деб баёнот берди.