Украина қишлоқларини ўққа тутган Россиянинг икки ҳарбийси 12 йилга қамалиши мумкин
Украина прокуратураси суддан шартнома асосида Россия армиясида хизмат қилган икки ҳарбийнинг ҳар бирини 12 йилдан қамоқ жазосига ҳукм этишни талаб қилмоқда.
Полтава вилояти Котелев туман суди айни пайтда асирга олинган рус аскарлари Александр Бобикин ва Александр Ивановларнинг ишини кўриб чиқмоқда. Улар уруш қонунлари ва тартибларини бузган ҳолда Харьков вилоятидаги қишлоқлардан бирида тинч аҳоли яшайдиган уйларни бомбардимон қилганликда айбланмоқда.
The Guardian нашрининг ёзишича, 26 май куни ўтган суд мажлисида Александр Бобикин ва Александр Иванов Украина қишлоқларини Россиянинг Белгород вилоятидан туриб ўққа тутган артилерия қисмида хизмат қилганларини тасдиқлаган.
“Мен ўзимга билдирилган айбловларнинг барчасини тан оламан. Биз Украина ҳудудини Россиядан туриб ўққа тутганмиз”, -деди Бобикин.
У “Град” артилерия тизими ҳайдовчиси ва ўқловчиси бўлган. Иванов эса “Град” тизими наводчиги эканини тан олди ва ўз қилмишидан афсусда эканини айтган ҳолда, суддан озроқ жазо муддати берилишини илтимос қилди.
Судланувчиларнинг адвокати ўз ҳимоясидаги шахслар ҳарбий буйруқни ижро этганлари ва бунинг учун афсусда эканликларини тан олганларини пеш қилган ҳолда, суддан камроқ жазо муддати белгилашни сўранди.
Украина прокуратураси ҳозирда тинч аҳоли уйларини бомбардимон қилишга буйруқ берган Россия командирларининг шахси аниқланаётганини билдирди.
Терговнинг маълум қилишича, Бобикин ва Иванов Харьков вилоятидаги қишлоқларни икки марта ўққа тутган. Уларнинг ҳаракати оқибатида Казачья Лопань қишлоғидаги бир неча ҳовли ва Ветеринарное қишлоғидаги ветеринария лицейи вайрон бўлган.
Бобикин ва Ивановга суд ҳукми 31 май куни эълон қилинади.
Бу Россия ҳарбийларига нисбатан Украинада олиб борилган иккинчи суд жараёнидир. 23 май куни Киев суди Россия армиясининг 21 ёшли сержанти Вадим Шишимаринни Сумск вилоятида 62 ёшли тинч аҳоли вакилини отиб ўлдиргани учун умрбод қамоқ жазосига ҳукм қилган эди.
Судда Шишимарин ўзига билдирилган айбловни тўлиқ тан олган. Шишимарин Украинада уруш қонуни ва тартибини бузганликда айбланиб судланган илк рус аскари бўлди.
Россиялик расмийлар Google’дан 7,5 млрд рублдан кўпроқ жарима ундиришди
Россия Суд приставлари федерал хизмати Google хизматидан 7,7 миллиард рубль миқдорида жарима ундирилганини эълон қилди, дея хабар қилди “Интерфакс” агентлиги.
Жарима Роскомнадзорнинг “тақиқланган контент ўчириб ташланмагани” учун белгиланган – муассаса YouTube видеопорталидаги 2,4 мингта роликни Россия фуқаролари учун хатарли, деб топган.
Google ширкатини Россияда тамсил этган “Гугл” МЧЖ 18 май куни банкротлик жараёнини бошлаганини эълон қилган эди.
Украиналик расмийлар: Ўққа тутилган Харьковда 9 яшар бола ва 5 ойлик чақалоқ нобуд бўлди
Россия қўшинлари томонидан 26 май куни Харьков шаҳри ва атрофи ўққа тутилиши оқибатида тинч аҳоли вакилларидан 9 киши нобуд бўлган, улар орасида тўққиз ёшли бола ва беш ойлик чақалоқ ҳам бор. Бу ҳақда Харьков вилояти маъмурияти раҳбари Олег Синегубов маълум қилди.
Синегубовнинг сўзларини Украина Миллий полицияси Игорь Клименко ҳам тасдиқлаган.
Харьков Украинанинг рус тилида сўзлашувчи аҳолиси энг кўп истиқомат қиладиган минтақаларидан бири бўлиб ҳисобланади.
Уруш шароитида Озодлик ҳатто расмийлар тарқатаётган маълумотларни ҳам тезкорлик билан текшириш имкониятига эга эмас.
Россияда Helsingin Sanomat ва Politiken нашрлари сайтларига тўсиқ қўйилди
Россияда Финляндиянинг Helsingin Sanomat ҳамда Даниянинг Politiken нашрлари сайтлари блокировка қилинди. Уларга нисбатан Россия Бош прокуратураси талабномасига кўра чеклов киритилган.
Шу йил 10 мартидан Helsingin Sanomat, Politiken ва Швециянинг Dagens Nyheter газетаси Украинадаги уруш ҳақида рус тилида хабарлар чоп эта бошлаган эдилар.