Қозоғистон Россия банклари шуъбалари ҳисобрақамларидаги қарийб 22 млн долларни музлатиб қўйди
Россияга қарши киритилган санкция тартибига риоя қилган ҳолда Қозоғистон Россия банклари шуъбалари ҳисобрақамларидаги 9,2 млрд танга (амалдаги курс бўйича 21,6 миллион доллар) маблағни блоклаб қўйган. Бу ҳақда “Интерфакс” ахборот агентлиги Қозоғистон молия бозорини бошқариш ва ривожлантириш агентлиги раиси Мадина Абилқасимова сўзларига таянган ҳолда хабар қилди.
Март ойда ВТБ, Альфа-банк ва Сбербанк шуъба корхоналари АҚШ томонидан жорий этилган санкция рўйхатига тушган. Май ойида Альфа-банк шуъбасини Қозоғистоннинг “ЦентрКредит” банки сотиб олган, ВТБ ва Сбербанк шуъбаларини сотиб олиш учун эса инвестор қидирилмоқда.
Украина уруши бошидан бери Россияда “бир томонлик” авиачипта олиш ҳолати кескин кўпайди
Россиялик ҳарбийлар Украина ҳудудига бостириб кирган кундан бошлаб Россияда фақат “бир томонга” сотилган авиачипталар улуши кескин кўпайиб кетган. Бу ҳақда РБК саёҳат бизнеси бозорида фаолият юритувчи “Аэроклуб” ширкати вакилларидан олинган маълумотга таянган ҳолда хабар қилди.
Қайд этилишича, март ойида бу кўрсаткич 70 фоизга, апрель ойида эса 47 фоизга етган. Дейлик, пандемиядан олдин саёҳатчиларнинг фақат учдан бир қисмигина “икки томонлик (бориш-келиш)” эмас, балки “бир томонлик” авиачипта сотиб олар эди.
“Бир томонлик” авиачипта сотиб олган россияликлар асосан Қозоғистон, Туркия, Ўзбекистон, Исроил, Арманистон, Озарбайжон ва Бирлашган Араб Амирликларига йўл олишмоқда.
YouTube Украина урушини “махсус амалиёт” ўлароқ ёритаётган минглаб канални блоклаб қўйди
Россия Украина ҳудудига бостириб кирганидан буён ўтган уч ой ичида YouTube видеопортали урушга оид мавзуларни ёритиб бораётган 9 мингдан зиёд канални блоклади. 70 мингдан зиёд видео жанговар ҳаракатлар тўғрисида нотўғри маълумот тарқатилгани туфайли платформа модерациясидан ўтмаган. Бу ҳақда The Guardian нашри хабар қилди.
Россия Мудофаа вазирлиги ва ТИВ билан боғлиқ каналларга урушни “халоскорлик миссияси” ўлароқ талқин қилганлари учун YouTube’га видео жойлаштириш вақтинча тақиқланган. Модератор урушни “махсус амалиёт” деб аташга ҳам рухсат беришмаяпти. Платформада россиялик журналист Владимир Соловьев ва унга яқин “таҳлилчилар”, шунингдек, Russia Today ва Sputnik каналлари блоклаб қўйилган.
Украинада Россия мудофаа вазири ўринбосари Евкуровнинг жияни ҳалок бўлди
Ингушетия ҳукумати Украинада Россия мудофаа вазири ўринбосари Юнусбек Евкуровнинг жияни Адам Хамхоев ҳалок бўлганини тасдиқлади. Евкуров аввал Ингушетия раҳбари лавозимида ҳам ишлаган.
“Десант-ҳужумчи рота командири Адам Хамхоев 20 майдан 21 майга ўтар кечаси Украинада ҳалок бўлди. У Рязань Ҳаво-десант қўшинлари битирувчиси бўлиб, Ульяновскда ҳарбий хизматни ўтаётган эди”, дейилган Ингушетия ҳукумати сайтида ёйинланган хабарномада.
Аввалроқ қатор нашрларда Хамхоев Ингушетияда дафн этилгани ҳақида хабарлар тарқалган эди.