Россиядан бир тарафга учиш кўпайди
Украинага босқин бошланганидан бери Россияда “бир тарафга” харид қилинган авиачипталар сони кескин ортди. Бу ҳақда бизнес-трэвел хизматлари бозорида фаолият юритувчи “Аэроклуб” ширкати маълумотига таяниб, РБК хабар қилди.
“Бир тарафга” олинган авиачипталар улуши март ойида 70 фоизни, апрелда эса 47 фоизни ташкил қилган. Ҳолбуки 2019 йилда авиатранспортда сафарга чиққанларнинг атиги учдан бир қисми чипталарни “бир тарафга” олган эди, дея қайд этади агентлик.
“Бир тарафга” чипта олганларнинг аксарияти Қозоғистон, Туркия, Ўзбекистон, Исроил, Арманистон, Озарбайжон ва БААга учган.
Медведчук собиқ президент Порошенкога қарши ифода берди
Украина хавфсизлик хизмати (УХХ) “Путиннинг қариндоши” Виктор Медведчукнинг собиқ президент Пётр Порошенкога қарши ифодалари акс этган видеоёзувини эълон қилди.
Медведчукнинг даъвосича, Порошенко ундан Россия раҳбарияти билан боғланишни илтимос қилган, сўнгра Украинанинг барча масъул идораларида зарур қарорлар қабул қилинишини таъминлаган.
Давлатга хиёнатда айбланаётган сиёсатчи, Порошенко нефть қувурини сотиб олишга 23 млн доллар сарфлаган, деб даъво қилмоқда. Унинг иддаосича, пул сохта шартномалар орқали чиқарилган, бу ишларни президент Порошенконинг молиявий масалалар бўйича маслаҳатчиси назорат қилиб турган.
Медведчукнинг ифодасига кўра, қувур бир йил ичида уни сотиб олишга кетган маблағдан икки карра кўп – 42 млн доллар фойда келтирган. Порошенко президентликдан кетгач, 2019 йил майдан бошлаб магистраль орқали дизель ёқилғиси ҳайдаш тўхтатилган.
Собиқ депутат видеоёзувда 2014-2015 йилларда ўзини “ДХР” ва “ЛХР” деб атаётган бўлгинчи республикалардан кўмир сотиб олиш схемалари йўлга қўйилгани ҳақида ҳам гапирган.
“Бу тижоратга президентдан тортиб вазирлару, ҳуқуқ идоралари ва бевосита ижрочиларгача – барча олий давлат мулозимлари бош қўшган эди”, деб даъво қилмоқда Медведчук.
Рус аскари умрбод қамоқ жазосига ҳукм қилинди
Украинада судланган илк Россия ҳарбий хизматчиси Вадим Шишимарин, Суми вилоятида яшовчи тинч фуқаро ўлимида айбдор, деб топилди.
Сержант “уруш қонунлари ва одатларини бузиш” моддаси бўйича умрбод қамоқ жазосига ҳукм қилинди.
19 майдаги суд мажлисида Украина прокуратураси 21 ёшли Шишимаринга қуролсиз тинч фуқарони ўлдиргани учун умрбод қамоқ жазоси тайинлашни сўраган эди. Тергов маълумотига кўра, сержант 2022 йил 28 февраль куни велосипед ҳайдаганча телефонда гаплашиб кетаётган 62 ёшли эркакни бошига отиб ўлдирган. Воқеа Суми вилоятининг Чупаховка қишлоғида юз бергани айтилмоқда.
“Прапоршчик Макеев отишга буйруқ берди. Мен рад рад қилдим. Кейин яна бир ҳарбий таҳдидли овозда “от” деб буюрди, отмасам, у бизни сотишини айтди. Мен қисқа-қисқа танаффус билан қ уздим. Уни ўлдирмоқчи эмасдим. Мени тинч қўйишларини истардим холос", деди Шишимарин.
Бу Россия Украинага қарши уруш бошлаган 24 февраль санасидан бери Россия ҳарбий хизматчиларига нисбатан ўтказилган биринчи маҳкама жараёнидир.
Ллойд Остин: Украинага дунёнинг 20 та мамлакати янги ёрдам пакети беришга ҳозир
Украинанинг хавфсизлигини таъминлаш учун бу мамлакатга жаҳоннинг йигирмата мамлакати янги ёрдам пакетларини тақдим этишга тайёр. Бу ҳақда АҚШ мудофаа вазири Ллойд Остин 23 май куни бўлиб ўтган Украина алоқа гуруҳининг онлайн учрашуви чоғида билдирди.
Дейлик, Дания, хусусан, Россия флоти томонидан ёпиб қўйилган Одессадаги портга соҳил чегарасини қўриқлаш учун кемага қарши замонавий “Гарпун” қанотли ракеталарини йўллайди. Бу қурол билан 150-200 километр нарида туриб нишонга ҳужум қилиш мумкин.
Остинга кўра, бошқа мамлакатлар “ўта зарур бўлган артиллерия ўқ-дориси, соҳил мудофааси тизимлари ҳамда танк ва бошқа зирҳли техника беришлари” мумкин. Бундан ташқари, Украина алоқа гуруҳи иштирокчилари ўз зиммаларига украиналик аскарларни ўқитиш ва уларнинг ҳарбий тизими фаолиятини дастаклаш вазифасини олишган.
Учрашув иштирокчиси бўлган 47 та мамлакат вакиллари юзага келган вазият глобал озиқ-овқат инқирозини келтириб чиқариш мумкинлигидан хавотирда.