Россия Финляндияга газ экспортини тўхтатди
Россиянинг "Газпром" компанияси шанба куни эрталаб соат 7 дан бошлаб Финляндияга газ экспортини тўхтатди.
Бунга Финляндия расмийларининг Россия президенти томонидан таклиф этилган “газ учун рубл” схемаси бўйича рус гази учун ҳақ тўлашдан бош тортгани сабаб бўлди.
Финляндиянинг “Гасум” давлат газ компанияси арбитражга даъво аризаси бериш ниятида эканини айтди. Финляндия ўз газининг катта қисмини Россиядан импорт қилади, аммо у мамлакатнинг умумий энергия истеъмолининг атиги 10 фоизини ташкил қилади.
Россия аллақачон Болгария ва Полшага газ етказиб беришни тўхтатган, улар ҳам рубл схемасига ўтишдан бош тортган.
Финляндиянинг “Гасум” ширкати бош директори Микка Волжанин “биз бу вазиятга пухта тайёргарлик кўрдик", деди.
Жума куни эрталаб Финляндия молия вазири Анника Саарико мамлакат АҚШнинг Exelarate Energy компанияси сузувчи омбори учун ўн йиллик ижара шартномасини имзолаганини эълон қилди.
Доғистондаги “сўнгги қўнғироқ”да “Путин – иблис” деган битирувчи қиз узр сўраб чиқди
Доғистоннинг Избербаш шаҳридаги мактаблардан бирида ўтган “Сўнгги қўнғироқ” тантанасида битирувчи қиз Украинадаги урушга қарши нутқ сўзлади. “Нетипичная Махачкала” телеграм-канали тарқатган видеода қизнинг: “Йўқолсин уруш! Украинага озодлик! Путин – иблис!” дегани уқилган. Бу баёнот ортидан олқиш саси эшитилган.
Доғистондаги ҳукуматга яқин телеграм-каналлар битирувчига қарши Россия армиясини “обрўсизлантирган”и, қизнинг ота-онасига қарши эса “вояга етмаган шахс тарбиясига оид мажбуриятларини бажармагани” учун баённома тузилгани ҳақида хабар қилишган.
Кейинроқ телеграм-каналларда битирувчи қиз ва онаси узр сўрагани акс этган видеолар тарқатилган. Мазкур видеода қиз ўз қилмишидан пушаймон экани, “шунчаки ўзига эътибор тортмоқчи” бўлганини айтган. Онаси эса қизининг “ўйламай қилган” ишидан пушаймон эканини урғулаган. У Путин сиёсатини тўла қўллашини, Россия ватанпарвари эканини ҳамда “Украина ҳудудида олиб борилаётган махсус амалиёт”ни ёқлашини қўшимча қилган.
Озодликнинг Кавказ.Реалии лойиҳаси маълумотига кўра, қизни ҳам, онасини ҳам узр сўрашга маҳаллий амалдорлар мажбур қилишган. Минтақа ҳукуматидаги манба нашрга Доғистон раҳбари Сергей Меликов “содир бўлган воқеани ўрганиб-ҳал қилиш талаби билан” Избербаш мэрига шахсан қўнғироқ қилганини айтган. Шаҳар маъмурияти вакиллари бу борада изоҳ беришдан бош тортишган.
Литва Россиядан электр энергияси сотиб олишни тўхтатди
Литва шу йилнинг 22 майидан бошлаб Россиядан электр энергияси импорт қилишни тўхтатади, дея маълум қилди маҳаллий Litgrid оператори.
Ширкат вакиллари қайдича, Nord Pool биржа оператори Россиянинг “Интер РАО” ширкати билан электр энергияси савдосини тўхтатишга оид қарор қабул қилган. Мазкур ширкат Россиядан Болтиқбўйи мамлакатларига электр энергиясини экспорт қилиш билан шуғулланган ягона компания бўлиб ҳисобланади.
Литва ўз аҳолисининг электр энергиясига бўлган эҳтиёжини маҳаллий электр станциялари ҳамда Европанинг бошқа мамлакатларидан электр импорт қилиш ҳисобига қондиришни режаламоқда.
Москва АҚШ президенти Жо Байден дохил 900 дан зиёд америкаликнинг Россияга киришини тақиқлади
Россия Ташқи ишлар вазирлиги мамлакатга кириши тақиқланган АҚШ фуқаролари рўйхатини эълон қилди. Мазкур рўйхатда 963 кишининг исм-фамилияси бор. Россия ТИВ мулоҳазасича, бу одамлар “русларга қарши нафрат қўзғатиш” билан шуғулланади.
Рўйхатда АҚШ ҳукумати вакилларидан президент Жо Байден, вице-президент Камала Харрис, АҚШ Давлат котиби Энтони Блинкен, мудофаа вазири Ллойд Остин, МРБ директори Уильям Бернс ҳамда молия вазирининг биринчи ўринбосари Адевале Адейемо кабилар бор.
Россиянинг “қора рўйхат”ига Озод Европа/Озодлик радиоси президент Жейми Флай ҳам киритилган.
Мазкур рўйхатда бундан бир неча йил вафот этган америкалик сиёсатчи ва мулозимларнинг ҳам исмларига (жами 5 киши) дуч келиш мумкин.
Аввалроқ АҚШ россиялик юзлаб фуқарога қарши санкциялар жорий этган, санкция рўйхати Россиянинг Украинага бостириб кириши ортидан анча кенгайган. Мазкур рўйхатдан президент Путин дохил Россия олий раҳбариятидаги кишиларнинг деярли барчаси ўрин олган.