“Азовстал”даги жангларда ҳалок бўлган ҳарбийлар жасадлари Киевга етказилди
Мариуполь шаҳрида жойлашган “Азовсталь” заводи ҳудудидаги жангларда ҳалок бўлган ҳарбийларнинг жасадлари Украина пойтахти Киевга етказилган. Бу ҳақда Associated Press хабар қилди.
Ўтган ҳафтада Украина ва Россия жангларда ҳалок бўлган 160 нафар ҳарбий жасадини бир-бирига топширишган. Бу алмашув Запорожье вилоятида бўлиб ўтган. Киевда жасадлар идентификацияси учун ДНК таҳлили ўтказилади.
“Азов” полки матбуот котиби Анна Головко агентликка жасадлардан камида 52 таси “Азов” полки ҳарбийларига оидлигини айтган.
Россияда уруш бошидан бери VPNдан фойдаланувчилар сони 15 баравар ошди
Россияда блокировкани айланиб ўтиш учун VPN хизматларидан 24 миллион одам фойдалана бошлаган, дея хабар қилди Times газетаси. Жорий йилнинг февраль ойида VPNдан 1,6 миллион россиялик фойдаланарди, холос.
Айни пайтда, Mediascope қайдича, апрель ойида интернетдан ёши 12 дан юқори бўлган 97,5 миллион россиялик фойдаланган. Бу Россияда блокланган ресурсларга кириш муаммосидан халос бўлиш учун ҳар тўрт россияликнинг бири хусусий тармоқ ёки VPNдан фойдаланганини англатади.
Ҳозирда Россияда мингдан зиёд сайт блокланган. Улар орасида Facebook ва Instagram тармоқлари, йирик хорижий ОАВ ва Россиядаги мустақил нашрларнинг сайтлари бор. Бу сайтларга Россиядан кирувчилар сони камайган бўлса-да, тўхтагани йўқ. Дейлик, РБК маълумотига кўра, аввал Instagram тармоғига Россиядан кунига 39 миллион фойдаланувчи кирган бўлса, эндиликда бу рақам 34 миллионга тушган.
Россияда Agentura.ru сайти бош муҳаррири Андрей Солдатов қидирувга берилди
Россия Ички ишлар вазирлиги махсус хизматлар тадқиқотчиси, Россия махсус хизматлари тўғрисидаги Agentura.ru сайти бош муҳаррири Андрей Солдатовга нисбатан қидирув эълон қилди. Бу ҳақда журналистнинг ўзи маълум қилди. Солдатовга кўра, унинг Россия банкларидаги барча ҳисобрақамлари ҳибс этилган.
Солдатов қайдича, унга қарши жиноят иши 2022 йилнинг 17 март куни очилган, суриштирув Россия Тергов қўмитасининг Тергов бош бошқармаси томонидан олиб борилаётгани тахмин қилинмоқда.
“Агора” ҳуқуқбонлик гуруҳи раҳбари Павел Чиков тахминича, Андрей Солдатовга қарши иш Россия армияси тўғрисидаги “фейк”лар тарқатиш (мамлакат Жиноят кодексининг 207.3-моддаси) бўйича очилган бўлиши мумкин.
Болалар омбудсмени ёш болаларнинг Россия армиясини дастаклаш акцияларига иштирок этишини маъқуллади
Россия президенти ҳузуридаги бола ҳуқуқлари бўйича вакил Мария Львова-Белова ёш болаларнинг Украина ҳудудида юрган россиялик ҳарбийларни дастаклаш учун ўтказилаётган флешмобларда иштирок этишини маъқуллади.
“Агар флешмобларда иштирок этиш онгли бўлса, бола ҳиссиётга тўлиб, қай бир шаклда ҳарбийларимизни қўллашни истаса, бу нарса, албатта, менда ҳурмат уйғотади”, дея билдирган Львова-Белова “акцияларда мажбурий иштирокнинг олдини олиш керак”лигини, бироқ ҳали ўзига бу борада биронта шикоят келиб тушмаганини қўшимча қилган.
Шунингдек, мулозима ўзининг болалар билан учрашуви чоғида мунтазам равишда уларнинг Россия ҳарбийларини дастаклашга астойдил интилаётганига дуч келаётганини айтган. Львова-Беловага кўра, улардан кўпи “Донбассга бориш” истагини билдиришган.
Россия қўшинлари Украина ҳудудига бостириб кирганидан буён Интернет тармоғида мунтазам равишда вояга етмаган болалар иштирокидаги Россия армиясини дастакловчи флешмобларнинг фото ва видеолари ёйинланиб келмоқда.