Россиянинг Курск вилоятидаги Тёткино қишлоғи ўққа тутилгани айтилмоқда
Курск вилоят губернатори Роман Старовойт Украина томонидан Тёткино қишлоғи ўққа тутилганини ва бунинг оқибатида бир киши ҳалок бўлганини маълум қилди.
Губернаторга кўра, яна бир киши яраланган ва касалхонага ётқизилган. Бундан ташқари бир нечта уйга зарар етган.
17 май куни эрталаб Курск вилоятининг Украина билан чегарадош ҳудудида жойлашган Алексеевка қишлоғи ҳам ўққа тутилгани айтилган эди. Ўшанда учта уй, мактаб биноси ва бир автомобил зарар кўргани билдирилган.
Россия Украинага бостириб кирганидан сўнг Курск вилоятининг Украина билан чегарадош ҳудудлари бир неча марта ўққа тутилгани хабар қилинганди. Шунингдек, вилоят ҳудудида украин дронлари уриб туширилгани ҳам иддао қилинган.
Май ойида Сужа-Сосновий бор темир йўлидаги кўприкнинг бир қисми қулаб тушган. Старовойт бу воқеани диверсия деб атаган.
Британия разведкаси: Украинада муваффақиятга эриша олмаган рус қўмондонлари ишдан олинган
Британия Мудофаа вазирлиги навбатдаги билдирувида, разведка маълумотларига таянган ҳолда, Украинада муваффақиятга эриша олмаган рус қўмондонлари ишдан олингани айтилмоқда.
Разведка маълумотларида қайд этилишича, генерал-лейтенант Сергей Кисель Харьковни эгаллаш амалиётини барбод қилгани, вице-адмирал Игорь Осипов “Москва” крейсерининг ҳалокатга учрагани ортидан лавозимидан бўшатилган.
“Бош штаб бошлиғи Валерий Герасимов лавозимида қолмоқда, лекин Путиннинг унга ишончи мустаҳкамми деган савол очиқ қолмоқда”,-дейилади билдирувда.
Сергей Киселнинг ишдан олингани тўғрисида аввал украин ОАВлари ёзган эди, Осиповнинг лавозимидан кетгани ҳақида эса Украина Мудофаа вазирлиги билдирган. Россия ҳозирча бу хабарларга муносабат билдирмади.
Уруш шароитида мазкур хабарларни мустақил манбалардан текшириш ва тасдиқлаш имкони мавжуд эмас.
БМТ Украина буғдойини экспорт қилиш тўхтаб қолгани ортидан озиқ-овқат тақчиллиги юзага келишидан ташвиш билдирмоқда
Жаҳон буғдой савдосида Украинанинг улуши 10 фоизни ташкил қилади, аммо уруш оқибатида бу мамлакат буғдой экспортини тўхтатишга мажбур бўлди. Чунки Россия буғдой экспорти амалга ошириладиган Қора денгиздаги бандаргоҳларни қамал қилган. Одесса ва бошқа шаҳарлардаги омборхоналарда Ғарбга экспорт қилиниши режалаштирилган минглаб тонна буғдой сақланмоқда.
“Бу бандаргоҳланрни зудликда қамалдан чиқариш зарур, негаки бу ерда гап нафақат Украина, балки очлик ёқасига келиб қолган жаҳондаги барча муҳтожлар ҳақида кетаяпти. Мен Путинни, агар унинг юраги бўлса, бандаргоҳларни очишга чақираман”,- деди БМТ Озиқ-овқат дастури раҳбари Дэвид Бисли Нью-Йоркда озиқ-овқат хавфсизлиги бўйича ўтган анжуманда.
БМТ Бош котиби Антониу Гутерриш уруш оқибатида Россия кимёвий ўғитларини экспорт қилиш тизими ҳам ишдан чиққанини, бу ҳам озиқ-овқат инқирози юзага келишига таъсир кўрсатишини таъкидлади.
Харьковда Александр Невский ҳайкали олиб ташланди
Александр Невский ҳайкали Харьковнинг 350 йиллиги муносабати билан 2004 йилнинг августида ўрнат илган эди. 2015 йилда номаълум шахслар ҳайкалнинг қўлидаги қилични олиб ташлаган эди, кейинчалик қилич яна қайта ўрнатилган. Эндиликда эса фаоллар ҳайкални тўлиқ олиб ташлашди.