Британия разведкаси Беларус армияси ҳаракатини ўрганди
Буюк Британия ҳарбий разведкаси навбатдаги маълумотномасини Беларуснинг сўнгги хатти-ҳаракатларига бағишлади.
Май ойи бошларида Лукашенко тўсатдан Беларусь армияси жанговар шайлиги текширилишини эъон қилди, кейин эса махсус амалиёт кучларини Украина билан чегара бўйлаб жойлаштирди.
Аммо Беларусь кучлари қаршисида украин қўшинлари тургани сабабли улар Россиянинг Донбассдаги амалиётларига кўмаклаша олмайди, деб ёзди Британия ҳарбийлари.
Айтишилича, аввалги тахминларга қарамай, Беларусь қўшинлари можарода бевосита иштирок этмаган. Бироқ Беларусь ҳудуди Россиянинг Киев ҳамда Чернигов йўналишида Украинага ҳужум қилишида плацдарм вазифасини ўтаган.
Қолаверса, Россия авиация орқали ҳужумларда ва ракета зарбалари йўллашда Беларусь ҳудудидан фойдаланган.
Британ разведкасига кўра, Лукашенко санкциялардан, Украинанинг жавоб зарбасидан ҳамда беларусь ҳарбийларининг эҳтимолий норозилигидан қўрқиб Россия босқинини дастаклаш билан можарода бевосита иштирок этишдан қочиш истаги ўртасида мувозанат сақламоқда.
Россияда шаҳар кенгашини сариқ-кўк бўёққа бўяб кетишди
16 май куни, Россиянинг Украинага босқинига қарши бўлган фуқаролардан яна бири Евпаторияда шаҳар кенгаши биносига сариқ-кўк бўёқ сепиб кетди.
Тарихий бино фасадига бўёқ кечаси сочилган, ҳозир эса бўёқ ювиб ташлангани айтилмоқда. РИА Новости хабарига кўра, кузатув камералари ниқоб таққан бир кишини қайд этган.
Қримтатар халқ мажлиси раиси Рефат Чебаров ушбу хабарга “Кейинги сафар “Молотов коктейли” ҳам нишонга тегишини кутиб қоламиз”, дея изоҳ қолдирган.
Журналист Шура Буртиннинг “Медуза” учун ёзган мақоласидан иқтибослар олгани учун эса, Красноярдаги ТВК телеканали бош продюсери Вадим Востровга нисбатан Россия армиясини “камситиш”га доир модда бўйича баённома тузилди.
“Иш материалларига кўра, мен танимайдиган бир капитан билан майор “интернет тармоғини кўздан кечириш далолатномасига мувофиқ” VadimVostrov саҳифасида 32 фотосурат, 8 видео ва 74 та ҳавола борлиги (бутун телеграмни санаб чиқишибди, азаматлар!) “аниқланган”и ҳақида бир-бирига ҳисобот ёзган эмиш ва охир-оқибат капитан ила майор “Россия Федерацияси Қуролли кучларини камситувчи ахборотни фош этишган” эмиш”, деди Вадим Востров.
У иқтибос келтирган мақолада Буртин социолог билан бирга россияликлар урушни қўллаб-қувватлаши сабабларини англашга уринган.
БМТ: Украинадаги уруш туфайли ҳар 10 украиналикдан 9 нафари қашшоққа айланиши мумкин
БМТнинг Ривожлантириш дастури уруш туфайли Украина тараққиёти бир неча ўн йил орқага кетиши мумкинлиги тўғрисидаги ҳисоботини эълон қилди.
Ҳисоботда таъкидланишича, уруш оқибатида Украинадаги саноат корхоналарининг ярми тўлиқ ёпилган, қолганлари эса катта қийинчиликларни бошдан кечирмоқда.
Дастлабки таҳминларга қараганда, урушнинг чўзилиб кетиши ортидан ҳар 10 украиналикдан 9 нафари қашшоққа айланиши мумкин. Йигирма йиллик тараққиёт эса таҳдид остида қолади. Урушнинг ижтимоий ва иқтисодий оқибатларини бартараф этиш учун асрлар керак бўлади.
Россия Украина шарқида янги ҳужумларга тайёргарлик кўрмоқда, НАТО Украина ғалаба қозонишини башорат қилмоқда
Украина ҳукумати мамлакатнинг иккинчи йирик шаҳри бўлган Харьков атрофида Россия армиясига қақшатқич зарбалар беришда давом этаётганини маълум қилди. Айни пайтда президент Владимир Зеленский 15 май куни кечқурун берган баёнотида Россия қўшини Донбассни тўлиқ назоратига олиш учун янги ҳужумларга тайёрланаётганини айтди:
“Биз Россиянинг Донбассга уюштирадиган янги ҳужумларини қайтаришга тайёргарлик кўрмоқдамиз. Оккупантлар ҳалигача боши берк кўчага кириб қолганларини, улар “махсус амалиёт” деб атаётган операция аллақачон банкрот бўлганини англай олмаяптилар”,-деди Зеленский.
Украина президенти маслаҳатчиси Алексей Арестович Харьковдан чекинган рус бўлинмалари Донбасс йўналишига ташланаётганини билдирди.
НАТО Бош котиби Йенс Столтенберг ташкилотга аъзо давлатлар расмийлари билан 15 май куни Берлинда ўтказган учрашувда “Уруш Москва режалаштирганидек бўлмаяпти”, деб айтди ва давлатларни Украинага ҳарбий кўмакни кучайтиришга чақирди.
16 май куни НАТО Эстонияда кенг кўламли ҳарбий ўқув машғулотларини бошлайди. Шу куни Брюсселда Европа Иттифқи ташқи ишлар вазирлари Украинадаги вазиятни муҳокама қилади. Мазкур учрашувда Россияга нисбатан янги санкциялар жорий этиш масаласи кўриб чиқилади.