Зеленский: Яқинда Украинада иккита ғалаба куни бўлади
Украина президенти Владимир Зеленский, 9-май кунги чиқишида Иккинчи жаҳон урушида фашистлар Германияси устидан қозонилган ғалабани ёдга оларкан, Россия билан урушда Украина ғалаба қозониши ва мамлакатнинг бирор бир қисмини бериб қўймаслигини таъкидлади.
Зеленский украиналикларни, тарихда кўп марта ўз ерларини ҳимоя қилиш учун курашган ва ўз “ўз йўли”га эга, эркин халқ, деб атади.
"Биз фарзандларимиз учун, озодлик учун курашяпмиз ва шу учун ҳам ғалаба қозонамиз. Биз "уруш такрорланмасин" деймиз. Чунки 2194 кунлик урушни фақат ақлдан озган одамгина такрорлашни хоҳлайди. Бир одам аллақачон Гитлер режимининг даҳшатли жиноятларини такрорлаб, улар қилган ишлардан нусха кўчиришга уринди ва у, оқибатда, йўқликка маҳкум бўлди. Яқинда Украинада иккита Ғалаба куни бўлади. Кимдир ҳеч нарсасиз қолади. Биз ўшанда ғалаба қозонган эдик, ҳозир ҳам ғалаба қозонамиз. Хрешчатик эса ғалаба парадига – Украина ғалабасига гувоҳ бўлади”, деди Зеленский.
Россиянинг Польшадаги элчиси юзига қип-қизил суюқлик сепиб юборишди
Ҳодиса элчи Сергей Андреев, Ғалаба куни муносабати билан Варшавадаги совет аскарлари қабрига гулчамбар қўймоқчи бўлган пайтда содир бўлди.
Бир неча киши элчининг юзи ва кийимларига қизил суюлиқни сепиб юборишди, элчининг ёнида турган шериклари ҳам қизил рангга бўялди.
Юзларини сидириб, тозаларкан элчи: “Мен ўз давлатим ва президентим билан фахрланаман”, деди. RIA Novosti агентлигига гапирган элчига кўра, унга шикаст етмаган, сочилган суқлик эса қандайдир шарбат бўлган.
Россия ташқи ишлар вазирлиги матбуот котиби Мария Захарова ҳодисага муносабат билдираркан: “Нео-нацизм тарафдорлари яна ўзларининг қиёфасини намойиш қилди”, деди.
"Бизлар тинчлик йўлида жанг қилдик, сиз урушни танладингиз!"
9 майни куни “Ўлмас полк” юришига қўлида урушга қарши плакатлар билан чиққан россияликлар ушлангани хабар қилинди. Жумладан, ОВД-Инфо нашри, Новосибирскда полиция Владимир Салтевскийни ушлаганини хабар қилди.
Салтевский, уруш фахрийсининг сурати туширилган палакатга: “Мени уятга қўйдингиз, набираларим. Биз тинчлик йўлида жанг қилган эдик, сизлар эса урушни танладингиз” деган тагсўзни қўшиб қўйгани учун қўлга олинган.
Сибирь.Реалии нашрга кўра, Новосибирскнинг Марказий тумани полиция бўлинмасида уни, Россия Жиноят кодексида яқинда пайдо бўлган “СССР раҳбариятининг хатти-ҳаракатларини нацистлар Германиясининг хатти-ҳаракатларига тенглаштириш” моддаси билан айбламоқчи бўлишган.
Аммо пировардида “Қуролли кучларни камситиш”га доир маъмурий модда бўйича баённома тузиб, жарима солиб, қўйиб юборишган.
Путин ғалаба парадини ёлғиз нишонлади
Президент Владимир Путин, 9 май куни - Москвадаги Қизил майдонда, Кремл таъбири билан айтганда “Улуғ ватан урушида қозонилган ғалаба”нинг 77 йиллигига бағишланган ҳарбий парадда иштирок этди.
Россия кучлари Украинадаги нишонларга зарба беришда давом этаркан, Путин бу босқинни яна, Донбасни озод қилиш учун ўтказилган “махсус ҳарбий операция” деб оқлашга уринди.
Украина уруши фонида ўтаётган бу йилги парадда бошқа давлат раҳбарлари иштирок этмади. Кремл матбуот котиби Дмитрий Песков, хориж давлат раҳбарлари таклиф қилинмаганини билдирган.
Парадни бошлаб бераркан, президент Путин Россиянинг Украинага интервенцияси зарурат эканини айтиб, Ғарб “бизнинг еримизга, жумладан Қримга бостириб киришга ҳозирлик кўраётган эди”, деб таъкидлади:
“Ҳурматли ўртоқлар, бугун Донбас исёнчилари Россия армияси билан биргаликда ўз тупроғида жанг қилмоқда. Сизлар Ватан учун, унинг келажаги учун курашяпсизлар, токи ҳеч ким Иккинчи жаҳон уруши сабоқларини унутмасин, токи дунёда жаллодлар, жазоловчилар ва фашистларга жой қолмасин. Бугун турли миллатдаги жангчиларимиз оға-инилардек бир-бирини ўқ ва снарядлардан қалқон қилиб биргаликда курашмоқда. Бу Россиянинг, бирлашган кўп миллатли халқимизнинг буюк, енгилмас қудратидир. Бугун сизлар ота-боболарингиз курашган нарсани ҳимоя қиляпсизлар. Ватанимиз фаровонлиги ва хавфсизлиги улар учун азалдан ҳаётнинг олий мазмуни бўлиб келган”.
Путин Россиянинг Украинадаги “махсус ҳарбий амалиёти”дан мақсад Украинани “нацистлар”дан тозалаш ва “геноцид”ни тўхтатиш эканини иддао қилган. Аммо Россия бу борада БМТ ва бошқа халқаро тузилмаларга биронта далил тақдим этмаган.