12 mart kuni Andijon viloyat, Asaka tuman markazidagi Najmiddin Kubro ko‘chasida joylashgan Paynet budkasini buzish talabi bilan Asaka shahar hokimi kelgan paytda do‘koncha egasi biznesini saqlab qolish uchun norozilik tariqasida qip-yalang‘och bo‘lib yechinib¸ yo‘lga yotib oldi.
Voqea guvohlaridan biri bu haqda Ozodlikka xabar qilarkan, do‘konchining O‘zbekistonda hozircha ko‘z ko‘rib, quloq eshitmagan norozilik aksiyasi aks etgan suratni ham jo‘natdi.
Shunday voqea sodir bo‘lgani va suratning haqiqiyligini mahalliy hokimiyat va huquq tizimida ishlovchi bir-biridan mustaqil mulozimlar tasdiqladi.
Asaka shahar hokimi Xursandbek Yo‘ldoshev Ozodlik bilan suhbatda¸ shaharda noqonuniy qurilishlarni buzish jarayoni borayotganini e’tirof etgani holda¸ bunday voqea bo‘lganini inkor etishga urindi.
Mahalliy huquq tizimi mulozimi¸ Najmiddin Kubro ko‘chasidagi bu voqeaning ichki ishlarda ro‘yxatga olinmagani¸ budka egasining bu harakatidan dovdirab qolgan hokimiyat rasmiylari norozilikni bosdi-bosdi qilayotganini bildirdi.
Ozodlik hozircha budka egasining o‘zi bilan bog‘lanishga muvaffaq bo‘lmadi.
Norozilik aksiyasi
12 mart kuni Asaka markazidagi Najmiddin Kubro ko‘chasida sodir bo‘lgan g‘ayrioddiy voqea haqida Ozodlikka xabar bergan mahalliy tadbirkor¸ uni oilasini boqish uchun ertayu kech ishlayotgan kichik tadbirkorning hokimiyat tazyiqiga noroziligi deb atadi:
“O‘sha kuni Asaka shahar hokimi Xursand hoji, yerda yotkan akaning Paynet (Paynet) budkasini oldiraman¸ deb kelgan mahal shu holat bo‘lgan. Bu yigit ruhan sog‘lom¸ hokimga sen budkamni buzdirib meni “yechintirmoqchi” bo‘lsang¸ mana men o‘zim hammaning oldida yechinib qo‘yaqolaman”¸ demoqchi bo‘lganda!”
Ozodlik bilan ismini ochiqlamasdan gaplashgan Asaka hokimiyat tizimidagi mulozim¸ 12 mart kuni Asaka tuman hokimining 1-o‘rinbosari¸ Asaka shahar hokimi Xursandbek Yo‘ldoshevning boshqa bir tadbirkordan tushgan ariza bo‘yicha Najmiddin Kubro ko‘chasidagi Paynet budkasiga borganini bildirdi:
“Bilishimcha¸ shu ko‘chadagi do‘kon egalaridan biri Paynet budkasi mening do‘konimni to‘sib qo‘ydi¸ deb rasman ariza topshirgan. Hokim shu shikoyat bo‘yicha bu budkani oldirish uchun borgan. Qandaydir janjal chiqipti¸ deb eshitdimku¸ lekin shaxsan men bu voqeani ko‘rganim yo‘q”.
Asakalik tadbirkor¸ Paynet budkasining shu ko‘chadagi 21-do‘kon oldida ekani va uni ko‘chirtirish talabi ham shu do‘kon egasidan chiqqanini bildirdi:
“Bu odam mahalliy boylardan. Paynet budkachasi ostanovkaning shundoqqina yonida. Zo‘r joy – oldida Asaka bank¸ Milliy bank, roddom¸ DXX idorasi bor. Shuni oldirib tashlasam¸ boychachcha do‘konchi dolya beradi¸ degan shekilli bular. Rasmga qarang¸ gavjum ko‘chaning chorrahasida¸ pul tushadigan joy. Bular juda yaxshi biladi kimning boshini og‘ritishni”.
Matbuotga ma’lumot berish vakolati yo‘qligi bois¸ shaxsini ochiqlamaslik sharti bilan voqeaning ayrim tafsilotlarini qo‘shimcha qilgan Asaka tuman huquq-tartibot tizimida ishlovchi mulozim¸ 12 mart kungi “g‘ayritabiiy norozilik aksiyasi”ning hech qaerda ro‘yxatga olinmaganini bildirdi:
“Bu yigit bemalol yechinib¸ yerga yotib olgan. Shahar hokimi 200 foiz o‘sha joyda bo‘lgan. Bu hududga qaraydigan uchastkovoy kelib¸ tushuntirish ishlari o‘tkazgan. Yechingan yigitga yaxshi gapirgan. Hokim janjal kattalashishidan qo‘rqib¸ qochib ketgan. Lekin bu holat hokim aralashgani uchun hech qaerda registratsiya bo‘lmagan”.
Ozodlik manbalari¸ janjalni yopish urinishi sifatida hokim Paynet budkasini oldirish talabidan hozircha voz kechganini aytdi.
“Shu ko‘chadagi chinorlar kesildi¸ lekin budka bugun (15 mart) ham joyida turipti¸ ishlayapti. Qo‘rqib ketgan bular. O‘zbekistonda norozilik sifatida yechinib yotvolishning birinchisi bo‘ldi bu. Bu sensatsiya prezidentga yetib borsa¸ anchasining kallasi ketishi mumkinda!” dedi Ozodlik gaplashgan mahalliy mulozim.
Hokim raddiyasi
Ozodlik 12 mart kungi voqea tafsilotlarini o‘rganish maqsadida 15 mart kuni Asaka shahar hokimi Xursandbek Yo‘ldoshevning o‘zi bilan bog‘landi.
Asaka shahri bo‘ylab noqonuniy qurilgan ¸ kadastr hujjati bo‘lmagan ob’ektlarning buzilayotganini bildirgan hokim¸ Najmiddin Kubro ko‘chasidagi Paynet budkasini oldirish talabini ana shu jarayonning bir qismi sifatida tushuntirdi.
Ayni paytda¸ 12 mart kuni bu do‘kon egasi bo‘lgan tadbirkorning mazkur talabga norozilik tariqasida qip-yalang‘och bo‘lib yechinganini mutlaq inkor qildi.
“Bunday voqea umuman bo‘lmagan”¸ degan gapni bir necha marta takrorlagan Yo‘ldoshev¸ Ozodlikning “Bo‘lmaganmi¸ yoki bundan sizning xabaringiz yo‘qmi?” degan savoliga:
- Men shahar hokimi sifatida bunaqa voqea bo‘lsa¸ undan xabar topgan bo‘lardim. Umuman bo‘lmagan¸ deb javob berdi.
Hozirgi texnologiya taraqqiy qilgan zamonda bunday voqeani bekitib bo‘lmasligini ta’kidlay boshlagan hokim¸ Ozodlikning qip-yalang‘och yerga yotib olgan yigit suratlarini qanday izohlash haqidagi savoliga javob bermasdan¸ telefonini o‘chirib qo‘ydi.
Raddiya mavsumi davom etadi...
Asakada ro‘y bergan voqea guvohi va uning tafsilotlaridan xabardor mulozimlar¸ Yo‘ldoshevning bunday raddiyasidan ajablanmasliklarini bildirdilar.
“Bizdagi muhitni yaxshi bilasizlarku! Rahbarlar ketini yopishni o‘ylaydi videos’yomkasi bo‘lsa ham¸ urmadim¸ so‘kmadim¸ deb tonib turib olishayaptiku! Hokimlar prezidentning himoyasida¸ bularga prokuratura¸ DXX ham tegishga qo‘rqadi hozir”¸ dedi mahalliy huquq tizimida ishlovchi mulozim.
Asakalik tadbirkor esa¸ norozilik tariqasida yechinib yotib olgan do‘konchi ham bu voqea ovoza bo‘lishidan manfaatdor emas, degan fikrni aytarkan, dedi:
“Bu bolaning ham ro‘zg‘ori bor. Bitta yechinish bilan o‘zining do‘konini himoya qildi. Paynet budkasi bugun ham ishlayapti¸ o‘zim oldidan o‘tdim. Rahbarlar lavozimini saqlashga harakat qiladi, tadbirkor ham o‘zini himoya qiladi – oila¸ bola-chaqasi bor! Paynet do‘koni kerakku! Shunga bu xabar chiqishi bilan¸ ikkala tomon ham¸ “bunaqasi bo‘lmadi”¸ deb dod-voy solsa keragov!”
