Юрий Жуковскийнинг дўсти
Юрий Жуковский Швецияга Москадан "Умид" исмли дўстининг моддий ёрдамида келганини айтди.
Юрий Жуковский сўзларига кўра, "Умид" исмли дўсти ундан Европага сафари харажатларини қоплаши эвазига "бир одамни" топиб беришни таклиф қилади.
"Дўстим бу одам ўзбеклар ва кўплаб виждонли одамлардан катта миқдорда қарзи бор ва улар уни топишни истайдилар, деди," илова қилади Юрий Жуковский.
Юрий Жуковский дўстининг Европадаги синглиси "ўша одам"нинг уй адресини топганини айтади.
"Умид" ундан "ўша одам" яшаётган жойга бориб, уни суратга олишни ва унга келтириб беришни сўрайди.
Дўст "совғаси"
Юрий Жуковский Стромшундга бориб, "Умид"нинг синглиси ижарага олган уйга жойлашганини айтади.
У "Умид" излаётган шахсни видеога олганини маълум қилди.
"Умид" ушбу видеони Москвага келтиришни сўрайди.
Юрий Жуковский Остершунддаги интернет кафе орқали "Умид"га видеони йўллаганини айтди.
Унга кўра, "Умид" ундан видеокамерани Москвага келтиришни сўрайди.
Юрий Жуковскийнинг айтишича, Москвада уни Умид кутиб олади ва синглисига иккита қўғирчоқ совға сотиб олади.
Рюкзак ва Нодирага аталган "совға"
Юрий Жуковский сўзларига кўра, унга "Умид" қўнғироқ қилиб, "презент"ни синглиси Нодирага қайтариши лозимлигини айтган.
Жуковский ким ва нимага Western Union-дан жўнатганини эслолмади.
"Менинг пул картим бор ва менга бунинг нима кераги бор эди?" деди у.
Жуковский поездга билет олиб, Остершундга борган.
У ерда рюкзак харид қилган, интернет кафега кирган, "Умид"нинг топшириғига кўра, рюкзакни ўша ерда қолдирган.
"Умид рюкзакни ичига "презент"ни жойлаштириши кераклигини айтди", деди Юрий Жуковский суддаги нутқида.
Озодлик изоҳи: "Умид", Юрий Жуковский сўзларига кўра, Нодира Аминованинг акасидир. Ўзбекистонлик жуфтлик - Нодира Аминова ва Баҳодир Пўлатов - Обид қори Назаровни отган шахсга қотилликни уюштиришда ёрдам бериш айблови билан 2012 йилнинг 15 май куни Швеция жанубидаги Скене шаҳрида қўлга олинган эди. Аммо швед суди эр-хотинга қўйилган айблар етарлича тасдиғини топмади, деган асосда уларни суд залидан озод қилганди.
"Дўстликнинг бузилиши"
Қиз болага машина ва тўппонча совға қилишнинг ғалатилигини эътироф этаркан, Юрий Жуковский рюкзакни қолдирганидан кейин енгил тортгани, энди кетмоқчи бўлганини айтди.
Бироқ, Жуковскийнинг айтишича, унинг Москвадаги "дўсти Умид" яна икки кун қолишни сўрайди.
"Нималар қилганимни эслай олмайман, лекин меҳмонхонани топшириб, машинада тунашга қарор қилдим", деди у.
Жуковский сўзларига кўра, кейинчалик телефонда гаплашганида "Умид" унга энди кетавериши мумкинлигини айтган.
У "Умид" билан айтишиб қолгани, Тошкентга қайтишни истагани, аммо "Умид" ундан Москвага келишни талаб қилганини билдирди.