"Мен одамови эмасман!"
Ижарага олинган машинани Нодира топшириши керак бўлгани учун Юрий у билан учрашиш учун Стокгольмга келганини айтади.
Нодира унга Стокгольм марказидан ижарага бир хона олиб беради.
"Мен терговчи айтганидек одамови эмасман, ҳамиша одамлар билан гаплашганман", деди 37 ёшли Юрий Жуковский.
Лекин у ким билан гаплашгани, кимга қўнғироқ қилгани эслолмаслигини айтди.
У, шунингдек, эски телефонини ташлаб, янги телефон, хотинига совғалар харид қилганини эслади.
Бошқа бир гапида у эски телефонини ташлаб юборишни "Умид" буюрганини айтади.
Суднинг биринчи кунида чиқиш қилган прокурор Кристер Петерссен Юрий Жуковский Швецияда экан қўл телефонини, ҳаммаси бўлиб, тўрт марта алмаштирганини айтганди.
Нодиранинг "қайғуси"
Кейин, Жуковский Мальмо шаҳрига йўл олганини ва Нодира Аминованинг уйида қолганини айтди.
"Улар нимадандир қаттиқ ташвишда, қайғуда эдилар", деди Жуковский.
Кейинчалик у газеталардан Обид қори жонига қасд бўлганидан хабардор бўлганини айтди.
"Умид" Жуковскийга улар қидирган одамга суиқасд қилишганини билдирган ва Москвага келишини сўраган.
Жуковский, транзит йўли арзон бўлгани учун, Таллин орқали йўлга чиққанини илова қилди.
Алданган "Умид"
Жуковский ўзининг суддаги нутқида "Умид" уларни алдашганини, кечирим сўраганини айтди.
Жуковскийнинг билдиришича, "Умид" газеталарда босилган хабарларда суиқасд ҳақида ва бунда уни айблашаётгани ҳақида ўқиб қаттиқ ҳайратланган.
"Ҳамма мени, менинг шахсий маълумотларимни рўкач қилиб, кўрсата бошлади", деди Юрий Жуковский ўз сўзининг охирида.
Шундан сўнг ҳакам суд чоршанба куни эрталаб соат тўққиздан давом этишини билдирди.
Умид ҳақида маълумот бериш оилам учун хавфли
Озодлик мухбирининг хабар беришича, суд соат 9:05 да бошланди.
Прокурор: Танирмидингиз Назаровни?
Жуковский: йук билмасдим
Прокурор: Сиз унинг имомлигини билармидингиз?
Жуковский: Имом нима дегани? У ҳам бошқалар сингари одам бўлса керакда.
Прокурор: Сиз Умид билан қандай таниш эдингиз?
Жуковский: Яхши муносабатимиз бор эди. Оилавий борди-келдимиз бор эди.
....
Прокурор: Тигра Каплан ва Аминова ҳақида ахборот бера оласизми?
Жуковский: Ҳозир бера оламан. Судгача мен унинг оиласи учун ташвишда эдим. Умид Аминов ва Каплан бир одам. Бу ҳақида мен кейин айтаман. Бу ахборотларни беришим оилам учун хавфли.