Россия 2025 йил 9 июль куни тун ва эрталаб давомида Украинага қарши рекорд даражада ҳаво ҳужумларини амалга оширди. Бу ҳужумлар Украина президенти Владимир Зеленскийни Россияга қарши янада қатъий чоралар кўришга чақиришга сабаб бўлди.
Зеленский Россия нефтига “оғриқли” санкциялар жорий этиш орқали Кремлни музокараларга мажбурлашга чақирди.
«Бу бир кунда қайд этилган энг кўп ҳаво ҳужумлари бўлди», — деди Зеленский “X” (собиқ Twitter) саҳифасида. Унга кўра, ҳужумда 728 та дрон ва 13 та гипертовушли “Кинжал” ҳамда баллистик “Искандер-К” ракеталари иштирок этган.
Президент Зеленский маълум қилишича, Украинага тун давомида учирилган 300 дан зиёд дрон Эронда ишлаб чиқарилган “Шаҳид” турига мансуб бўлган.
Украина ҳарбийлари билдиришича, ҳужумлар асосан мамлакатнинг ғарбидаги Лутск шаҳрига қаратилган. Шаҳар мэри Игор Поліщукнинг сўзларига кўра, бу Лутск тарихида кузатилган энг йирик ҳужум бўлган.
Зарар Киев, Харьков ва Днепропетровск вилоятлари ҳамда яна 10 та ҳудудда ҳам қайд этилган.
«Бу ҳужум — рамзий ҳужум. У айнан шу вақтда, тинчликка эришиш учун кўплаб саъй-ҳаракатлар олиб борилаётган паллада амалга оширилди», — деди Зеленский. У Россия нефтини харид қилиш орқали урушни молиялаштираётганларга қарши “оғриқли иккинчи даражали санкциялар” жорий этиш зарурлигини таъкидлади.
8 июль куни кечқурун илк рус дронлари Украина ҳаво ҳудудига кирган пайтда, АҚШ президенти Доналд Трамп Оқ уйда қилган баёнотида Россия президенти Владимир Путинга нисбатан кучайиб бораётган норозилигини билдирди.
Трамп сўзларига кўра, АҚШ Москвага қарши янги санкциялар жорий этишни кўриб чиқмоқда ҳамда Украинага янада кўпроқ мудофаа қуролларини етказиб беради. «Чунки Путин инсонларга инсоний муносабатда бўлмаяпти», — деди у.
Трамп сўзлаганидан бир неча соат ўтиб, Россия ҳужумлари натижасида Украина бўйлаб тўрт киши ҳалок бўлди ва ўнлаб одамлар яраланди.
Қочқинликдаги “Новая газета Европа” нашри бош муҳаррири Кирилл Мартынов RFE/RL’нинг “Current Time” дастурига берган интервьюсида Кремл ҳали ҳам Трамп билан “ўйин ўйнаш” орқали ҳарбий ва сиёсий мақсадларига эришишга умид қилмоқда, деди.
Бироқ, Мартыновнинг таъкидлашича, Трампнинг сўнгги танқиди Кремлнинг бу мақсадларини амалга ошириш имконини камайтиради.
Харьков вилоятидаги Купянск шаҳрида 68 ёшли эркак ҳалок бўлди, икки кекса аёл яраланди. Донецк вилоятида эса яна уч киши ҳалок бўлди.
«Россия қўшинлари 16 та аҳоли пунктига ўт очди. Жами 59 та фуқаролик иншоотларига зарар етди, шулардан 43 таси турар жой бинолари,» — дейилади Донецк вилояти полицияси ҳисоботида.
Херсон шаҳрида, Россия қўшинларидан 10 километрча масофада содир бўлган ҳужумда 73 ёшли эркак юзи, қорни, оёқ ва қўлларидан парча жароҳатлари олгани маҳаллий расмийлар томонидан маълум қилинди.
Россия ушбу ҳужумни айнан АҚШ бизни қуроллар билан таъминлашини оммавий эълон қилган пайтда амалга оширгани жуда кўп нарсани ифодалайди», — деб ёзган Украина президенти бош штаби раҳбари Андрей Ермак ўзининг Telegram саҳифасида.
Москва ҳужум асосан Украина ҳарбий аэродромларига қаратилганини маълум қилди. Россия расмийлари Қурск вилоятида Украина томонидан амалга оширилган дрон ҳужуми натижасида уч киши ҳалок бўлган ва олти киши яраланганини билдиришди.
Москва шаҳар раҳбари Сергей Собянин яна бир дрон Россия пойтахтига яқинлашар экан, у ёқ қилинишини ва бу туфайли шаҳарнинг асосий аэропорти Шереметьевода учишлар вақтинча тўхтатилганини маълум қилди.
