Линклар

Шошилинч хабар
28 сентябр 2021, Тошкент вақти: 00:14

Халқаро хабарлар

Украинада яшаётган ингушетиялик фаол БМТ комиссари ҳимоясига олинди

Илёс Белхароев

Украинада яшаб келаётган асли ингушетиялик фаол Илёс Белхароевни БМТнинг Қочқинлар ишлари бўйича олий комиссари бошқармаси ваколатхонаси ўз ҳимоясига олди. Россия Белхароевни қайтаришни талаб қилиб келмоқда. Ватанида у Ингушетия Экстремизмга қарши кураш маркази бошлиғини ўлимига алоқадорликда айбланган.

Белхароев миграция хизматидан ҳимоя сўраб мурожаат қилгани тўғрисида маълумотнома олган, унинг экстрадиция иши тўхтатилган. БМТ олий комиссари маҳкамаси Белхароевнинг сиёсий сабабларга кўра таъқиб қилинаётганини тан олди, дея хабар қилган “Кавказ.Реалии”.

Уч ой ичида Украина миграция хизмати унга қочқин мақомини бериш ёки қочқин мақомини беришни рад этиш тўғрисида қарор қабул қилиши керак.

Белхароев май ойида Интерпол сўровига асосан қўлга олинган. Терговчилар тахминича, у 2019 йилда шериклари билан бирга “Батал ҳожи издошлари” диний гуруҳининг жанговар қаноти етакчисига тўппонча ва ўқлар бергани, Ингушетия ИИВнинг Экстремизмга қарши кураш маркази бошлиғи Иброҳим Элжаркиев ва унинг укаси шу қуролдан отиб ўлдирилгани айтилмоқда.

Белхароевга қарши айблов унга нотаниш одамнинг кўрсатмасига асосланган бўлиб, ушбу гувоҳ қурол етказиб берилгани ҳақида бошқалардан эшитганини иддао қилган, дейди адвокат.

Элжаркиев иши бўйича 11 киши (айримлари — сиртдан) қўлга олинган. Январь ойида гумонланувчилардан бири ўз адвокатига ҳибсда уни қийноққа солишганини билдирган.

Илёс Белхароев “Кавказ.Реалии” билан суҳбатда ватанида ўз қариндошлари бўлмиш ингуш мухолифатчилари мунтазам таъқиб қилинаётганини айтган. Фаолнинг айтишича, 2013 йилда федерал ҳукуматнинг республика раҳбари лавозимига сайловни бекор қилиш ташаббусига қарши чиқишгани, Ингушетия ва Чеченистон ўртасида чегара белгиланганидан сўнг норозилик чиқишлари ташкил қилишгани учун ҳукумат улардан шу тариқа ўч олмоқда.

Кун янгиликлари

NRC: Афғонистон иқтисодиёти ҳалокат арафасида турибди

Кобул яқинидаги ғишт заводи.

Норвегиядаги қочқинлар кенгаши - NRC Афғонистон иқтисодиёти ҳалокат арафасида тургани ва мамлакат гуманитар инқирозга юз тутганини эслатди.

Ташкилот Бош котиби Ян Эгеланн 27 сентябрь куни Кобулга қилган сафари давомида Афғонистонда нақд пул етишмовчилиги оқибатида банк тизими ҳам ишдан чиқиши мумкинлигини таъкидлади.

“Биз ҳаво ҳарорати 20 даражагача тушадиган қиш мавсумигача инсонлар ҳаётини сақлаб қолиш учун вақт билан курашаяпмиз. Қочишга мажбур бўлган юз минглаб кишиларга тез орада бошпана, иссиқ кийим-бош ва озиқ-овқат керак”,-деди Ян Эгеланн.

Қочқинлар кенгашининг билдиришича, январь ойидан бери Афғонистондан 664 минг одам чиқиб кетган. Бу билан афғон қочқинлари сони 3,5 миллион кишига етди.

Толибон ҳукуматни босиб олгани ортидан халқаро ҳамжамият Афғонистонга бериладиган ёрдамни вақтинча тўхтатган ва Толибон ҳукуматини тан олмаслигини билдирган.

Қочқинлар кенгашининг билдиришича, бугунги кунда Афғонистонда ҳар уч одамнинг бири очликда яшамоқда.

БМТнинг Озиқ-овқат дастури сўнгги бир ҳафтада Афғонистондаги оилаларнинг 93 фоизи тўйиб овқатланмаганини маълум қилди.

Қозоқ элчиси Кобулда Толибон вазири билан учрашди

Қозоғистоннинг Афғонистондаги элчиси Алимхан Эсенгелдиев ва Толибон ҳукуматида ташқи ишлар вазири лавозимини бажарувчи Амир Хон Муттақий.

Қозоғистоннинг Афғонистондаги элчиси Алимхан Эсенгелдиев 26 сентябрь куни Кобулда Толибон ҳукуматида ташқи ишлар вазири лавозимини бажарувчи Амир Хон Муттақий билан учрашди. Қозоғистон матбуотининг билдиришича, бу олий даражадаги қозоқ расмийсининг Толибон ҳукумати вакили билан илк учрашувидир.

Қозоғистон Ташқи ишлар вазирлиги ўз билдирувида Толибон номини тилга олмади. Расмий баёнотда Муттақий “Афғонистондаги муваққат ҳукуматнинг ташқи ишлар вазири вазифасини бажарувчи” сифатида тақдим этилган.

Билдирилишича, томонлар Афғонистон халқига озиқ-овқат ва бошқа гуманитар ёрдамларни кўрсатиш масаласини муҳокама қилган.

Марказий Осиё давлатлари орасида Ўзбекистон, Қирғизистон ва Қозоғистон Толибон билан мулоқот ўрнатиш зарур деган нуқтаи назарда эканини билдирган. Тожикистон ҳукумати эса Толибон ҳукуматини тан олмаслигини шаъма қилиб келмоқда.

Туркияда Олтой халқаро симпозиуми бўлиб ўтмоқда

Симпозиум 30 сентябргача давом этади.

Туркиянинг Бурса шаҳридаги “Панорама 1326” музейида 27 сентябрь куни Олтой халқларининг IX халқаро симпозиуми бошланди.

Жорий йилда симпозиум “Эпослар ва эпика маданияти” мавзусида бўлиб ўтмоқда. Симпозиумнинг биринчи кунида Қирғизистондан борган манасчилар “Манас” эпосидан парчаларни ижро этишди.

Симпозиумда Қирғизистон, Қозоғистон, Туркия, Япония, Монголия, Ҳиндистон, Озарбайжон, Венгрия ва Испаниядан келган 80 дан ортиқ олим иштирок этмоқда. Симпозиум 30 сентябргача давом этади.

Олтойшунослик бўйича бу каби илмий анжуманлар бунга қадар Бишкек, Стамбул, Сеул, Анталия, Улан-Батор ва Иссиқкўлда ўтказилган.

COVID-19 умр кўришнинг ўртача ёши қисқаришига сабаб бўлди

22 та мамлакатда умр кўришнинг ўртача даражаси 2019 йилдагига нисбатан 6 ойга қисқарган.

COVID-19 пандемияси Иккинчи жаҳон урушидан бери биринчи марта инсон ўртача умр кўриш ёшининг камайишига сабаб бўлди. Бу борадаги тадқиқот 27 сентябрь куни Халқаро эпидемиология журналида эълон қилинди.

Европа давлатлари, АҚШ ва Чилидан иборат 29 мамлакатда ўтказилган тадқиқот мазкур минтақаларда инсон умрини узайтириш йўналишидаги чора-тадбирларни бир неча йил ортга сурганини кўрсатди.

Масалан, 22 та мамлакатда умр кўришнинг ўртача даражаси 2019 йилдагига нисбатан 6 ойга қисқарган. Аёлларга қараганда эркаклар ўртасида ўлим ҳолатлари кўпайган.

Эркакларнинг ўртача умр кўриш ёши 11 давлатда, аёлларники эса 8 давлатда бир йилга қисқарган.

Эркаклар ўртасидаги энг ночор кўрсаткич АҚШда қайд этилди. Бу давлатда эркакларнинг ўртача умр кўриш ёши 2019 йилга нисбатан 2 йилу 2 ойга, Литвада 1 йилу 7 ойга қисқарди.

АҚШда 60 ёшгача бўлган эркаклар ўртасида ўлим кўпайган бўлса, Европада 60 ёшдан ошганлар орасида ўлимлар сони кўпайган.

АҚШдаги Жонс Хопкинс университетининг билдиришича, шу кунгача коронавирусдан жаҳонда 4,7 миллион киши вафот этди.

ФХХ Уфада теракт тайёрлаётган неонацистлар қўлга олинганини билдирди

Россия Федерал хавфсизлик хизмати – ФХХнинг билдиришича, Уфада 5 кишидан иборат неонацистлар гуруҳи қўлга олинганини билдирди. ФХХ уларни терактни амалга оширишга тайёргарлик кўрганликда гумонламоқда.

Расман билдирилишича, 2001-2003 йилда туғилганлардан иборат бўлган мазкур гуруҳ қўлбола портловчи мосламалар билан ҳужум уюштиришни режалаштирган.

Улардан қўлбола портловчи мослама, 9 та совуқ қурол, портловчи моддалар, портловчи мослама тайёрлаш тўғрисидаги инструкция, Учинчи Рейх раҳбарларининг портретлари, миллатчи Степан Бандеранинг сурати ва миллатчиларнинг рамзлари мусодара қилинган.

Тергов қўмитаси террорчилик ҳаракатини амалга оширишга тайёргарлик моддаси асосида жиноят иши қўзғатди. Ҳозирча қўлга олинганларнинг адвокатлари бу воқеага муносабат билдирмади.

Мали Россия хусусий ҳарбий ширкати билан ҳамкорлик қилмоқчи, Франция ва ЕИ бунга қарши

Мали ҳарбийлари, Бамако, 2020 йил августи

Мали ҳукумати террорчиларга қарши курашда ҳамкорлик қилишни сўраб Россиянинг хусусий ҳарбий ширкатига (ХҲШ) мурожаат қилган. Бу ҳақда Россия ташқи ишлар вазири Сергей Лавров Нью-Йоркда БМТ Бош ассамблеясида маълум қилди.

Мали бош вазири Шогел Кокалла Майга БМТ анжуманидаги чиқишида Франция Африканинг бу давлатидаги ҳарбий контингенти сонини қисқартириши ва “Бархан” амалиёти тугаганини эълон қилиши ортидан юзага келган бўшлиқ туфайли ХҲШ билан ҳамкорлик олиб борилаётганини таъкидлаган.

Аввалроқ қатор ОАВларда Мали ҳукумати армияга таълим бериш ва юқори мартабали шахсларни қўриқлаш учун “Вагнер ХҲШ” билан битим имзолашга ҳозирлик кўраётгани хабар қилинган. Ўшанда Бамако (Мали пойтахти – таҳр.) расмийлари Россия томони билан музокара қилинаётганини, аммо ҳеч бир келишувга эришилмаганини билдирган. Москва эса Мали ҳукумати билан ХҲШ ўртасидаги алоқаларнинг ўзига дахли йўқлигини айтган.

Шундан сўнг Франция ва Германия ҳукуматлари Малидан ўз ҳарбийларини олиб чиқиб кетиш билан таҳдид қилган. Ушбу позицияни Европанинг 13 мамлакати мудофаа вазирлари қўллаб-қувватлаган. Европа Иттифоқи эса, Россия ХҲШ билан битим имзолаган тақдирда, Мали билан муносабатларини узишини маълум қилган.

Франция ўзининг Малидаги ҳарбийлари сонини беш минг нафардан бир неча юз кишига камайтиришга қарор қилган, аммо қўшинни олиб чиқиб кетишни бошлаганича йўқ. AFP хабарига кўра, Париж “Вагнер ХҲШ” билан битим Франциянинг Малидаги аксилтеррор амалиётини барбод қилиши мумкинлигидан хавфсирамоқда.

“Вагнер хусусий ҳарбий ширкати” – Россиянинг норасмий ҳарбий бўлинмаси бўлиб, ҳарбий идоралар балансида ва юридик шахслар реестрида турмайди, бироқ унинг жангчилари, суриштирувларга кўра, Сурия ва Ливиядаги амалиётларда, шунингдек Украина шарқидаги урушда иштирок этган. ХҲШ Африкадаги бир неча мамлакатда, хусусан Марказий Африка Республикасида фаолият олиб боради.

“Вагнер ХҲШ” Россия президентига яқин тадбиркор Евгений Пригожинга алоқадор экани айтилади. Москва ушбу ХҲШ билан алоқаси борлигини инкор этиб келади. Россия қонунчилиги мамлакат фуқароларига ёлланма аскар сифатида чет элдаги қуролли тўқнашувларда иштирок этишни тақиқлайди.

Германия: Парламент сайловида социал-демократлар ХДИ/ХСИ блокидан олдинроқда бормоқда

Германиядаги парламент сайловида мамлакатнинг икки етакчи партияси – христиан-демократлар ва Бавария Христиан-социалистлар иттифоқи блоки (ХДИ/ХСИ) ҳамда социал-демократлар қарийб тенг натижа қайд этиб турибди: иккаласи ҳам тахминан 25 фоиздан овоз олган.

Дастлабки ҳисоб-китобларга кўра, Олаф Шольц раҳбарлигидаги социал-демократлар амалдаги канцлер Ангела Меркель партиясини (Меркель раҳбарликдан кетганидан сўнг унга Армин Лашет бошчилик қилмоқда) бир оз фарқ билан ортда қолдирмоқда: 25.9 фоизга қарши 24.1 фоиз.

Христиан-демократлар учун мазкур кўрсаткич бутун урушдан кейинги даврдаги энг паст кўрсаткичдир.

Учинчи ўринда 14.3 фоиз овоз билан “Иттифоқ-90/Яшиллар” партияси боряпти. Эркин демократик партия (ЭДП) 11.5 фоиз овозга эга бўлиб турибди, ўнг популистларнинг “Германия учун альтернатив” партияси ҳисобида эса 10.6 фоиз овоз бор. Дастлабки маълумотларга кўра, сайловчиларнинг 5 фоизи овоз берган Сўллар партияси ҳам парламентга ўтиши мумкин.

Германия ҳукумати кўпинча коалиция асосида шакллантирилади. Сўнгги 16 йил давомида ҳукуматга Христиан-демократик иттифоқ номзоди Ангела Меркель раҳбарлик қилган бўлса, сўнгги саккиз йилда ХДИ/ХСИнинг коалициядаги кичик ҳамкори социал-демократлар бўлган.

Ангела Меркелнинг ХДИдаги вориси Армин Лашет икки бошқа партия билан коалиция тузишга тайёрлигини билдирган. Умуман олганда, коалиция тузиш учун вариантлар кўп, ҳатто социал-демократлар устунлиги ортиб бораверган тақдирда, ХДИ/ХСИ ҳукуматга кира олмаслиги ҳам эҳтимолдан холи эмас. Коалиция тузиш бўйича музокаралар узоққа чўзилиши мумкин ва то бу коалицияга асос солингунича Ангела Меркель канцлер лавозимидан кетмайди.

Немис матбуоти хабарига кўра, COVID-19 пандемияси туфайли ушбу сайловда рекорд миқдордаги сайловчилар почта орқали овоз берган. Уларнинг улуши 40 фоизгача бўлиши мумкин.

Ереванда Қорабоғ уруши қурбонлари хотирасига намойиш ўтказилди

Ереванда 26 сентябрь куни “Айастан” мухолифат блоки 2020 йилда Тоғли Қорабоғдаги қуролли можаро қурбонлари хотирасига машъала ва шамлар кўтариб намойишга чиқди. Ушбу можарода, расмий қайдларга кўра, икки томондан 6,5 минг киши ҳалок бўлган, шундан 3777 нафари – Арманистон тарафидан.

Намойиш иштирокчилари шаҳар жануби-ғарбидаги Гарегин Ндже майдонидан Ереван чеккасидаги Қорабоғ уруши қурбонлари дафн этилган “Ераблур” қабристонига қараб юрди, дея хабар қилди Озодликнинг арман хизмати. Намойишга “Айастан” етакчиси, Арманистоннинг иккинчи президенти Роберт Кочарян бошчилик қилган.

Арманларнинг жаҳон ҳамжамияти Озарбайжоннинг бир қисми деб тан оладиган Тоғли Қорабоғ республикаси ҳудудида қуролли можаро 2020 йилнинг 27 сентябрь куни Озарбайжон қўшинлари ҳужуми билан бошланган. 10 ноябрь куни бу уруш Боку ва Ереван ўртасида ўт очишни тўхтатишга оид битим имзоланиши билан тугаган. Ҳужжатга мувофиқ, Озарбайжон ўзининг Тоғли Қорабоғ мухтор вилояти таркибига кирмайдиган барча ҳудудлари устидан назорат ўрнатган.

Уруш якуни Арманистонда сиёсий инқирозни келтириб чиқарган ва бу жараён муддатидан олдин парламент сайлови ўтказилиши билан тугаган. Сайловда амалдаги бош вазир Николь Пашинян партияси ишончли ғалаба қозонган, яққол устунлик унга ҳукуматни мустақил шакллантириш имконини берган.

27 сентябрь куни эрталаб соат 11 да Арманистонда ҳамда тан олинмаган Қорабоғда 44 кунлик уруш қурбонлари хотирасига бир дақиқа сукут сақланади. Озарбайжонда ҳам 12 дақиқа сукут сақланиши эълон қилинган, шунингдек Боку шаҳри марказий кўчаларида намойишлар ўтказилади.

Дуров Telegram “Ақлли овоз бериш” дастурини фойдаланувчилар манфаати учун блоклаганини иддао қилди

Telegram ўзи блокланиш хавфи остида қолгани туфайли Россия Давлат думасига сайлов чоғида “Ақлли овоз бериш” дастури ботига блок солишга мажбур бўлган. Бу ҳақда мессенжер асосчиси Павел Дуров маълум қилди.

Дуровга кўра, Telegram якка ҳолда ишлай олмайди, у сайлов арафасида Навальний иловасини блоклаб қўйган Apple ва Google каби ширкатлар билан боғланган бўлиб, улар белгилаб берган қоидаларга амал қилишга мажбур. Акс ҳолда, мессенжер iOS ва Android телефонларида ишламай қолиши мумкин.

“Telegram турли мамлакатларда ҳукуматга биринчи бўлиб қаршилик кўрсатиб келади ва зарур бўлганда улар билан жангга киришади”, дея урғулаган Дуров. Аммо, унинг айтишича, сайлов кунлари жанг қилиш учун ноқулай пайт бўлган.

Дуров ўз хабарида Россия қонунчилиги сайлов кунлари ташвиқот олиб боришни тақиқлашини ҳам эслатган. Telegram асосчисига кўра, бу “ғирт аксилконституцион” талаб ҳисобланмайди.

“Сайлов бошланиб бўлганидан сўнг ҳам сиёсий партия яна икки кун ташвиқот олиб бориш имконига эга бўлсин деган мақсадда Telegram’нинг барча россияликлар учун блокланишига йўл қўйиб бериш – бу аниқ ютиш стратегияси бўлмай туриб фарзинни пиёдага қурбон бериш билан тенг. Telegram’нинг юз миллионлаб фойдаланувчилари манфаатлари мен учун исталган сиёсий куч манфаатларидан ҳамиша қиёслаб бўлмас қадар юқори туради”, деб ёзган Дуров.

18 сентябрга ўтар кечаси Павел Дуров Россияда сайлов якунлангунга қадар Telegram сайловолди ташвиқотига алоқадор ботлар ишини чеклашини маълум қилган эди. Ўшанда, жумладан, “Ақлли овоз бериш” боти ҳам блокланган.

Сайлов олдидан Apple ва Google ўз онлайн дўконларидан “Ақлли овоз бериш” тавсияларини эълон қилувчи “Навальний” иловасини ўчирган. Apple ширкати буни Россия қонунчилигининг экстремистик деб топилган ташкилот контентини тарқатиш тақиқланганига оид талабини бажаргани билан изоҳлаган.

Google эса Россия ҳукумати ушбу ширкатнинг Россиядаги ходимларига жиноят иши очиш билан таҳдид қилгани ортидан иловани блоклагани ҳақида маълум қилинган.

Сайловдан сўнг Навальний Google, Apple, Youtobe ва Telegram’ни ҳукумат талаби билан “Ақлли овоз бериш” дастурини тўсиб қўйгани учун қаттиқ танқид қилган ва улардан “кўнгли қолган”ини айтган.

Швейцарияда бир жинсли никоҳларни легаллаштириш бўйича референдум бўлиб ўтди

Швейцарияликлар 26 сентябрь куни бир жинсли никоҳларни легаллаштиришга оид умумхалқ референдумида иштирок этишди. Reuters агентлиги хабарига кўра, сайловчиларнинг 64 фоизи бу каби никоҳларни қонунийлаштиришни дастаклаб овоз берган.

Янги қонун бир жинсли жуфтликларга ўзаро никоҳланиш ва бола асраб олиш ҳуқуқини беради. Ўзаро оила қурган аёлларга сунъий уруғланиш орқали фарзанд кўришга ҳам рухсат этилади. Бунгача Швейцарияда донор спермасидан фақат гетеросексуал оилалар фойдаланиши мумкин эди, холос.

Швейцария дунёда бир жинсли шахслар ўртасида тўлақонли никоҳ қурилишини маъқуллаган 30-давлатга айланди.

Amnesty International инсон ҳуқуқлари ташкилоти бу мамлакатдаги овоз бериш натижаларини “тенг йўлидаги муҳим босқич” деб атаган.

Ўнг қараш тарафдори бўлган Швейцария халқ партияси вакиллари референдум натижаларидан ҳафсалалари пир бўлганини билдирганлар. Уларнинг фикрича, бир жинсли никоҳларнинг легаллашуви болалар иқболига салбий таъсир кўрсатади.

Украиналик Олександр Усик профессионал бокс бўйича жаҳон чепиони бўлди

Олександр Усик, Манчестер, 2018 йилнинг 10 ноябри.

Украиналик боксчи Олександр Усик WBA, IBF, WBO ва IBO версиялари бўйича ўта оғир вазнда жаҳон чемпиони бўлди.

У британиялик Энтони Жошуа билан рингда 12 раунд жанг ўтказди. Умумий натижаларга асосан ҳакамлар ҳайъати уни бир овоздан чемпион деб эълон қилди.

Олександр Усик 34 ёшда. У 8 йилдан бери профессионал бокс билан шуғулланади. У профессионал рингда 19 марта ғалабага эришди, жумладан, 13 жангни нокаут билан якунлади.

31 ёшли Энтони Жошуа эса 24 та жангда ғалаба қозонган ва уларнинг 22 тасини нокаут билан якунлаган. У ўз карьераси давомида бу билан иккинчи марта мағлубиятга учради.

Германия парламентига сайловлар Ангела Меркел иштирокисиз ўтмоқда

Германияда сайлов 26 сентябрь куни ўтмоқда.

Германияда 26 сентябрь куни Бундестагга сайлов бўлиб ўтмоқда. Мазкур сайлов сўнгги 16 йилда илк маротаба Германиянинг амалдаги канцлери Ангела Меркел иштирокисиз ўтказилмоқда.

Меркел 2018 йилда Христиан-демократик иттифоқ раислигидан кетганини ва канцлер сифатидаги тўртинчи муддати якунланганидан сўнг сиёсатдан кетишини эълон қилган эди.

Германияда сайловчилар канцлер учун эмас, Бундестаг раҳбари лавозимига номзод кўрсатган партиялар учун овоз беради.

Бу сайловда канцлер лавозимига Христиан-демократик иттифоқ раиси Армин Ланшет, социал-демократик партия аъзоси, вице-канцлер Олаф Шольц ва Яшиллар партиясидан Анналена Бербок номзоди кўрсатилган.

Кузатувчиларнинг айтишларича, номзодлар рейтингидаги фарқ жуда кам бўлгани учун сайловда ким ғолиб бўлишини олдиндан айтиб бўлмайди.

Россияда Думага сайлов натижаларидан норозилар намойишга чиқди

Москвада 25 сентябрда ўтган намойишда қатнашганларнинг кўпчилиги Коммнуистик партия тарафдорлари экани айтилди.

Москвада 25 сентябрь куни Давлат Думасига ўтказилган сайлов натижаларидан норози бўлган мингдан кўпроқ киши намойиш ўтказди. Намойишга келганларнинг асосий қисми Коммунистик партия тарафдорлари экани айтилди.

Норозилар электрон овоз бериш жараёнида кўплаб овозлар ўғирланганини иддао қилган ҳолда, “Овозларни қайтариб беринг” деган сўзлар ёзилган плакатларни кўтариб туришди. Улар онлайн овоз бериш натижаларини бекор қилишни талаб этишди.

Россия президенти Владимир Путин 25 сентябрда Думага ўтган партиялар раҳбарлари билан учрашди. Путин сайлов ҳалол, адолатли ва қонун талабларига риоя қилинган ҳолда ўтказилганини айтди. Президентга кўра, сайловдан ўтмай қолган партияларгина “электрон овоз бериш натижаларини бекор қилишни талаб этмоқда”.

Аввалроқ Туркия, ЕИ мамлакатлари, АҚШ ва Буюк Британия аннексия қилинган Қрим ҳудудида ўтказилмиш Россия Давлат думасига сайлов якунларини ва овоз бериш жараёнини тан олмаслиги тўғрисида баёнот берган.

Расман билдирилишича, сайловда “Ягона Россия” 49,8 фоиз, Коммунистлар партияси 19 фоиз, ЛДПР 7,5 фоиздан кўпроқ, “Адолатли Россия” 7,5 фоизга яқин овоз олди. Думага 2003 йилдан бери илк маротаба яна бир партия – “Янги одамлар” ҳам кирди.

АҚШда поезд издан чиқиши оқибатида камида уч киши ҳалок бўлди

Поездда 146 йўловчи ва экипажнинг 16 аъзоси бўлган.

АҚШнинг Монтана штатида Сиэтлдан Чикагога кетаётган Amtrak ширкатига қарашли поезд темир йўл изидан чиқиши оқибатида камида уч киши ҳалок бўлди ва бир неча киши жароҳатланди.

Amtrak ширкатининг билдиришича, воқеа 25 сентябрь куни эрталаб юз берган. Поездда 146 йўловчи ва экипажнинг 16 аъзоси бўлган. Жароҳат олганларнинг аниқ сони ҳозирча айтилмаяпти.

Поезд 10 та вагон ва иккита локомотивдан иборат бўлган. 7 та вагон издан чиқиб кетиб, ағдарилган. Айни пайтда поезднинг издан чиқишига нима сабаб бўлгани аниқ эмас.

Толибон одам ўғирлашда гумонланган 7 кишини ўлдириб, жасадларни майдонларга осиб қўйди

Ҳирот марказий майдонига осиб қўйилган жасад.

Толибон жангарилари одам ўғирлашда гумон қилинган шахсларни қўлга олиш жараёнида ўлдириб, уларнинг жасадларини оммага намойиш қилиш учун осиб қўйди.

Ўлдирилганлардан тўрт кишининг жасади Ҳирот шаҳри марказий майдонига осиб қўйилди. Яна уч жасадни Толибон жангарилари бошқа шаҳарларнинг бош майдонларига осиш учун олиб кетди. Бу ҳақда гувоҳларга таянган ҳолда AP агентлиги хабар берди.

Маҳаллий амалдорлардан бирининг айтишича, улар афғонистонлик тадбиркорлардан бирининг ўғлини ўғирлашда гумон қилинган. Ўлдирилганлардан бири Толибон жангариси экани айтилмоқда.

“Биз бошқа ҳеч кимнинг бундай жиноятга қўл уришга ҳадди сиғмасин деган мақсадда уларнинг жасадларини Ҳирот майдонларига осиб қўйдик”,- деди Ҳирот ҳокими ўринбосари Мавлави Шоир Аҳмад Эмар.

Аввалроқ Associated Press агентлигига берган интервюсида Толибон ҳаракаит асосчиларидан бири мулла Нуруддин Туробий Афғонистонда қатл этиш, қўл ва оёқ кесиш жазолари жорий этилишини эълон қилган эди.

Афғонистонда аввалги Толибон ҳукмронлиги даврида қотиллик учун қатл жазоси, ўғирлик учун қўл кесиш, талончилик учун қўл ва оёқни кесиш шаклида жазолар қўлланиб келинган. Кейинчалик Толибон бундай жазоларни омма олдида, жумладан Кобулдаги спорт стадионида ҳам амалга оширди.

Европа Иттифоқи Россияни киберҳужумлар кампаниясида айблади

Хосеп Боррел

Европа Иттифоқи Россияни бир қатор аъзо давлатларга қаратилган киберҳужум кампанияси ортидан "давлат ҳатти-ҳаракатлари масъулияти" меъёрларига риоя қилишга чақирмоқда.

"Айрим Иттифоққа аъзо давлатлар"Ghostwriter"деб номланган зарарли кибер-ҳаракатларни кузатиб боришди ва бу ҳужумларни Россия давлати билан боғлашди", деди Европа Иттифоқининг ташқи сиёсати бўйича раҳбари Хосеп Боррел 24 сентабрда бирлашма номидан қилган баёнотида.

"Бундай ҳаракатлар қабул қилиниши мумкин эмас, чунки улар бизнинг яхлитлигимиз ва хавфсизлигимизга, демократик қадриятлар ва тамойилларимизга, демократик давлатларимиз фаолиятининг асосларига таҳдид солишга қаратилган", - деди у.

Баёнот Германия бош прокурори шу ой бошида немис сиёсатчиларига қаратилган сўнгги киберҳужумлар юзасидан тергов ишларини бошлаганидан сўнг эълон қилинди. Германия Ташқи ишлар вазирлиги киберҳужумлар учун жавобгарликни Москвага юклади.

Россия 26 сентябрда Германияда бўлиб ўтадиган парламент сайловлари арафасида қўйилган айбловларни рад этди.

Борреллнинг сўзларига кўра, "Ghostwriter" киберкампанияси " Европа Иттифоқининг кўп сонли парламент аъзолари, ҳукумат амалдорлари, сиёсатчилар, матбуот ва фуқаролик жамияти" ни нишонга олган, хакерлар эса "компьютер тизимлари ва шахсий ҳисобларига киришга ва маълумотларни ўғирлашга ҳаракат қилган".

Унинг сўзларига кўра, Европа Иттифоқи ва унга аъзо давлатлар бу ҳаракатларни "кескин қоралайдилар" ва Иттифоқ "кейинги қадамлар эҳтимолини кўриб чиқадилар".

У бу қадамлар нимадан иборат эканлигига тўхталиб ўтирмади.

6 -сентябр куни Германия Ташқи ишлар вазирлиги ҳукуматда "ишончли маълумотлар" борлигини билдириб, сиёсатчиларга қаратилган сўнгги киберҳужумлар ортида Россиядаги шахслар, хусусан ГРУ деб номланувчи Россия ҳарбий разведкаси турган бўлиши мумкинлигини тахмин қилди.

Италия суди Каталония бўлгинчиларининг етакчиси Пучдемонни озод қилди

Карлес Пучдемон (ўнгда)

Италия суди Каталония мустақиллиги ҳаракати раҳбари Карлес Пучдемонни қамоқдан озод қилди. Адвокатнинг айтишича, уни Испанияга экстрадиция қилиш октябрдаги йиғилишда муҳокама қилинади.

Пучдемон 24-сентябр, жума куни Испания расмийлари талабига биноан Сардиния оролида ҳибсга олинган эди. Италия суди сиёсатчи ҳибсга олинганида дахлсизлик ҳуқуқига эга бўлганлиги ёки бўлмаганлигини аниқламоқчи.

Карлес Пучдемон маданий фестивалда иштирок этиш учун Европа Парламенти аъзоси сифатида Сардинияга келганди.

Испания Пучдемонни сиёсий иғвогарликда ва давлат мулкини ўзлаштиришда айбланмоқда, шунингдек испан ҳукумати уни Каталония мустақиллиги бўйича референдумнинг асосий ташкилотчиси деб ҳисобламоқда. Бу овоз бериш 2017 йилда бўлиб ўтган эди. Мадрид бу референдумни ноқонуний деб ҳисоблаб, уни мамлакат Конституциявий суди тақиқлади.

Ҳукумат Каталония парламентини тарқатиб юбориши ортидан Пучдемон мамлакатдан қочиб кетган эди. Унинг бир қанча шериклари Испанияда қамоқ жазосига ҳукм қилинди. Шу йилнинг ёзида улар амнистия қилинди, лекин бу қарор Пучдемонга тааллуқли эмаслиги билдирилди.

Сентябр ойининг бошида The New York Times ва бошқа оммавий ахборот воситалари Пучдемон сафдошлари Каталонияни Испаниядан мухторият сифатида ажратишда ёрдам сўраб Россияга мурожаат қилган бўлиши мумкинлиги ҳақида хабар беришди.

Журналистларга кўра, Пучдемон маслаҳатчиси Москвада махсус хизмат ходимлари ва Кремль расмийлари билан учрашган.

Россия ўз ўрнида хорижий давлатлар ишларига аралашмаслигини таъкидлаб келади.

Россия мигрантлар учун ягона миграция ҳужжатини жорий этмоқчи

Uzbekistan/Russia - Central Asian migrants in the department of the Federal Migration Service of the North Eastern District of Moscow city

Россия Федерацияси Ички ишлар вазирлигининг маълумотига биноан, миграция соҳасида ҳозирланаётган янги қонун хорижлик ватандошларнинг мамлакатга кириб келиши, мамлакат ҳудудида бўлиши ва вақтинчалик меҳнат фаолиятини амалга оширишини тартибга солади.

Янги қонун лойиҳасига Россия Федерацияси ИИВнинг Миграция масалалари бўйича бош бошқарма бошлиғи ўринбосари К.Aдзинов изоҳ бериб, миграция соҳасидаги қоидаларни тубдан ўзгартирадиган катта қонун ёзилаётгани, бу чет эл гражданларининг мамлакатга кириши, мамлакат ҳудудида бўлиши, ишлаши билан боғлиқ ҳуқуқий муносабатларга таъсир қилиши ва ҳозирда амалда бўлган қатор ҳужжатларни бекор қилишини айтган.

Хусусан, Россия Федерацияси ҳудудига киришнинг иккита асосий тури - визали ва визасиз тартиб жорий этилиши айтилмоқда.

Хорижликлар учун расмийлаштирилаётган барча ҳужжатлар ўрнини босадиган ягона ҳужжатни жорий этиш ҳам режалаштирилаётгани маълум бўлди. Шунингдек, мажбурий тиббий суғурта доирасида меҳнат мигрантларига тиббий ёрдам кўрсатиш ва тиббий визалар олиш қоидаларига ўзгартиришлар киритилиши кутилмоқда.

Россия ҳукумати миграция тўғрисидаги янги қонун 2024 йилда жорий қилиши режалаштирилганини эълон қилди.

Толибон Афғонистонда қатл этиш, қўл ва оёқ кесиш жазоларини қайтармоқчи

Мулла Нуруддин Туробий

Афғонистонда ҳокимиятни қўлга олган Толибон ҳаракати мамлакатда жиноятчиларга нисбатан шариат қонунлари асосида жазони қўллаш амалиётини қайта тикламоқчи. Гап қўл кесиш ва ўлим жазоси ҳақида кетаётганини Associated Press агентлигига берган интервюсида маълум қилди ҳаракат асосчиларидан бири мулла Нуруддин Туробий.

"Қўлларни кесиш хавфсизликни таъминлаш учун керак", деди Туробий.

Унинг сўзларича, бундай жазо жиноятларни олдини олиш таъсирига эга. Толибон вакили жазолар илгаригидек омма олдида ўтказилиши ёки ўтказилмаслиги масаласи ҳали толиблар раҳбарияти томонидан ҳал этилмаган.

Афғонистонда аввалги Толибон ҳукмронлиги даврида қотиллик учун қатл жазоси, ўғирлик учун қўл кесиш, талончилик учун қўл ва оёқни кесиш шаклида жазолар қўлланиб келинган. Кейинчалик Толибон бундай жазоларни омма олдида, жумладан Кобулдаги спорт стадионида ҳам амалга оширди.

Олдинги Толибон ҳукуматида Нуруддин Туробий Фазилатни тарғиб қилиш ва гуноҳлардан сақлаш вазирлигини бошқарган.

- Ҳамма бизни стадионда жазо ижро этгани учун танқид қилди, лекин биз бошқа мамлакатларда қўлланиладиган қонунлар ва жазолар ҳақида ҳеч қачон ҳеч нарса демаганмиз. Ҳеч ким бизга қонунларимиз қандай бўлиши кераклигини уқтирмаслиги керак. Ислом буюради ва биз Қуръонга мувофиқ уларни яратамиз, деди мулла Нуруддин Туробий.

Қозоғистонликлар Ўзбекистонда АЭС қурилишига қарши чиқди

Қозоғистоннинг Тараз шаҳри аҳолиси Ўзбекистонда Марказий Осиёда биринчи биринчи атом электр станцияси қурилаётганидан хавотир билдирмоқда.

Atameken Business News нашри хабарига кўра, маҳаллийлар бу каби хавфли лойиҳалар қўшни давлатлар билан ҳамкорликда қурилиши кераклигига даъват этмоқда. Нашр шунингдек, маҳаллий аҳоли ўртасида ўтказилган махсус ижтимоий сўровни ҳам эълон қилди. Қозоғистонликлар Ўзбекистонда АЭСнинг қурилишини Чернобил авариясига менгзади.

Бундан ташқари, Қозоғистон экологлари ҳам бу лойиҳадан шикоят қилмоқдалар. Уларнинг фикрича, Ўзбекистон атом электр станцияларидан олинадиган энергия нархинининг арзонлигини ҳисобга олган, лекин атроф-муҳит учун юзага келадиган зарарларни ҳисобга олмаган.

Atameken Business News нашри Тараз шаҳридан бу масалага оид видеорепортаж ҳам ҳозирлади.

ФСБ ўзбекистонликни Украинага жосуслик қилишда айбламоқда

ФСБ ходимлари гўё Украина ҳуқуқ-тартибот идоралари ходимлари билан ҳамкорлик қилган ва Россия Федерацияси билан чегарани кесиб ўтган Ўзбекистон ватандошини қўлга олишди. Бу ҳақда РИА Новости Россия Федерал хавфсизлик хизматига (ФСБ) таяниб хабар бермоқда.

"Россия ФСБнинг Брянск вилояти бўйича Чегара хизмати бўлими Украинадан Россия Федерацияси томон давлат чегарасини ноқонуний кесиб ўтган 1981 йилда туғилган Ўзбекистон фуқаросини наркотик мастлик аломатлари билан ушлади", - дейилади хабарда.

Қайд этилишича, тинтув пайтида ўзбекистонликдан фотосуратга олиш, видео ва аудио ёзиш имконияти бўлган махсус яширин техник воситалари, шунингдек, бироз миқдорда кукунли модда мусодара қилинган. Чегарачилар бу кукунли модда наркотик эканини тахмин қилишмоқда.

“Тинтув давомида, қонунбузар 2019 йилдан бери Украина ҳуқуқ -тартибот идоралари билан махфий асосда ҳамкорлик қилиб келгани маълум бўлди. Навбатдаги вазифани бажараётганда, Россия Федерациясига ноқонуний кирмоқчи бўлган шахс ниқоби остида, у жиноий гуруҳ вакилларидан бири билан алоқага чиқиб, 27 минг гривна (1 минг доллар - таҳр. ) пул мукофоти эвазига бу шахсни чегарадан ноқонуний олиб қўйиш жавобгарлигини олган", - дейилади хабарда.

Лекин, Ўзбекистон фуқаросининг сўзларига кўра, режаланган ишлар чипакка чиққан. Ўзбекистонлик муҳожир, чегарачилар хабарича, ҳамкорлари билан келиша олмаган ва якка ўзи Россия-Украина чегарасини бузишга мажбур бўлган.

Қўлга олинган шахсга нисбатан жиноий иш қўзғатиш масаласи кўрилмоқда.

Ўзбекистон Ташқи ишлар вазирлиги ушбу маълумотга ҳозирча изоҳ берганича йўқ.

Россия президентининг бюджетдан харажатлари бир миллиард рублга кўпайди

Президент Владимир Путин

Россия давлат ҳокимияти органлари таъминотига яқин уч йилда 1.3 триллион рубль сарфланади, шундан 45 миллиард рубль мамлакат президенти ва унинг маъмурияти фаолиятини таъминлашга йўналтирилади.

Бир йил аввал давлат бюджети лойиҳасида президент ва унинг маъмурияти эҳтиёжлари учун кўзда тутилган маблағ бундан бир миллиард рублга, бош вазир ва ҳукумат аппаратининг сарф-харажатлари эса уч миллиардга кам эди.

Жорий қонун лойиҳасига илова қилинган изоҳ хатида сарф-харажатлар ортишига, хусусан, мулозимлар иш ҳақларининг оширилгани, авиапарвозлар таннархи кўтарилгани, давлат мукофотлари тайёрланиши, шунингдек 2024 йилда давлат раҳбарининг инаугурацияси ўтказилиши асос сифатида кўрсатилган.

Қайд этилишича, энг кўп маблағ – қарийб 719 миллиард рубль суд тизими фаолиятига йўналтирилади. Ушбу сумма амалдаги судьяларга тўланадиган қўшимча ҳақ, истеъфодаги судьялар учун нафақалар ҳамда судларда қўриқлаш хизматини кучайтириш сарф-харажатларини ўз ичига олади.

Тожик-қирғиз чегарасида ўқувчи болалар тошбўронга тутилди

Қирғизистоннинг Кўктош қишлоғи одамлари мактабдан қайтаётган тожик болаларини тошбўрон қилди. Бу ҳақда 23 сентябрь куни Озодликнинг тожик хизматига Тожикистоннинг Чоркўҳ қишлоқ жамоатига қарашли Сомониён қишлоғида яшовчилар маълум қилишган.

Айтилишича, ҳодиса ортидан бир бола ва катта ёшли бир киши маҳаллий касалхонага тушган.

Исфара туманининг Чоркўҳ қишлоқ жамоати раиси Шукурхон Насриев можародан Қирғизистон вакилларини хабардор қилишганини билдирган.

“Болалар дарсдан қайтишаётган бўлган. Боткен вилоятининг Сомониёнга қўшни Кўктош қишлоғи одамлари ҳеч бир сабабсиз уларни тошбўрон қилишибди. Ҳозир биз ҳодисани тафтиш қиляпмиз”, деган Насриев.

Сомониёнда истиқомат қилувчи яна бир киши исмини ошкор қилмаслик шарти билан, кўктошликлар унга ҳамқишлоқ эр-хотинни ҳам калтаклаганини айтган.

Исфара маъмурияти қирғизларнинг тошбўрони ва калтаклаши натижасида сомониёнлик бир бола ва 54 яшар эркак жабр кўрганини тасдиқлаган. “Жабрланганлар шаҳар марказий касалхонаси шифокорлари назоратида. Эркакнинг бурни ва тишлари синган, боланинг боши ёрилган”, деган шаҳар маъмурияти ходимларидан бири.

Бу орада Қирғизистоннинг Боткен вилояти Боткен тумани ҳокими Учқун Жўрўбаев Озодликнинг қирғиз хизматига Тожикистон билан чегара яқинида икки мамлакат ўқувчилари ўртасида юзага келган жанжал оқибатида вояга етмаган тўрт нафар қирғизистонлик жабрлангани ҳақида маълум қилган.

Мулозимга кўра, ҳодиса 23 сентябрь куни соат 13:00 атрофида Кўктош қишлоғининг Даҳма участкасида содир бўлган.

“Дастлабки маълумотларга кўра, Қирғизистон мактабида 8-синфда ўқийдиган тўрт ўқувчи 30 нафарга яқин тожикистонлик 11-синф ўқувчилари томонидан калтакланган. Қирғизистонлик ўқувчиларга тиббий ёрдам кўрсатилган, улар касалхонага етказилган. Уларнинг аҳволи яхши”, деган У. Жўрўбаев.

Ҳодиса ортидан Боткен тумани ҳокими, ТИИБ ва МХДҚ туман бўлими раҳбарлари Тожикистоннинг Исфара тумани раиси ва ҳуқуқ-тартибот идоралари раҳбарлари билан учрашув ўтказганлар. Томонлар маҳаллий аҳоли ўртасида тушунтириш ишларини олиб бори ва қонунбузарларга қарши чора кўришга келишиб олганлар. Айни пайтда чегарадаги вазият барқарор экани айтилмоқда.

Қирғиз-тожик давлат чегарасидаги баҳсли ҳудудлар сабаб икки мамлакат чегарачилари ва аҳолиси ўртасида тез-тез низо чиқиб туради. Ҳарбийлар иштирокидаги охирги йирик тўқнашув шу йилнинг 28-29 апрель кунлари содир бўлган эди. Тожик ҳукумати қуролли можарода 19 киши нобуд бўлиб, 87 киши яраланганини тасдиқлаган. Қирғиз томони маълумотига кўра, улардан 36 киши қурбон бўлган ва 189 киши жароҳат олган.

Қирғизистон ва Тожикистон расмийлари бир-бирини низо чиқариш ва катта зарар етказишда айблаб келмоқда. Иккала мамлакат прокуратуралари чегарадаги воқеалар муносабати билан жиноят ишлари қўзғатганлар.

Навальний Google, Apple, YouTube ва Telegram’дан “кўнгли қолган”ини айтди

Иллюстратив сурат

Россиялик мухолифатчи Алексей Навальний Google, Apple, YouTube ва Telegram’ни “Ақлли овоз бериш” дастурига олиб кирувчи ҳаволаларни блоклаб қўйгани учун танқид қилди.

“Google ва Apple каби гигантлар, Кремль талабини адо этиб, иловамизни ўчирди. Мен ёқтирган YouTube видеомизни ўчириб ташлади, Telegram эса ботимизни блоклаб қўйди. Путин “экстремистик” деб биладиган ушбу дастурларда сизнинг округингиздан кўрсатилган номзодларга оид маълумотлар бор эди, холос”, деб ёзилган Навальний саҳифасида.

Сиёсатчи Кремль гўё IT-гигантларнинг қамоққа олиниши керак бўлган ходимлари рўйхатини рўкач қилиб, уларни ўз иродасига бўйин эгишга мажбур этгани ҳақидаги ОАВ хабарларини эслатган. “Агар бу гаплар рост бўлса, бу борада сукут сақлаш энг ёмон жиноятдир. Бу одамларни гаровга олган террористни рағбатлантириш билан тенг”, дейилган унинг номидан эълон қилинган хабарда.

Навальний, шунингдек, Telegram мессенжери эгаси Павел Дуровдан “қаттиқ ранжигани ва кўнгли қолган”ини ҳамда “Путиннинг блокловчилари рўйхатида уни кўраман деб ўйламаган”ини айтган.

Давлат думасига сайлов олдидан Россия расмийлари Apple ва Google’дан “Навальний” ҳамда “Ақлли овоз бериш” иловаларини App Store ва Google Play дўконларидан ўчириб ташлашни талаб қилиб, бу талабдан бўйин товлаш “Россия сайловларига аралашиш” деб баҳоланиши ҳақида огоҳлантирган.

Кейинроқ маълум бўлишича, Google Docs сервиси “Ақлли овоз бериш” орқали тавсия этилган номзодлар рўйхати келтирилган икки ҳужжатни блоклаб қўйган.

Қирғизистонлик юқори мартабали мулозимлар Кобулда Толибон раҳбарияти билан учрашди

Толибон тузган ҳукуматда ташқи ишлар вазири вазифасини бажарувчи Амир Хон Муттақий Қирғизистон Хавфсизлик кенгаши раисининг ўринбосари Талъатбек Масадиқов билан, Кобул, 2021 йил 23 сентябри

Толибон Қирғизистоннинг юқори мартабали икки мулозими радикал гуруҳ раҳбарияти билан музокара олиб бориш учун Кобулга келганини маълум қилди. Бу толиблар Афғонистонда ҳокимиятни эгаллаб олганидан бери жангарилар пешволари билан учрашган марказий осиёлик энг юқори мақомли делегациядир.

Толибон шакллантирган ҳукуматда ташқи ишлар вазири вазифасини бажарувчи Амир Хон Муттақий Қирғизистон Хавфсизлик кенгаши раисининг ўринбосари Талъатбек Масадиқов ҳамда Қирғизистон президенти маъмуриятининг ташқи сиёсат бўлими мудири Жиянбек Қулибаев билан учрашди, деб ёзган Толибон расмий вакили Забиҳуллоҳ Мужоҳид 23 сентябрь куни “Твиттер”даги саҳифасида.

Қирғизистон расмий вакиллари ушбу маълумот юзасидан ҳали изоҳ беришганича йўқ.

Мужоҳидга кўра, Муттақий қирғиз мулозимларини “олқишлаб”, “ёрдам учун миннатдорлик билдирган”. “У, шунингдек, ҳамкорлик ва кўмаклашувни давом эттириш зарурлигини таъкидлади”, деб ёзган Толибон вакили учрашувда “икки томонлама муносабатлар”га алоҳида эътибор қаратилганини қўшимча қилган.

Забиҳуллоҳ Мужоҳид ушбу учрашувдан олинган фотосуратни ҳам ёйинлаган.

Халқаро ҳамжамият толибларнинг Афғонистон ҳукуматини тан олиш масаласида тобора кучайиб бораётган дилемма қаршисида қолган.

Аммо минтақа давлатларининг хатти-ҳаракатлари уларнинг Толибон билан алоқа боғлашга ва ҳатто ҳамкорлик қилишга тайёрлигига ишора қилмоқда.

Хусусан, 21 сентябрь куни толиблар тузган ҳукумат раҳбари мулла Муҳаммад Ҳасан Охунд Кобулда Россия, Хитой ва Покистон вакиллари билан учрашган.

Қўшни Марказий Осиё мамлакатлари Толибонга муносабат юзасидан якдил фикрга эга эмас. Тожикистон Афғонистондаги барча этник гуруҳлар манфаатини ифодаловчи инклюзив ҳукумат тузилмагунча толиблар ҳукуматини тан олмаслигини очиқ билдирган бўлса, Ўзбекистон тўхтаб қолган иқтисодий алоқаларни тиклашга уринмоқда. Жорий ҳафтада БМТ Бош ассамблеяси минбарида нутқ сўзлаган президент Шавкат Мирзиёев Ўзбекистон Афғонистонга нефть ва электр қуввати етказиб беришни қайтадан бошлаганини маълум қилган.

“Афғонистонни ўз муаммолари билан ёлғиз қолдирмаслик керак”, деган Ш. Мирзиёев.

Давомини ўқинг

XS
SM
MD
LG