Линклар

Шошилинч хабар
01 октябр 2022, Тошкент вақти: 04:13

Ўзбекистон хабарлари

Толибон Ўзбекистонни “олиб қочилган самолётлардан фойдаланишга йўл қўймаслиги” ҳақида огоҳлантирди

Иллюстратив сурат.

Толибон ҳукуматининг мудофаа вазири Мавлавий Муҳаммад Ёқуб Мужоҳид: “Тожикистон ва Ўзбекистондаги бизнинг самолётларимиз қайтарилиши шарт. Биз бу самолётлар хорижда қолишига ва бу давлатлар томонидан фойдаланишига йўл қўймаймиз”, - деб баёнот берди.

TOLOnews сайтининг хабар беришича, Толибон вазири бу гапни 11 январда техник сабабларга кўра фойдаланилмай қолган бир нечта Россия самолётлари таъмирдан чиқарилиб, уларнинг парвози намойиш этилган тадбирда айтди.

Мавлавий Муҳаммад Ёқуб Мужоҳид агар Ўзбекистон ва Тожикистон самолётларни қайтармаса, “оқибатларига дучор бўлишлари”дан огоҳлантирди. Аммо вазир бу оқибатлар қандай бўлиши ҳақида тушунтириш бермади.

Толибон ҳукумати ўтган йилнинг 15 августида жаҳонда тан олинган Афғонистон ҳукумати қулатилганидан сўнг мамлакатдан қочган ҳарбийлар ўзлари билан Ўзбекистон ва Тожикистонга 40 та вертолётни олиб чиқиб кетганини билдирган. Бундан ташқари 164 та ҳарбий самолётдан 83 таси ҳам хориж давлатларига ҳарбийлар томонидан олиб чиқилган.

Толибон ҳукумати матбуот котиби Иномулла Самангоний 5 январда Ўзбекистон ва Тожикистон билан вертолётларни қайтариш бўйича музокаралар олиб борилаётганини маълум қилганди.

Толибон Кобулни эгаллаганидан сўнг 14-15 август кунлари Афғонистоннинг 22 та ҳарбий самолёти ва 24 та вертолёти Ўзбекистон чегарасини кесиб ўтгани ҳақида хабар берилганди.

Кун янгиликлари

Ўзбекистон ТИВ мобилизациядан қочиб келаётган россияликлар масаласида муносабат билдирди

Ўзбекистон Ташқи ишлар вазирлиги 30 сентябрда мобилизациядан қочиб келаётган россияликлар масаласида муносабат билдирди.

“Уларнинг мамлакатимизда бўлиши масаласи, шунингдек, эҳтимолий экстрадиция қилиниши Ўзбекистон қонунчилиги, икки томонлама ва кўп томонлама ҳуқуқий ҳужжатлар асосида тартибга солинишини қайд этамиз. Шу билан биргаликда ҳуқуқбузарликлар содир қилмаган хорижий давлат фуқаролари мажбурий депортация қилиб юборилмайди” дейилади вазирлик баёнотида.

ТИВ баёнотида Украинанинг бўлгинчи ҳудудларидаги “референдум”лар бўйича муносабат билдирилмаган. Бироқ Ўзбекистон томони мавжуд вазиятни халқаро ҳуқуқ нормаларидан келиб чиқиб сиёсий-дипломатик йўл билан ҳал этиш учун шартларни имкон қадар тезроқ ишлаб чиқиш тарафдори экани қайд этилган.

Президент Путин 21 сентябрь куни Россияда қисман сафарбарлик эълон қилгани ортидан минглаб россияликлар урушга боришдан қочиб бошқа давлатларга, жумладан, Ўзбекистонга бошпана излаб келди.

Украина уруши ортидан Ўзбекистонга россияликларнинг биринчи оқими шу йил мартига тўғри келган эди. Камида 2 минг россиялик, асосан IT-мутахассислар Тошкентда иш ва бошпана қидириши турар-жой ижара нархларига сезиларли таъсир кўрсатгани айтилган.

Ўзбекистон ҳукумати Украинадаги уруш борасида нейтрал позицияда эканини таъкидлаб келади.

Жўрабек Мирзамаҳмудов энергетика вазири этиб тайинланди

Жўрабек Мирзамаҳмудов бунга ыадар «Ўзкимёсаноат» бошқаруви раиси лавозимида ишлаб келаётган эди.

Президент фармони билан Жўрабек Мирзамаҳмудов бош вазирнинг ёқилғи-энергетика ва кимё соҳаларини ривожлантириш бўйича ўринбосари — энергетика вазири лавозимига тайинланди. Бу ҳақда 30 сентябрга ўтар кечаси президент матбуот котиби Шерзод Асадов маълум қилди.

Бунгача энергетика вазири лавозимида ишлаган Алишер Султонов апрель ойида «саломатлиги туфайли бошқа ишга ўтган» ва ўшандан бери вазир ўрни бўш турган эди.

1979 йилда Наманган вилоятида туғилган Жўрабек Мирзамаҳмудов 2001 йилда АҚШдаги Алабама университетини, 2005 йилда эса Тошкент кимё технологиялари институтини тамомлаган.

Жўрабек Мирзамаҳмудов 2006-2012 йилларда «Ўзбекнефтгаз»да турли лавозимларда ишлаган. Шундан сўнг 2012-2014 йилларда иқтисодиёт вазири ўринбосари, 2014-2017 йилларда «Ўзкимёсаноат» раиси ўринбосари, 2017-2018 йилларда Вазирлар маҳкамасида департамент мудири, 2018-2019 йилларда Вазирлар маҳкамаси ҳузуридаги Атом энергетикасини ривожлантириш агентлиги бош директори, 2019 йилдан «Ўзатом» агентлиги бош директори лавозимларида ишлади.

У 2019-2020 йилларда энергетика вазири ўринбосари бўлди. 2020 йил январидан «Ўзкимёсаноат» бошқаруви раиси лавозимида ишлаб келаётган эди.

Ўзбекистонликлар учун Ҳаж квотаси 24 мингтагача оширилади

Саудия Арабистон делегацияси аъзолари Ўзбекистон президенти қабулида, Тошкент, 2022 йил 29 сентябри (president.uz фотоси)

Ўзбекистон фуқаролари учун йиллик Ҳаж квотаси 24 мингтагача оширилади. Бунга оид келишувга Саудия Арабистони подшоҳлиги ҳаж ва умра ишлари вазири Тавфиқ бин Фавзон ар-Рабиа бошчилигидаги делегациянинг 29 сентябрь куни президент Шавкат Мирзиёев қабулида бўлган пайтда эришилган.

Президент матбуот хизмати маълумотига кўра, қабул чоғида Саудия делегацияси йилига Ўзбекистондан 100 минг нафаргача Умра зиёратчисини қабул қилишга тайёр эканини билдирган.

Каримов ҳукмронлиги даврида ўзбекистонликлар учун Ҳаж квотаси 5000 дан оширилган эмас. Мирзиёев даврида бу кўрсаткич ўсган, дейлик, 2019 йилда 7 200 нафар ўзбекистонлик учун Ҳаж ибодатини адо этиш имконияти берилган. Жорий йилда эса Ўзбекистон фуқаролари учун умумий ҳаж квотаси 10 865 нафар этиб белгиланганди.

Аслида бирор мамлакат учун Ҳаж квотаси “ҳар минг мусулмонга бир зиёратчи” формуласидан келиб чиққан ҳолда белгиланади. Ўзбекистонда ўртача ҳисоб-китобларга кўра 31 миллиондан зиёд мусулмон яшаши эътиборга олинса, сўнгги келишув ортидан квота меъёрга яқинлашиб қолганини кўриш мумкин.

Саудия ҳаж ва умра ишлари вазири Тавфиқ бин Фавзон ар-Рабиа бошчилигидаги делегация Тошкентга келгани ҳақида Озодлик аввалроқ хабар қилган эди.

Ўзбекистон баданига Путиннинг учта татуировкасини чиздирган рус раққоси иддаоларини рад этди

Полунин Путиннинг биринчи татуировкасини 2018 йилда чиздирган.

Россиялик раққос Сергей Полунин 28 сентябрь куни Instagram саҳифасида Тошкентдаги гастроли пайтида ҳалок бўлган рус аскарларига бағишланган қўшиққа рақс ижро этгани учун Ўзбекистон расмийлари унга қўпол равишда танбеҳ берганини иддао қилди. Ўзбекистон расмийлари эса Полунин келишилган дастурдан четга чиққани учун огоҳлантирилганини айтмоқда.

Reuters агентлигининг ёзишича, Полунин «Встанем» қўшиғига рақс тушган. Бу қўшиқ Россия армиясига бағишланган бўлиб, биринчи марта 23 февраль куни, яъни Украинага уруш очилишидан бир кун олдин ижро этилган.

Полунинга кўра, шундан сўнг Ўзбекистон маданияти ва санъатини ривожлантириш фонди вакиллари унга қўпол муомалада бўлишган ҳамда иш ҳақини тўлашдан бош тортишган. Полунин Россия элчихонасидан ўзини ҳимоя қилишни сўраган.

“Биз улар билан муроса қилмаслигимиз керак, биз уларга рус санъаткорлари ва рус маданиятига бундай муносабат қилинишига йўл қўймаслигимиз керак”, деган Полунин.

Gazeta.uz бу масалада Ўзбекистон маданияти ва санъатини ривожлантириш фонди расмийларидан муносабат олди. Фонд расмийлари Полунинга қўпол муносабатда бўлинмаганини, раққос келишилган дастурдан четга чиқиб, келишувни биринчи бўлиб ўзи бузганини айтишган.

Ўз баданига президент Путиннинг учта суратини ва свастикага ўхшаган рамзни татуировка қилдирган Сергей Полунин Тошкентдаги Алишер Навоий номидаги опера ва балет Катта театрида 25-26 сентябрь кунлари Satori балетини намойиш этган эди.

Украинанинг Херсон вилоятида 1989 йилда туғилган ва кейинчалик жаҳоннинг йирик театрларида раққослик қилгани ортидан танилган Сергей Полунин 2018 йилда кўкрак қисмига президент Путиннинг татуировкасини чиздирган эди. Август ойида эса у ўз баданига Путиннинг учинчи татуировкасини чиздирганини эълон қилган.

Ўзбекистонда гўдаклар ўлими кўпайди

Ўзбекистонда 9 миллион туғиш ёшидаги аёлга 227 та туғруқхона хизмат кўрсатади.

Ўзбекистонда 2021 йилда гўдаклар ўлими 2020 йилга нисбатан 160 тага кўпайди ва 7 214 тани ташкил қилди. Бу ҳақда 28 сентябрь куни бўлиб ўтган Олий Мажлис Сенати Кенгаши мажлисида маълум қилинди.

Сенат матбуот хизматининг билдиришича, бунинг асосий сабабларидан бири ҳудудларда 2018-2022 йилларда болаларда туғма ва ирсий касалликларни барвақт аниқлаш давлат дастури камчиликлар билан ижро этилаётганидадир.

Бундан ташқари йиғилишда ҳомиладор, туғувчи, туққан аёллар ва янги туғилган чақалоқларга кўрсатиладиган тиббий ёрдам сифатини яхшилаш мақсадида республикадаги туғруққа ёрдам берувчи муассасаларнинг моддий-техника базасини халқаро стандартларга мувофиқ мустаҳкамлаш ва зарур дори воситалари билан таъминлаш масаласи тўлиқ бажарилмагани ҳам қайд этилди.

Сенатга маълум қилинишича, Ўзбекистондаги 17,5 миллиондан ортиқ аёлнинг 9,1 миллиони туғиш ёшидадир. Уларга 227 та туғруқхона хизмат кўрсатади. 18 нафаргача бўлган болалар сони 11,3 миллион бўлиб, улар учун 238 та болалар даволаш-профилактика муассасалари хизмат кўрсатмоқда.

2022 йилнинг 8 ойи давомида 9,1 миллион нафар туғиш ёшидаги аёлдан 6,7 миллиони (74,1 фоизи) тиббий кўрикдан ўтказилган, улардан 2,9 миллионида (42,9 фоизи) экстрагенитал касалликлар аниқланган.

Йиғилишда бу борадаги муаммоларни бартараф этиш учун ишчи гуруҳи ташкил этилди. Ишчи гуруҳ бир ой муддатда мазкур йўналишда ҳудудлардаги ҳақиқий ҳолат бўйича ўрганишлар ўтказиб, 1 ноябрга қадар Сенат Кенгашига аниқ таклиф киритиши белгиланди.

Деновдаги мактабда 3-синф ўқувчисининг жасади топилди

Ўзбекистон Бош прокуратураси.

Сурхондарё вилоят прокуратураси ижтимоий тармоқларда тарқалган Деновдаги мактаблардан бирининг ҳовлисида 3-синфда ўқийдиган қизалоқнинг жасади топилгани тўғрисидаги маълумотни тасдиқлади, бироқ қизалоқ қотиллик қурбони бўлгани тўғрисидаги гумонларни рад этди.

Прокуратуранинг 28 сентябрда хабар беришича, дастлабки терговда Денов тумани “Буюк ипак йўли” маҳалласида яшовчи М.Қ., исмли аёл 27 сентябрь куни 2013 йилда туғилган З.Қ.,ни Сариосиё туманига олиб боргани аниқланган. Прокуратура аёл ўқувчи қизни Сариосиёга нега олиб борганини очиқламаган.

Сариосиёдан Деновга қайтилган пайтда З.Қ.,нинг соғлиги ёмонлашган. Аммо М.Қ., қизнинг “ҳаёти хавф остида қолганлиги ва ўзини-ўзи ҳимоя қилиш имкониятидан маҳрум бўлганлигини англаган ҳолда унга ёрдам кўрсатмасдан” 15-мактабнинг ҳовлисига ташлаб кетган. Қизалоқ мактаб ҳовлисида вафот этган.

“Мазкур ҳолат юзасидан жорий йилнинг 28 сентябрь куни Денов тумани прокуратураси томонидан М.Қ.,га нисбатан Ўзбекистон Республикаси Жиноят кодексининг 117-моддаси 2-қисми (хавф остида қолдириш одам ўлишига сабаб бўлса) билан жиноят иши қўзғатилган”,- дейилади прокуратура билдирувида.

Прокуратура аёл ўқувчи қизни нега Сариосиёга олиб боргани, қизалоқнинг аҳволи қай тарзда ёмонлашгани ва айнан қандай сабаблар оқибатида вафот этгани тўғрисида ҳеч қандай маълумот бермади.

Саудиянинг Ҳаж ва умра ишлари вазири Тошкентга келди

Иллюстратив сурат

Саудия Арабистони подшоҳлиги Ҳаж ва умра ишлари вазири Тавфиқ бин Фавзон ар-Рабиа бошчилигидаги делегация 27 сентябрь куни Ўзбекистонга келган.

Дин ишлари бўйича қўмита ахборот хизмати маълумотига кўра, меҳмонлар Тошкент халқаро аэропортида президент маслаҳатчиси Музаффар Комилов, Дин ишлари бўйича қўмита раиси Содиқжон Тошбоев, Ўзбекистон мусулмонлари идораси раиси, муфтий Нуриддин Холиқназаров ва бир гуруҳ мутасаддилар томонидан кутиб олинган.

Ташрифдан асосий мақсад Ўзбекистон ва Саудия Арабистони ўртасидаги ҳамкорлик муносабатларини такомиллаштириш, айниқса, диний-маърифий, илмий-тадқиқот, туризм, транспорт соҳасидаги алоқаларни мустаҳкамлаш экани айтилган.

Ўзбекистонда раҳбарлик этикаси ва қонунни бузган бешта туман ҳокими ишдан олинди

Андижон туман ҳокими Абдужаббор Эгамбердиев қабулига келганларга пойгакдан жой бергани билан "машҳур" бўлган. Ижтимоий тармоқлардан олинган фотосурат.

Президент қарорлари асосида 27 сентябрь куни Андижон вилоятининг Асака, Андижон ва Пахтаобод, Фарғона вилоятининг Фарғона, Самарқанд вилоятининг Нуробод туманлари ҳокимлари ишдан олинди.

Президент матбуот хизматининг билдиришича, Асака тумани ҳокими Мансурбек Алихонов ва Фарғона тумани ҳокими Шуҳратжон Мўминов ер муносабатларини тартибга солишга оид қонунчилик ҳужжатларига риоя этмагани, фаолиятида йўл қўйган бошқа жиддий қонунбузилиш ҳолатлари учун эгаллаб турган лавозимидан озод этилди.

Пахтаобод тумани ҳокими Элёрбек Усмонов ва Нуробод тумани ҳокими Шерали Йўлдошев раҳбарлик этикаси қоидаларига риоя этмагани учун, Андижон тумани ҳокими Абдужаббор Эгамбердиев давлат хизматчиси этикасини бузган ҳолда фуқароларга нисбатан ҳурматсизлик қилгани учун ишдан олинди.

2020 йил сентябридан Асака тумани ҳокими лавозимида ишлаб келаётган Мансурбек Алихонов 2021 йил декабрида фуқаролар билан менсимаслик оҳангида гаплашгани тасвирга олинган видео ижтимоий тармоқларда тарқалган эди. Бунинг учун ҳокимининг матбуот котиби ишдан олинганди.

2021 йил февралидан бери Андижон тумани ҳокими сифатида ишлаб келган Абдужаббор Эгамбердиев эса 2022 йил августида қабулига келганларга пойгакдан жой бераётгани акс этган маълумотлар тарқатилгани ортидан ўзбекистонликлар орасида «машҳур» бўлиб кетган эди.

Қолган уч ҳокимнинг бу каби ҳаракатларни содир этгани тўғрисида ижтимоий тармоқларда маълумотлар мавжуд эмас.

Мажлис қатнашчиларини ҳақорат қилган Сурхондарё вилояти ҳокими жаримага тортилди

Сурхондарё вилояти ҳокими Тўра Боболов.

Президентнинг 27 сентябрдаги қарори билан “ўз фаолиятини давлат сиёсати ва амалга оширилаётган ислоҳотларга мос равишда ташкил этмагани, ҳокимларга қўйиладиган талабларга риоя этмасдан мажлис қатнашчиларини ҳақорат қилганлиги ва бу билан кенг жамоатчиликнинг норозилигига сабаб бўлгани” учун Сурхондарё вилояти ҳокими Тўра Боболовга жарима интизомий жазо чораси қўлланилди. Бу ҳақда президент матбуот хизмати хабар берди.

“Кун уз” нашрининг хабар беришича, Боболовга интизомий жазо чораси қўлланилгани тўғрисида 27 сентябрь куни ўтган видеоселектор йиғилишида президент администрацияси раҳбари Сардор Умрзоқов маълум қилган.

«Тўра Боболов, сиз ўрнак бўлмаяпсиз. Интернетда чиққан гапларни монтаж дедингиз. Лекин экспертиза сизнинг овозингизни тасдиқлади. Президентимиз топшириғи билан сизга интизомий жазо чораси сифатида ойлик иш ҳақининг 40 фоизи миқдорида жарима қўлланди”, деган Умрзоқов.

Август ойининг иккинчи ярмида интернетда Тўра Боболов йиғилишга келган Ангор тумани прокурорини ҳақорат қилгани айтилган аудиоёзув тарқалган эди. Кейинроқ эса Боболов Қизириқ тумани ҳокими ва кластер раҳбарини қўпол равишда танқид қилгани акс этган янги аудиоёзув пайдо бўлган эди.

Бу аудиоёзувлар ижтимоий тармоқларда тарқалиб, кенг муҳокамаларга сабаб бўлган ва Тўра Боболовга нисбатан норозиликларни келтириб чиқарганди.

Ўзбекистон-Қирғизистон чегараси бўйича янги шартнома устида иш бошланди

Ўзбекистон бош вазири Абдулла Арипов (чапда) ва Қирғизистон Миллий хавфсизлик қўмитаси раиси Қамчибек Ташиев протоколни имзоламоқда.

Ўзбекистон-Қирғизистон чегарасини делимитациялаш ва демаркациялаш бўйича янги шартнома устида ишлаш юзасидан протокол 26 сентябрда Бишкекда имзоланди.

Протоколни Ўзбекистон бош вазири Абдулла Арипов ва Қирғизистон министрлар кабинети раисининг ўринбосари, Миллий хавфсизлик қўмитаси раиси Қамчибек Ташиев имзолади.

Икки давлат раҳбарлари чегара масалаларини муҳокама қилишни жорий йил охиригача якунлаш ниятини билдирган эди.

Шу кунгача 1378 километрли чегаранинг 98 фоизи аниқлаб бўлинган. Чегаранинг 2 фоиз қисми баҳсли бўлиб қолаётган эди.

Қирғизистонга иш сафари билан келган Абдулла Ариповни президент Садир Жапаров қабул қилди. Учрашувда икки томонлама ҳамкорликни ривожлантириш масалалари муҳокама этилди. Томонлар Ўзбекистон президенти Шавкат Мирзиёевнинг Бишкекка бўлажак давлат ташрифини ҳам муҳокама қилдилар.

Ҳозирча Ўзбекистон президентининг Қирғизистонга давлат ташрифи қачон амалга оширилиши тўғрисида маълумот йўқ.
Қирғизистон президенти С. Жапаров ўтган йилнинг март ойида Тошкентга сафар қилган эди. Ўшанда Ўзбекистон билан Қирғизистон ҳамкорлигига оид 22 та ҳужжат имзоланган.

Ўзбекистoн халқ шоири Жамол Камол вафот этди

Ўзбекистон халқ шоири Жамол Камол.

Ўзбекистoн халқ шоири Жамол Камол 27 сентябрь куни 84 ёшида вафот этгани тўғрисида Ёзувчилар уюшмаси маълум қилди.

Марҳум бугун Тошкент шаҳар Юнусобод тумани 17-даҳа 21-уй 27-хонадондан сўнгги манзилга кузатилади. Жаноза аср намозидан сўнг Юнусобод туманидаги Оқтепа масжидида ўқилади.

1938 йил Бухоро вилояти Шофиркон туманида туғилган Жамол Камол Бухоро педагогика институтининг филология факультетини тугатган (1959). У Ёзувчилар уюшмаси Бухоро вилояти бўлимида масъул котиб (1970−72), Ўзбекистoн Фанлар академияси Тил ва адабиёт институтида аспирант ва илмий ходим (1972−86) бўлиб ишлаган.

Лирик шеър тузилиши бўйича илмий тадқиқот олиб борган. Faфур Ғулом номидаги Адабиёт ва санъат нашриётида бош муҳаррир (1986−88), Ўзбекистoн Ёзувчилар уюшмаси раиси (1991−96) лавозимларида хизмат қилган.

Унинг “Олам кирар юрагимга” номли биринчи шеърий тўплами 1968 йилда чоп этилди. Шундан сўнг унинг ўндан ортиқ китоблари нашр этилди. Жамол Камол Шекспир, Жалолиддин Румий, Фаридиддин Аттор, Абдураҳмон Жомий каби кўплаб ижодкорларнинг ўттизга яқин асарларини ўзбек тилига ўгирган.

Жамол Камол 1992 йилда Ўзбекистон халқ шоири унвонига сазовор бўлган эди. Шекспирдан таржималари учун 2009 йилда Британия Қироличаси Елизавета II дан миннатдорчилик мактуби олган. 2016 йилда Тошкент аэропортига Ислом Каримов номи берилишига қарши чиққан эди.

ЎМИ мусулмонларнинг Россия-Украина урушида қатнашиши “шаръан жоиз эмас”лигини урғулади

Ўзбекистон мусулмонлари идораси Фатво маркази ижтимоий тармоқларда “Россия ва Украина каби уруш кечаётган ерларда истиқомат қилаётган ўзбекистонликларни турли ваъдалар билан урушга тарғиб қилиш ҳолатлари” кузатилаётганига эътибор қаратди.

ЎМИ баёнотига мувофиқ, мусулмон кишининг “ўз ватанини ҳимоя қилишдан бошқа ҳар қандай ҳарбий ҳаракатларда иштирок этиши шаръан жоиз бўлмайди”.

“Бу каби фитналарга аралашиш шаръан ҳаром ҳисобланади. Қолаверса, амалдаги қонунчилигимизда ҳам хорижий мамлакатларнинг ҳарбий тузилмалари, ноконуний диний ташкилотлар ва террорчи гуруҳлар таркибига аъзо бўлиш таъқиқланган”, дейилган ЎМИ Фатво маркази баёнотида ўзбекистонлик мусулмонлар “турли алдамчи тарғиботларга учмасликка, фитналардан йироқ бўлишга даъват” этилган.

Норов Нью-Йоркда бўлиб ўтган “C5+1” йиғилишида қатнашди

Марказий Осиё мамлакатлари ва АҚШ ташқи ишлар вазирларининг "C5+1"форматидаги йиғилишидан лавҳа, Нью-Йорк, 2022 йил 22 сентябри (mfa.uz фотоси)

БМТ Бош Ассамблеясининг 77-сессияси доирасида 2022 йилнинг 22 сентябрь куни Нью-Йоркда Марказий Осиё мамлакатлари ва АҚШ ташқи ишлар вазирларининг “C5+1”форматидаги йиғилиши бўлиб ўтди.

ТИВ матбуот хизмати маълумотига кўра, тадбир давомида Қозоғистон, Қирғизистон, Тожикистон, Туркманистон, Ўзбекистон ва Америка Қўшма Штатлари ташқи сиёсат идоралари раҳбарлари ва вакиллари томонларни қизиқтирган йўналишлардаги ҳамкорликнинг долзарб масалаларини муҳокама қилганлар, минтақанинг барқарор иқтисодий тараққиётини таъминлаш мақсадида “C5+1” форматида савдо ва сармоявий алоқаларни кенгайтириш йўллари тўғрисида фикр алмашганлар.

“Ўзбекистон делегацияси раҳбари, ташқи ишлар вазири Владимир Норов ўз нутқида “C5+1” муҳим мулоқот механизми бўлиб, унинг доирасидаги ҳамкорлик самарадорлигини ошириш борасида маълум ютуқларга эришилганини қайд этди”, дейилган вазирлик хабарномасида.

Қайд этилишича, томонлар “C5+1” доирасида юқори ва эксперт даражаларида яқин мулоқотни давом эттириш, шунингдек амалий натижаларга эришишга қаратилган аниқ чораларни кўриш бўйича келишиб олганлар.

“C5+1” гуруҳи учрашувлари 2015 йилдан бери ўтказиб келинади. Гуруҳнинг илк учрашуви Ўзбекистоннинг Самарқанд шаҳрида ўтказилган эди.

UZCARD Ўзбекистонда Россиянинг “Мир” карталарига хизмат кўрсатилмаётганини билдирди

Жорий йилнинг 23 сентябридан Ўзбекистонда халқаро банклар томонидан чиқарилган “Мир” карталарига хизмат кўрсатиш вақтинча тўхтатилган. Бу ҳақда билдирган UZCARD умумреспублика процессинг маркази буни “техник ва профилактик ишлар олиб борилаётгани” билан изоҳлаган. “Мир” карталарига хизмат кўрсатиш қачондан тикланиши ҳозирча маълум эмас.

Айни пайтда UZCARD вакиллари РБК нашрига Ўзбекистонда ишлаб чиқарилган “Мир” карталарига хизмат кўрсатиш ҳали ҳам давом этаётганини таъкидлашган.

Аввалроқ АҚШ Молия вазирлиги огоҳлантируви манзарасида Туркия, Қозоғистон ва Вьетнамдаги бир неча банк “Мир” картасига хизмат кўрсатиш бўйича чеклов жорий қилишган.

Мирзиёев газ экспорт қилинмаётганини айтди. Рақамлар бунинг аксини кўрсатмоқда

Статистиканинг билдиришича, 8 ой ичида Ўзбекистон 645,9 миллиард долларлик газ сотган.

22 сентябрь куни Тошкент вилояти фаоллари билан учрашган президент Шавкат Мирзиёев Ўзбекистон газ ва пахта экспортини тўхтатгани тўғрисида гапириб ўтди.

“Ҳозир эса пахтани ҳам, газни ҳам экспорт қилмаяпмиз. Ҳатто газни четдан сотиб ҳам оляпмиз. Сабаби, саноатимиз ривожланяпти. Ана шундай икки асосий маҳсулот четга сотилмаса ҳам экспортимиз ҳажми 2016 йилга нисбатан 5-6 баробар ошди”, – деб иқтибос келтирди президент сўзларидан Kun.uz.

Ўзбекистон Статистика қўмитасининг 2022 йилнинг январидан-августигача ўтган 8 ой учун берган ҳисоботида эса 645,9 миллион долларлик газ сотилгани, бу ўтган йилнинг мос даврига солиштирганда 60,9 фоизга кўплиги қайд этилган. Шу билан бир қаторда газ импорти 35,9 фоизга камайиб, 76,2 миллион долларни ташкил қилган.

Аввалроқ Озодлик радиоси Хитой Божхона бош бошқармасининг 20 июлдаги ҳисоботига таянган ҳолда Ўзбекистон 2022 йилнинг олти ойида Хитойга 404 миллион долларлик табиий газ сотгани тўғрисида хабар берган эди.

Хитой томонининг расман билдиришича, бу ўтган йилнинг шу даврига нисбатан 2,2 баробарга кўпдир.

Хитой Божхона бош бошқармаси ҳисоботида Ўзбекистон Хитойга энг кўп газ сотувчи беш давлатдан бири бўлиб қолаётгани қайд этилган. Биринчи ўринда олти ойда Хитойга 4,5 миллиард доллар газ сотган Туркманистон бормоқда. Ундан кейинги ўринларни эса Россия, Мьянма, Қозоғистон ва Ўзбекистон эгаллади.

Очиқ манбалардаги маълумотларга қараганда, Ўзбекистон ўзи қазиб олаётган газнинг камида 10 фоизини Хитойга сотмоқда.

Ўзбекистон ички истеъмол талаби кучайгани ортидан 2022 йил бошида Хитойга газ экспортини тўхтатганди. Аммо май ойидан бошлаб яна Хитойга газ экспорти қайта тикланган.

“Ўзтрансгаз” раҳбари Беҳзод Норматов 28 июнь куни Ўзбекистон 2025−2026 йилларга бориб хорижга газ сотишнинг бутунлай тўхтатиши мумкинлиги тўғрисида билдирган эди. Буни у газга бўлган ички талабнинг ошиб бораётгани билан изоҳлаган.

Ўзбекистон аҳолиси ҳар йилги куз-қиш мавсумида газ ва электр таъминоти тақчиллигига дучор бўлаётгани халқаро матбуотда, жумладан, Озодлик радиосида ёритиб келинади.

Мирзиёев 2016 йил декабрида президентликка келишидан аввал аҳолининг газ ва электр муаммосини ҳал қилишга ваъда берган эди. Аммо ўтган вақт ичида вазият ижобий томонга ўзгармаган.

Давомини ўқинг

XS
SM
MD
LG