УРГАНЧ. “Хоразм вилояти Урганч тумани Ҳожибойлар маҳалласи аҳли номидан ёзмоқдамиз. Урганч–Янгиариқ йўлида жойлашган намунали уйлар олдида хусусий пудратчилар томонидан кўп қаватли уйлар қурила бошлади. Қурилиш бўладиган ер майдони экин экишга мўлжалланган қўшимча томорқа эди. Тупроқ унумдорлигини текширувчи ташкилотлар ер экин экишга яроқсиз деб хулоса берди. Ҳолбуки, расмларга эътибор қилсангиз, полиз экинлари яхши ҳосил бераётганини кўрасиз.
Яна бир муаммо. Урганч туман ҳокимининг қарори билан қурилаётган кўп қаватли уйларнинг канализация тизими марказий канализация қувурига уланмайди. Пудратчининг сўзига қараганда, уйни сотиб олганлар ҳар ҳафта канализация чиқиндисини машинада чиқартириши керак бўлади. Бу уйнинг бўлажак эгаларига ноқулайлик туғдириб қолмай, маҳаллий аҳолига азият ҳамдир. Ахир, канализация тизими ишламаса, ҳаммаёқни бадбўй эгаллайди-да!
2018 йил баҳорда ушбу ҳудуд орқали президентлар Шавкат Мирзиёев ва Гурбангули Бердимуҳаммедов “Туркманлар” маҳалласига ўтган эди. Эндиликда қандайдир йўллар билан рухсат олиб, талабга жавоб бермайдиган тарзда уй қурилмоқда”.
(Бу хабар Озодликка 11 сентябрь куни келган.)
Ўзбекистон ва халқаро ҳаётга оид энг сўнгги янгиликлар, қизиқарли фото-видео тасвирларни Озодликнинг Instagramсаҳифасида кузатинг!
|