Линклар

Шошилинч хабар
02 феврал 2023, Тошкент вақти: 13:44

Халқаро хабарлар

Қозоғистон: Мустақил экологлар Ўзбекистонда АЭС қурилиши масаласида сўров ўтказишди

Қозоғистонлик эколог Дмитрий Калмиков

“Қарағанда вилояти экология музейи” жамоат ташкилоти экологлари Ўзбекистон Қозоғистон билан чегара яқинида атом электр станцияси қуришни режалаётгани муносабати билан қозоғистонликлар орасида ўтказилган электрон сўров натижаларини эълон қилди. Бу ҳақда Озодликнинг қозоқ хизмати эколог Дмитрий Калмиковдан олинган маълумотга таянган ҳолда хабар қилди.

Сўровда фуқароларга 11 саволга жавоб бериш таклиф этилган, унда бир неча юз киши иштирок этгани айтилмоқда.

Сўров натижаларига кўра, респондентларнинг ярмидан кўпроғи Ўзбекистон Қозоғистон чегараси яқинида АЭС қуришни режалаётганини билмаган. Билувчиларнинг аксарияти бундан расмий манбалар орқали эмас, балки ижтимоий тармоқлар орқали хабар топгани маълум бўлган.

Сўров иштирокчиларининг қарийб 90 фоизи АЭС қурилишига қарши чиққан. Яна тахминан шунча респондент Ўзбекистон атом станциясининг хавфсиз ишлашини кафолатлай олмайди, деб ҳисоблайди. Сўралганларнинг аксарияти АЭС қурилиши масаласида умумхалқ референдуми ўтказиш ғоясини қўллаб-қувватлашини билдирган. 11 фоиздан кўпроқ киши АЭС қурилишини маъқуллаган.

Қўшни мамлакатда қурилажак АЭСнинг Қозоғистон учун фойдаси ҳақидаги саволга сўралганларнинг ярмидан кўпроғи “бунда ҳеч қандай фойда кўрмаяпман”, деб жавоб берган. Ўзбекистонда АЭС қуриш масаласини муҳокама қилиш чоғида Қозоғистон фикри инобатга олиниши керак ёки йўқлиги сўралганда эса мутлақо кўпчилик “ҳа”, дея жавоб берган.

Сўралганларнинг 18 фоиздан ортиғи атом энергетикасини ривожлантириш зарур деб ҳисоблайди, 62 фоиздан кўпроқ киши бунга қарши чиққан, 19 фоиздан зиёд респондент “бу ҳақда ўйлаб кўрмаган”ини айтган.

Экологлар сўров натижаларини ҳукуматга ва президент администрациясига юборишмоқчи.

Кун янгиликлари

Краматорскда кўп қаватли уй Россия ракетасига нишон бўлди, қурбонлар бор

Краматорскда Россия ракетаси зарбасига нишон бўлган уй

Украинанинг Донецк вилояти Краматорск шаҳри марказида жойлашган кўп қаватли уй россиялик ҳарбийлар берган ракета зарбаси натижасида вайрон бўлган.

Донецк вилоят ҳарбий маъмурияти раҳбари Павел Кириленко маълумотига кўра, ҳодиса чоғида камида 3 киши ҳалок бўлиб, 20 киши яраланган. Айни пайтда қутқарувчилар иш олиб бораётган вайронлар остида яна одамлар бўлиши мумкинлиги эътимолдан соқит қилинмаяпти.

Донецк вилояти полицияси қайдича, Россия қўшинлари шаҳарнинг одамлар яшайдиган мавзеига “Искандер-К” ракетасини улоқтиришган, пировардида камида 8 та кўп квартирали уйга шикаст етган.

Украина президент Владимир Зеленский Краматорскка берилган ракета зарбасини “мутлақ ёвузлик билан ҳудудий жиҳатдан чегарадош бўлган мамлакат турмушининг кундалик реаллиги” деб атаган.

Россия томони мазкур ракета зарбаси юзасидан ҳали изоҳ берганича йўқ.

Украиналик ҳарбийлар назорати остида бўлиб турган Краматорск Россия қўшинлари тўхтовсиз ҳужум уюштираётган Бахмут шаҳридан ўнлаб километр нарида жойланган. Бахмутда уруш бошидан буён энг шиддатли жанглар бораётгани айтилмоқда.

Bloomberg Billionaires Index: Алишер Усмоновнинг бойлиги йил бошидан буён $1 млрдга кўпайди

Алишер Усмонов

Bloomberg агентлигининг Миллиардерлар индекси маълумотига кўра, асли ўзбекистонлик миллиардер Алишер Усмоновнинг бойлиги жорий йил бошидан буён 1 миллиард доллардан кўпроққа ошиб, 19,5 миллиард долларга етган.

Россия президенти Владимир Путинга яқин кўрилган Усмонов, мазкур рейтингга кўра, айни пайтда дунёдаги 500 нафар энг бой одамлар рўйхатида 81-ўринни эгаллаб турибди.

Россия қўшинлари ўтган йилнинг февраль ойи охирида Украинага бостириб киргани ортидан Алишер Усмонов АҚШ, Европа Иттифоқи ва Буюк Британиянинг санкция рўйхатига киритилган эди.

Financial Times нашрининг ёзишича, Ўзбекистон ЕИдан россиялик миллиардер Усмоновдан санкцияларни олиб ташлашни сўраган.

Forbes журнали бундан ўн кун муқаддам Алишер Усмонов Россия ишлаб чиқарувчилар ва тадбиркорлар уюшмаси (РИЧТУ) раёсати бюросига пенсия чиқаётгани ва актив фаолиятдан чекинаётганини билдириб, ўзини бюрога аъзоликдан озод қилиш ҳақида ариза ёзгани ҳақида хабар қилган эди.

Наманганнинг Чуст туманида туғилган Алишер Усмонов Россиядаги USM гуруҳининг асосчиси ва йирик акциядори бўлиб ҳисобланади. Мазкур гуруҳга “Металлоинвест”, “Удоканская медь”, “МегаФон” дохил қатор ширкатлар киради. Усмонов “Коммерсантъ” нашр уйига ҳам эгалик қилади, аввалроқ у VK (ВКонтакте ижтимоий тармоғи) соҳиби ҳамда Британиянинг “Арсенал” клубининг эгадоши бўлган, шунингдек, у 2022 йилнинг март ойигача Халқаро қиличбозлик федерацияси раҳбари лавозимини ҳам эгаллаб турган.

Россиялик мухолифатчи Алексей Навальний ва унинг сафдошлари Алишер Усмоновни коррупцияда айблаб чиққан. ФБКнинг энг машҳур “У сизга Димон эмас” (“Он вам не Димон”) деб номланган суриштирувида Усмонов Россия ҳукуматининг собиқ раҳбари Дмитрий Медведевга билвосита пора бергани иддао қилинган эди. Усмонов бу иддаони рад этган. Суриштирув ёйинланганидан кейин у Навальнийга видеомурожаат билан чиқиб, “Тупурдим сизга” деган сўзлар билан мухолифатчини ёлғончиликда айблаган. Усмонов ўз шаъни ва эътиборини ҳимоя қилиш бўйича Москвада бўлиб ўтган судда Навальнийнинг устидан ғалаба қилган.

Навальний Ғарб мамлакатларини Британия резиденти бўлган Усмоновга қарши коррупция айблови билан санкциялар жорий этишга чақирган эди. Бироқ санкциялар Россия қўшинлари Украинага бостириб кирганидан кейингина жорий этилган.

Грузия президенти: Россия Жанубий Осетия ва Абхазияни тарк этиши лозим

Грузия президенти Саломе Зурабишвили

Грузия президенти Саломе Зурабишвили Россия ўзларини мустақил деб эълон қилиб олган ва 2008 йилдан буён феълан Москва томонидан бошқарилаётган Абхазия ва Жанубий Осетияни Грузия назорати остига қайтариши зарур, дея билдирди. Унинг фикрича, Россия Украинадаги урушда ютқазяпти, уруш тугаганидан кейин эса у нафақат Украинанинг, балки Грузиянинг ҳам ишғол этилган ҳудудларидан чиқиб кетиши керак.

“Россия, агар бутун урушни демасак, барча жангларни қарийб бой бериб бўлди. Грузия масалалари ҳам музокара столида бўлиши шарт. Россия ўз чегаралари қаердан ўтишини яхшилаб ўрганиб олиши лозим”, дея иқтибос келтирган Bloomberg агентлиги Саломе Зурабишвили сўзларидан.

Грузия президенти ғарб ҳамжамиятини Россия президенти Владимир Путиндан ўз қўшинларини Абхазия ва Жанубий Осетиядан олиб чиқиб кетишни Украина билан тинчлик шартномаси тузилиши шартларидан бири ўлароқ талаб қилишга чақирган. “Акс ҳолда, Ғарб 2008 ва 2014 йилларда бўлгани каби яна битта катта хатога йўл қўяди”, деган Зурабишвили.

Жанубий Осетия билан Абхазия Грузия ССР таркибига кирган. Ўтган асрнинг 90-йилларида бу икки ҳудуд ўз мустақиллигини эълон қилган, бироқ Тбилиси буни қабул қилган эмас. 2008 йили Грузия билан “беш кунлик уруш”дан сўнг Россия Абхазия ва Жанубий Осетия ҳудудларига ўз қўшинларини жойлаштириб, уларни мустақил деб тан олган. Мазкур ҳудудлар мустақиллигини Россиядан ташқари фақат Венесуэла, Науру, Никарагуа ва Сурия каби мамлакатларгина тан олишган. Грузия бу жойларни Россия томонидан ишғол қилинган ўз ҳудудлари деб билади.

Грузия ва Россия ўртасида дипломатик алоқалар мавжуд эмас. Айни пайтда Грузия, гарчи Украинани дастаклашини расман билдирган бўлса-да, Киевга қарши уруш бошланганидан кейин ғарб мамлакатлари томонидан Россияга қарши киритилган санкцияларга қўшилмаган. Грузия мухолифати мамлакат расмийларини Россияга ён босувчи позицияни эгаллаб келаётганликда айблаган.

Reuters: АҚШ Украинага 150 километр масофага етадиган ракеталарни беради

GLSDB (Ground Launched Small Diameter Bomb) ракетаси учирилишининг моделлаштирилган кўриниши

Қўшма Штатлар Украинага қиймати 2,2 миллиард долларга тенг бўлган ҳарбий ёрдамнинг янги пакетини ҳозирлаяпти, мазкур пакетга илк бор ҳаракат радиуси 150 километргача бўлган ракеталар киритилиши кутилмоқда. Бу ҳақда Reuters агентлиги АҚШ президент Жо Байден маъмуриятидаги икки манбадан олинган маълумотга таянган ҳолда хабар қилди.

Гап бу ерда 150 километргача масофага уча оладиган юқори аниқликка эга GLSDB (Ground Launched Small Diameter Bomb) ракеталарини етказиб бериш ҳақида бормоқда. Ҳозирда Украинага радиуси 80 километргача бўлган ракеталар етказиб бериляпти.

Reuters ўтган йилнинг ноябрь ойидаёқ GLSDB’ни ишлаб чиқарувчи Boeing ширкатининг Украинага мазкур ракеталарни етказиб бериш таклифи ҳақида хабар қилган эди.

Айни пайтда Вашингтон Киевга 300 километргача уча оладиган ATACMS ракеталарини етказиб беришга оид илтимосини рад этган. Оқ уй украиналик ҳарбийлар мазкур ракеталар билан Россия ичкарисидаги ҳадафларга зарба беришидан хавотирланмоқда, бу эса урушнинг назоратсиз эскалациясига олиб келиши мумкин.

Аввалроқ Украина президенти офисининг маслаҳатчиси Михаил Подоляк Киев Россия томонидан аннексия қилинган Қримдаги объектларга ҳужум қилиш имконини берувчи ракеталар етказиб берилиши бўйича музокаралар олиб бораётганини айтган эди.

АҚШ Украинага ҳарбий ёрдамининг янги пакетига “Пэтриот” зенит-ракета комплекслари учун ёрдамчи қурилмалар, аниқ нишонга урадиган ўқ-дорилар ва танкка қарши “Жавелин” ракеталари кириши кутиляпти, дея қўшимча қилишган агентлик манбалари.

Reuters маълумотига кўра, ҳарбий ёрдамнинг янги пакети ҳақида жорий ҳафтада эълон қилинади. Оқ уй бу борада расмий изоҳ беришдан бош тортган.

Қирғизистонлик депутатлар яна TikTok тармоғига тўсиқ қўйиш таклифи билан чиқишмоқда

Қирғизистон парламенти депутати Шайлообек Атазов 1 февраль куни Жўғўрқу Кенеш мажлисида TikTok ижтимоий тармоғини блокировка қилишни таклиф қилган. Бу ҳақда Озодликнинг қирғиз хизмати хабар қилди.

Атазовга кўра, TikTok ўсиб келаётган авлодга салбий таъсир кўрсатяпти ва у миллий мафкурага зиддир. Депутат Маданият вазирлигини мазкур ижтимоий тармоққа эътибор қаратишга чақирган.

“Маданият вазирлигига топшириқ бериш зарур, бу йўналишда иш олиб борсин. Оқшомлари оилавий ўтириб, TikTok томоша қилиш уятли ҳолат бўляпти. Давлатнинг миллий сиёсати бўлиши керак-да”, деган депутат Апазов.

Бу Қирғизистонда TikTok’ни блоклаш бўйича парламент депутатлари томонидан билдирилаётган таклифларнинг биринчиси эмас. Ўтган йилнинг сентябрь ойида депутат Надира Нарматова TikTok тармоғига “бемаъни нарсалар” қўйилаётганини айтган. Бошқа бир депутат – Жанибек Қидиқбаев эса ноябрь ойида TikTok болалар онгига “салбий таъсир” кўрсатаётгани иддаоси билан мазкур ижтимоий тармоқни тўсиб қўйишга чақирган эди.

TikTok Марказий Осиё минтақасидаги мамлакатлар дохил кўплаб ўлкаларда кенг тарқалган, қисқа видеоларни жойлаш ва томоша қилишга мўлжалланган ижтимоий тармоқдир. Дунёда энг кўп юклаб олинадиган иловалардан бири бўлган TikTok Хитойнинг ByteDance ширкатига қарашли.

Қирғизистонда ҳам минглаб одам TikTok тармоғидан актив фойдаланишади. Шунингдек, бу платформага қирғизистонлик ўнлаб машҳур блогерлар ўз контентларини жойлаб келишади.

Лондон Абрамовичнинг қарийб 2,8 млрд доллар маблағини Украинага ёрдам ўлароқ ўтказиб бермоқчи

Россиялик миллиардер Роман Абрамович

Буюк Британия ҳукумати россиялик миллиардер Роман Абрамовичга қарашли “Челси” футбол клубининг сотилишидан тушган 2,3 миллиард фунт стерлинг (тақрибан 2,8 миллиард АҚШ доллари) маблағни Украидаги уруш қурбонларга ёрдам жамғармасига ўтказиб беришни режаламоқда. Бу ҳақда The Telegraph нашри ҳукуматдаги манбалардан олинган маълумотга таянган ҳолда хабар қилди.

Нашрнинг ёзишича, Британия нашрлари бу қадамнинг Европа Иттифоқи томонидан маъқулланишини кутмоқда, чунки Абрамович ЕИда санкция рўйхатида киритилган. Мазкур масаланинг ҳал бўлиши бир неча ҳафтага чўзилиши мумкин.

ОАВ қайдича, пул жўнатилиши режаланаётган жамғармани тузиш ғояси Абрамовичнинг ўзига тегишли бўлган. Бу фикр ўтган йилнинг март ойида россиялик олигарх Украинадаги уруш туфайли санкциялар дуч келгани ортидан пайдо бўлгани айтилмоқда.

“Челси” футбол клубининг савдога қўйилиши 2022 йил бошида эълон қилиниб, сотиш ишлари май ойи охирида якунига етган. Клуб америкалик инвестор Тодд Боли бошчилигидаги консорциумга 4,25 миллиард фунт стерлингга сотилган. Байдан тушган маблағ махсус банк ҳисобрақамига қўйилган, ҳисобрақамининг ўзи эса музлатилган.

Россияда военкомат биносининг ёқилиши илк бор судда теракт деб топилди

Кемеровода ўт қўйилган ҳарбий комиссариат биноси (архив сурати)

Россияда суд ҳарбий комиссариат биносини ёққанлик учун биринчи марта “террор хуружи” моддаси бўйича ҳукм чиқарди.

ТАСС агентлиги хабарига кўра, Ханти-Мансийск округидан бўлган айбланувчи 12 йилга озодликдан маҳрум этилган.

Агентлик ўз хабарида судланувчининг исмини келтирган эмас. Бироқ, афтидан, бу ерда гап Владислав Борисенко ҳақида бормоқда. Ҳукм Екатеринбургдаги Марказий округ ҳарбий суди томонидан чиқарилган.

Нижневартовск шаҳрида яшаган Борисенко Василий Гаврилишен билан биргаликда ўтган йилнинг май ойида шаҳардаги военкомат биносини ёқиб юборишга уринганликда айбланган. Ўшанда бинодаги чўмилиш хонасининг кийим алмаштирадиган хонасига ўтгани айтилган. Аланга чақириқ асосида келган полициячилар томонидан тез орада ўчирилган, ҳодиса чоғида бирор кишининг жабрлангани маълум қилинган эмас.

Украина уруши бошланганидан буён Россияда ўнлаб военкомат ва бошқа давлат муассасалари биноларига ўт қўйишга уринишлар бўлган. Бу каби ҳаракатлар президент Путин томонидан қисман ҳарбий сафарбарлик эълон қилинганидан кейин кучайган. Дастлаб ҳарбий комиссариат биноларини ёқиб юборишга уринганлардан бир неча нафари “безорилик” ёки “мулкка зарар етказганлик” моддалари бўйича судланган, бироқ куз ойларидан бошлаб тергов идоралари бу каби ишларни “террор хуружи” ўлароқ малакалаётганлари кузатилмоқда.

WP: АҚШ Украинага танкларни 2023 йил охиридагина етказиб беради

АҚШ Киевга бермоқчи бўлган 31 та “Абрамс” танкини 2023 йилнинг охиригача етказиб бера олмайди. Бу ҳақда The Washington Post хабар берди.

Нашрнинг ёзишича, Украинага “Абрамс” танкининг модификация қилинган M1A2 варианти етказиб берилади. Бу танклар АҚШ армиясининг мавжуд заҳирасидан олинмайди, балки Украина учун махсус ишлаб чиқарилади.

CNN телеканали ҳам Киев «Абрамс» танкларини камида йил охирида олиши мумкинлигини хабар қилди.

Украина президенти Владимир Зеленский 27 январда Sky News телеканалига берган интервьюсида танклар 2023 йилнинг августида етказиб берилган тақдирда ҳам «жуда кеч бўлиши»ни айтган.

Аввалроқ Украинага АҚШ 31 та «Абрамс» танкини, Германия эса 14 та «Леопард» танкини беришини ва қолган давлатларга ҳам Киевга танкларни етказиб беришга тўсқинлик қилмаслигини билдирган. Шундай қилиб, Украинага жами 112 та «Леопард» жўнатилиши режалаштирилган. «Леопард» танклари Украинага 2-3 ойда етиб келиши кутилмоқда.

Украина армияси контрҳужум учун камида 300 ғарб танклари зарур бўлишини маълум қилди.

ЖССТ COVID-19 пандемияси якунланмаганини билдирди

Жаҳон соғлиқни сақлаш ташкилоти (ЖССТ) 30 январь куни тарқатган баёнотида COVID-19 пандемияси якунланмаганини билдирди. Баёнотда айтилишича, коронавирус билан боғлиқ вазият ҳамон мураккаблигича қолмоқда.

ЖССТнинг коронавирус бўйича қўмитасининг 14-йиғилиши пандемиянинг уч йиллигига бағишланди. COVID-19 пандемияси 2020 йилнинг 30 январида эълон қилинган эди.

Йиғилишда коронавирусни бартараф этиш учун катта ишлар қилингани, аммо пандемия ўтиб кетди деб ҳисоблашга ҳали эрта экани таъкидланди. Бунга Хитойда қатор карантин чекловлари бекор қилингач яна COVID-19 кескин кўпайгани мисол қилиб кўрсатилди.

Коронавирус тўғрисидаги илк маълумотлар 2019 йилнинг декабрида Хито йда пайдо бўлди. Вирус дунё бўйлаб тез тарқала бошлади. Сўнгги уч йилда жаҳонда 670 миллион киши коронавирусга чалинди, улардан 6,8 миллиони вафот этди. Бугунги кунда 5 миллиард киши коронавирусга қарши эмланди.

Покистон масжидида бўлган портлашни худкуш амалга оширгани маълум бўлди

Портлаш 30 январь куни пешин намози пайтида содир этилди.

Покистоннинг Пешовар шаҳридаги масжидда содир этилган портлашни худкуш амалга оширган. Бу ҳақда “Машъал” радиоси гувоҳларга таянган ҳолда хабар берди.

Гувоҳлар имомнинг ортида биринчи қаторда турган шахс ўзини портлатганини айтганлар. Бу воқеа 30 январда 260 дан ортиқ киши масжидда пешин намозини ўқиётган вақтда содир этилган.

Сўнгги маълумотларга қараганда, портлаш оқибатида 37 киши ҳалок бўлган, 150 киши яраланган. Масжиднинг бир қисми ўпирилиб тушиб, бир неча одамни босиб қолган.

Мазкур портлаш учун масъулиятни “Таҳрики-Толибон Покистон” гуруҳи ўз зиммасига олди. Бу ҳақда гуруҳ раҳбарларидан бири Сарбақаф Мухманд Твиттер саҳифасида эълон қилди.

Бош вазир Шаҳбоз Шариф портлаш ортида турганларга “қатъий чоралар” кўрилишини билдирди.

Ўтган йилнинг ноябрь ойи охирида “Таҳрики-Толибон Покистон” гуруҳи (АҚШ, Британия ва Канада томонидан террор ташкилоти ўлароқ тан олинган) Покистон ҳукумати билан келишилган оташкесим тартибини бундан буён тан олмаслиги ҳамда ўз жангариларига бутун мамлакат бўйлаб террор хуружлари содир этишни буюрганини эълон қилган эди.

Европа Иттифоқи Эроннинг дрон ишлаб чиқарувчи ширкатига қарши санкция киритди

Iran Aircraft Manufacturing Industries Corporation корпорацияси маҳсулотлари

Европа Иттифоқи Эрондаги давлат корпорацияси бўлган Iran Aircraft Manufacturing Industries Corporation (HESA) ни санкция рўйхатига киритди. Бу ҳақда “ЕИ расмий журнали”да ёйинланган хабарномада айтилган.

Мазкур корпорация ҳарбий ва фуқаровий учоқлар ҳамда Россия томонидан сотиб олинаётган учувчисиз аппаратлар ишлаб чиқаришга ихтисослашган.

ЕИ қайдича, “HESA Украинанинг ҳудудий яхлитлиги, суверенитети ва мустақиллигига путур етказаётган ёки таҳдид солаётган хатти-ҳаракатларни дастаклаётгани учун масъулдир”.

Қозоғистонда бир миллиондан зиёд одам ўзини банкрот деб эълон қилиши мумкин

Иллюстратив сурат

Қозоғистонда “Фуқароларнинг тўловчанлигини тиклаш ва банкротлиги тўғрисида”ги қонун кучга кирганидан кейин бир миллиондан зиёд киши ўзини банкрот деб эълон қилиши мумкин. Бу ҳақда 30 январь куни Марказий коммуникациялар хизматида ўтган брифинг чоғида молия вазирининг ўринбосари Ержан Биржанов маълум қилган.

“Кўпи билан 1 миллион 100 минг тушиши мумкин. Бироқ бу банкротликка тушган одамларнинг максимал сонидир. Биро бу иш ихтиёрий ва мен аминманки, фуқароларимизнинг кўпчилиги “банкротлик”нинг қора тамға эканини ҳисобга олиб, оқилона қарор қабул қилади”, дея иқтибос келтирган Биржанов сўзларидан Озодликнинг қозоқ хизмати.

Мулозимга кўра, мазкур мақом билан қарздор 7 йилгача юради, янги кредитни эса киши “банкрот” деб топилганидан кейинги 5 йил ичида ололмайди.

Вазир ўринбосари январь ойи бошига кўра мамлакатда 10 минг чоғли одам банкротликка даъвогар эканини қўшимча қилган.

Брифингда ўзини банкрот деб топилишига қарор қилган шахс ярим йил ичида Қозоғистонни тарк этиш ҳуқуқидан маҳрум этилиши ҳам билдирилган.

Покистондаги масжидда содир бўлган портлаш оқибатида ўнлаб одам ҳалок бўлди

Покистоннинг Пешовар шаҳрида 30 январь куни худкуш шахс масжидда портлаш мосламасини ишга туширган. Бу ҳақда Associated Press агентлиги мамлакат расмийларидан олинган маълумотга таянган ҳолда хабар қилди. Нашр манбалари ҳодиса чоғида 20 дан зиёд одам ўлгани, 100 га яқин киши жароҳатланганини айтганлар. Бошқа нашрлар эса портлаш оқибатида камида 28 киши ҳалок бўлганини қайд этмоқдалар.

Reuters агентлигининг ёзишича, ҳужум ортидан касалхонага 90 нафар ярадор етказилган, улардан айримларининг аҳволи ёмон экани айтилмоқда. Агентлик ҳодиса қурбонлари сони 32 нафарга етганини хабар қилган.

Портлаш масжид яқинидаги полиция бўлими ходимлари дохил 150 нафарга яқин киши намоз ўқиётган пайтда содир бўлган. Гувоҳларга кўра, портлаш натижасида масжид томи қулаб тушган. Бино вайроналари остида яна жабрланганлар бўлиши тахмин қилинмоқда.

Мазкур террор хуружи учун масъулиятни ҳали ҳеч бир гуруҳ ўз зиммасига олганича йўқ.

Ҳайбар-Пахтунхва вилоятининг маркази бўлмиш Пешовар шаҳри Афғонистон билан чегарада жойлашган. AP қайдича, бу ерда жангарилар тез-тез террор хуружларини уюштириб туришади.

Ўтган йилнинг ноябрь ойи охирида “Таҳрики-Толибон Покистон” гуруҳи (АҚШ, Британия ва Канада томонидан террор ташкилоти ўлароқ тан олинган) Покистон ҳукумати билан келишилган оташкесим тартибини бундан буён тан олмаслиги ҳамда ўз жангариларига бутун мамлакат бўйлаб террор хуружлари содир этишни буюрганини эълон қилган эди.

Чехияда истеъфодаги генерал Петр Павел президентликка сайланди

Петр Павел 2015-2018 йилларда НАТО Ҳарбий қўмитасининг раҳбари бўлган.

Чехияда 28 январь куни президентлик сайловининг иккинчи босқичи якунланди. Унда истеъфодаги генерал Петр Павел ғалаба қилгани билдирилди.

Сайловнинг иккинчи босқичида рақиб бўлган Чехия собиқ бош вазири Андрей Бабиш 42 фоиз, Павел 58 фоиз овоз олган.

Павел Милош Земаннинг ўрнини эгаллайди. Земан узоқ вақт Европа Иттифоқидаги Россияга мойил бўлган сиёсатчи сифатида кўрилган. Аммо Россия Украинага бостириб кирганидан сўнг у Москвага нисбатан муносабатини кескин ўзгартирган.

Петр Павел 2015-2018 йилларда НАТО Ҳарбий қўмитасининг раҳбари бўлган. Унга қадар беш йил давомида Чехия армияси бош штабининг бошлиғи лавозимида ишлаган. Павел ғарбпараст сиёсатчилардан бўлиб, Россиянинг Украинага бостириб кириши борасида қатъий позицияда туради. Уни асосан ўнгчилар, консерватив ва либерал қарашдагилар қўллайди.

Павел март ойлари бошларида қасамёдга келтирилганидан сўнг президентлик лавозимини бажаришга киришади.

Павелнинг асосий рақиби бўлган миллиардер Андрей Бабиш Чехиянинг собиқ бош вазиридир. У ҳозирда ANO мухолифат партияси лидеридир. Сайлов арафасида суд уни Европа Иттифоқи дотациялари билан товламачилик қилганлик юзасидан очилган жиноят иши доирасида оқлади. Уни асосан пенсионерлар ва кам даромадли сайловчилар қўллади.

Сайловнинг биринчи босқичи 13 ва 14 январда ўтказилган эди. Ўшанда Бабиш ҳам, Павел ҳам етарли даражада овоз ололмаганди.
Чехия парламент республикаси бўлиб, унда президент ваколатлари унчалик катта эмас. Аммо анъанавий тарзда президент катта таъсир кучига эга.

Петр Павел 1993 йилда Чехословакия иккига бўлинганидан сўнг ўтган даврда Чехиянинг тўртинчи президенти бўлди. Бунга қадар собиқ диссидент ва драматург Вацлав Ҳавел (1993–2003), иқтисодчи профессор ва собиқ бош вазир Вацлав Клаус (2003-2013) собиқ бош вазир Милош Земан (2013–2023) президент бўлган. 2013 йилгача Чехияда президент парламент томонидан сайланар эди. Кейин президент умумхалқ сайловида сайланадиган бўлди.

Украина мудофаа вазири: Бизга қирувчи самолётлар ва узоққа отиладиган ракеталар керак

F-16 қирувчи самолётлари.

Украина мудофаа вазири Алексей Резников Ғарб давлатлари Киевга танклар етказиб бериш қарорини қабул олганидан бир неча кун ўтгач, Канаданинг CBC телеканалига берган интервьюсида, Украинага қирувчи самолётлар ва узоқ масофага отувчи ракеталар ҳам ўта зарурлиги тўғрисида гапирди.

Сўнгги кунларда президент Владимир Зеленский ҳам Ғарб давлатларини Украинага ҳарбий самолётлар ва узоқ масофага отилувчи ракеталар етказиб беришга чақириб келаётган эди.

“Бугун иложиси бўлмаган нарсанинг эртага иложиси топилади”, - деди Резников Ғарб дастлаб Украинага танклар ва ҳаводан мудофаа тизими етказиб беришга тайёр бўлмаганини назарда тутган ҳолда.

Вазир Ғарбдан олинаётган қуроллардан Россиянинг халқаро тан олинган ҳудудига зарба берилмаслигини алоҳида таъкидлади.

АҚШ матбуоти Вашингтон ва НАТО Украинага F-16 қирувчи самолётларини етказиб беришни муҳокама қилаётгани тўғрисида ёзмоқда. Германия канцлери Олаф Шольц 29 январда Украинага қирувчи самолётлар етказиб бериш эҳтимолий мавжуд эмаслигини айтди. Италия мудофаа вазири ҳам Украинага ҳужумкор ҳарбий техника берилишига қарши эканини билдирди.

Аввалроқ Британия, АҚШ, Германия каби қатор ғарб давлатлари Украинага танклар етказиб беришга розилик билдирганди.

Давомини ўқинг

XS
SM
MD
LG