Ўзбекистон президенти Шавкат Мирзиёев 25 октябрь куни Туркияга икки кунлик давлат ташрифини бошлади. Бу Ўзбекистон давлат раҳбарининг сўнгги 18 йилда Туркияга илк сафаридир. Ўзбекистоннинг аввалги президенти Ислом Каримовнинг вафоти ортидан Анқара ва Тошкент ўртасида борди-келдиларнинг жонлангани кузатилмоқда.
Ўзбекистон президенти Шавкат Мирзиёев Туркия президенти Ражаб Тоййиб Эрдўғон таклифига биноан 25 октябрь куни расмий сафар билан Анқарага келди.
Ўзбекистон президенти матбуот хизматининг хабар қилишича, Анқара шаҳрида бўлиб ўтган олий даражадаги музокаралар чоғида Ўзбекистон ва Туркия ўртасида сиёсий, савдо-иқтисодий, инвестициявий, транспорт-коммуникация ва бошқа соҳалардаги ҳамкорликни кенгайтириш, глобал ҳамда минтақавий таҳдид ва хатарларга қарши биргаликда курашиш масалалари муҳокама қилинади, халқаро муаммолар юзасидан фикр алмашилди.
Ш.Мирзиёев бошчилигидаги ўзбек делегацияси 26 октябрь куни Истанбулда туркиялик тадбиркорлар билан учрашувлар ўтказмоқда.
Ўзбекистон президенти оҳирги марта Туркияга 1999 йил бошида сафар қилган эди.
Туркия 1991 йилда биринчилардан бўлиб Ўзбекистон мустақиллигини тан олган эса-да 90-йиллар ўрталарида икки мамлакат орасидаги муносабатлар совиди.
Мухолифат лидерлари Муҳаммад Солиҳ ва Абдураҳим Пўлатовларнинг Туркиядан бошпана топиши ортидан Ислом Каримов Туркиядан юз ўгиришни бошлади.
Туркияда таҳсил олаётган юзлаб ўзбекистонлик талаба мажбуран ватанга қайтарилди.
2011-12 йилларда эса Туркиянинг Ўзбекистондаги ширкатларига қарши Тошкент кенг кўламли кампания бошлади.
Туркиялик элликдан ортиқ тадбиркор ҳибсга олинди, турк ширкатлари ёпилди.
Президент Ислом Каримовнинг 2016 йил сентябрдаги вафоти ортидан Анқара ва Тошкент ўртасида борди-келдиларнинг жонлангани кузатилмоқда.
