Бенямин Нетаняху: "Биз урушдамиз"
Фаластиннинг исломий ҲАМАС гуруҳи шанба куни Исроилга сўнгги йиллардаги энг йирик ҳужумини амалга оширди, ўнлаб одамлар ўлган ва Ғазо секторидан ракеталар отилар экан, қуролланган жангарилар Исроилга ўтди, деб хабар беради Reuters агентлиги.
Исроил томони Эрон томонидан қўллаб-қувватланган гуруҳ уруш эълон қилганини маълум қилди. Исроил армияси эса Ғазо сектори яқинидаги Исроилнинг бир қанча шаҳарлари ва ҳарбий базаларида жангарилар билан жанг кетаётганини тасдиқлаган. Бош вазир Бенямин Нетаняху эса бунинг учун жавоб қайтаришга ваъда берди.
"Душманимиз тушига ҳам кирмаган товон тўлайди, – деди у. – Биз урушдамиз ва унда ғалаба қозонамиз."
Исроилнинг N12 News нашри камида 100 исроиллик ҳалок бўлганини хабар қилди. Reuters фотографи жанубдаги Сдерот шаҳри кўчаларида ётган бир нечта жасадни кўрган.
Исроил ҳарбийлари Ғазо секторига ҳаво ҳужумлари билан жавоб берганини, гувоҳлар катта портлашлар эшитилгани ва кўплаб ўлик ва ярадорлар шифохоналарга етказилганини маълум қилган. Исроил ҳарбийлари билдиришича, денгиз флоти Исроилга денгиз орқали кирмоқчи бўлган ўнлаб фаластинлик жангариларни ўлдирган.
ҲАМАС раҳбари ўринбосари Солиҳ ал-Арурийнинг Ал-Жазира телеканалига айтишича, гуруҳ кўп сонли исроиллик асирларни, жумладан, юқори мартабали амалдорларни ушлаб турибди. Унинг сўзларига кўра, ҲАМАСда Исроилни ўз қамоқхоналаридаги барча фаластинликларни озод қилишга мажбурлаш учун етарлича асир бор.
N12 ва Reshet 13 нашрларига кўра, ҳарбийлар Ғазо секторида исроилликлар асирда ушлаб турилгани ва аскарлар ҳалок бўлганини тасдиқлаган.
Ғазо соғлиқни сақлаш расмийлари билдиришича, ҳаво ҳужумларида 198 фаластинлик ҳалок бўлган.
ҲАМАС ҳужумга Исроилнинг Ғарбий Соҳил Қуддусдаги ва Исроил қамоқхоналаридаги фаластинликларга қарши муносабати сабаб бўлганини айтди.
"Бу ер юзидаги сўнгги ишғолга барҳам бериш учун катта жанг куни", деди ҲАМАС ҳарбий қўмондони Муҳаммад Деиф операция ҳақида эълон қилар экан ва барча фаластинликларни жанг қилишга чақирди.
ҲАМАС Исроилни йўқ қилишни истайди.
Ғазо секторидан чегарани кесиб ўтган номаълум сонли ҲАМАС жангариларининг Исроилга мисли кўрилмаган даражада кириб келиши кузатилган.
“Исломий жиҳод” жангари гуруҳи ҳужумларга қўшилганини ва бир неча исроиллик аскарни асирда ушлаб турганини айтди. ҲАМАСнинг Telegram’даги каналида тарқатилган видеода жангчилар исроиллик аскарларни танкдан чиқараётгани акс этган.
Исроил матбуоти Исроил жанубидаги шаҳарларда Фаластин жангарилари тўдалари ва хавфсизлик кучлари ўртасида отишма бўлганини хабар қилди. Исроил полицияси раҳбари айтишича, Исроил жанубида "21 фаол саҳна" мавжуд.
Ғазо секторида одамлар яқинлашиб келаётган тўқнашув кунларини кутиб, зарурий маҳсулотларни сотиб олишга шошмоқда. Баъзилар уйларини ташлаб, бошпаналарга кетган.
Бирлашган Миллатлар Ташкилотининг Яқин Шарқдаги тинчлик элчиси Тор Веннесленд Исроилга қилинган ҳужумларни қоралаб, “Бу хавфли жар ва барчани ундан чекинишга чақираман” дея огоҳлантирди.
Зўравонликлар Вашингтон ва бошқа Ғарб мамлакатлари томонидан ҳам қораланди.
“АҚШ ҲАМАС террорчиларининг Исроил фуқароларига қарши асоссиз ҳужумларини сўзсиз қоралайди. Терроризмни ҳеч қачон оқлаб бўлмайди”, деди Оқ уй Миллий хавфсизлик кенгаши матбуот котиби Эдриен Уотсон.
Ғазо сектори яқинидан N12 News’га гапирган Дорин исмли аёл қуролланган шахслар унинг уйига кириб, у яширинган бомбапаноҳни очишга уринганини айтди.
"Улар яна келишди, илтимос, ёрдам юборинг, – деди у. – Кўп уйларни вайрон қилишди... Эрим эшикни беркитиб қўйди”.
Исроил мудофаа вазири Галлант “қўшинлар исталган жойда душманга қарши курашади” деди ва заҳирадагиларни чақиришга рухсат берди.
Ижтимоий тармоқларда тарқалаётган кадрларда шаҳар кўчаларидаги тўқнашувларни, шунингдек, жипларда юрган қуролланган одамлар қишлоқларда кетаётганини кўриш мумкин.
"Бизга киббутз ичида террорчилар борлигини айтишди, отишма овозини эшитяпмиз", деди Киббутз Биридан бўлган Двир исмли ёш аёл Исроил армияси радиосига.
ҲАМАС оммавий ахборот воситалари Ғазога олиб келинган исроиллик аскарлар жасадлари ва Исроил уйларида фаластинлик юрган жангарилар акс этган видеоларни намойиш этди.
Reuters бу кадрларни дарҳол тасдиқлай олмаган.
Ғазо секторида ракета отилгани овозлари эшитилган ва аҳоли жанубдаги Хон Юнис шаҳри яқинида Исроил билан ажратувчи девор бўйлаб қуролли жангарилар кўп ҳаракатланаётганини кўрганини айтишди.
Ғазодаги фаластинликлар Исроилнинг жавоби ҳужумига тайёрланмоқда.
"Қўрқяпмиз", деди фаластинлик аёл Амал Абу Дакка Хон Юнисдаги уйини тарк этар экан.
Саудия Арабистони ташқи ишлар вазирлиги “исроилликлар ва фаластинликлар ўртасидаги зўравонликни зудлик билан тўхтатишга” чақирди, дея хабар беради мамлакат ахборот агентлиги.
Эрон томонидан қўллаб-қувватланган Ливаннинг Ҳизбуллоҳ гуруҳи бу операция “Исроилнинг давом этаётган ишғолига кучли жавоб ва Исроил билан муносабатларни нормаллаштиришга интилаётганларга сигнал” эканини айтди.
Эрон олий раҳбари Али Хоманаийнинг маслаҳатчиси фаластинлик жангариларни ҳужум билан табриклади.
Маҳмуд Аббос: "Фаластин халқининг ўзини ҳимоя қилишга ҳаққи бор"
Фаластин мухторияти раҳбари Маҳмуд Аббос “босқинчи қўшинлар”дан ўзини ҳимоя қилишга Фаластин халқининг ҳаққи борлигини айтди.
Ўз навбатида Саудия Арабистони ТИВ зудликда исроилликлар ва фаластинликлар ўртасидаги можарони кескинлаштиришни бас қилишга чақирди. Мамлакат вазият ривожланишини диққат билан кузатиб турибди, дейилади маҳкама баёнотида.
Теҳрон Фаластин қуролли гуруҳларини қўллаб-қувватлади. Бу ҳақда Эрон олий раҳбарининг маслаҳатчиси Раҳим Сафавий маълум қилди.
Сурия президенти Башар Асаднинг Facebook'даги расмий саҳифасида Фаластин гуруҳларига хайрихоҳлик билдирилган пост эълон қилинди.
Қатар ТИВ барча томонларни можарони оловлантиришни бас қилишга чақириб, юз бераётган воқеалар учун Исроилни айблаб чиқди.
Зеленский исроилликларга ҳамдардлик билдирди
Украина президенти Владимир Зеленский исроилликлар қурбон бўлгани муносабати билан ҳамдардлик билдирди.
“Дунёнинг ҳеч қаерида террорга ҳеч бир имконият бермаслик керак, зеро террор шунчаки бир мамлакат ёки муайян қурбонларга қарши эмас, балки инсонийликка ва сиз билан биз яшаётган бутун оламга қарши жиноятдир”, деб ёзди Зеленский Telegram'да.
Ғарб давлатлари ҲАМАСнинг Исроилга ҳужумини қораламоқда. Туркия ва Россия томонларни босиқликка чақирди
Президент Байден Қўшма Штатлар Исроилни сўзсиз қўллаб-қувватлашини билдирди.
У Бош вазир Бенямин Нетаньяху билан телефонда суҳбатлашгани ва Исроил халқи ва ҳукуматиги дастаклаш учун барча зарур воситаларни тақдим қилишларини айтди.
"Қўшма Штатлар Ғазодаги ҲАМАС террорчилари томонидан Исроилга қилинган бу даҳшатли ҳужумни сўзсиз қоралайди", дейилади президент Байденнинг баёнотида.
Европа Иттифоқи ташқи сиёсат маҳкамаси раҳбари Жозеп Боррел, Брюссел Исроилда бўлаётган воқеаларни хавотир билан кузатиб турганини айтди. “Биз ҲАМАС ҳужумини мутлақо қоралаймиз”, деб ёзди Боррел Twitter'да. Мулозим ЕИ номидан Исроил билан бирдамлигини билдирди.
Германия ташқи ишлар вазири Анналена Бербок Ғазо бўлгаси томондан Исроилга бўлган ҳужумни қоралаб, тинч аҳолига нисбатан зўравонликларни дарҳол бас қилишга чақирди. “Биз тамомила Исроил билан бирдаммиз”, урғулади Бербок.
“Буюк Британия ҲАМАСнинг Исроил фуқароларига даҳшатлиҳужумларини сўзсиз қоралайди. Буюк Британия Исроилнинг ўзини ҳимоя қилиш ҳуқуқини ҳамиша қўллаб-қувватлайди”, деб ёзди Twitter'да Буюк Британия ТИВ раҳбари Жеймс Клеверли.
Туркия президенти Ражаб Тоййиб Эрдўғон ҳамда Россия ТИВ қуролли можаро тарафларини босиқликка чақирди. Россия ТИВ расмий вакили Мария Захарова можарони фақат сиёсий-дипломатик воситалар билан бартараф этиш мумкинлигини таъкидлади.