Ўзбекистон Экология вазирлиги ҳозирча Чорвоқ сув омборидаги баҳсли Sea Breeze Uzbekistan курорти лойиҳаси бўйича расмий ҳужжатларни қабул қилиб олмаган.
Бу ҳақда вазир Азиз Абдуҳакимов 23 июль куни Тошкентда бўлиб ўтган матбуот анжуманида маълум қилди. У жамоатчиликни танқид қилишдан аввал лойиҳа билан тўлиқ танишишга чақирди ва уни жамоатчилик муҳокамасига қўйишга ваъда берди.
«Ҳозир бизга бу ҳақда фақат норасмий, оғзаки маълумотлар келаётгани айтиляпти. Шунинг учун биз сўрадик: ҳужжатларни расман келтиришсин. Ҳужжатлар бўлса, шунда — қурилиш вазирлиги, сув хўжалиги вазирлиги, тегишли инспекциялар, Экологик экспертиза маркази ва бошқа барча мутасадди идоралар ўз таклиф ва фикрларини билдириши мумкин», — деди Абдуҳакимов.
«Келинг, аввал таклифнинг ўзига қарайлик, кейин “йўқ” деймиз. Лойиҳа нима эканини кўрмасдан туриб рад этиш менимча ақлга тўғри келмайди», — дея қўшимча қилди у.
Sea Breeze Uzbekistan лойиҳаси ортида озарбайжонлик девелопер Эмин Агаларов турибди — у Озарбайжон президенти Илҳом Алиевнинг собиқ куёви. Агаларовнинг билдиришича, лойиҳани Чорвоқда амалга ошириш ғояси Ўзбекистон президенти Шавкат Мирзиёевдан чиққан. Абдуҳакимов Тошкентдаги матбуот анжуманида бу девелоперни Ўзбекистон томони таклиф этганини амалда тасдиқлади.
«Бу девелоперни Ўзбекистонга таклиф қилишган, чунки унда тажриба бор, — деди вазир. — Унда жуда катта истак ҳам йўқ, чунки минглаб таклифлар олаётган одам.»
Sea Breeze Uzbekistan қурилиши лойиҳаси 2024 йил декабрида президент Шавкат Мирзиёевга тақдим этилган. Лойиҳага кўра, 500−700 гектар майдондаги ҳудудни қамраб олувчи ушбу марказда дам олиш зоналари, пляжлар, спорт майдончалари, меҳмонхоналар, коттежлар, турар жой мажмуалари, шунингдек, дўконлар, ресторанлар, мактаблар, аквапарк ва ҳордиқ боғларини ўз ичига олган қурилиш ишлари кўзда тутилган.
Лойиҳа Ўзбекистон жамоатчилиги орасида кенг муҳокамаларга сабаб бўлди. Танқидчиларнинг фикрича, Тошкентнинг 4 миллиондан ортиқ аҳолиси учун ичимлик суви манбаи бўлган Чорвоқ сув омбори қирғоғида қурилиш ишлари маҳаллий экотизимни йўқ қилиши мумкин.
Шу каби эътирозларга жавобан, лойиҳа вакиллари Ўзбекистон қонунчилигига тўлиқ риоя қилинишини, экологик экспертиза ва бошқа зарур ҳужжатлар якунланмасдан ҳеч қандай қурилиш бошланмаслигини таъкидлашди. Agalarov Development компанияси маълум қилишича, ҳозирча объект ҳудудида фақат чиқиндиларни тозалаш ишлари амалга оширилмоқда.
Ўзбекистон расмийлари бундан аввал Россия билан қурилиши режаланаётган зиддиятли АЭС лойиҳаси қурилиши юзасидан жамоатчилик тинглови ўтказишни ваъда беришган, аммо ҳозиргача бирон муҳокама ўтказилгани маълум эмас.
Форум