Линклар

Шошилинч хабар
29 сентябр 2022, Тошкент вақти: 19:05

Халқаро хабарлар

Британия Россия адлия вазирига ва Алишер Усмоновнинг жиянларига санкция жорий қилди

Алишер Усмоновга 2022 йил мартида санкциялар жорий этилган.

Британия Россия Украинага бостириб кириши муносабати билан санкция эълон қилинган шахслар рўйхатини кенгайтирди. Рўйхатга яна 42 киши, жумладан, адлия вазири Константин Чуйченко, миллиардер Алишер Усмоновнинг икки жияни ва Россия вилоятларининг 29 раҳбари киритилди.

Британия ҳукуматининг билдиришича, Усмоновнинг жиянлари Санжар ва Сарвар Исмоилов Лондоннинг энг қиммат икки туманида қатор турар жой биноларига эгалик қилади. Улар Усмоновнинг синглиси Гулбаҳор Исмоилованинг ўғилларидир.

Бундан ташқари Россия ҳукуматининг Sputnik International ахборот агентлиги бош муҳаррири Антон Анисимов ва Россиянинг RT ва “Звезда” телеканаллари билан ҳамкорлик қилувчи британиялик видеоблогер Грэм Филлипсга ҳам санкциялар жорий этилди.

Рўйхатга киритилганларнинг Британиядаги активлари музлатилади. Британия санкциялари офшор ширкатларни рўйхатга олувчи қатор давлатлар адлия тизими томонидан, жумладан, Мэн оролида мажбурий ҳисобланади.

Алишер Усмонов Россиянинг Украинага тажовузи ортидан Россиянинг президент Путинга яқин деб ишонилган бошқа олигархлари қаторида ЕИнинг санкциялар рўйхатига киритилган эди.

Санкциялар доирасида миллиардернинг Европа Иттифоқига кириши тақиқланган, Иттифоқ ҳудудидаги активлари эса музлатилган.

Март ойи бошида Франция ҳукумати Алишер Усмоновга алоқадор 2 та вертолётни ҳибс қилди. Шунингдек, Германия ҳукумати Гамбургдаги кемасозлик заводида Алишер Усмоновнинг 600 миллион долларлик “Дилбар” яхтасини тўсиб қўйгани хабар қилинди. Италия нашрлари эса, Сардиниядаги Усмоновга тегишли вилла хатлангани ҳақида хабар берди.

Британия Ташқи ишлар вазирлигининг билдиришича, Алишер Усмонов март ойида ЕИ санкциялар рўйхатига киритилганидан сўнг бир қатор активларини синглиси Гулбаҳор Исмоилова номига ўтказиб берган.

Шундан сўнг Исмоилованинг Британиядаги барча активлари музлатилган ва унга мамлакатга кириш тақиқланган. Гулбаҳор Исмоилова Тошкентдаги Федорович номидаги клиник санаторий акцияларининг 82,1 фоизига ҳам эгалик қилади.

8 апрель куни Европа Иттифоқи Кенгаши Алишер Усмоновнинг яна бир синглиси Саодат Нарзиевани ҳам санкциялар рўйхатига киритди. Коррупция ва уюшган жиноятчиликни ўрганиш маркази (OCCRP) Нарзиева Швейцария банкларидаги умумий қиймати 2 млрд доллардан кўпроқ 27 дан ортиқ банк ҳисобларининг бенефициари экани ҳақида ёзган.

Кун янгиликлари

Россия: Тува марказида мобилизацияга қарши аёлларнинг норозилик акцияси бўлиб ўтди

Қизил шаҳридаги норозилик акциясидан тутиб кетилган аёллар полиция бўлимида

Тува республикаси маркази бўлмиш Қизил шаҳрининг Арата майдонида бир гуруҳ аёл ҳарбий сафарбарликка қарши норозилик намойиши ўтказди. Озодликнинг “Сибирь.Реалии” лойиҳаси хабарига кўра, акцияга чиққан аёллар “Йўқолсин мобилизация” деб қичқиришган.

Норозилик тадбири бошланганидан беш дақиқа ўтар-ўтмас у ерга полиция ходимлари етиб боришган ҳамда 20 га яқин акция қатнашчисини тутиб кетишган.

“Полиция ходимлари сони норозилар сонидан кўпроқ эди”, дея қайд этган акция иштирокчиларидан бири.

Таҳририят тасарруфида бўлган видеода полициячилар уч кишилашиб бир аёлни, майдонни ўзи тарк этишга тайёрлигини айтганига қарамай, куч билан олиб кетаётгани акс этган.

Полиция бўлимида аёллардан шахсий маълумотлар ва бармоқ изларини топширишни талаб қилишаётгани айтилмоқда.

Кремлда 30 сентябрь куни Украинанинг 4 вилоятини аннексия қилишга оид ҳужжатлар имзоланади

Путин Қрим аннексиясига оид ҳужжатларни имзоламоқда, Кремль, 2014 йил марти

Жорий йилнинг 30 сентябрь куни Кремлда “янги ҳудудларнинг Россия таркибига киритилиши” тўғрисидаги шартномалар имзоланади. Бу ҳақда Россия президентининг матбуот котиби Дмитрий Песков маълум қилди.

Бу ерда гап яқинда сохта референдумлар ўтказилмиш Украинанинг ишғол этилган Донецк, Луганск, Запорожье ва Херсон вилоятлари ҳақида бормоқда. Украина ва Ғарб мамлакатлари ҳеч қачон бу аннексияни тан олмасликлари ҳақида билдиришган.

Маълумотларга кўра, Давлат думаси депутатлари жума куни соат 15.00 га Кремлга таклиф этилган. Песковнинг айтишича, ҳужжатлар имзоланишидан аввал Путин депутатлар олдида чиқиш қилади.

Шартномалар айирмачи ЛХР ва ДХР раҳбарлари ҳамда Херсон ва Запорожье вилоятларининг Москва томонидан тайинланган бошлиқлари билан имзоланади. Худди шу каби ҳолат 2014 йил март ойида кузатилган эди – ўшанда Путин депутатлар ва Федерация кенгаши аъзолари олдида чиқиш қилганидан кейин Қрим аннексиясига оид ҳужжатлар имзоланган.

Россия-Қозоғистон чегарасида ҳам кўчма ҳарбий комиссариат пункти ташкил этилади

Россия-Қозоғистон чегарасидаги НЎПлардан бири

Россия-Қозоғистон чегарасидаги “Қараўзек” назорат-ўтказиш масканида яқин кунларда мобилизация пункти очилиши режаланмоқда. Бу ҳақда Астрахань вилоят маъмурияти матбуот хизмати маълумот тарқатди.

Мазкур пунктда чегарадан ўтиш ниятида бўлган эркаклар текширилиб, армияга чақирилиши лозим бўлганларга чақириқ қоғози тарқатилади.

Маҳаллий пабликлар “Қараўзек” масканида шу кунда Қозоғистон тарафга ўтмоқчи бўлган россияликларнинг кўп километрга чўзилган навбати ҳосил бўлгани ҳақида ёзишмоқда.

Аввалроқ кўчма военкоматлар Россия-Грузия ҳамда Россия-Финляндия чегарасида очилиши ҳақида хабар қилинган.

Финляндия 30 сентябрга ўтар кечасидан эътиборан россияликлар учун чегарасини ёпмоқчи

Россия-Финляндия чегараси

Финляндия пайшанбадан жумага ўтар кечаси қўлида Шенген визасига эга бўлган Россия фуқаролари учун чегарасини ёпади. Бу ҳақда Helsingin Sanomat газетаси ўз манбалари маълумотига таянган ҳолда хабар қилди.

Финляндия ҳукумати аввалроқ 29 сентябрь куни россияликлар учун чегарадан ўтиш тартибини кучайтиришга оид масалани кўриб чиқишини билдирган.

Нашр қайдича, Шенген шартномасига қўшилган бошқа мамлакатлар томонидан берилган виза эгаларини ҳам чегарадан ўтказиш тўхтатилади. Бироқ бу ерда айрим истиснолар мавжуд. Россия фуқаролари Финляндияга оилавий шароити, ўқиш ёки иш учун ўтишлари мумкин бўлади.

Шунингдек, газета мамлакатга “мухолифат вакиллари” ҳам ўтказилишини иддао қилган, бироқ бу ерда айнан нима назарда тутилгани очиқланган эмас.

ЕИ мамлакатларида яшаш учун рухсатномаси борлар ҳам Финляндия-Россия чегарасидан ўтказилиши айтилмоқда.

Мазкур тақиқ амалда асосан Россиядан келаётган, шу жумладан Финляндиядан транзит мамлакат сифатида фойдаланаётган туристларга тааллуқли бўлади.

Қирғизистонда таълим вазири йирик миқдорда пора олганликда гумонланмоқда

Алмазбек Бейшеналиев

Қирғизистон таълим ва фан вазири Алмазбек Бейшеналиев ўта йирик миқдорда пора олаётган пайтда қўлга олинган. Бу ҳақда Озодликнинг қирғиз хизмати мамлакат Ички ишлар вазирлиги матбуот хизматидан олинган маълумотга таянган ҳолда хабар қилди.

Вазирлик қайдича, айни пайтда хорижлик талабаларнинг Қирғизистон ОТМларига қабул қилишда йирик миқдорда пора олиш ҳолати бўйича тергов олиб борилмоқда. Бу ерда гап 110 минг АҚШ доллари ҳақида кетаётгани айтилган.

ИИВ вакиллари тергов натижалари бўйича барча маълумотни тақдим этишга ваъда қилганлар.

Алмазбек Бейшеналиев 2020-2021 йилларда Қирғизистон таълим ва фан вазири лавозимида ишлаган. 2022 йил февралидан у яна шу лавозимга тайинланган эди.

Meta: Россия дезинформаторлари Ғарб ОАВларининг сохта сайтларини яратган

Meta трансмиллий технологик корпорацияси Россиянинг дезинформация кампанияси фош этилгани тўғрисидаги ҳисоботни эълон қилди. Ҳисоботда таъкидланишича, россиялик программистлар интернетда Ғарбдаги нуфузли ОАВларникига жуда ўхшаш сохта саҳифаларни яратганлар ва уларда Россия олқишланган материалларни чоп қилганлар. Фейк янгиликлар Facebook, Instagram, Twitter ва бошқа ижтимоий тармоқларда чоп этилган.

Россия дезинформаторлари жаҳондаги 60 дан ортиқ йирик ОАВлар, жумладан, Германиянинг Der Spiegel, Британиянинг The Guardian газеталари ва Италиянинг Ansa ахборот агентлиги сайтларига жуда ўхшаш бўлган сайтларни ишлаб чиқишган. Масалан, The Guardian сохта сайтида Киев яқинидаги Буча шаҳрида тинч аҳолининг қатлиом қилингани инсценировка экани, Der Spiegel сохта сайтида эса Германия ўз фаровонлиги йўлида Россиядан иқтисодий санкцияларни олиб ташлаши шартлиги тўғрисидаги фейк мақолалар чоп қилинган.

Meta фош қилган дезинформация кампанияси апрелдан сентябргача давом этган. Экспертлар ҳисобича, ижтимоий тармоқларда фейк саҳифалар рекламаси учунгина кампания ташкилотчилари камида юз минг доллар сарфлаган.

Аввалроқ ижтимоий тарқмоқларда нуфузли нашрларнинг фейк саҳифалари пайдо бўлгани тўғрисида Германиянинг T-Online нашри эътибор қаратган эди. Германиянинг Welt ва Bild, Франциянинг 20 Minutes ва Британиянинг Daily Mail нашрлари ҳам ўзларининг фейк саҳифаларини топишган.

ОАВ: Путин 30 сентябрда босиб олинган украин ҳудудлари Россияга қўшилганини эълон қилади

Москва марказида 30 сентябрь куни қатор кўчалар ва Кремль атрофидаги ҳудудлар ҳаракат учун вақтинча ёпилади. Бу ҳақда хабар берган Москва транспорт департаменти кўчаларнинг ёпилиши сабабларини айтмаган.

РБК Давлат думаси ва Москва мэриясидаги манбаларига таянган ҳолда, 30 сентябрда пойтахт марказида ҳокимият Украинанинг босиб олинган ҳудудларини Россияга қўшиб олиш борасида халқаро ҳамжамият тан олмаган “референдум”лар натижаларини қўллаб-қувватлашга бағишланган митинг ўтказишини хабар қилди. ТАСС митинг Қизил майдонда ўтишини ва унда президент Владимир Путин иштирок этишини ёзди.

Аввалроқ РИА Новости ўз манбаларига таянган ҳолда 30 сентябрда Путин Давлат думасида Украинанинг тўрт вилоятини аннексия қилинганини эълон этиши кутилаётганини хабар қилганди. Кремль ҳозирча бу хабарларга муносабат билдирмади.

Озодлик радиоси рус хизматининг ёзишича, ўзларини ДХР ва ЛХР деб номлаб олган айирмачи ҳудудлар раҳбарлари ва Россия томонидан босиб олинган ҳудудларга тайинланган оккупацион ҳукумат вакиллари 28 сентябрь куни Москвага етиб келишган.

Озодлик радиоси рус хизматининг билдиришича Россия Давлат думаси 3 октябрда навбатдан ташқари пленар йиғилиш ўтказади ва унда Украинанинг босиб олинган ҳудудларини Россия таркибига қўшиб олиш, яъни аннексия қилиш масаласи кўриб чиқилиши кутилмоқда. Украина, АҚШ, Европа Иттифоқи ва қатор давлатлар аннексияни тан олмасликларини эълон қилди.

23-27 сентябрь кунлари ўзини ЛХР, ДХР деб номлаб олган айирмачи ҳудудларда ва Херсон ҳамда Запорожье вилоятларининг Россия босиб олган ҳудудларида халқаро ҳамжамият “сохта” деб эътироф этган “референдум”лар ўтказилган эди. Босиб олинган ҳудудларга Москва томонидан тайинланган маъмурлар “овоз берганларнинг асосий қисми Россияга қўшилишга розилик бергани”ни иддао қилган.

Беларусда давлат телерадиокомпаниясининг собиқ ходимаси 8 йилга қамалди

Ксения Луцкина

Минск суди Белтелерадиокомпаниянинг (БТРК) собиқ ходимаси Ксения Луцкинани 8 йилга озодликдан маҳрум қилиш ҳақида ҳукм чиқарди. Бу ҳақда “Вясна” инсон ҳуқуқлари ташкилоти маълум қилди.

Луцкина давлат ҳокимиятини эгаллаб олиш мақсадида фитначилар билан тил бириктирганликда (ЖКнинг 357-моддаси) айбланган.

Жиноят иши материалларига мувофиқ, БТРКнинг собиқ ходимаси Мувофиқлаштирувчи кенгаш таркибига кириб, у ерда ахборот тарқатиш фаолияти билан шуғулланган.

Мувофиқлаштирувчи кенгаш Беларусда 2020 йил 9 августида бўлиб ўтган президент сайловидан кейиноқ бир гуруҳ мухолифатчилар томонидан тузилмиш коллегиал ташкилот бўлган.

АҚШнинг Москвадаги элчихонаси ўз фуқароларини Россияни зудлик билан тарк этишга чақирди

АҚШнинг Москвадаги элчихонаси

“АҚШ фуқаролари Россияга бормасликлари керак, у ерда яшаётган ёки саёҳатга борганлар эса, ҳозир тижорат сафарлари учун чекланган имконият бор бўлган бир пайтда зудлик билан Россияни тарк этишлари лозим”, дейилган элчихона томонидан 27 сентябрь куни тарқатилган хабарномада.

Мазкур чақириқ ҳам АҚШ, ҳам Россия паспортига эга бўлган фуқаролар ҳарбий сафарбарликка жалб қилиниши хавфи борлиги билан изоҳланган.

Аввалроқ Болгария, Польша ва Эстония ҳам ўз фуқароларини Россиядан чиқиб кетишга чақирган эди.

Жалолободда вояга етмаган қизга уйланган милиционерга қарши жинояти иши қўзғатилди

Иллюстратив сурат

Қирғизистоннинг Жалолобод вилояти Сузоқ туманида вояга етмаган қизга уйланган милиция ходими ишдан ҳайдалди. Бу ҳақда Озодликнинг қирғиз хизмати Бош прокуратура матбуот хизматидан олинган маълумотга таянган ҳолда хабар қилди.

Қайд этилишича, Сузоқ тумани ИИБсининг 27 ёшли ходими ўтган йил декабрида 16 яшар қизга уйланган. Уларнинг никоҳини маҳалла имоми ўқиб қўйган.

Ҳолат юзасидан прокуратура мамлакат Жиноят кодексининг 175-моддаси (“Диний маросимларни ўтказишда никоҳ ёши тўғрисидаги қонунчиликни бузиш”) бўйича жиноят иши қўзғатилган ҳамда милиция ходими, имом ва келиннинг онасига айблов эълон қилинган. Ҳозирда иш кўриб чиқиш учун Сузоқ туман судига йўллангани айтилмоқда.

Қирғизистон қонунчилигига кўра, бу мамлакатда йигит-қизлар ёши 18 кирганидан кейингина расмий никоҳдан ўтишлари мумкин. 2016 йили вояга етмаганларни никоҳлашни тақиқловчи қонун қабул қилинган. Қонун меъёрларини бузган одамлар 3 йилдан 5 йилгача озодликдан маҳрум этилишлари мумкин.

Россия Афғонистондаги “Толибон” ҳукуматига арзон буғдой ва ёқилғи етказиб беришга рози бўлди

"Толибон" ҳаракати вакиллари сўнгги бир йил ичида Москвага серқатнов бўлиб қолишган

Россия ҳукумати “Толибон” ҳаракати шакллантирган ҳукумат билан Афғонистонга буғдой, суюлтирилган газ, дизель ёқилғиси ва бензин етказиб бериш бўйича келишув тузди. Бу ҳақда Reuters агентлиги “Толибон” ҳукуматида саноат вазири вазифасини бажариб келаётган Нуриддин Азизийдан олинган маълумотга таянган ҳолда хабар қилди.

Азизийга кўра, Россия Афғонистонга ҳар йили 2 миллион тонна буғдой, бир миллион тоннадан солярка ва бензин ҳамда 500 минг тонна суюлтирилган газ етказиб беришга рози бўлган. У етказиб бериладиган маҳсулотлар нархи ҳақида гапиришдан бош тортган, бироқ Москва уларни жаҳондаги нархлардан арзонроқ беришга рози бўлганини қайд этган.

Афғонистоннинг бу товарлар учун қай йўсинда пул тўлаши ҳам аниқ эмас. Мамлакат санкциялар туфайли жаҳон молия тизимидан феълан узиб қўйилган. Москва билан келишув толиблар ўтган йилнинг август ойида ҳокимият тепасига келганидан бери жамоатчиликка маълум бўлган илк йирик шартнома бўлиб ҳисобланади.

“Толибон” ҳаракати Россияда суд ҳукми билан террор ташкилоти ўлароқ тан олинган. Бироқ бу ҳолат Москванинг толиблар билан сиёсий ва иқтисодий жабҳаларда ҳамкорлик қилишига тўсқинлик қилаётгани йўқ.

Қирғизистон ФВВ: Тожикистон билан чегарада қурбон бўлганлар сони 63 нафарга етди

Қирғизистон билан Тожикистон чегарасидаги қуролли тўқнашувлар оқибатида қурбон бўлганлар сони 63 нафарга етган. Бу ҳақда Қирғизистон Фавқулодда вазиятлар вазирлиги маълумот тарқатди.

Вазирлик матбуот хизматига кўра, қурбонларнинг 50 нафарини ҳарбийлар, 13 нафарини эса тинч аҳоли вакиллари ташкил қилган. Тўқнашувлар чоғида 195 киши яраланган.

Аввалроқ Тожикистон Ташқи ишлар вазирлиги чегарадаги можаро чоғида 41 киши нобуд бўлганини маълум қилган. Озодликнинг тожик хизмати эса ўз манбаларидан, ҳалок бўлганларнинг яқинларидан ва маҳаллий ҳокимият идораларидан олинган маълумотга таянган ҳолда тўқнашувда қурбон бўлган 70 кишининг рўйхатини тузган. Нашр мазкур рўйхат якуний эмаслигига эътибор қаратган.

Шу йил 14 сентябридан 17 сентябригача тожик-қирғиз чегарасида қуролли тўқнашувлар кузатилгани ҳақида Озодлик аввалроқ хабар қилган. Томонлар можарода бир-бирларини айблаганлар.

Икки мамлакат ўртасидаги чегара 970 километрга узанган бўлиб, бундан 519 километри аниқланган, қолган қисми эса бўйича эса музокаралар давом этмоқда.

Эрондаги намойишларда камида 60 киши ҳалок бўлди

Эрондаги намойишлардан бири.

Эронда 12 кундан бери ҳижоб тўғрисидаги қонунни бузганликда айбланиб полиция томонидан қўлга олинган Маҳса Аминий ўлими ортидан бошланиб кетган намойишлар давом этмоқда.

27 сентябрда ҳам намойишчилар полиция билан тўқнашгани, кўплаб норозилар қўлга олингани айтилмоқда. Намойишлар Теҳрон, Табриз,Қоража,Қум ва Язд каби кўплаб шаҳарларда давом этмоқда.

Эрондаги Fars ахборот агентлигининг билдиришича, 16 сентябрдан бери намойишлар пайтида полиция билан содир этилган тўқнашувлар оқибатида камида 60 киши ҳалок бўлди.

Ҳуқуқ фаоллари айрим ҳудудларда интернет ўчириб қўйилгани сабабли воқеалар ривожи ва тўқнашувлар тўғрисидаги видеоларни тарқатиш имконияти бўлмаётганини айтмоқда.

Эрон инсон ҳуқуқлари ташкилоти эса камида 76 киши ҳалок бўлгани ва 1200 киши қўлга олинганини билдирди. Tasnim агентлиги қўлга олинган норозилар орасида Эрон собиқ президенти Али Акбар Хошими Рафсанжонийнинг қизи ҳам борлигини ёзди.

22 ёшли Маҳса Аминий Теҳронда ҳижоб тўғрисидаги қонунни бузганликда айбланиб қўлга олинган эди. У қўлга олинганидан сўнг комага тушган ва уч кундан сўнг касалхонада вафот этган.

Европага келаётган россияликлар сони бир ҳафтада 30 фоизга кўпайди (ВИДЕО)

Россия-Грузия чегарасида навбатда турганлар.

Ўтган ҳафтада Россиянинг 66 минг фуқароси Европа Иттифоқи давлатларига кириб келди, бу икки ҳафта олдинги кўрсаткичдан 30 фоизга кўпдир, деб хабар берди Чегараларни назорат қилиш бўйича Европа агентлиги.

Агентлик чегарани кесиб ўтаётган россияликлар сони кўпайганини президент Путин 21 сентябрда эълон қилган қисман сафарбарлик билан боғламоқда. Агентлик ЕИга кириб келганларнинг кўпчилиги Европада яшаш рухсатномаси, шенген визалари ва икки фуқароликка эгалигини таъкидлади.

Аввалроқ "Новая газета. Европа" Россия президенти администрациясидаги манбасига таянган ҳолда, сафарбарлик эълон қилинганидан сўнг мамлакатни 261 минг эркак тарк этгани тўғрисида ёзган. Расман бу хабар тасдиқланмаган.

Аввалроқ Қозоғистон, Ўзбекистон ва Қирғизистонга ҳам Россиядан минглаб эркаклар қочиб ўтгани, бунинг оқибатида минтақанинг катта шаҳарлари, жумладан, Тошкент ва Бишкекда меҳмонхоналарда жой қолмагани, уй ижараси эса ошиб кетгани хабар қилинган.

“Тошкент меҳмонхоналарида жой қолмади” - Россияликлар мобилизациядан қочмоқда
Илтимос кутинг

Айни дамда медиа-манба мавжуд эмас

0:00 0:09:26 0:00

Украинанинг босиб олинган ҳудудларида ўтказилган сохта референдумлар натижалари эълон қилинди

Донецкдаги овоз бериш участкаси.

Айирмачи Донецк вилоят «сайлов комиссияси»нинг билдиришича, овоз беришда қатнашганларнинг 99,23 фоизи Россияга қўшилишни маъқуллаган. Луганск вилоятида 98,42 фоиз, Запорожьеда 93,11 фоиз, Херсон вилоятида 87,05 фоиз сайловчи “Россияга қўшилиш учун овоз берган”.

«Референдум»лар якунланишидан бир неча соат олдин Россия Хавфсизлик кенгаши раисининг ўринбосари Дмитрий Медведев телеграм саҳифасида: «Референдумлар якунланди. Натижалари аниқ. Уйингиз Россияга хуш келибсиз!» деб ёзди.

Украинанинг босиб олинган ҳудудларини Россия таркибига қўшиб олиш масаласи 4 октябрда Федерация кенгашида кўриб чиқилиши кутилмоқда. Аммо ўзини ЛХР деб атаб олган тан олинмаган ҳудуд раҳбари Леонид Пасечник президент Путиндан вилоятни 28 сентябрдаёқ Россияга қўшиб олишни илтимос қилди.

Украина президенти Владимир Зеленский: «Оккупация қилинган ҳудудларда ўтказилган фарсни хатто референдумларнинг имитацияси деб ҳам атаб бўлмайди» , деди. Унга кўра, Украина армияси ҳар қандай шароитда ҳам украин ерларини озод қилишдан воз кечмайди. Зеленский Россия «референдум» натижаларини тан олса, «Путин билан сўзлашадиган ҳеч қандай гапи қолмаслиги»ни айтди.

Ғарб давлатлари Россияни бир неча марта «референдум» натижаларини тан олмасликлари тўғрисида огоҳлантирди. 27 сентябрь куни АҚШ давлат котиби Энтони Блинкен: «Украина ўзининг барча ҳудудларида абсолют даражада мудофаа ҳуқуқига, жумладан, Россия томонидан турли йўллар билан босиб олинган ерларини қайтариб олиш ҳуқуқига эга», деб баёнот берди. Блинкен президент Жо Байденнинг сўзларини такрорлаб, «сохта референдумлар ўтказган Россияга нисбатан қўшимча қатъий санкциялар жорий этилиши»ни айтди.

Ғарб давлатлари «сохта» деб атаётган «референдум»лар 23 сентябрдан 27 сентябргача Украинанинг босиб олинган ҳудудлари («ЛХР», «ДХР», ва Херсон ҳамда Запорожье вилоятларининг бир қисми)да ўтказилди.

Давомини ўқинг

XS
SM
MD
LG