Афғонистон Журналистлар хавфсизлиги қўмитаси 18 январь куни эълон қилган ҳисоботга кўра, 2016 йил - Афғонистонда журналистлар энг кўп ҳалок бўлган йил ўлароқ тарихга кирди. Мамлакатда йил давомида 13 журналист ўлдирилган.
Қўмита журналистларни ўлдириш, уларга ҳужум қилиш, қўрқитиш, қийноққа тутиш ва уларга қарши бошқа ҳужумлар билан боғлиқ камида 101 та ҳолатни аниқлаган. Бу 2015 йилга қиёслаганда 38 фоизга кўпдир.
13 қотилликнинг 10 таси учун толиблар айбланаётган бўлса-да, журналистларга қарши зўравонликдаги ўсишнинг ярмига Афғонистон ҳукумати сабабчи эканлиги айтилмоқда.
Қўмита етакчиси Нажиб Шарафий: “Бу мудҳиш, хавотирга солувчи ва жиддий тенденциядир. Агар муайян чоралар кўрилмаса, 2017 йил бунданда ёмон бўлиши мумкин”, деди.
Афғонистон президенти Ашраф Ғанининг матбуот котибларидан бири журналистларга қарши ҳужумларни ҳукумат эмас, балки алоҳида шахслар амалга ошираётганини айтиб, президент эркин матбуотни қўллашини таъкидлади.
“Мамлакат бўйлаб бирор ерда ҳам журналист қамалгани йўқ. Бош прокурор офиси журналистларга таҳдид солган ёки уларга қарши чора кўрган ҳукумат расмийларини жавобгарликка тортиб келмоқда”, деди котиб.
Ҳисоботга кўра, толиблар 2015 йил охирида жангари гуруҳни кескин танқид қилган журналистларни ўлдиришини айтиб, таҳдид сола бошлаганидан кейин журналистларга қарши ҳужумлар сони ошган.
Ўтган йилнинг январь ойида толиблар Афғонистондаги энг йирик телестанция бўлмиш “Толо” тармоғига ҳужум қилган, натижада бир неча одам ҳалок бўлган эди.
