Украина президенти Владимир Зеленский АҚШнинг аэрокосмик ва мудофаа компанияси Raytheon Patriot ракета-тутқичларни бирга ишлаб чиқаришни йўлга қўйишга қизиқиш билдирганини айтди.
Зеленскийнинг айтишича, Raytheon вице-президенти Жозеф ДеАнтона бошчилигидаги делегация билан бўлиб ўтган музокараларда «ҳужумкор бўлмаган ҳарбий жиҳозларга оид ҳамкорликнинг бошқа йўналишлари» ҳам муҳокама қилинган.
- Сизлар ва буюк компаниянгизнинг барча ходимларидан жуда миннатдормиз. Биз бу ташрифдан, президент Трампдан ва Америка Қўшма Штатлари халқи қўллаб-қувватловидан миннатдормиз. Биз бундай ажойиб муносабатларга эга эканимиздан фахрланамиз ва олдинга янада силжий олишимизга умид қиламан, -деди Украина президенти.
Шу ой Туркияда бўлиб ўтган НАТО саммити чоғида АҚШ президенти Дональд Трамп Вашингтон Украинага Patriot ракета-тутқичларни ишлаб чиқариш лицензиясини беришини айтган эди.
- Raytheon ва RTXни тамсил қилувчи жамоа учун бу сафар ниҳоятда самарали бўлди. Биз Украина халқи ва Украина ҳарбийлари учун ер усти ҳаво мудофааси имкониятларини янада ривожлантириш имкониятларидан жуда мамнунмиз. Шунингдек, Украина учун зарур мудофаа воситаларини тақдим этишни давом эттириш мақсадида сиз, ҳукуматимиз ва АҚШ ҳукумати билан ҳамкорлик қилишни интиқлик билан кутмоқдамиз, - деди Raytheon компанияси вице-президенти.
Украина узоқ вақтдан бери Россиянинг баллистик ракеталарини уриб тушириш учун ҳаво ҳужумидан мудофаа захирасини кўпайтириш борасида Ғарбдаги ҳамкорларидан ёрдам сўраб келмоқда ҳамда лицензия олиш бўйича келишувга эришишга интилмоқда.