Хитой Халқ Республикаси Раиси Си Цзинпин президент Доналд Трамп билан музокаралар чоғида Россия президенти Владимир Путин Украинага бостириб кирганидан охир-оқибат "афсусланиши" мумкинлигини айтган.
Бу ҳақда Пекинда бўлиб ўтган саммит якунлари бўйича Америка томонининг баҳосидан хабардор бир нечта манбага таяниб, Financial Times нашри ёзмоқда.
Хитой раҳбари бу баёнотни Украина масаласи ҳам муҳокама қилинган музокаралар давомида билдирган. Трамп, ўз навбатида, Гаагадаги Халқаро жиноий судга қарши АҚШ, Хитой ва Россия саъй-ҳаракатларини бирлаштиришни таклиф қилган.
Ушбу музокараларнинг бошқа тафсилотлари келтирилмаган. Нашр суҳбатдошларидан бирининг қайд этишича, Си Цзиньпин собиқ президент Жо Байден билан учрашувларида, Россия ва Украина ҳақидаги «очиқ ва тўғридан-тўғри» суҳбатларга қарамай, Путинга ва Украинага қарши кенг кўламли урушга ҳеч қачон баҳо бермаган эди.
Си Цзинпиннинг Путин ҳақидаги ушбу шарҳи Россия президентининг Пекинга уюштирадиган расмий ташрифи олдидан ҳамда фронтда Россия армияси илгарилашининг секинлашиши фонида янграган.
Хитой ТИВ вакили Го Цзякун нашрнинг бу даъвосини «мутлақо ёлғон» деб атади.
Путиннинг ўзи Хитойга ташрифи олдидан йўллаган видеомурожаатида айни пайтда "Россия-Хитой муносабатлари ҳақиқатан ҳам мисли кўрилмаган даражага етганини" маълум қилди.
"Россия ва Хитойнинг яқин стратегик шериклиги дунё майдонида муҳим, барқарорлаштирувчи рол ўйнамоқда. Шу билан бирга, биз кимгадир қарши дўстлашмаяпмиз, балки тинчлик ва умумий фаровонлик йўлида ишлаяпмиз", — деди Россия президенти.
Европа Иттифоқи, АҚШ ва Украинада Хитой Украинага қарши урушни тўхтатиши мумкинлиги бир неча бор таъкидланган.
Украина президенти Владимир Зеленскийнинг фикрича, Хитой Россия армиясига қурол етказиб бермоқда, шунингдек, Россия ҳудудида қуролларнинг айрим турларини ишлаб чиқариш билан шуғулланаётган бўлиши мумкин.
"Агар Хитой ҳақиқатан ҳам бу урушни тугатишни истаса, Москвани босқинни тўхтатишга мажбур қила оларди. Хитойсиз Путин Россияси ҳеч ким эмас. Аммо Хитой тинчлик йўлида фаол ҳаракат қилиш ўрнига, жуда тез-тез сукут сақламоқда ва четда турибди", — деди Владимир Зеленский.
АҚШнинг НАТОдаги элчиси Мэтью Уитакер 2026 йилнинг февралида "Хитой Владимир Путинга қўнғироқ қилиб, бу урушни эртагаёқ тугатиши мумкинлигини" айтган эди.
Шунингдек, у ўшанда Пекин Россияга икки хил мақсадда фойдаланиладиган маҳсулотлар етказиб беришни тақиқлаши ва Россия энергия ресурсларини сотиб олишни тўхтатиши мумкинлигини таъкидлаган.
Форум