Паҳлавий: Ворис тайинлаш уринишлари “муваффақиятсизликка маҳкум”
Эрон сўнгги шоҳининг ўғли, муҳожирликдаги Ризо Паҳлавий X тармоғида Хоманаийнинг ўлими ҳақидаги хабарларга муносабат билдирди:
"Замонамизнинг қонхўр диктатори, Эроннинг энг жасур ўғил-қизларидан ўн минглабини ўлдирган Али Хоманаий тарих саҳнасидан ўчирилди. Унинг ўлими билан Ислом Республикаси амалда ўз ниҳоясига етди ва яқин орада тарих чангига айланади".
Паҳлавийнинг таъкидлашича, режим қолдиқлари томонидан Хоманаий ўрнига ворис тайинлашга бўлган ҳар қандай уриниш бошиданоқ муваффақиятсизликка маҳкумдир.
"Унинг ўрнига кимни қўйишмасин, у на қонунийликка, на узоқ умр кўриш имконига эга бўлади ва шубҳасиз, бу режим жиноятларига шерик бўлади", деб ёзди у.
Эрон ОАВ: Ислом инқилобий қўшинлари бош қўмондони ўлди
Эрон давлат ОАВлари сўнгги зарбаларда Ислом инқилобий қўшинлари (IRGC) бош қўмондони Муҳаммад Пакпур ҳамда Эрон Мудофаа кенгаши котиби Али Шамханий ҳалок бўлганини хабар қилди.
IRNA агентлиги хабарларига кўра, президент, суд ҳокимияти раҳбари ва Қўриқчилар кенгаши аъзосидан иборат янги тузилган вақтинчалик кенгаш олий раҳбар вафотидан кейинги ўтиш даврида раҳбарлик вазифасини ўз зиммасига олади.
Вақтинчалик бошқарув тартиби Эрон конституцияси қоидаларига асосланади ва янги олий раҳбар сайлангунга қадар давлатни бошқаришни назарда тутади.
HRANA: Эронда камида 133 нафар тинч аҳоли ҳалок бўлган
Human Rights Activists News Agency - HRANA тарқатган маълумотга кўра, АҚШ–Исроилнинг Эронга қарши уруши давомида камида 133 нафар тинч аҳоли ҳалок бўлган, 200 нафар фуқаро жароҳатланган.
Агентликнинг қайд этишича, мамлакатнинг 18 вилояти бўйлаб камида 59 та ҳужум рўйхатга олинган ва энг кўп ҳужум Теҳронда қайд этилган.
Маълумотга кўра, ҳужумга нишон бўлган объектлар орасида мактаблар ва болалар ҳамда ўқувчилар билан боғлиқ бинолар бор. Шунингдек, "шаҳар ҳудудлари ва бошқа фуқаровий жойлар, жумладан турар жой маҳаллалари ва иш жойларида" ҳам вайроналар кузатилган.
