Жонли Европа авиакомпаниялари ëқилғи танқислигига дуч келиши мумкин

Америкалик расмийнинг “Озод Европа/Озодлик радиоси”га маълум қилишича, 3 апрел куни Эрон устидан уриб туширилган ҳарбий самолёт экипажининг бир аъзоси қутқарилган. Иккинчи учувчи қидирилмоқда. Яна бир америкалик расмий самолёт икки ўринли F‑15E эканини айтди.

Аввалроқ расмий Теҳрон америкалик учоқ қулатилганини эълон қилиб, экипаж аъзоларини қўлга олган фуқароларга мукофот ваъда қилган эди.

Бу - Эрон билан ҳозирги қуролли тўқнашув бошланганидан бери АҚШ самолёти уриб туширилгани ҳақидаги биринчи маълум ҳолат.

CBS, Reuters ва Исроил ахборот воситалари ҳам америкалик расмийларга таяниб, экипаж аъзоларидан бири қутқарилганини хабар қилди.

Айрим манбаларга кўра, қутқарув операциясида махсус кучлар ҳам иштирок этган. Шунингдек, Эрон ҳаво мудофааси зарбаси натижасида Black Hawk вертолётига зарар етгани, аммо у базасига қайтишга муваффақ бўлгани айтилган.

CBS манбаси кейинроқ учувчи вертолёт орқали эвакуация қилинганини ва вертолёт ердан отилган ўққа дуч келганини тасдиқлади. Экипаж аъзоларидан бири яраланган, лекин вертолёт базасига етиб борган.

Пентагон ва АҚШ Қуролли кучлари Марказий қўмондонлиги ҳозирча самолёт уриб туширилганини расман тасдиқламаган. Оқ уй эса президент Доналд Трамп вазиятдан хабардорлигини маълум қилди холос.

CBS ёзишича, Исроил қутқарув операцияси давомида Эроннинг тегишли ҳудудларига авиаҳужумларни вақтинча тўхтатган.

The New York Times газетаси Форс кўрфази минтақасида яна бир америкалик ҳарбий самолёт қулагани ҳақида жума куни кечқурун хабар берди. Унда ягона учувчи бўлган ва у ҳам қутқарилгани айтилмоқда. Манбаларга кўра, бу A‑10 Warthog учоғи бўлиб, Ҳурмуз бўғози яқинида қулаган. У уриб туширилганми ёки бошқа сабаб билан қулаганми, маълумот берилмаган.

Украинанинг Донецк вилоятидаги Краматорск шаҳрига Россия авиацияси томонидан 3 апрелда берилган зарбалар натижасида олти киши ҳалок бўлди.

Кундуз куни ташланган бомба икки кишини ўлдирган. Кечқурунги ҳужумда яна тўрт киши ҳалок бўлган. Уларнинг бири 16 яшар ўсмир эканини Донецк вилояти ҳарбий маъмурияти раҳбари Вадим Филашкин маълум қилди. Унинг айтишича, шаҳарга тўртта бошқариладиган авиабомба ташланган.

Краматорск - Донецк вилоятида Украина назоратида қолган энг йирик аҳоли пункти ҳисобланади. Фронт чизиғидан тахминан 10–15 километр узоқликда жойлашган бу шаҳар мунтазам равишда ўққа тутилади ва авиаҳужумларга учрайди.

Россия томони бу айбловларга ҳозирча муносабат билдирмади. Одатда Москва Украинада фуқаролик инфратузилмасига қасддан зарба берилаётганини инкор этиб, ҳарбий объектлар нишонга олинишини таъкидлаб келади.

Уруш шароитида хабарларни мустақил текшириш имконияти мавжуд эмас.

Татаристондаги “Нижнекамскнефтехим” заводидаги портлашда ўлганлар сони жума кунги маълумотларга кўра, етти кишига етди. Яна беш киши бедарак йўқолган.

“Сибур Нижнекамск – Нижнекамскнефтехим” компанияси кимё заводи ҳудудида 31 мартда куни юз берган портлашдан кейин 24 киши касалхонага тушганини билдирди. Улар Нижнекамск, Қозон ва Москва шифохоналарига ётқизилган.

Аввалроқ 3 киши ҳалок бўлгани ва 70 дан ортиқ одам жароҳат олгани ҳақида хабар берилган эди. 1 апрель куни Нижнекамскда уч кунлик мотам эълон қилинган.

Расмий маълумотларга кўра, ҳодисага “жихозлардаги носозлик” сабаб бўлган.

“Нижнекамскнефтехим” ПАО СИБУР компаниясига тегишли. Ишхона сайтидаги маълумотга қараганда, у дунёдаги энг йирик синтетик каучук ишлаб чиқарувчилардан бири ҳисобланади. Шунингдек, у Россия саноат вазирлиги ҳарбий-саноат корхоналари рўйхатига киритилган.

Дунёнинг кўплаб мамлакатларида, жумладан Украинада ҳам Пасха диний байрами нишонланаётган айни дамда рус армиясининг ҳужумлари тўхтамади.

3 апрел куни Херсон вилоятида микроавтобусга қилинган ҳужумда етти киши яраланган. Вилоят прокуратураси маълумотига кўра, дрон Днепровский туманидаги микроавтобусга портловчи модда ташлаган.

Шунингдек, Пасха арафасидаги Қутлуғ жума кечаси Россия қўшинлари Харков, Киев вилояти ва бошқа ҳудудларни ҳам ҳужумга тутди. Натижада уйларга, боғларга ва савдо марказларига зарар етгани хабар қилинмоқда. Суми вилоятидаги Шостка шаҳрига ташланган тўртта авиабомба оқибатида 59 ёшли аёл ҳалок бўлгани, унинг қариндошлари яралангани айтилмоқда.

Россия томони бу айбловларга ҳозирча муносабат билдирмади. Одатда Москва Украинада фуқаролик инфратузилмасига қасддан зарба берилаётганини инкор этиб, ҳарбий объектлар нишонга олинишини таъкидлаб келади.