Трамп Эронга қарши амалиёт икки-уч ҳафтада якунланиши мумкинлигини билдирди
АҚШ президенти Доналд Трамп Америка ва Исроилнинг Эронга қарши олиб бораётган ҳарбий амалиёти яна “икки–уч ҳафта” ичида якунланиши мумкинлигини билдирди. У Оқ уйда журналистлар билан мулоқот чоғида бунинг учун Эрон билан тинчлик келишуви шарт эмаслигини айтди. Трампга кўра, Эрон “тош даврига қайтарилгани” ва ҳеч қачон ядровий қуролга эга бўла олмаслиги аён бўлса, АҚШ зарбаларни тўхтатади.
“Биз ишни охирига етказамиз. Бу тахминан икки ҳафта, балки бироз кўпроқ вақт олиши мумкин. Уларда бор нарсанинг барчасини йўқ қилишни истаймиз”, - деди у.
Аввалроқ Трамп АҚШ Эрон билан музокаралар олиб бораётгани ва “келишув”га яқин эканини айтган, ҳатто буни Эроннинг ўзи сўраганини таъкидлаган эди. Теҳрон эса буни рад этган, бироқ воситачилар орқали мулоқотлар давом этаётганини тан олган.
Аммо Ҳурмуз бўғози масаласи очиқ қолмоқда. The Wall Street Journal хабарига кўра, Трамп ҳатто бўғоз ёпиқ қолса ҳам, ҳарбий кампанияни тугатишга тайёрлигини билдирган. Шу билан бирга, Бирлашган Араб Амирликлари бўғозни куч ишлатиб очиш ташаббусини қўллаб-қувватламоқда ва БМТда шундай қарор қабул қилиниши учун ҳаракат қилаётгани маълум қилинган.
Эрон сўнгги кунларда ҳужумларни кучайтирган: 31 март куни Амирликлар томон қарийб 50 та ракета ва дрон учирилгани хабар қилинган. Теҳрон Форс кўрфази давлатларини огоҳлантириб, ўз ҳудудига қарши ҳар қандай операция қўллаб-қувватланса, жавоб қаттиқ бўлишини билдирган.
Баҳрайн БМТга кемачилик хавфсизлигини таъминлаш бўйича резолюция киритди. Ҳужжат куч ишлатиш имкониятини ҳам назарда тутади. Овоз бериш 2 апрель куни бўлиб ўтади, аммо Франция бу ташаббус етарли қўллов топмаслиги мумкинлигини билдирган. Париж муросага асосланган, ҳарбий кучни назарда тутмайдиган алтернатив лойиҳани таклиф қилган.
Песков: Зеленский бугуноқ қўшинларини Донбассдан чиқариши керак
Кремлнинг матбуот котиби Дмитрий Песков 1 апрел куни баёнот бериб, Украина президенти Владимир Зеленский Донбассдан қўшинларини олиб чиқиш ҳақидаги қарорни зудлик билан қабул қилиши кераклигини билдирди. Москва шу йўл билан урушнинг “қизғин босқичи”ни тўхтатиш мумкин деб ҳисоблайди.
Бу баёнот Зеленскийнинг бир кун аввалги сўзларига жавоб сифатида айтилди.
“Бу икки ойлик масала эмас. Зеленский бугуноқ Украина қўшинларини Донбасс ҳудудидан чиқариш ва Донецк Халқ Республикасининг маъмурий чегараларидан ташқарига олиб чиқиш тўғрисида қарор қабул қилиши керак. Биз буни бир неча бор айтганмиз. Аслида, Зеленский бундай қарорни кечаёқ қабул қилиши лозим эди. Қайта-қайта таъкидлаганимиздек, у масъулиятни зиммасига олиб, бу оғир қарорни қабул қилиши шарт. Бу кўплаб одамларнинг ҳаётини сақлаб қолиши ва энг муҳими, урушнинг қизғин босқичини тўхтатиши мумкин” - деди Песков.
Украина президенти Владимир Зеленский Россия ҳукумати Украинадан Донбассни икки ой ичида тарк этишни талаб қилаётгани ҳақида 31 март куни айтган. У Бучада шаҳарнинг россиялик оккупантлардан озод этилганига тўрт йил тўлиши муносабати билан ўтказилган мемориал тадбирда сўзлар экан, Россия бу икки ойлик муддат ҳақида АҚШ президенти Доналд Трамп маъмуриятига маълум қилганини билдирган.
Аннексияланган Қримда ҳарбий самолёт қулаши оқибатида 30 киши ҳаётдан кўз юмди
Аннексияланган Қримдаги авиаҳалокат бўйича дастлабки аниқлаштирилган маълумотлар тақдим этилди.
31 март куни оқшомда Қрим ҳудудида Ан-26 русумли ҳарбий-транспорт самолёти қулаб, 30 киши ўлган. Россиянинг Мудофаа вазирлиги маъулмотига кўра, уларнинг етти нафари экипаж аъзоси ва 23 нафар йўловчилар эди.
Самолёт соат 18:00 атрофида режали парвоз вақтида радарлардан йўқолган. Алоқа узилгандан сўнг қидирув-қутқарув гуруҳлари ишга туширилган ва самолёт қолдиқлари тоғли ҳудуддан топилган.
Россия Мудофаа вазирлиги дастлабки сабаб сифатида техник носозликни кўрсатмоқда. Расмий баёнотда самолётга ташқи таъсир ёки зарба бўлмагани таъкидланган. Айрим манбалар самолёт қояга урилиб кетганини билдирмоқда, аммо бу ҳолат юзасидан қўшимча тафсилотлар ҳозирча очиқлангани йўқ. Ҳодиса бўйича жиноят иши қўзғатилган.
Ан-26 самолёти одатда юк, техника ва шахсий таркибни ташиш учун қўлланиладиган ҳарбий-транспорт ҳаво кемаси ҳисобланади.
Зеленский Кремлнинг Донбасс бўйича янги талаблари ҳақида маълум қилди
Украина президенти Владимир Зеленскийнинг айтишича, Россия ҳукумати Украинадан Донбассни икки ой ичида тарк этишни талаб қилмоқда.
“Озодлик”нинг украин хизмати хабарига кўра, Зеленский 31 март куни Бучада шаҳарнинг россиялик оккупантлардан озод этилганига тўрт йил тўлиши муносабати билан ўтказилган мемориал тадбирда сўзлар экан, Россия бу икки ойлик муддат ҳақида АҚШ президенти Доналд Трамп маъмуриятига маълум қилганини айтган.
“Улар Америка томонига янги муддат борлигини айтмоқда: икки ойдан кейин мамлакатимизнинг шарқий қисмини эгаллайди, Донбассни олади. Шунинг учун Украинада чиқиб кетиш учун икки ой вақт бор. Агар Украина чиқмаса, Россия Донбассни эгаллаб, бошқа шартларни қўяди. Мантиқий савол - агар уларнинг мақсади Донбасс бўлса, нима учун Донбассни олгандан кейин ҳам олға юришини айтишмоқда? Демак, масала фақат Донбассда эмас” - деди Зеленский Кремл Россия армияси бу мақсадга эриша олмаслигини яхши тушунишини қўшимчалади.
Шу билан бирга Россия ҳукумати Вашингтонга босим ўтказишда давом этаётганини, бу орқали АҚШни Украинани чекинишга мажбурлашга ундаётганини айтди.
Украина президентининг бу баёнотига Россия томони ҳали жавоб бермаган.
Россия президентининг ёрдамчиси Юрий Ушаков ВГТРК каналига берган интервьюсида Москва тинчлик музокараларида Россия учун фойдали натижага эришиш мақсадида АҚШни Киевга таъсирини кучайтиришга чақирганини айтди. Ушаковнинг сўзларига кўра, АҚШ “фойдали ва қизиқарли бир қатор таклифлар” киритган, аммо улар ҳозирча амалга ошмайди. У қандай таклифлар эканини очиқламаган.
Владимир Зеленский 1 апрелда АҚШ билан урушни тўхтатиш масаласи бўйича икки томонлама видеомулоқот бўлишини маълум қилган.