Норвегия "Беларус" номини расман тан олди
Норвегия ташқи ишлар вазири Анникен Гитфелт Норвегия Беларус номини расман ўзгартирганини маълум қилди.
Энди норвег тилида мамлакат Hviterussland (сўзма-сўз - "Оқ Россия") эмас, балки айнан "Беларус" деб номланади, дея вазирнинг сўзларидан иқтибос келтирди Озодлик радиосининг Беларус хизмати.
"Биз буни Беларус демократик ҳаракати билан бирдамлик белгиси сифатида ва мамлакат Россиянинг давоми сифатида қабул қилинмаслиги учун қиляпмиз", деди вазир.
2019 йилда Швеция ҳукумати ҳам расмий муносабатларда Vitryssland ("Оқ Россия") ўрнига Беларус деб ишлатилишини эълон қилганди. Дания ҳам 2021 йилдан бошлаб мамлакатни расмий равишда Беларус деб аташни бошлади.
Луганск вилоятида эвакуация машинаси ўққа тутилиши оқибатида франциялик журналист ҳалок бўлди
Луганск вилоятида россиялик ҳарбийлар эвакуация машинасини ўққа тутишган, ҳужум натижасида франциялик журналист нобуд бўлган. Бу ҳақда Луганск вилояти ҳарбий маъмурияти раҳбари Сергей Гайдай ўз Телеграм-канали орқали маълум қилди.
Мулозимга кўра, 30 май куни зирҳли эвакуация транспорт вилоятдан 10 кишини олиб кетиш учун келаётганида ўққа тутилган. “Снаряд парчалари машина зирҳини тешиб ўтган, эвакуация ҳақида материал тайёрлаётган аккредитацияли франциялик журналист бўйнидан яраланиб, вафот этган, полиция ходими бўлган қўриқчини эса каскаси қутқариб қолган”, деб ёзган Гайдай.
Кейинроқ ҳалок бўлган журналистнинг Франциянинг BFM TV телеканали мухбири Фредерик Леклерк Имхофф эканига оид маълумот пайдо бўлди.
Ҳодиса Северодонецк шаҳри яқинида содир бўлган. Аввалроқ Россия қўшинлари ва Луганск вилоятидан бўлган россияпараст айирмачилар шаҳарни ишғол қилишга уринаётгани хабар қилинган эди.
Мазкур ҳодиса ортидан, Гайдайга кўра, эвакуация расман тўхтатилган.
Уруш шароитида Озодлик ҳатто расмийлар ва ҳарбийлардан олинган маълмуотни ҳам оператив тарзда текшириш имконига эга эмас.
Херсон шаҳри ва вилоятида Украина мобиль алоқаси йўқолиб қолди
Херсон шаҳри ва Херсон вилоятида Украина мобиль алоқа операторларига уланиб бўлмаяпти. Шунингдек, Украина провайдерларига уланган интернет ҳам йўқолиб қолган.
Херсон вилоят ҳарбий маъмурияти раҳбари Геннадий Лагута алоқа узилишида россиялик ҳарбийларни айблаган.
Шу йилнинг 27 май куни аннексия қилинган Қрим раҳбарининг маслаҳатчиси Олег Крючков Херсон ва Запорожье вилоятларида телефон рақами +7 дан бошланган Россия алоқа оператори ишлай бошлаганини маълум қилган, унинг айнан қайси оператор эканига аниқлик киритган эмас.
Петербург суди қўшиқчи Юрий Шевчукка қарши тузилган баённомани полицияга қайтарди
Санкт-Петербургнинг Дзержинский туман суди рок мусиқачи, ДДТ гуруҳи раҳбари Юрий Шевчукка қарши тузилган баённомани полицияга қайтарди. Баённомада Россия армиясини обрўсизлантиргани учун қўшиқчини жаримага тортиш сўралганди. Суд ҳужжатда Шевчук айнан қайси ҳаракати билан армияни обрўсизлантирганига оид баённи топа олмаган, дея маълум қилган шаҳар судлари матбуот хизмати.
Суд баённомада муҳтамал ҳуқуқбузарлик ҳодисаси очиқланмаган, деган қарорга келган: ҳужжатда Россия армиясидан мамлакат ва унинг фуқаролари манфаатларини ҳимоя қилиш мақсадида фойдаланилишига тўсқинлик қилишга оид чақириқлар айнан нимада акс этгани кўрсатилган эмас.
Тахминларга кўра, полиция Шевчукни қўшиқчининг 18 май куни Уфадаги концертда “Ватан - сўлакни оқизиб, ўпилиши лозим бўлган президентнинг кети эмас” деган сўзлари учун жаримага тортишга уринган.
Концертдан кейин полициячилар парда ортига ўтиб, Шевчукни гуруҳдан иҳота қилиб, гримхона эшигига икки қўриқчи қўйиб, у билан бир соат суҳбат ўтказишган. Кейинроқ мусиқачи ватан ва президент тўғрисидаги бу жумлани биринчи марта айтмаётганини қайд этган.