ЕИ Россия нефтига эмбарго бўйича ягона қарорга келолмаяпти
Европа Иттифоқи мамлакатлари 30–31 май кунларига мўлжалланган саммит арафасида якшанба куни Россия нефтига эмбарго қўйиш масаласи бўйича келишувга эриша олмаган. Бу ҳақда хабар қилган Reuters агентлигига кўра, бу масала бўйича муҳокамани душанба куни эрталаб давом эттириш режаланган.
Reuters агентлиги келишилиши лозим бўлган шартномада йил охиригача Россиянинг ЕИга денгиз орқали нефть етказиб беришига тақиқ жорий этиш кўзда тутилаётган эди. Айни пайтда Венгрия, Словакия ва Чехияни нефть билан таъминловчи Россия қувуридан оқиб келаётган маҳсулот учун истисно киритиш назарда тутилган.
ЕИ саммити арафасида Reuters Германия иқтисодиёт вазири Роберт Хабек сўзларидан ҳам иқтибос келтирган. У Москвага қарши санкциялар масаласида ЕИга аъзо мамлакатлар ўртасидаги бирдамлик чатнай бошлаётганидан хавотир изҳор этган.
“Россиянинг Украинага ҳужумидан кейин ЕИ бир бўлган тақдирда нималар қила олишимиз мумкинлигини ҳаммамиз кўрдик. Эртагалик саммитни назарда тутган ҳолда, бирдамлик сақланиб қолади, деган умиддаман. У қайта-қайта емирила бошлаяпти”, деган Роберт Хабек.
Аввалроқ 29 май куни Bloomberg ва Politico нашрлари ЕИ мамлакатлари лидерларининг саммити олдидан Еврокомиссия нефть эмбаргоси масаласи бўйича муросавий таклиф ишлаб чиққанини хабар қилишган эди.
Европа Иттифоқи бир ойдан буён Украинага бостириб кирган Россияга нисбатан санкцияларнинг олтинчи пакетини маъқуллай олмаяпти. Бунга асосан Венгриянинг тутган позицияси монелик қилмоқда. Россиядан қувур орқали келаётган нефтга эмбарго қўйилиши қарши чиқаётган Будапешт бундай тақиқ ўз иқтисодиётига катта зарар беришини иддао қилмоқда. Муросавий вариант фақат денгиз орқали келаётган Россия нефтига эмбарго жорий этилишини кўзда тутади, бу Венгрия ва ЕИдаги денгизга чиқиши бўлмаган бошқа мамлакатларга аввалгидек Россиядан қувур орқали хом нефть олиш имконини яратади.
Зеленский Харьков вилоятига иш сафари билан борди
Украина президенти Владимир Зеленский 29 май куни Харьков вилоятига иш сфари билан борган. Бу унинг 24 февраль куни Россия томонидан бошлаган кенг кўламли босқин бошидан бери Киев вилояти ҳудудидан илк бор чиқишидир.
Зеленский офиси маълумотига кўра, сафар чоғида президент украиналик ҳарбийлар жанг қилаётган жойларга бориб, уларга давлат мукофотларини топширган. “Сиз бизларнинг ҳаммамиз учун ва мамлакат учун жонингизни хатарга қўйяпсиз”, деган Зеленский ҳарбийларга мурожаат қиларкан.
Шунингдек, у Харьков мэри Игорь Терехов, вилоят ҳарбий маъмурияти бошлиғи Олег Синегубов, армия қўмондонлиги аъзолари ва ҳуқуқ-тартибот идоралари раҳбарлари дохил маҳаллий мулозимлар билан йиғилиш ўтказган.
Президентнинг ташрифи Украина фавқулодда вазиятлар хизмати Россия томонидан ўққа тутилганидан кейин Харьков атрофида ёнғинлар бошлангани ҳақида маълумот тарқатган пайтга тўғри келган. Украина қўшинлари Россия кучларини катталиги жиҳатдан мамлакатдаги иккинчи шаҳар бўлмиш ва асосан рус тилида сўзлашувчи турғунлар яшайдиган Харьков яқинидаги позициясидан чекинтиришга муваффақ бўлгани ортидан россияликлар шаҳарни бомбардимон қилишда давом этишмоқда.
Россияликлар вақтинча эгаллаб олган Херсон вилоятидан Украинанинг бошқа ҳудудларига ўтиш тақиқланди
Херсон вилояти чегараларидан Украина назорати остида бўлган бошқа ҳудудларга ўтиш йўллари ёпиб қўйилди. Бу ҳақда “РИА Новости” агентлиги Россия ҳарбийлари томонидан вилоятга раҳбар ўринбосари этиб тайинланган Кирилл Стремоусовдан олинган маълумотга таянган ҳолда хабар қилди.
“Николаев ва Днепропетровск вилоятлари томонидан чегарадан ўтиш жуда хавфли. Шунинг учун Биз Украинага мутлақо, ҳеч қанақа сабаб билан бормасликни тавсия қиламиз”, деган Стремоусов.
Херсон вилоятидан фақат аннексия қилинган Қрим ёки Запорожье вилоятининг Россия қўшинлари назорат қилаётган ҳудудларигагина чиқиб кетиш мумкин.
Россия қўшинлари 24 февраль куни Украинага бостириб кирганидан кейин Херсон ва Запорожье вилоятлари қисман россияликлар назорати остига ўтган. Бу ерда гап Херсоннинг вилоят маркази дохил катта қисми ва Запорожье вилоятининг тақрибан ярми ҳақида бормоқда. Запорожье шаҳрининг ўзи айни пайтда Украина назорати остида бўлиб турибди.
“Қон доғидан қутулолмаймиз” – россиялик фаол аёллар акцияси
Россиялик фаоллар Наталья Перова ва Людмила Анненкова 29 май куни Москвадаги Россия Ташқи ишлар вазирлиги биноси олдида Украинадаги урушга қарши акция ўтказишган. Бу ҳақда SOTA Телеграм-канали хабар қилди.
Ўз акциясини “Биз қон доғини ювиб кетказолмаймиз” деб номлаган фаол аёллар тадбирга кийимларига қонни тамсил этувчи буёқ суриб келишган.
Маҳаллий пабликларнинг ёзишларича, мазкур норозилик чиқиши ортидан фаоллар қўлга олинган эмас.