Рамзан Қодиров Польшага таҳдид қилди
Чеченистон Республикаси раҳбари Рамзан Қодиров чоршанба куни эфирга узатилган видеолавҳада Полшадан Украинага ҳарбий ёрдамни тўхтатишни талаб қилди.
Унинг даъвосича, Украина “ёпиқ масала”. Поляклар бу можарода Украина томонини қўллаш орқали нимага эришмоқчи экани ҳақида яхшилаб ўйлаб олишлари керак:
"Украина ёпиқ масала. Полшага ҳайронман. Полша нимага эришмоқчи? Агар буйруқ берилса Украинадан кейин, олти сония ичида нималарга қодир эканингизни кўрсатамиз. Қурол-яроғларингиз ва ёлланма аскарларингизни қайтариб олганингиз маъқул ва элчимиздан расман узр сўранг. Биз буни шундай қолдирмаймиз. Шуни ёдда тутинг".
Чоршанба куни Қодиров ўзининг расмий Telegram-каналида эфирга узатилган мурожаатида Полша россиялик дипломатга қилинган ҳужум учун узр сўраши керак, деб ҳам таъкидлади.
9 май куни Россиянинг Варшавадаги элчиси Сергей Андреев Иккинчи жаҳон уруши ёдгорлиги олдига гул қўйиш учун келганида намойишчилар унга қизил суюқлик сепган.
Қодиров Украинадаги вазиятни тез-тез изоҳлаб туради. Чечен аскарлари Украинадаги манзили ва тафсилотлари ноаниқ ҳарбий ҳаракатларда қатнашяпти, деган иддаоли видеоларни тез-тез улашади.
Бироқ бу маълумотларнинг ҳақиқийлиги ёки чечен аскарларининг ҳарбий ҳаракатлардаги иштирокини мустақил манбалардан тасдиқлаш уруш шароитида имконсиз бўлиб қолмоқда.
Херсон ва Запорожье Россиянинг +7 кодига ўтказиляпти
Россия оккупацион маъмурияти, Украинанинг Херсон ва Запорожье вилоятлари телефон тармоғини Россиянинг +7 кодига ўтказаётгани хабар қилинмоқда.
Бу ҳақда аннексия қилинган Қрим раҳбарининг маслаҳатчиси Олег Крючков “РИА Новости” билан суҳбатда маълум қилди.
Унинг сўзларига кўра, босиб олинган украин ҳудудларига янги мобил алоқа оператори кирган. Россиянинг +7 коди билан бошланадиган сим-карталар аллақачон савдога чиқарилгани айтилмоқда.
Приморскда депутатлар урушни тўхтатишни талаб қилди
Приморск ўлкасида қонунчилик кенгашининг бир гуруҳ депутатлари Украинадаги урушни тўхтатишни талаб қилишди.
Кенгаш йиғилиши чоғида КПРФ фракцияси аъзоси Леонид Васюкевич тўрт ҳамкасби номидан Владимир Путинга мурожаат қилиб, урушни тўхтатишни ва Россия қўшинларини Украина ҳудудидан олиб чиқиб кетишни талаб қилди.
Унинг мурожаати видеоёзуви “ВКонтакте” тармоғида ёйинланган.
“Ҳарбий амалиёт тўхтатилмаса, мамлакатимизда етимлар янада кўпайишини барчамиз тушуниб турибмиз. Ҳарбий амалиёт чоғида ёш-ёш йигитлар ҳалок бўлмоқда ёки майиб-мажруҳ бўлиб қолмоқда. Ҳолбуки улар мамлакатимизга катта фойда келтириши мумкин”, деб таъкидлади Леонид Васюкевич, КПРФ фракцияси аъзоси.
Шундан сўнг губернатор Олег Кожемяко Васюкевични хоин, деб атаган ва у билан депутат Геннадий Шульгани залдан ҳайдаб чиқаришни талаб қилган Ўлка раҳбари фикрича, уларнинг сўзлари “Россия армиясини ва нацизмга қарши курашаётган жангчиларни бадном қилади”.
Канн кинофестивалида Донбасда олинган яна бир фильм намойиш қилинди
25 май куни украиналик режиссёр Максим Наконечнийнинг “Капалак кўриниши” деб номланган дебьют фильми Каннда намойиш этилди.
Асарда аскар аёлнинг жароҳатдан кейинги руҳий безовталик ҳолати тасвирланган.
Киевлик режиссёр фильмидаги воқеалар, Украинанинг Донбас вилоятида бошланади.
Бадиий тўқима устига қурилган ҳикояда актриса Рита Бурковска гавдалантирган жангчи аёл - Лилия россияпараст кучлар қўлидан озод қилинади.
"Мен жанг қилаётган аёл-аскарлар ва ветеран-аёллар ҳақидаги ҳужжатли фильмни таҳрир қилиш жараёнида шуни англаб етдимки, аёлнинг нозиклиги ва айни пайтда кучлилиги ўртасидаги парадоксал комбинация туфайли, урушда аёлларнинг ўрни анча кенгроқ экан", дейди режиссёр.
Фильмда, ҳаво разведкаси мутахассиси Лилиянинг асирликда кечирган қийноқлари унинг орзуларини йўққа чиқаради. У душман аскари томонидан зўрланиб, ҳомиладор бўлади. Бундан эса Лилиянинг мағрур эри қаттиқ ғазабланади.
"Уч юз йилдан бери, Россия империяси, Совет Иттифоқи ва бошқаларга қарши ўз озодлигимиз учун, курашиб келамиз. Биз қурбон бўлишни хоҳламаймиз. Биз қаҳрамонлар каби бўлишни хоҳлаймиз. Менимча, энди бу бизнинг характеримизга айланиб бўлди", дейди Бурковска.
Фильм қисман Украина шарқида - Россия чегарасига яқин ҳудудда суратга олинган. Февраль ойида Россиянинг кенг кўламли босқини, Канн фестивалида қатнашаётган украиналик киноижодкорлар асарларидан ўрин олган.
Бу йилги фестиваль танловига “Мариупол 2”, “Памфир” фильмлари ҳам киритилган.