Европа пойтахтларида Россия кунига бағишланган норозилик акциялари бўлиб ўтди
Европанинг бир неча мамлакати пойтахтларида 12 июнь куни асосан россиялик эмигрантлар томонидан Россия куни муносабати билан ташкил этилган урушга қарши акциялар бўлиб ўтди. Лондон, Варшава, Берлин, Хельсинки, Париж, Прага, Вена, Тбилиси ва Ереванда бўлиб ўтган акцияларда 100 нафардан 500 нафаргача одам қатнашган.
Британия пойтахтида бўлиб ўтган кўча юришида россиялик эмигрантлардан ташқари украиналик қочқинлар ва маҳаллий аҳоли вакиллари ҳам иштирок этишган. Веллингтон дарвозасидан Россия элчихонаси биносигача юриш қилган бу одамлар йўл-йўлакай “Россияга озодлик, Украинага тинчлик”, “Путин ва Лукашенко – террористлар”, “Россияликлар тинчлик истайди” ва Путин – қотил” дея қичқириб боришган.
Варшавада Украина элчихонасидан Россия элчихонасигача юриш қилган намойишчилар эса ўз акцияларини “Путинизмсиз Россия куни” деб аташган.
Россия босқинига қарши яна бир акция якшанба куни Киевда ҳам бўлиб ўтган. Фаоллар Россиянинг собиқ элчихонаси деворига “Россиянинг Сўнгги Куни” деган ёзувни осиб, унинг атрофига қабр хочларини ўрнатиб қўйишган.
АҚШ Давлат котиби Россия куни муносабати билан мурожаатнома эълон қилди
АҚШ Давлат котиби Энтони Блинкен Россия куни муносабати билан тарқатган мурожаатида Кремль мустақил қўшни давлатга ҳеч нарса билан оқлаб бўлмайдиган уруш олиб бораётган бир пайтда россияликларга нисбатан ҳам қатағонлар олиб бораётганини қайд этди.
“Россия ҳукумати ўз фуқароларини Украина халқига қарши амалга оширилаётган ваҳшийликлар борасида ғафлатда тутишга уринмоқда”, дейилган мурожаатномада.
Блинкен фикрича, Кремль бошлаган уруш Россияни халқаро изоляцияда қолдириб, россияликларни қўшнилар билан аҳилчиликда яхши келажак қуриш имконидан маҳрум қиляпти. У мазкур яккаланишни Россия раҳбарияти қарорларининг натижаси деб атаган. Блинкен ўз мурожаатида Россия турғунлари кўпинча ўзларини катта хавф остига қўйиб бўлса-да, озодлик ва муносиб ҳаётга интилаётганларини эътироф этган.
Москва метросида Россия кунида 50 дан зиёд одам қўлга олинди
Москва метросида 12 июнь куни 50 нафардан зиёд одам ушланди. Бу ҳақда “ОВД-Инфо” ҳуқуқбонлик лойиҳаси ва қатор телеграм-каналлар маълумот тарқатишди. Қўлга олинганлар орасида сиёсий фаоллар, журналистлар ҳамда аввалроқ Россиянинг Украинага бостириб киришига қарши норозилик чиқишларида кўриниш берган оддий фуқаролар бор.
Қайд этилишича, полиция бу одамларни юз таниш тизими ёрдамида аниқлаган. Қўлга олинганлардан уларга тақдим этилган “ноқонуний хатти-ҳаракатларга йўл қўймаслик тўғрисидаги огоҳлантириш”ни имзолаш талаб қилинган ва кейин улар қўйиб юборилган, бироқ ушланганларнинг айримларини суратга олишиб, бармоқ изларини топширишни талаб қилишиб, полиция бўлимларида 4-5 соатлаб тутиб туришган.
“ОВД-Инфо” маълумотига кўра, москваликларни оммавий равишда тутиб кетилишига турли телеграм-каналларда гўё 12 июнь – Россия кунида пойтахт марказида бўлиб ўтиши керак бўлган Украинадаги урушга қарши норозилик акциясига оид хабарлар сабаб бўлган. Бу маълумот қаердан пайдо бўлгани ҳақида билдирилган эмас.
Пировардида Москвада ҳеч қанақа йирик акция ўтказилмаган. Якшанба куни пойтахтда бор-йўғи бир неча одам бир кишилик пикет ўтказган, холос. Шу куни Санкт-Петербургда ҳам бир неча киши қўлга олинган.
Путин Европа суди қарорларини ижро этмайди
Россия президенти Владимир Путин Давлат Думаси томонидан илгари қабул қилинган Инсон ҳуқуқлари бўйича Европа судининг 2022-йил 15 мартдан кейин чиқарилган қарорларини ижро этмаслик тўғрисидаги қонун лойиҳасини имзолади. Ҳужжат давлат расмий порталида эълон қилинди.
Россия Европа судининг 15 мартгача чиқарилган қарорлари бўйича Россия ҳисоб рақамларига фақат рублда тўлайди.
Қонун лойиҳаси шу ҳафта маъқулланди. Рус депутатлари бу қарорни шу йилнинг март ойида Украинага бостириб кириши туфайли Россиянинг Европа Кенгашидан чиқарилиши билан изоҳлади. Россия бу ташкилотдан расман чиқишини эълон қилди.
Россия Европа Кенгашига 1996 йилда қўшилган. Феврал ойи охирида ташкилот Россиянинг Украинага бостириб кириши сабабли аъзолигини вақтинчалик тўхтатди. Шундан сўнг Россия ТИВ мамлакат Кенгаш ишида иштирок этмаслигини маълум қилди ва 16 март куни Кенгашдан чиқариб юборилган эди.
Россия ташкилотдан чиқариб юборилган тарихда биринчи давлат бўлди.