Россия денгиз кучлари ҳарбий мағулотини ўтказмоқда
9 июнь куни Россия Мудофаа вазирлиги, ҳарбий-денгиз кемаларининг Калининград вилояти яқинида - Болтиқ денгизида режали оператив машқларни бажараётганини билдирди.
Вазирликка кўра, Болтиқ флотининг ҳарбий-денгиз-тактик гуруҳлари бу машғулотда қатнашиш учун ўз базаларини тарк этиб, “белгиланган ҳудудлар”га жойлашган.
Машғулотларга корветлар, патруль катерлари, ракета катерлари, фрегатлар, мина тозалайдиган кемалар, шунингдек, десант кемалари ва тезюрар катерлар жалб этилган, деб маълум қилди вазирлик.
Россия ҳарбий-денгиз кучларининг бу машғулоти, НАТОнинг ўн тўрт давлати, 5-17 июнь кунлари, Болтиқбўйи минтақасида BALTOPS 22 ҳарбий-денгиз машқларини ўтказаётган пайтга тўғри келмоқда.
НАТО баёнотига кўра, машғулотларда НАТОнинг ўн тўрт иттифоқчисидан ташқари Шимолий алянсга қўшилиш кутилаётган Швеция ва Финляндия ҳам иштирок этмоқда.
Зеленский: Украина кучлари Россия кучларига Северодонецкда жиддий талафот етказмоқда
Украина президенти Владимир Зеленский украиналик ҳарбийлар Северодонецкда Россия кучларига жиддий талафот етказаётганини билдирди.
Зеленский ўзининг галдаги мурожаатида Северодонецкни “Донбассдаги курашнинг эпимаркази” деб атаган.
“Мавқеларимизни ҳимоя қилиб, душманга сезиларли талафотлар етказяпмиз. Бу шиддатли, оғир жанг бўлиб, у мазкур урушдаги энг қийин жанглардан биридир”, деган Украина президенти.
Сбербанк Хитой юанида пул ўтказишни тўхтатди
Россия “Сбербанк”и юандаги халқаро транзакцияларни тўхтатди. Бунга, Frank Media нашри хабарига кўра, Хитой банкининг Сбербанкка хизмат кўрсатишдан бош тортгани сабаб бўлган.
Қайд этилишича, мижозлар 7 июндан эътиборан юанда пул ўтказолмаяптилар.
Россия қўшинлари Украинага бостириб кирганидан кейин Сбербанк АҚШ ва Британиянинг санкцияси остига тушган, июнь ойи бошида эса Европа Иттифоқи уни SWIFT халқаро тизимидан узиб қўйган.
Сбербанк билан ҳамкорлик қилгани учун бошқа ташкилотлар ҳам иккиламчи санкциялар остига тушишлари мумкин.
Петербургда Украинадаги урушни қоралаган православ руҳонийси ҳибсга олинди
Петербург суди Россия православ черкови руҳонийси Иоанн Курмояровни ҳибсга олиш тўғрисида қарор чиқарди.
Қайд этилишича, Украинадаги урушни Инжилга кўра тафсир қилган Курмояров Россия армияси ҳақида “фейк” тарқатиш моддаси бўйича айбланмоқда.
2020 йили руҳоний Россия қуролли кучларининг асосий черковини танқид қилиб, уни “бутпарастлар черкови” деб атаган эди.
Кейинроқ руҳоний мазкур черков устидан Россия Тергов қўмитасига ариза билан мурожаат қилган. Курмояров фикрича, черков фрескаларида руҳонийлар ўлимига алоқадор бўлган коммунистлар ва Қизил армия вакиллари акс этган, бу билан диндорларнинг ҳис-туйғулари таҳқирланган.