«Қонни дарё қилиб оқизишмоқда»
Россия армияси, шу кунларда Донбасснинг саноат минтақасида назоратини мустаҳкамлашга интилмоқда.
Россия бу ҳудудга катта ҳарбий куч ташлаган. Уруш бошида рус қуролли кучлари асосан ингичка чизиқ бўйлаб ҳаркатланиб, артиллерия ва ҳаво ҳужумлари билан шаҳарни ўққа тутди.
"Бахмут, Попасна, Северодонецк. Ҳозирча босқинчилар бу шаҳарларга бор эътиборини қаратган. У ерда улар, қонни дарё қилиб оқизишмоқда ва бор нарсани йўқ қилишга уринмоқда, нимаики тирик жон бўлса ҳаммасини йўқ қилмоқда. Ҳеч ким Донбассни, Россия қўшинлари ҳозир қилаётгани каби вайрон қилмаган. Мен барчадан, фронт позицияларида турганлар ва қарши ҳужумда жасорат кўрсатган барча жангчиларимиздан миннатдорман”, деди Владимир Зеленский.
Северодонецк ва Лисичанск шаҳарларини қўлга киритиш, Москва учун, Украинанинг стратегик аҳамиятга эга Луганск вилоятида назоратни мустаҳкамлаш имконини бермоқда.
Бу устунлик - Кремлга, бу урушда ғалаба қозонганини иддао қилиш имконини ҳам бериши мумкин.
Украинани қуролсизлантириш ва фашистлардан озод қилиш даъвоси билан Россия бошлаган босқин - Европа хавфсизлигига жиддий таҳдид яратди.
Киев ва унинг Ғарбдаги иттифоқчилари, Кремлнинг фашизм бўйича даъвосини асоссиз ва уруш учун баҳона, деб инкор қилиб келмоқда.
Сербия Лавровнинг учоғи учун учта мамлакат ўз осмонини ёпиб қўйганини маълум қилди
Болгария, Шимолий Македония ва Черногория Россия ТИВ раҳбари Сергей Лавровнинг учоғи учун ўз осмонини ёпиб қўйди. Бу россиялик вазирнинг 6–7 июнь кунлари Белградга қилинажак сафари олдидан содир бўлди, дея хабар қилди Сербиянинг “Оқшом янгиликлари” газетаси.
Нашр Черногория расмийлари муҳри билан парвозни тақиқловчи ҳужжат фотонусхасини ёйинлаган.
Россия Ташқи ишлар вазирлигидаги юқори рутбали манба “Интерфакс” агентлигига Болгария, Шимолий Македония ва Черногория Лавров учоғининг ўз ҳаво ҳудудидан учиб ўтишини тақиқлаганини тасдиқлаган.
Газета аввалроқ Сербия президенти Александр Вучич Лавровнинг режаланган сафари билан боғлиқ логистик қийинчиликлар ҳақида билдирганига эътибор қаратган. 6 июнь куни Вучич Россиянинг Белграддаги элчиси Александр Бокан-Харченко билан учрашиши керак.
Айни пайтда Сербия президенти душанба куни Лавровнинг Белградга сафари бекор қилингани муносабати билан халққа мурожаат билан чиқмоқчи.
Путин ҳали зарба берилмаган объектлар нишонга олиниши билан таҳдид қилди
“Россия 1” телеканалига берган интервьюсида Владимир Путин, агар Киевга узоқ ҳаракат радиусига эга ракеталар берилса, Россия “ҳали зарба берилмаган объектлар” нишонга олиниши билан таҳдид қилди.
Россия президентига кўра, ракета тизимлари етказиб берилиши “моҳиятан ҳеч нарсани ўзгартирмайди”, чунки Украина армияси тасарруфида совет намунасидаги бунақа тизимлар уруш бошланишига қадар ҳам бўлган. Зарбдор дронлар ҳам Россиянинг Украинага қарши жанговар ҳаракатларининг энг бошидан бери қўлланилмоқда. Путин фикрича, ғарбдан Украинага қурол-аслаҳа етказиб берилишидан мақсад урушни чўзишдир.
АҚШ президенти Жо Байден 1 июнь куни мақола ёзиб, Украинага етказиб берилажак қурол-аслаҳаларни очиқлаганди. Байденга кўра, бу қуроллар Украинага “жанг майдонида кураша олиши ҳамда музокаралар столида максимал даражада кучли позицияга эга бўла олиши” учун етказиб берилмоқда.
Луганскда Россия армияси генерали Кутузов ўлди
Украинанинг Луганск вилоятида Россия армияси генерал-майори Роман Кутузов ҳалок бўлди. Россия Телеграм-каналларида тарқатилаётган хабарларга кўра, ҳодиса Попасная туманининг Николаевка қишлоғида содир бўлган.
Айни манбалар Роман Кутузов ўзини Украинадан мустақил деб эълон қилиб олган Луганск халқ республикаси ҳудудида ўлган генералларнинг тўртинчиси экани ҳақида хабар қилишган.
Луганск вилояти учун жангларда россиялик генерал ҳалок бўлгани ҳақида аввалроқ Украинадаги манбалар хабар тарқатишган эди.