ЕИ вакиллари Россияга қарши санкцияларнинг олтинчи пакетини тасдиқлашди
Европа Иттифоқига аъзо мамлакатларнинг ЕИ қароргоҳидаги доимий вакиллари 2 июнь куни Россиянинг Украинага бостириб кириши важидан Москвага қарши санкцияларнинг олтинчи пакетини тасдиқлашган. Янги пакет билан Россия нефтига қисман эмбарго жорий этиш кўзда тутилган.
Озодликнинг рус хизмати мухбири хабарига кўра, санкция рўйхатининг якуний вариантига Россия патриархи Кирилл киритилган эмас.
Санкцияларнинг олтинчи пакети 3 июнь куни расман эълон қилиниши кутилмоқда. Унда Россия нефтини денгиз йўли билан етказиб беришга эмбарго қўйилишидан ташқари Сбербанкни SWIFT тизимидан узиш ҳамда жисмоний ва юридик шахсларнинг санкция рўйхатини кенгайтириш назарда тутилган.
Компьютер ишлаб чиқарувчи Hewlett Packard ширкати Россия бозоридан бутунлай кетишга қарор қилди
Ноутбуклар ва компьютер техникаси ишлаб чиқариш билан шуғулланувчи Hewlett Packard ширкати Россия ва Беларусда бизнес юритишни бутунлай тўхтатиш тўғрисида қарор қабул қилди.
HP февраль ойида Россия ва Беларусга ўз маҳсулотларни етказиб беришни вақтинча тўхтатишини эълон қилган эди.
“Бизнес-хатарлар ва эҳтиёжларни баҳолаш натижаларига асосланган ҳолда, биз Россия ва Беларусдаги фаолиятни давом эттириш бундан буён мақсадга мувофиқ эмас, деган хулосага келдик ҳамда бу мамлакатларда қолган бизнесимизни тартиб билан олиб чиқишда давом этамиз”, дейилган ширкат сайтида ёйинланган молиявий ҳисоботда.
Frontex: Европадан ватанига қайтаётган украиналиклар сони кўпаймоқда
Уруш бошидан бери Украинадан Европа Иттифоқи мамлакатларига 7 миллион киши кирган, улардан 5,3 миллионини Украина фуқаролари ташкил этади. Бу маълумот Европа Иттифоқининг ташқи чегаралар хавфсизлиги бўйича агентлиги (Frontex) томонидан эълон қилинди.
“Сўнгги кунларда Украинадан ЕИга келаётганлардан кўра кетаётганлар сони кўпроқ. 25 майдан 31 майгача ЕИни қарийб 260 минг нафар украиналик тарк этди. Уруш бошидан бери эса жами 2,3 миллион нафар украиналик ватанига қайтди”, дейилган Frontex ҳисоботида.
АҚШ Молия вазирлиги Мария Захарова дохил яна ўндан зиёд россияликни санкция рўйхатига қўшди
Қўшма Штатлар Россия қўшинларининг Украинага бостириб кириши муносабати билан санкция рўйхатини кенгайтирди.
АҚШ Молия вазирлигининг 2 июнь куни ёйинланган хабарномасида 13 нафар россияликнинг фамилияси очиқланган. Улар орасида Россия Ташқи ишлар вазирлиги вакиласи Мария Захарова, Путин ўзининг дўсти деб атаган виолончелист Сергей Ролдугин, тадбиркорлар Алексей Мордашов ва Год Нисанов, Мордашевнинг хотини ва икки ўғли бор.
“Қора рўйхат”га Северсталь ширкати ва бошқа юридик шахслар ҳамда бир неча хусусий учоқ ва яхта ҳам киритилган.