Харьков вилоятида шиддатли жанглар давом этмоқда
Россия қўшинлари Изюм йўналишида ҳужумни давом эттиришга ҳаракат қилмоқда. Бу ҳақда Харьков ҳарбий раҳбари Олег Синегубов ўзининг телеграм-каналида маълум қилди. Унинг сўзларига кўра, тунда Харков нисбатан тинч бўлган, қурбонлар бўлмаган.
"Душман Харков вилоятининг аҳоли пунктларини ўққа тутишда давом этди. Люботин шаҳрида мактаб-интернати вайрон бўлди. Чугуев ҳам кечаси ўққа тутилди. Турар-жой бинолари шикастланди. Яхшиямки, қурбонлар йўқ", - дейди Снегубов.
Шунингдек, ўтган кун давомида рус армияси Харковни йирик калибрли Пион қуролларидан ўққа тутди.
Канн кинофестивалида Донбасда олинган яна бир фильм намойиш қилинди
25 май куни украиналик режиссёр Максим Наконечнийнинг “Капалак кўриниши” деб номланган дебьют фильми Каннда намойиш этилди.
Асарда аскар аёлнинг жароҳатдан кейинги руҳий безовталик ҳолати тасвирланган.
Киевлик режиссёр фильмидаги воқеалар, Украинанинг Донбас вилоятида бошланади.
Бадиий тўқима устига қурилган ҳикояда актриса Рита Бурковска гавдалантирган жангчи аёл - Лилия россияпараст кучлар қўлидан озод қилинади.
"Мен жанг қилаётган аёл-аскарлар ва ветеран-аёллар ҳақидаги ҳужжатли фильмни таҳрир қилиш жараёнида шуни англаб етдимки, аёлнинг нозиклиги ва айни пайтда кучлилиги ўртасидаги парадоксал комбинация туфайли, урушда аёлларнинг ўрни анча кенгроқ экан", дейди режиссёр.
Фильмда, ҳаво разведкаси мутахассиси Лилиянинг асирликда кечирган қийноқлари унинг орзуларини йўққа чиқаради. У душман аскари томонидан зўрланиб, ҳомиладор бўлади. Бундан эса Лилиянинг мағрур эри қаттиқ ғазабланади.
"Уч юз йилдан бери, Россия империяси, Совет Иттифоқи ва бошқаларга қарши ўз озодлигимиз учун, курашиб келамиз. Биз қурбон бўлишни хоҳламаймиз. Биз қаҳрамонлар каби бўлишни хоҳлаймиз. Менимча, энди бу бизнинг характеримизга айланиб бўлди", дейди Бурковска.
Фильм қисман Украина шарқида - Россия чегарасига яқин ҳудудда суратга олинган. Февраль ойида Россиянинг кенг кўламли босқини, Канн фестивалида қатнашаётган украиналик киноижодкорлар асарларидан ўрин олган.
Бу йилги фестиваль танловига “Мариупол 2”, “Памфир” фильмлари ҳам киритилган.
Приморскда депутатлар урушни тўхтатишни талаб қилди
Приморск ўлкасида қонунчилик кенгашининг бир гуруҳ депутатлари Украинадаги урушни тўхтатишни талаб қилишди.
Кенгаш йиғилиши чоғида КПРФ фракцияси аъзоси Леонид Васюкевич тўрт ҳамкасби номидан Владимир Путинга мурожаат қилиб, урушни тўхтатишни ва Россия қўшинларини Украина ҳудудидан олиб чиқиб кетишни талаб қилди.
Унинг мурожаати видеоёзуви “ВКонтакте” тармоғида ёйинланган.
“Ҳарбий амалиёт тўхтатилмаса, мамлакатимизда етимлар янада кўпайишини барчамиз тушуниб турибмиз. Ҳарбий амалиёт чоғида ёш-ёш йигитлар ҳалок бўлмоқда ёки майиб-мажруҳ бўлиб қолмоқда. Ҳолбуки улар мамлакатимизга катта фойда келтириши мумкин”, деб таъкидлади Леонид Васюкевич, КПРФ фракцияси аъзоси.
Шундан сўнг губернатор Олег Кожемяко Васюкевични хоин, деб атаган ва у билан депутат Геннадий Шульгани залдан ҳайдаб чиқаришни талаб қилган Ўлка раҳбари фикрича, уларнинг сўзлари “Россия армиясини ва нацизмга қарши курашаётган жангчиларни бадном қилади”.
Херсон ва Запорожье Россиянинг +7 кодига ўтказиляпти
Россия оккупацион маъмурияти, Украинанинг Херсон ва Запорожье вилоятлари телефон тармоғини Россиянинг +7 кодига ўтказаётгани хабар қилинмоқда.
Бу ҳақда аннексия қилинган Қрим раҳбарининг маслаҳатчиси Олег Крючков “РИА Новости” билан суҳбатда маълум қилди.
Унинг сўзларига кўра, босиб олинган украин ҳудудларига янги мобил алоқа оператори кирган. Россиянинг +7 коди билан бошланадиган сим-карталар аллақачон савдога чиқарилгани айтилмоқда.