Ёниб кетган кўприклар
Украина ҳаво-десант кучлари қўмондонлиги 12 май, пайшанба куни Россиянинг ёниб кетган ҳарбий машиналари ва кўприклар акс этган суратларни тарқатди.
Қўмондонликка кўра, суратлар Донецк дарёси бўйида тасвирга олинган. Аммо, Рейтерс агентлиги тилга олинган ҳудудни мустақил равишда таслиқлай олмаганини хабар қилди.
Украина кучлари эълон қилган фотосуратларда Россия ҳарбий машиналари ва Украина шарқидаги кўчма кўприк вайрон қилинганини кўриш мумкин. Суратлардан, кўприк ва техниклар бир неча қисмга бўлиниб, сув остида қолганини кўриш мумкин.
“Настояшчее время” телеканали мухбири Юлия Горичева Днепропетровск вилоятидаги вазиятни хабар қилди:
“Россия қўшинлари Запорожье вилоятининг Камишеваха шаҳарчасига кечадан бери 15 та ракета йўллади. Кўплаб хусусий сектор иморатлари вайрон бўлди, зарбалардан бир киши ўлиб, яна бири яраланди. Днепропетровск вилоятининг бир неча тумани туни билан кассетали ва фосфорли снарядлар билан ўққа тутилгани хабар қилинди. Украина томони Харьков вилоятининг баъзи ҳудудларида қўшинлар Россия чегарасига чиққанини, баъзи жойларда чегарага яқин қолганини айтмоқда. Луганск вилоятининг Белогоровка тумани ҳудудидан Северний Донецк дарёси оқиб ўтади. Маҳаллий маъмурларга кўра, рус ҳарбийлари дарёдан ўтиб олиш учун бир неча марта понтон кўприк қурган ва ҳар гал кўприк ва ҳарбий техникалари билан бирга йўқ қилинган. “Кўприкни тайёр қилиб, ўта бошлаганларида артиллериядан ўққа тутиб, яксон қилдик. Бу ҳол бир неча марта такрорланди. Россиянинг понтон кўприклари, ўнлаб БТР ва танклар ҳамда аскарларига қўшиб ғарқ қилинди, дейди вилоят раҳбари Сергей Гайдай”.
Pussy riot гуруҳи урушга қарши гастролга ҳозирланмоқда
Россияда уй қамоғидан қочгани ҳақидаги хабардан бир кун ўтиб, таниқли Pussy riot панк гуруҳи солисти Мария Алёхина, Берлинда бўладиган “урушга қарши гастрол”га тайёргарлик кўраётганини маълум қилди.
Алёхинанинг сўзларига кўра, уйи ташқарисидаги полицияга кўринмаслик учун, озиқ-овқат етказиб берувчи ходим кийимида кўчага чиқиб, қочган.
Алёхинанинг таъкидлашича, Россия ҳукумати Украинада содир бўлаётган воқеалар ҳақида "мулоҳаза юритиши" керак ва бундай мулоҳазасизлик билан Россиянинг "иккинчи жаҳон урушидан кейинги Германияга айланишга ҳаққи йўқ".
“Биз денацификация қилишимиз керак бўлган жой Украина эмас, балки Россия. Уруш бошланганидан бери қарийб 4 миллион киши мамлакатни тарк этди. Бу биринчи масала. Руслар уруш ҳақида яхши билишади ва урушга қарши норозилик билдиришмоқда”, деди Алёхина.
Алёхинанинг сўзларига кўра, гуруҳ икки ҳафта олдин ёзилган янги қўшиқни машқ қилмоқда. Қўшиқ сўзлари Буча қурбонларидан тортиб, Кремл кампанияси рамзига айланган Z-белгисигача ишора қилади:
“Бу янги қўшиқ. Буни икки ҳафта олдин ёздик. Бу урушга қарши, Путин Украинада бошлаган урушга қарши қўшиқ. Бу бизнинг уруш ҳақидаги баёнотимиз ва эртага концертнинг бир қисми сифатида ижро этамиз”.
Украина орқали Европага газ етказиш 25 фоизга қисқарди
Россия энэргетика гиганти Газпром Украина ҳудуди орқали Европага Россия газини етказиб бериш бир кун ичида қарийб 25 фоизга қисқариб, умумий 72 миллион куб метрни ташкил қилганини маълум қилди.
"Украина Европага газ транзити учун фақат битта кириш нуқтасини қолдирди, бу эса газ етказиб бериш ҳажмини сезиларли даражада пасайтирди", деди Газпром матбуот котиби Сергей Куприянов.
Украина газ узатиш тизими оператори (GTSOU) чоршанба кунидан бошлаб "форс-мажор ҳолатлар" ва уруш сабабли шарқий чегарадаги Сохранивка кириш нуқтасини ёпишини эълон қилди.
Газпром Украинанинг бу қарори ҳақида сешанба куни хабардор қилинган. GTSOU маълумотларига кўра, Сохранивка кириш пункти орқали кунлик газ етказиб бериш ҳажми 32,6 миллион куб метрни ташкил қилган. Бу эса Украина орқали Европага етказиладиган Россия газининг учдан бир қисми деганидир.
Газпром Украина орқали Европага газ етказиб беришда давом этаётганини айтди. Бироқ чоршанба куни 72 миллион куб метр газ узатилган. Бу сешанба кунги 95,8 миллион куб метрдан 25 фоизга камайганини кўрсатади.
Россия Европага муқобил газ узатиш йўлларини қидирадими ёки йўқми деган саволга жавобан кремль матбуот котиби Дмитрий Песков Россия шартнома мажбуриятларига содиқ қолади, деди журналистларга.
Немис газ оператори ҳам, газ транзитининг қисқариши натижасида Украина орқали Германия қувурлари тизимига кирадиган газ ҳажми сешанба кунгига нисбатан қарийб 25 фоизга камайганини тасдиқлади. Аммо бу пасайиш Норвегия ва Нидерландиядан келаётган газ оқимининг ортиши билан қопланганини айтди.
Германия Иқтисодий Ҳамкорлик ва Тараққиёт вазирлиги, табиий газ таъминоти хавфсизлиги кафолатланишини ва вазиятга жиддий ёндашилишини билдирди.
"НАТОнинг кенгайиши қитъамизни барқарор ва хавфсиз қилмайди"
Россия Украинада "махсус операция"ни бошлаганидан сўнг, финларнинг НАТОга нисбатан қарашлари жуда тез ўзгарди. Кремл матбуот котиби Дмитрий Песков, Финдландия ҳукуматининг бу қарорига кескин норозилик билдирди.
"Биз НАТОнинг кенгайиши ва ўз ҳарбий инфратузилмасини чегараларимизга яқинлаштириши бутун дунёни айниқса Евроосиё қитъамизни барқарор ва хавфсиз қилмаслигини кўп марта айтдик. Бу айни ҳақиқат. Албатта, мен бу саволингизга жавоб бердим - НАТОнинг кенгайиши бизнинг қитъамизни барқарор ва хавфсиз қилмайди", деди Песков.
Украинанинг тақдири 1939-1944 йилларда Россия билан иккита уруш олиб борган, аммо тинчлик шартномасидан сўнг ўз ҳудудининг тахминан 10 фоизини йўқотган Финляндияни айниқса ташвишга солмоқда.
Финляндиянинг НАТОга тез яқинлашиши қўшни Швецияни ҳам беэътибор қолдирмайди.