Линклар

Шошилинч хабар
23 сентябр 2020, Тошкент вақти: 18:23

Ўзбекистон хабарлари

Сардоба тошқинида Қозоғистон томонига сув ўтмайди, деб маълумот берилгани расман тан олинди

Сув хўжалиги вазири ўринбосари Воҳиджон Аҳмаджонов

Ўзбекистон сув хўжалиги вазири ўринбосари Воҳиджон Аҳмаджонов 1 май куни Сардоба сув омборида тўғон ўпирилгач, Қозоғистон сўровига жавобан, сув омборида "тезроқ сув ёпилади ва сув хавфсиз йўналтирилади", деб айтилганини тан олган.

Gazeta.uz нашрига берган интервьюсида мулозимнинг маълум қилишича, 1 май куни Қозоғистон экология, геология ва табиий ресурслар вазири ўринбосари Сергей Громовга шундай маълумот берилган.

Мулозим бу маълумот вазиятга оид дастлабки баҳолашга таяниб, берилганини таъкидлаган.

"Дастлабки баҳолашларда ҳеч ким кутмаган эди, сув омборидан катта миқдорда сув чиқиб кетишини. Шунга асосланиб [Қозоғистон томонига] ҳақиқатан ҳам бу сув омборида тезроқ сув ёпилади ва сув хавфсиз йўналтирилади, деб айтилган. Лекин, афсуски, ҳеч қандай техноген аварияни олдиндан башорат қилиш қийин. Бунинг талафотини, бунинг кўламини зудлик билан айта олиш жуда қийин. Биринчи он, биринчи лаҳзаларида, улар [Қозоғистон] томонидан сўров бўлганида, ҳақиқатан ҳам шунақа жавоб бўлган. Барча чоралар кўриляпти, сизларга сув етиб бормаслиги учун ёки талафот етказмаслик учун, деган хабарлар бўлган", деган Воҳиджон Аҳмаджонов.

Шунингдек, "Сардобадаги тошқин сувларини Арнасой кўлига йўналтириш чораси самара бермадими?" деган саволга жавобан Воҳиджон Аҳмаджонов, сув тошқинини мавжуд Жанубий Мирзачўл магистрал зовурига (коллектор) йўналтиришда бу каналнинг ўтказиш қобилияти етмаганини айтган:

"Бу атрофда сув чиқариб юборадиган асосий артерия, бу — Жанубий Мирзачўл магистрал зовури (коллектор). Шу орқали сув чиқиб кетади. Умуман, рельеф шунақа тузилганки, энг пастлик жойига ўша коллектор қурилган. Барча сув шу йўналишдан чиқиб кетади. Лекин ҳар бир каналнинг ўз ўтказиш қобилияти бўлади. Ўша канал 120 метр кубли. Шу куни [1 май куни] 300 кубгача сув ўтган. Демак, ўзига нисбатан 2−3 баравар [кўп]".

Шу билан бирга, Воҳиджон Аҳмаджонов Ўзбекистон томони Қозоғистонга минимал даражада зарар етказиш бўйича барча чораларни кўрганини айтиб ўтган.

1 май куни тонгда Сирдарё вилоятидаги Сардоба сув омборида тўғон ўпирилиши натижасида сув тошқини рўй берган. Тошқин Қозоғистоннинг Мактаарал туманидаги 5 қишлоқни босган, 845 та уй сув остида қолганди.

Кун янгиликлари

Маҳалла ва оилани қўллаб-қувватлаш вазири ҳамда унинг икки муовини коронавирусга чалинди

Маҳалла ва оилани қўллаб-қувватлаш вазирининг ўринбосари Ботир Парпиев (суратда) 2018 йилгача қарийб 14 йил давомида Ўзбекистон Давлат солиқ қўмитасини бошқарган.

Маҳалла ва оилани қўллаб-қувватлаш вазири Раҳмат Маматов ҳамда унинг ўринбосарлари Ботир Парпиев ва Азизбек Икромовда коронавирус инфекцияси аниқланди. Бу ҳақда Газета.uz нашри вазирлик матбуот хизматидан олинган маълумотга таянган ҳолда хабар қилди.

Ҳозирда вазир ва унинг ўринбосарлари Ўзбекистон президенти админстрацияси ҳузуридаги Бош тиббиёт бошқармасига қарашли 2-марказий клиник касалхонада даволанмоқда.

Вазирликдан маълум қилишларича, аввалроқ коронавирусга чалинган вазирнинг биринчи ўринбосари Гулнора Маруфова шу кунда соғайиб, ишга қайтган.

Йилига 3 миллион 600 минг қадам юрганларга имтиёз ваъда қилинмоқда

Ўзбекистонда бир кунда камида ўн минг, бир ой давомида уч юз минг, бир йил давомида 3 миллион 600 минг қадам юрган шахсга барча давлат хизматлари кўрсатиш соҳасида 50 фоиз имтиёз берилиши ҳамда спорт иншоотларидан фойдаланиш учун абонемент тақдим этилиши мумкин. Бунга доир кўрсатма мамлакат президентининг “Оммавий спортни ривожлантириш ва соғлом турмуш тарзини ҳар бир фуқаронинг ҳаётига киритишга қаратилган чора-тадбирлар тўғрисида”ги қарори лойиҳасида акс этган. Жисмоний тарбия ва спорт вазирлиги томонидан ишлаб чиқилган мазкур лойиҳа матни 23 сентябрь куни regulation.gov.uz порталида ёйинланди.

Лойиҳага мувофиқ, Жисмоний тарбия ва спорт вазирлиги Адлия вазирлиги, Соғлиқни сақлаш вазирлиги, Молия вазирлиги билан биргаликда 2021 йил 1 февралига қадар аҳолини кунлик юриш ва югуришга тарғиб қилиш мақсадида “Янги нафас” платформасини яратиши лозим. Кўп юрганлар айнан шу платформа иши доирасида рағбатлантирилиши кўзда тутилган.

Қарор билан Адлия вазирлигига “Янги нафас” платформасини давлат хизматлари кўрсатиш тизими билан интеграция қилинишини таъминлаш вазифаси юклатилган.

Қарор лойиҳасида “2021 йилдан бошлаб сентябрь ойининг учинчи якшанба куни республика бўйича “Автомобилсиз кун” деб эълон қилинсин ҳамда шу куни автомобилда ҳаракатланиш таъқиқлансин”, дейилган.

Лойиҳа муҳокамаси шу йил 8 октябрига қадар давом этади.

ОАВ: Марказий Осиё халқаро институти ташкил этилди

Марказий Осиё минтақасида жойлашган Ўзбекистон, Қирғизистон, Қозоғистон ва Тожикистон мамлакатлари байроқлари.

Ўзбекистонда Марказий Осиё халқаро институти ташкил этилди. Дарё.уз нашрининг ҳукуматдаги ўз манбаси сўзларига таянган ҳолда хабар қилишича, бунга оид қарор президент Ш.Мирзиёев томонидан август ойида имзоланган.

Янги институт минтақа давлатлари раҳбарлари Маслаҳат учрашувининг Тошкентда бўлиб ўтган иккинчи саммитида эришилган барча келишувларни тўлиқ амалга ошириш, эксперт-таҳлил доира вакиллари, амалиётчи мутахассислар ўртасидаги алоқаларни кенгайтириш, минтақавий стратегияни ишлаб чиқишда улар иштирокини таъминлаш мақсадида ташкил этилгани айтилмоқда.

Марказий Осиё давлатлари ўртасидаги ўзаро ҳамкорликни ҳар томонлама кенгайтиришга қаратилган стратегия ва дастурларнинг янги йўналишларини ишлаб чиқишга кўмаклашиш, уларни илмий асосланган ҳолда чуқур таҳлил қилиш ва тадқиқ этиш янги ташкил этилган институтнинг асосий вазифалари сифатида кўрсатиб ўтилган.

Бундан ташқари, қайд этилишича, институт минтақа давлатлари ўртасидаги алоқаларни мустаҳкамлашга қаратилган изланишлар, Марказий Осиё хавфсизлиги билан боғлиқ бошқа таҳдид ва муаммоларни ҳал этишга қаратилган тадқиқот ишларини олиб боради, қўшни давлатларнинг ташқи сиёсат концепция ва мақсадларини пухта ўрганади, минтақавий аҳамиятга эга лойиҳаларни батафсил таҳлил қилади ҳамда халқаро анжуман ва тадбирларда бу мавзуларни муҳокама қилади.

Учтепада минг ўринли коронавирус маркази ташкил этилди (ВИДЕО)

Ўзбекистонда коронавирусга чалинганлар сони 53 мингга яқинлашди.

Тошкентнинг Учтепа туманида коронавирусга чалинган ва гумон қилинган беморларни қабул қилиш ва тақсимлаш маркази ишга тушди.

Тошкент шаҳар ҳокимлиги 23 сентябрга ўтар кечаси бу борада тарқатган видеода Учтепа тумани ҳокими ўринбосари Бобур Мирзаев мазкур марказ “саховатпеша тадбиркор томонидан ва ҳомийлик маблағлари ҳисобидан” ташкил қилинганини билдирди.

Минг нафар беморга мўлжалланган марказнинг биринчи иш кунида 50 нафардан кўпроқ бемор қабул қилинган. Бу ерда 750 нафар тиббиёт ходими ишлаши режалаштирилган.

“Ҳозирги пайтда марказда 72 нафар ходим ишламоқда, уларнинг 60 нафари шифокор ва ҳамширалар бўлса, 10 нафардан ортиғи ёрдамчи кўнгиллилар ҳисобланади”, -дейилади хабарда.

Тошкент шаҳрида аввалроқ “Ўзэкспомарказ”да 1000 ўринли, “Ёшлик” спорт мажмуасида 520 ўринли, Гимнастика саройида 750 ўринли тақсимлаш марказлари ишга туширилган эди.

Марказий банк ташқи қарз 27,6 миллиард доллар эканини билдирди. Молия вазирлиги эса бошқа рақамларни келтирмоқда

Ташқи қарз масаласида Марказий банк ва Молия вазирлиги келтираётган рақамлар бир-биридан кескин фарқ қилмоқда.

Ўзбекистон ташқи қарзининг умумий ҳажми 2020 йил 1 июль ҳолатига 27,6 миллиард долларни долларни ташкил қилди. Бу ташқи қарз умумий ҳажми 2020 йил бошидан 12,7 фоизга ёки 3,1 миллиард долларга ошганини англатади. Бу ҳақда Марказий банк 23 сентябрь куни эълон қилган янги ҳисоботида маълум қилди.

Ҳисоботда таъкидланишича, 2020 йилнинг I ярим йиллигида давлат сектори қарздорлигининг ўсиши 1,7 миллиард долларни ташкил қилди.

Глобал пандемия ва иқтисодий фаолликнинг пасайиши сабабли Ўзбекистоннинг суверен облигациялари қиймати фонд бозорларида биржа котировкаларининг пасайиши натижасида 2020 йилнинг бошига нисбатан камайди.

Банклар ва иқтисодиётнинг бошқа сектор корхоналари томонидан қарз олиш ҳажмининг ошиши натижасида хусусий сектор қарздорлиги 1,4 миллиард долларга ошди.

“Қайд этиш лозимки, 2020 йилнинг I ярим йиллигида хусусий сектор томонидан умумий миқдорда 2,1 млрд. доллар қарздорлик жалб қилинди. Қарзларни жалб қилиш асосан банклар – 1,8 млрд. доллар, текстиль ва тўқимачилик сектори корхоналари – 71 млн. доллар ва иқтисодиётнинг бошқа секторлари – 154 млн. доллар томонидан амалга оширилди”, -дейилади ҳисоботда.

Айни пайтда Марказий банк ҳисоботида келтирилган ташқи қарз миқдори Молия вазирлиги эълон қилган ҳисоботда кўрсатилган рақамдан кескин фарқ қилмоқда.

Молия вазирлигининг август ойида эълон қилинган ҳисоботида қайд этилишича, 2020 йил 1 июль ҳолатига Ўзбекистон Республикаси номидан ва унинг кафолати остида жалб қилинган умумий қарз қолдиғи дастлабки ҳисоб-китобларга кўра 19 миллиард 400 миллион доллар эквивалентини ёки ялпи ички маҳсулотга (ЯИМ) нисбатан 34,0 фоизни ташкил этган.

Жорий йилнинг август ойида молия вазири Тимур Ишметов Олий Мажлиси Қонунчилик палатаси ялпи мажлисида Ўзбекистоннинг ташқи қарзи, 2020 йилнинг 1 июль ҳолатига кўра, 19,6 миллиард долларни ташкил этаётгани тўғрисида билдирган эди.

Биометрик паспорт ўрнига ID-карта жорий этилмоқда. Унинг нархи ҳозирча 198,5 минг сўм

Биометрик паспорт 2030 йилдан ҳақиқий эмас деб ҳисобланади.

Ўзбекистон фуқароларига 2021 йилнинг 1 январидан бошлаб биометрик паспортлар ўрнига шахсни ва фуқароликни тасдиқлайдиган электрон ташувчи қурилмага эга ҳужжат сифатида ID-карта берила бошланади. Президентнинг бу борадаги “Ўзбекистон Республикасида идентификация ID-карталарини жорий этиш чора-тадбирлари тўғрисида”ги фармони матбуотда эълон қилинди.

Мазкур фармонга асосан 2021 йил 1 январдан бошлаб шахсни рақамли идентификация қилишнинг ягона тизими жорий қилинади. Мазкур тизимни жорий этиш доирасида биометрик паспортлар ID-карталарга икки босқичда алмаштирилади.

Биринчи босқич 2021 йил 1 январдан 2022 йил 31 декабргача ихтиёрийлик асосида амалга оширилади.

Иккинчи босқич 2023 йил 1 январдан 2029 йил 31 декабргача давом этади ва бу босқичда биометрик паспортлар мажбурий тартибда ID-карталарга алмаштирилади.

2011 йилги намунадаги биометрик паспорт 2030 йил 1 январдан бошлаб ҳақиқий эмас деб ҳисобланади. ID-карталарни расмийлаштириш 1 иш кунида амалга оширилади.

ID-карта бир ёшгача бўлган болага 2 йил, бир ёшдан 16 ёшгача 5 йил, 16 ёшдан бошлаб – 10 йил муддатга берилади.

ID-картани расмийлаштириш учун базавий ҳисоблаш миқдорининг 89 фоизи, яъни 198 минг 470 сўм (22.09.2020 ҳолатига) миқдорида тўлов ундирилади.

Самарқанд шаҳар бош имом-хатиби Нуриддинхон Исломов вафот этди

Нуриддинхон Исломов 1970 йилда Ўзбекистон мусулмонлари идораси ходими сифатида иш фаолиятини бошлаган. Самарқанд шаҳар ҳокимлиги матбуот хизмати фотоси.

Самарқанд шаҳар бош имом-хатиби Нуриддинхон Исломов 73 ёшда вафот этгани тўғрисида Самарқанд шаҳар ҳокимлиги хабар берди.

22 сентябрда эълон қилинган таъзияда қайд этилишича, Нуриддинхон Исломов 1970 йилда Ўзбекистон мусулмонлари идораси ходими сифатида иш фаолиятини бошлаган.

1980 йилдан 2008 йилга қадар Жиззах вилояти Ғаллаорол тумани бош имом-хатиби бўлган. 2017 йилгача Самарқанд вилояти бош имом-хатиби вазифасида ишлаган. Шундан сўнг айни пайтгача Самарқанд шаҳар бош имом-хатиби ҳамда “Шоҳи Зинда” жоме масжиди имом-хатиби бўлиб турган эди.

Самарқанд шаҳар ҳокимлиги матбуот хизмати имомнинг вафоти сабабларини маълум қилмаган.

Бундан бир кун аввал Ўзбекистон мусулмонлари идораси матбуот хизмати Қашқадарё вилоятининг Яккабоғ тумани бош имом-хатиби Тоҳир Исматиллаев вафот этгани ҳақида билдирганди.

16 сентябрь куни Тошкент вилояти бош имом-хатиби Хайруллоҳ Турматов вафот этгани хабар қилинган.

Бу борадаги расмий билдирувларда имомларнинг ўлим сабаби очиқланмаган.

22 сентябрда коронавирусдан 4 киши вафот этди. Уларнинг ким ва қайси ҳудуддан экани номаълум

22 сентябрь куни Ўзбекистонда 598 ҳолатда касаллик қайд этилди.

Соғлиқни сақлаш вазирлиги 22 сентябрь куни 4 киши коронавирусдан вафот этгани тўғрисида маълумот берди. Бироқ вафот этганлар қайси ҳудуддан экани, қаерда даволангани, уларнинг ёши тўғрисида маълумот берилмади.

Шунингдек, вазирлик вафот этган тўрт кишидан бир нафари аёл, бир нафари эркак эканини билдирди. Аммо қолган икки шахснинг жинси ҳақида маълумот йўқ.

Вазирлик кун охирида коронавирусдан касалланганлар, соғайганлар ва вафот этганлар тўғрисдаги маълумотлар жамланмаси бўлган анъанавий жадвални ҳам эълон қилмади. Бунинг оқибатида 22 сентябрь куни вафот этганлар қайси ҳудуддан экани ва ўлим ҳолатлари расмий статистикаси ноаниқ бўлиб қолмоқда.

Вазирлик 21 сентябрь куни эълон қилган жадвалда вафот этганлар сони 438 киши деб қайд этилган эди. Улардан 305 нафари Тошкент шаҳрида, 67 нафари Тошкент вилоятида даволанган беморлардир.

Вазирликнинг қайд этишича, 22 сентябрь куни Ўзбекистонда 598 ҳолатда касаллик қайд этилди. Бу билан коронавирусга чалинганлар сони 53 мингга яқинлашди. Шу кунгача беморлардан 49 224 нафари соғайди. Касалхонада 3 191 нафар бемор даволанмоқда.

UNFPA Қорақалпоғистон ва Чирчиқда бачадон ракига қарши кураш учун 1 миллион доллар маблағ ажратди

UNFPA логоси.

БМТ Аҳолишунослик жамғармаси (UNFPA) контрацептив воситалар ва бачадон раки диагностикаси учун Ўзбекистонга 1 миллион доллардан кўпроқ маблағ ажратди.

Соғлиқни сақлаш вазирлигининг билдиришича, 22 сентябрь куни Соғлиқни сақлаш вазири ўринбосари Эльмира Боситханова БМТ Аҳолишунослик жамғармасининг Ўзбекистондаги вакили Ю Ю билан видеоконференция тарзида “UNFPAнинг 2021-2025 йиллар учун мўлжалланган мамлакат дастури” лойиҳасини муҳокама қилган.

“Дастурда туғруқ хизмати сифатини ошириш ва оналар ўлимини камайтириш, амбулатор хизматни яхшилаш ва оилани қўллаб-қувватлаш, репродуктив аъзолар онкологик касалликлари диагностикаси ва профилактикаси, аҳоли ўртасида соғлом турмуш тарзини тарғиб этиш ва репродуктив саломатликни шакллантириш масалалари бўйича қатор тадбирлар режалаштирилган”,-дейилади хабарда.

Шунингдек, мазкур дастур доирасида UNFPA Ўзбекистонга контрацептив воситалар учун 30 минг АҚШ доллари ҳамда Қорақалпоғистон Республикасида ва Чирчиқ шаҳрида бачадон раки касаллигининг диагностикаси ҳамда профилактикаси учун 1 миллион АҚШ доллари миқдорида маблағ ажратади.

Бюджетчиларга янги йилгача рағбатлантириш пуллари тўланмайди

Ўзбекистонда бюджет ташкилотларида ишлайдиган ходимларга моддий рағбатлантириш махсус жамғармаси, ОТМларнинг моддий рағбатлантириш жамғармаси ҳамда директор жамғармаси маблағлари ҳисобидан тўловлар ҳисобланишининг тўхтатиб турилиши (тиббиёт, тиббий-ижтимоий муассасалар, меҳрибонлик уйларидан ҳамда меҳнатга ҳақ тўлашнинг 1-3 разрядлари қўлланиладиган ходимлардан ташқари) 2020 йил 1 октябрдан 2021 йил 1 январга қадар узайтирилди.

Мазкур тартиб ҳукуматнинг шу йил 21 сентябрида қабул қилинган “2020 йил учун Ўзбекистон Республикаси Давлат бюджетининг барқарорлигини таъминлаш ва харажатларини мақбуллаштириш чора-тадбирлари тўғрисида”ги қарорида акс этган.

“Ҳуқуқий ахборот” Телеграм-канали маълумотига кўра, ҳукумат қарори билан Инқирозга қарши курашиш жамғармаси маблағлари ҳисобига амалга оширилиши режалаштирилган 224 млрд 288 млн сўм харажатлар мақбуллаштирилган.

Қарорга мувофиқ, Қорақалпоғистон Республикаси бюджети, вилоятлар ва Тошкент шаҳар маҳаллий бюджетларининг тасдиқланган даромадлар прогнозининг бажарилмаслиги ҳисобига харажатларнинг мақбуллаштирилган қисми республика бюджетига, ушбу қарорга мувофиқ мақбуллаштирилган маблағлар эса Инқирозга қарши курашиш жамғармасига ўтказилади.

ХВЖ расмий Тошкентга банк ислоҳотини кечиктирмасликни тавсия қилмоқда

Халқаро валюта жамғармаси Ўзбекистонга банк соҳасидаги ислоҳотларни кечиктирмасликни тавсия қилди. Бу ҳақда ХВЖнинг 21 сентябрь куни ёйинланган хабарномасида айтилган.

Ҳисоботга кўра, жамғарма мутахассислари "Ўзбекистонга виртуал ташриф"дан сўнг ўзларининг дастлабки хулосаларини баён қилганлар.

Қайд этилишича, Ўзбекистонда ҳукумат соғлиқни сақлаш ва ижтимоий кўмак учун қўшимча харажатлар каби солиқ чораларини кўрган ҳамда солиқ имтиёзлари жорий қилган.

Иқтисодий ўсиш секинлашганига қарамай, бу йил унинг мусбат бўлиши, 2021 йилда эса инқироз сусайганидан кейин жадаллашиши кутилмоқда.

Айни пайтда, халқаро экспертлар фикрича, расмийлар янада кучлироқ, барқарорроқ ва инклюзивроқ иқтисодий ўсиш ва турмуш даражасини оширишга эришишлари учун ислоҳотларни олға суришда давом этишлари лозим.

Бу ўринда таҳлилчилар Марказий банк томонидан асосий ставканинг туширилиши, солиққа оид рағбатлантирувлар ва бошқаларни келтириб, буларнинг иқтисодиётнинг бироз ўсишига сабаб бўлиши мумкинлигини қайд этганлар.

Гарчи инфляция даражаси аввалдаги каби юқори бўлиб, 11 фоиздан кўпроқни ташкил қилаётган бўлса-да, у аста-секин пасая бошлаган. “Қатъийроқ пул-кредит сиёсати юритилган тақдирда инфляция даражаси янада пасайиши мумкин”, деб ҳисоблайди ХВЖ вакиллари.

Хабарномада чеклов чоралари юмшатила бошлаганидан кейин Ўзбекистонда иқтисодий фаоллик ўса бошлаганига эътибор қаратилган.

ХВЖ экспертларига кўра, инқироз иқтисодий мақсадларга эришиш учун ислоҳотларни янада олға силжитиш заруратини намоён қилган.

Инқироз давлат банклари ва давлат корхоналарни ислоҳ қилиш ишини тўхтатмаслиги керак”, дея билдирган халқаро экспертлар.

ХВЖ таҳлилчилари қайдича, инқироз чекина бошлаши билан расмийлар давлатнинг иқтисодиётдаги ролини пасайтириш, бозорлар очиш, рақобатни кучайтириш ҳамда бизнес учун шароитни яхшилаш ишини давом эттиришлари лозим.

АҚШдаги хайрия ташкилоти Ўзбекистонга қиймати 800 минг доллардан ошган ёрдам юки йўллади

Жорий йилнинг 21 сентябрида АҚШнинг Юта штати Солт-Лейк-Сити шаҳридан Ўзбекистонга икки контейнер тиббий препарат ва жиҳозлар етиб келган.

“Дунё” ахборот агентлиги хабарига кўра, умумий қиймати 808 минг долларга тенг бўлган инсонпарварлик ёрдами АҚШдаги “Globus Relief” хайрия ташкилоти томонидан коронавирусга қарши кураш бўйича Ўзбекистон соғлиқни сақлаш тизимини мустаҳкамлаш мақсадида йўлланган.

Ёрдам юки ичида диагностика аппаратлари, стерилизация контейнерлари, антисептик воситалар, ногиронлар аравалари, ортопедик ва жарроҳлик асбоблари ҳамда бошқа ашёлар борлиги айтилмоқда.

Қайд этилишича, мазкур тиббиёт буюмлари Ўзбекистоннинг чекка ҳудудларида жойлашган давлат тиббиёт муассасаларига етказиб берилади.

Сухандон ва хонанда Шуҳрат Қаюмов 51 ёшида оламдан ўтди

Шуҳрат Қаюмов.

Ўзбекистонда хизмат кўрсатган артист, таниқли хонанда ва сухандон Шуҳрат Қаюмов 22 сентябрь куни 51 ёшида вафот этди. Бу ҳақда Маданият вазирлиги Телеграмдаги ўз канали орқали маълумот тарқатди.

Ш. Қаюмов 1969 йил 5 мартида Қирғизистоннинг Ўш шаҳрида таваллуд топган. У 1991 йили Ўзбекистон давлат санъат институтини тамомлаган.

Шуҳрат Қаюмов 1992 йилдан бошлаб кўп йиллар Миллий телерадиокомпания тизимида сухандонлик қилган. Хонанда сифатида ҳам у Ўзбекистонда ўз мухлисларини топа олган санъаткор эди.

Газете.uz нашри Маданият вазирлигидаги ўз манбалари маълумотига таянган ҳолда, Ш. Қаюмов вафотига юрак хуружи сабаб бўлганини хабар қилди.

Новосибирск ва Самарадан яна 1800 чоғли ўзбекистонлик юртига қайтарилди

Россиянинг Новосибирск ва Самара вилоятларидан 1800 чоғли ўзбекистонлик махсус поездлар билан ватанига олиб келинди.

Транспорт вазирлиги ахборот хизмати маълумотига кўра, ўтган жума Новосибирск станциясидан йўлга чиққан “Ўзбекистон темир йўллари” АЖ поезди 854 нафар йўловчи билан 21 сентябрь куни Поп станциясига етиб борган.

Ушбу рейс орқали олиб келинган барча фуқаролар Наманган вилояти транспорт бошқармаси томонидан ажратилган автобусларда Поп туманидаги карантин зонасига етказилди”, дейилади хабарномада.

Ўтган шанба 938 нафар ўзбекистонлик билан Самара вилоятидаги Кинель станциясидан йўлга чиққан ҳам 21 сентябрь куни Тошкент жанубий вокзалига етиб келган. Мазкур рейс билан олиб келинган йўловчилар ҳам автобусларда Тошкент вилоятидаги карантин зоналарига етказилган.

Ўтган ҳафта Екатеринбург ва Кинелдан 1700 га яқин ўзбекистонлик махсус поезд рейслари билан ватанига қайтарилгани ҳақида аввал хабар қилган эдик. Озодликдаги маълумотларга кўра, шу кунда Самара вилоятида яна камида 3000 нафар ўзбекистонлик юртига кетиш илинжида юрибди.

Мактабларнинг 44 фоизи тўлақонли равишда ишлай бошлади

Ўзбекистонда навбатдаги ўқув йили 14 сентябрдан бошланган.

Халқ таълими вазирлигининг билдиришича, 21 сентябрда тўлақонли равишда ишлай бошлаган мактаблар сони 4 379 тага етди. Бу Ўзбекистондаги мактабларнинг 43,9 фоизини ташкил қилади.

“Мазкур мактабларда 2,1 млн. нафар (34%) ўқувчи таҳсил олаётган бўлиб, улардан 1,5 млн. нафари (72%) анъанавий, қолган 595 минг нафари (28%) онлайн шаклда таълим олмоқда”,-дейилади хабарда.

Аввалроқ вазирлик мактабларнинг анъанавий шаклда очилиши тўғрисидаги қарорлар ҳар бир мактаб бўйича фақатгина Маҳаллий Кенгаш депутатлари томонидан қабул қилиниши ҳақида хабар берган эди.

Ўзбекистонда навбатдаги ўқув йили 14 сентябрдан бошланган. Ўшанда Халқ таълими вазирлиги мамлакатдаги 10 мингга яқин мактабдан 2635тасида ўқиш анъанавий тарзда бошланганини маълум қилганди.

Яккабоғ тумани бош имом-хатиби вафот этди

Ўзбекистондаги масжидлардан бири.

Қашқадарё вилоятининг Яккабоғ тумани бош имом-хатиби Тоҳир Исматиллаев вафот этгани ҳақида Ўзбекистон мусулмонлари идораси матбуот хизмати маълум қилди.

“Ўзбекистон мусулмонлари идораси жамоаси диний соҳада кўп йиллар самарали хизмат қилган, жонкуяр уламо, Қашқадарё вилояти Яккабоғ тумани бош имоми ҳамда "Эски Қўрғон" жоме масжиди имом-хатиби Тоҳир домла Исматиллаевнинг вафоти муносабати билан чуқур таъзия изҳор этади”,- дейилади расмий билдирувда.

Мусулмонлар идораси хабарида имомнинг вафоти сабаби айтилмаган.

16 сентябрь куни муфтият Тошкент вилояти бош имом-хатиби Хайруллоҳ Турматов вафот этганини билдирган, бироқ ўшанда ҳам ўлим сабабини очиқламаган эди.

44 ёшли имомнинг қариндошлари маҳаллий нашрларга Хайруллоҳ Турматов ўлимига коронавирус сабаб бўлганинини маълум қилган.

Ўзбекистон Россиянинг коронавирусга қарши вакцинасини синовдан ўтказишга қизиқиш билдирди

Ғарб давлатлари Россия вакцинасига шубҳа билдирмоқда.

Ўзбекистон Россиянинг “Вирусология ва биотехнология “Вектор” давлат маркази” томонидан ишлаб чиқарилган COVID-19га қарши вакцинани ҳамкорликда синовдан ўтказишга қизиқиш билдирди. Бу ҳақда Роспотребнадзор 21 сентябрь куни хабар берди.

Хабарда таъкидланишича, Роспотребнадзор Ўзбекистон Соғлиқни сақлаш вазирлиги ҳузуридаги Санитария-эпидемиологик осойишталик агентлиги билан COVID-19 тарқалишига қарши кураш масалаларини муҳокама қилган.

Видеоконференция шаклида ўтказилган муҳокама пайтида Ўзбекистон “Вектор” маркази томонидан ишлаб чиқарилаётган "ЭпиВакКорона” вакцинасини Россия ҳукумати рўйхатдан ўтказгандан сўнг уни ҳамкорликда синаб кўришга қизиқиш билдирган.

Россияда ишлаб чиқарилган коронавирусга қарши икки компонентли вакцина 11 август куни вақтинчалик рўйхатдан ўтиш гувоҳномасини олгани хабар қилинган эди.

Президент Путин вакцина муваффақиятли синовдан ўтказилгани ва тез орада ишлаб чиқарила бошланишини билдирган. Аммо ғарб давлатлари Россия вакцинасига шубҳа билдирган эди.

Ўзбекистон Инновацион ривожланиш вазирлиги эса 3 сентябрь куни Хитой COVID-19га қарши вакцина клиник синовларининг учинчи босқичида Ўзбекистонни ҳам иштирок этишга чақиргани ва ҳозирда бу масала ўрганилаётганини хабар қилган.

Коронавирусдан ўлганлар сони расман 438 кишига етди

Даволанаётган 3 215 нафар бемордан 536 нафари оғир, 283 нафари эса ўта оғир аҳволда.

Соғлиқни сақлаш вазирлигининг 22 сентябрда билдиришича, сўнгги бир сутка ичида коронавирусдан расман 5 киши вафот этди. Уларнинг тўрт нафари Тошкент шаҳридан, бир нафари Тошкент вилоятидан. Вафот этганлардан уч нафари эркак ва икки нафари аёл.

Айни пайтда коронавирус бўйича мустақил ҳисоб олиб бораётган “Дарё” нашри 21 сентябрь куни вазирлик қайд этганидай 5 киши эмас, 7 киши вафот этганини билдирди.

Нашр 66 ёшида вафот этган Хоразм вилоят 1-сон клиник шифохонаси шифокори Бахтиёр Қиличев ва Халқ таълими вазирлигининг Биринчи бўлим масъул ходими Шуҳрат Расуловни ҳам коронавирусдан ўлганлар қаторига киритган.

Хоразм вилояти Соғлиқни сақлаш бошқармаси Бахтиёр Қиличев коронавирусдан вафот этганини рад этган. Бироқ унинг оиласи лаборатория таҳлиллари ва текширувларга асосланиб, Қиличевнинг ўлимига айнан коронавирус асоратлари сабаб бўлганини тасдиқламоқда.

“Дарё” нашрининг билдиришича, Халқ таълими вазирлиги “58 ёшли Шуҳрат Расулов сўнгги вақтларда коронавирус инфекциясидан шифохонада даволанаётганини маълум қилган, бироқ кейинроқ хабардан мазкур жумлани ўчириб ташлаган”.

Соғлиқни сақлаш вазирлигининг билдиришича, ҳозирги кунгача коронавирусдан ўлганлар сони республика бўйича расман 438 нафарга етган.

“Дарё” нашри эса коронавирус қурбонлари сони камида 450 киши эканини билдирмоқда.

Ҳозирда касаллик қайд этилган жами 52 259 нафар бемордан 48 606 нафари соғайиб, даволаниш кўрсаткичи 93 фоизни ташкил этмоқда.

Айни пайтда тиббиёт муассасаларида даволанаётган 3 215 нафар бемордан 536 нафари оғир, 283 нафари эса ўта оғир аҳволда.

Фуқароликка қабул қилиш онлайн тартибга ўтмоқда

Ўзбекистонда Ички ишлар вазирлиги, Ташқи ишлар вазирлиги, Ахборот технологиялари ва коммуникацияларини ривожлантириш вазирлиги, Адлия вазирлиги ҳамда Давлат хавфсизлик хизматига "Паспорт-виза" автоматлаштирилган ахборот тизими мажмуасини модернизация қилиш орқали унинг таркибида "E-Fuqaro" идоралараро маълумотлар базасини жорий этиш топширилди. Бу топшириқ Вазирлар Маҳкамасининг жорий йил 16 сентябрида қабул қилинган “Ўзбекистон Республикасининг фуқаролиги масалаларини кўриб чиқишда замонавий ахборот-коммуникация технологияларини татбиқ этиш бўйича қўшимча чора-тадбирлар тўғрисида”ги қарорида акс этган.

Norma.uz қайдича, ушбу маълумотлар базаси асосида бундан буён:

  • фуқаролик масалалари бўйича аризаларни қабул қилиш ва уларни кўриб чиқиш билан боғлиқ тартиб-таомиллар автоматлаштирилади;
  • фуқаролик масалалари бўйича тушган аризалар идоралараро электрон ҳамкорлик йўли билан манфаатдор вазирликлар ва идоралар ўртасида кўриб чиқилади ҳамда уларга тегишли муносабат билдирилади;
  • фуқароликка қабул қилиш, уни тиклаш, ундан чиқиш ва уни йўқотиш бўйича ягона маълумотлар базаси шакллантирилади.

Шу тариқа Ўзбекистон Республикаси фуқаролигига қабул қилиш, ундан чиқиш ҳақидаги аризалар эндиликда реал вақт режимида "E-Fuqaro" ИМБ орқали қабул қилинади.

Автомобиллар нархини туширишни истамаган UzAvto Motors судга шикоят қилди

Ўзбекистонда ишлаб чиқарилаётган Cobalt автомобили.

UzAvto Motors АЖ Монополияга қарши курашиш қўмитасининг қарори устидан Тошкент шаҳар маъмурий судига шикоят киритган. Бу ҳақда парламент депутати Расул Кушербаев ўз Телеграм-канали орқали маълум қилди.

Депутатга кўра, суд шу йилнинг 2 октябрь куни соат 10.00 да Тошкент шаҳар маъмурий суди биносида бўлиб ўтади.

Маҳкамада Монополияга қарши курашиш қўмитаси ҳузуридаги махсус комиссиянинг 21/31-сонли иш буйича 2020 йил 19 августидаги қарорини ҳақиқий эмас, деб топиш ҳақидаги шикоят аризаси кўриб чиқилиши кутилмоқда.

Мазкур қарорга мувофиқ, комиссия UzAuto Motors енгил автомобилларнинг базавий улгуржи ва чакана сотиш нархларини ўртача 10,29 фоизга ошириб шакллантирганини тасдиқлаган ҳамда ширкат зиммасига енгил автомобиллар нархининг асоссиз оширилган қисмини пасайтириш ва ортиқча олинган маблағни (ҳар бир автомобилдан камида 3 млн сўмдан) истеъмолчиларга қайтариш мажбуриятини юклаган.

Кўрамиз, суд бу ишни қанчалик мустақил кўриб чиқиб, қонунларга асосан қарор қабул қиларкин”, деб ёзган депутат Р. Кушербаев.

Ўзбекистонда кино олган ширкатларга харажатининг бешдан бири қайтариб берилади

Хорижий кинокомпанияларга Ўзбекистон ҳудудида амалга оширган харажатларининг 20 фоизи (бироқ 300 минг АҚШ долларидан ошмаган миқдорда) Давлат бюджети маблағлари ҳисобидан қайтарилади. Бу ҳақда ҳукуматнинг шу йил 19 сентябридаги қарори билан тасдиқланган “Ўзбекистон Республикаси ҳудудида ўз фильмларини яратишда хорижий кинокомпанияларга харажатларининг бир қисмини қайтариш (“rebate”) тартиби тўғрисида”ги низомда қайд этилган.

Адлия вазирлигига қарашли “Ҳуқуқий ахборот” Телеграм-каналининг маълум қилишича, қарорга мувофиқ, хорижий кинокомпания республика ҳудудида фильмларни суратга олиш учун “Ўзбеккино” миллий агентлигидан рухсатнома олади ҳамда ҳамкорлик бўйича Меморандум имзоланади.

Хорижий кинокомпания Ўзбекистон ҳудудида фильмларни суратга олиш учун республикадаги тижорат банкларида махсус ҳисоб рақами очади ва харажатларни шу орқали амалга оширади. Рухсатнома муддати якунлангандан сўнг фильмни суратга олиш ишлари якунланган ҳисобланади.

Харажатларни қайтариш учун тегишли ҳужжатлар Молия вазирлигига тақдим этилади ва вазирлик томонидан 10 кун муддатда қарор қабул қилинади.

Чироқчида гумонланувчини калтаклаб ўлдирган ИИБ ходимларига нисбатан ҳукм ўқилди

Иллюстратив сурат.

Жиноят ишлари бўйича Қашқадарё вилоят суди жорий йил январида Чироқчи туманида мол ўғирлаганликда гумон қилиниб, ИИБ биносига олиб кетилган ва ўша ерда калтакланишдан вафот этган 32 ёшли Юсуф Абдураҳмонов ўлимида айбдор бўлган милиция ходимлари устидан 21 сентябрь куни ҳукм ўқиди. Бу ҳақда Ўзбекистон Олий суди матбуот хизмати маълумот тарқатди.

Суд ҳукмига кўра, Н. Овлаев Ўзбекистон Жиноят кодексининг 241-1-моддаси (жиноятни ҳисобга олишдан қасддан яшириш) 2-қисми “а”, “б” бандлари, 234-моддаси (қонунга хилоф равишда ушлаб туриш ёки ҳибсга олиш) 1-қисми, 235-моддаси (қийноққа солиш ва бошқа шафқатсиз, ғайриинсоний ёки қадр-қимматни камситувчи муомала ҳамда жазо турларини қўллаш) 3-қисми ва 104-моддаси (қасддан баданга оғир шикаст етказиш) 3-қисми “д” бандида назарда тутилган жиноятларни содир этганликда айбдор айбдор, деб топилган ва у 9 йилга озодликдан маҳрум қилинган.

А. Жонқобилов Ўзбекистон Жиноят кодексининг 234-моддаси 1-қисми, 235-моддаси 3-қисми ва 104-моддаси 3-қисми “д” бандида назарда тутилган жиноятларни содир этганликда айбдор, деб топилган ва унга 8 йилу 6 ой озодликдан маҳрум қилиш жазоси тайинланган.

Ш. Раҳмонов Ўзбекистон Жиноят кодексининг 241-1-моддаси 2-қисми “а”, “б” бандлари, 234-моддаси 1-қисми ва 235-моддаси 2-қисми “а”, “в”, “г” бандларида назарда тутилган жиноятларни содир этганликда айбдор, деб топилган ва унга 6 йиллик қамоқ жазоси тайинланган.

А. Тожиноров Ўзбекистон Жиноят кодексининг 234-моддаси 1-қисми ва 235-моддаси 2-қисми “а”, “в”, “г” бандларида назарда тутилган жиноятларни содир этганликда айбдор, деб топилган ва 5 йилу 6 ойга озодликдан маҳрум қилинган.

Б. Ғайратов Ўзбекистон Республикаси Жиноят кодексининг 241-1-моддаси 2-қисми “а”, “б” бандлари ва 209-моддаси (мансаб сохтакорлиги) 2-қисми “а” бандида назарда тутилган жиноятларни содир этганликда айбдор, деб топилган ва унга 4 йил озодликни чеклаш жазоси тайинланган.

Аввалроқ Чироқчи ИИБда калтаклаб ўлдирилган Юсуф Абдураҳмоновнинг турмуш ўртоғи Гўзал Абдиева суд ҳайъатидан судланувчилар Нурбек Овлаев ҳамда Анвар Жонқобиловларни кечириб, суд залидан озод қилишни сўрагани ҳақида хабар қилган эдик. Маълумотларга кўра, маҳкамада прокурор судланувчиларга 10 йилгача қамоқ жазоси тайинланишини сўраган.

Доллар ва евронинг расмий курси кўтарилишда давом этмоқда

Ўзбекистон Марказий банки жорий йил 22 сентябридан валюталарнинг сўмга нисбатан янги қийматини белгилади.

МБ маълумотига кўра, сешанбадан АҚШ долларининг расмий курси ўтган ҳафтага нисбатан 20 сўм 29 тийинга қимматлаб, 10 минг 315 сўм 62 тийинни ташкил этади (ўтган ҳафта доллар 21 сўм 16 тийинга қимматлаб, 10 минг 295 сўм 33 тийин бўлган эди).

Евронинг расмий курси эса олдинги курсга нисбатан 15 сўм 78 тийинга ошиб, 12 минг 210 сўм 60 тийинга тенг бўлади (ўтган ҳафта евро 32 сўм 26 тийинга ошиб, 12 минг 194 сўм 82 тийин бўлган).

Валюта қийматини белгилаш чоғида Марказий банк мазкур валюталарни ушбу қийматда сотиш ёки сотиб олиш мажбуриятини зиммасига олмаган.

Маданият вазирлиги Самарқандда тарихий бино бузилиши бўйича шаҳар ҳокимлигидан изоҳ талаб қилмоқда

Самарқандда давлат ва ЮНЕСКО ҳимоясида бўлган архитектура ёдгорлигининг бузилиш жараëни, 2020 йил 11 сентябри.

Ўзбекистон Маданият вазирлиги Самарқанд шаҳар ҳокимиятидан Амир Темур кўчаси, 14-уй бузилиши бўйича тушунтириш беришни талаб қилади. Бу ҳақда вазирлик томонидан 21 сентябрь куни ёйинланган баёнотда айтилган.

Мазкур манзилдаги тарихий бино 11 сентябрь куни шаҳар Ободонлаштириш корхонаси ва Мажбурий ижро бюро ходимлари томонидан бузиб ташлангани ҳақида Озодлик хабар қилган ва бу мавзу ижтимоий тармоқларда кенг муҳокамаларга сабаб бўлганди. Бино 2010 йилгача тарихий архитектура ёдгорлиги сифатида давлат ҳимоясида бўлган.

Баёнотда Маданият вазирлиги Амир Темур кўчаси 14-уйда жойлашган бино бузилиши ҳақида ҳам, бузилишга оид суд қарори ҳақида ҳам огоҳлантирилмагани қайд этилган.

“Маданият вазирлиги Ўзбекистон Республикаси Бош Прокуратурасига 1990-2000-йилларда тарихий объектларни қайси сабабларга биноан рўйхатдан чиқарилганлиги бўйича қуйидаги сўровнома асосида текширув ўтказилиши масаласи бўйича мурожаат қилади: 1) Объектлар нега рўйхатдан чиқарилди? 2) Ушбу хулосалар ким томонидан қабул қилинган? 3) Хулосалар маданият вазирлиги ва вилоят ҳокимиятининг қайси раҳбари томонидан тасдиқланган? 4) Рўйхатдан чиқарилган бошқа объектларнинг тақдири нима бўлган?” дея саволлар ташланади баёнотда.

Вазирликка кўра, “агар тарихий объектнинг бузилиши Самарқанд шаҳар ҳокимлиги томонидан амалга оширилган ҳамда Маданият вазирлиги бу жараённи тасдиқламаган бўлса, у ҳолда бузилишга оид масъулиятни шаҳар ҳокимлиги ўз зиммасига олиши ва бунга алоқадор шахслар амалга оширган ноқонуний ҳатти-ҳаракатлари учун қонунда белгиланган тартибда жазоланиши шарт”.

Ўз баёнотида Маданият вазирлиги Самарқанд вилояти ҳокимияти ва Самарқанд шаҳар ҳокимлигидан ЮНЕСКО ҳудудларига қўйилган барча талаб меъёрларига қатъий амал қилинишини талаб қилган.

Ўзбекистон 8 ойда олтин сотиш бўйича янги рекорд ўрнатди

Август ойида Ўзбекистон 2,5 миллиард доллардан кўпроқ олтин экспорт қилган.

Ўзбекистон жорий йилнинг январь-август ойлари оралиғида 5 миллиард 800 миллион долларлик олтин экспорт қилди.

Давлат статистика қўмитасининг маълум қилишича, бу ўтган йилнинг шу даврига солиштирганда 147,2 фоизга ёки 1 миллиард 800 миллион долларга кўпдир.

Олтин экспорти саккиз ойдаги жами экспорт улушининг 50 фоизини ташкил этган.

Ҳисоботда таъкидланишича, биргина август ойида Ўзбекистон 2,5 миллиард доллардан кўпроқ олтин экспорт қилган. Давлат статистика қўмитаси ҳисоботида ўтган саккиз ой мобайнида республиканинг ташқи савдо айланмаси 24,5 миллиард долларни ташкил қилди.

Бу эса ўтган йилнинг мос даврига нисбатан 3,5 миллиард долларга оздир. Ташқи савдо айланмасида экспорт ҳажми 11,6 миллиард долларни, импорт ҳамжи 12,9 миллиард доллар бўлган.

Ўзбекистон июль ойида 11,6 тонна олтин сотиб жаҳондаги энг кўп олтин сотган мамлакатга айланган эди.

Олтин сотиш бўйича иккинчи ўринни Мўғулистон эгаллаган. Бу мамлакат июль ойида 6,1 тонна олтин экспорт қилган.

Айни пайтда мазкур ойда Россия ва Германия ҳам ярим тоннадан олтин сотгани айтилмоқда.

Давомини ўқинг

Кўрмай қолган бўлсангиз

XS
SM
MD
LG