Линклар

Шошилинч хабар
20 июл 2024, Тошкент вақти: 07:46

Ўзбекистон хабарлари

Адлия вазирлиги активларни қайтаришда Г. Каримованинг умуман роли йўқлигини билдирди

Гулнора Каримова.
Гулнора Каримова.

Адлия вазирлиги аввалги президентнинг тўнғич қизи Гулнора Каримованинг хорижда музлатиб қўйилган активлардан бир қисмини Ўзбекистонга қайтаришига оид баёнот юзасидан изоҳ берди.

Вазирлик Ўзбекистонга мулкларни Г.Каримованинг ўзи қайтарганлиги ёки қолган мулклар бевосита Г.Каримова ёхуд бошқа алоҳида шахслар томонидан қайтарилиши мумкинлиги ҳақидаги таъкидлар ҳуқуқий асосга эга эмаслиги ва шу боис ҳақиқатга тўғри келмаслигини билдирган.

“Мазкур мулклар хорижий давлатларнинг ваколатли органлари томонидан ҳибсга олинганлиги муносабати билан улар анчадан буён Г.Каримова (унинг оила аъзолари)нинг тасарруфида эмас”, дейилади вазирлик хабарномасида.

Хабарномада Бош прокуратура ва Адлия вазирлиги томонидан Ўзбекистоннинг ваколатли идоралари иштирокида Г.Каримова томонидан жиноий йўл билан орттирилган 1,3 млрд. АҚШ долларидан ортиқ миқдордаги мулкларни қайтариш бўйича Швейцария, Франция, Россия Федерацияси ва бошқа давлатларнинг ваколатли органлари билан ҳамкорликда иш олиб борилаётгани урғуланган.

Эслатиб ўтамиз, жиноят ишлари бўйича Тошкент шаҳар судида 2020 йилнинг 18 март куни Г. Каримова ва у томонидан ташкил этилган жиноий уюшма аъзоларига нисбатан жиноят ишини кўриб чиқиш бўйича суд жараёни ниҳоясига етган ва суд ҳукми эълон қилинган.

Суд ҳукми билан 47 ёшли Гулнора Каримовага 13 йил 4 ой муддатга озодликдан маҳрум қилиш жазоси тайинланган. Жиноят қонунчилиги нормаларига мувофиқ ҳамда бир неча жиноят ва ҳукмлар мажмуи бўйича жазо тайинланганлигини инобатга олган ҳолда, жазо муддатини 2015 йил 21 августидан бошлаб ҳисоблаш белгиланган.

Кун янгиликлари

Қашқадарёда уч нафар блогер қамалди

Иллюстратив сурат
Иллюстратив сурат

Жиноят ишлари бўйича Қарши шаҳар суди ҳукми билан 18 июль куни блогер Наргиза Келдиёрова 6 йил 6 ойга, блогер Дилдора Ҳакимова 6 йил 2 ойга ва блогер Шукрулло Парпиев 6 йил 6 ойга озодликдан маҳрум қилинди.

Шунингдек, блогерларга жиноий шерикликда айбланган яна 4 нафар фуқаронинг ҳар бири 5 йилга озодликдан чеклаш билан жазоланди. Бу ҳақда Озодликка судда иштирок этган адвокатлардан бири маълум қилди.

Блогерлар Ўзбекистон Жиноят кодексининг 165-моддасида (Товламачилик) кўзда тутилган жиноятларни содир этганликда айбланган.

Бундан ташқари, блогер Наргиза Келдиёровага Жиноят кодексининг 155-моддаси (Терроризм) ва 158-моддаси 3-қисми (Ўзбекистон Республикаси президентини омма олдида ҳақоратлаш ёки унга туҳмат қилиш, шунингдек, матбуот ёки бошқа оммавий ахборот воситаларидан, телекоммуникация тармоқларидан ёки Интернет бутунжаҳон ахборот тармоғидан фойдаланган ҳолда уни ҳақоратлаш ёки унга туҳмат қилиш) бўйича айблов қўйилган.

Жиноят иши материалларига кўра, Келдиёрова хусусан Қозоғистондаги оммавий тартибсизликлар ҳақида ижтимоий тармоқларда фикр билдириб, уни қўллаб-қувватлаган ва бу билан қонунчиликдаги терроризм жиноятини содир этган.

Блогерларга нисбатан суд томонидан белгиланган жазо муддатлари умумий тартибдаги колонияларда ўталиши билдирилган.

Шавкат Мирзиёев Урсула фон дер Ляйенга табрик мактуби йўллади

Урсула фон дер Ляйен
Урсула фон дер Ляйен

Ўзбекистон президенти Шавкат Мирзиёев Урсула фон дер Ляйенни Европа комиссияси президенти лавозимига қайта сайлангани муносабати билан табриклаб, унга мактуб йўллаган. Бу ҳақда президент матбуот котиби Шерзод Асадов ўз телеграм-канали орқали маълум қилди.

Асадовга кўра, Мирзиёев ўз мактубида Ўзбекистоннинг сўнгги йилларда Европа Иттифоқи билан кенг қамровли муносабатларини сифат ва мазмун жиҳатидан мутлақо янги босқичга кўтаришда, “Ўзбекистондаги ортга қайтмас тус олган демократик ва иқтисодий-ижтимоий ислоҳотларни ҳар томонлама қўллаб-қувватлашда Еврокомиссия Президентининг улкан шахсий ҳиссаси бор”лигини урғулаган.

Мактубда Ўзбекистон Европа Иттифоқи билан муносабатларда мутлақо янги саҳифа очадиган Кенгайтирилган ҳамкорлик ва шериклик тўғрисидаги битимни тез орада имзолаш тарафдори экани қайд этилган.

Яқин келажакда Самарқанд шаҳрида биринчи “Марказий Осиё - Европа Иттифоқи” саммити ўтказилиши минтақавий алоқаларимизни манфаатли лойиҳалар ва дастурлар билан бойитиш йўлида муҳим амалий қадам бўлишига аминман", дейилган президент Мирзиёев мактубида.

Германиялик сиёсатчи Урсула фон дер Ляйен номзоди 18 июль куни Европарламент томонидан яна беш йилга Европа комиссияси раҳбари лавозимига тасдиқланган эди. Маълумотларга кўра, Европарламентдаги 720 депутатдан 401 нафари Урсула фон дер Ляйен номзодини ёқлаб, овоз берган. Бу Европа комиссияси президенти бўлиш учун зарур бўлган овоз миқдоридан 40 тага кўпдир. Яширин овоз бериш йўли билан ўтказилган сайловда 284 нафар депутат Урсула фон дер Ляйенга қарши овоз берган, депутатлардан 15 нафари эса овоз беришдан тийилган.

Аввалроқ ЕИга аъзо давлатлар раҳбарлари ҳам Урсула фон дер Ляйен номзодини маъқуллаган эдилар.

“Бахти Ташкентский” 20 йилга озодликдан маҳрум этилди

"Бахти Ташкентский" лақаби билан танилган Бахтиёр Қудратуллаев (Тошкент шахар ИИББ фотоси)
"Бахти Ташкентский" лақаби билан танилган Бахтиёр Қудратуллаев (Тошкент шахар ИИББ фотоси)

Жиноят ишлари бўйича Юнусобод туман суди 19 июль куни жиноят оламида “Бахти Ташкентский” лақаби билан танилган Бахтиёр Қудратуллаев ва унинг яқинлари дохил 37 нафар судланувчига нисбатан ўз ҳукмини очиқлади.

Маҳаллий матбуот хабарига кўра, Ўзбекистон Жиноят кодексининг қатор моддалари бўйича айбдор деб топилган Бахтиёр Қудратуллаев, суд ҳукмига кўра, 20 йилга озодликдан маҳрум қилинган.

Аввалроқ прокурор 44 та эпизод бўйича айбланаётган “Бахти Ташкентский”га 20 йиллик қамоқ жазоси берилишини сўраганди.

53 ёшни қоралаган Бахтиёр Қудратуллаев ўтган йилнинг ноябрь ойи охирида Тошкент шаҳар ИИББ томонидан ўтказилган “Долзарб 40 кунлик” тадбирлари доирасида қўлга олинган эди. У Маъмурий жавобгарлик тўғрисидаги кодекснинг 183-моддаси (майда безорилик) ва 194-моддаси (ИИО ходимини қонуний талабини бажармаслик) 1-қисмида назарда тутилган маъмурий ҳуқуқбузарликларни содир этганликда айбли деб топилган ва 15 суткага қамалган.

Декабрь ойи бошида Тошкент шаҳар ИИББ Бахтиёр Қудратуллаев 165-модда 3-қисми (жуда кўп миқдорда товламачилик), 276-модда 2-қисмида (кўп миқдорда гиёҳвандлик воситаларини сақлаш) ҳам гумонланаётганини билдирганди.

“Бахти Ташкентский” ва яна 36 кишининг жиноят ишини кўриб чиқиш бўйича суд жараёни жорий йилнинг 3 июнида Юнусобод туман суди биносида бошланган эди.

Ўзини ўзи банд қилган таксичилар сони ярим миллиондан ошди

Иллюстратив сурат
Иллюстратив сурат

Ўзбекистонда ўзини ўзи банд қилган шахслар сони 2024 йилнинг 1 июль ҳолатига 3,5 миллион нафардан ошган. Давлат солиқ қўмитаси матбуот хизмати қайдича, бу ўтган йилнинг шу даврига нисбатан 115,6 фоизга (1,9 миллион нафарга) кўпдир.

Солиқ қўмитаси ўтган йилга нисбатан ўсиш кўрсаткичи энг юқори соҳалар қаторида ишлаб чиқариш ва хизмат кўрсатиш (199,3 фоиз ёки 220,4 мингта), маиший хизматлар (186,2 фоиз ёки 952,5 мингта) ҳамда ахборот-коммуникация (154,7 фоиз ёки 56,1 мингта) каби соҳаларни санаган.

Ўзини ўзи банд қилган шахслар ичида эркаклар улуши 57 фоизга, аёллар улуши эса 43 фоизга тенг.

Ҳудудлар кесимида ўзини ўзи банд қилганлар энг кўп Самарқанд вилоятида (қарийд 430 минг киши), Қашқадарё вилоятида (362,5 минг киши), Андижон вилоятида (327,7 минг киши) ва Тошкентда (320 минг киши) яшайди.

IT соҳасида ўзини ўзи банд қилган шахслар сони 2,5 баравар (92,3 минг киши) ошган. Солиқ қўмитаси бу кишиларнинг қайси мамлакат фуқароси эканига аниқлик киритган эмас. Шу сабабдан қайд этилган ITчиларнинг ҳаммаси ўзбекистонликми ёки улар орасида Ўзбекистонда фаолият юритаётган Россия ва Беларусь фуқаролари ҳам борми – маълум эмас.

Қўмита маълумотига кўра, жорий йилнинг биринчи ярмида енгил автотранспортда йўловчи ташиш фаолияти бўйича рўйхатдан ўтган фуқаролар сони 530 минг 16 нафарга етган. “Шундан 238 631 нафари жорий йилда рўйхатдан ўтган”, дейилган Солиқ қўмитаси хабарномасида.

Ўзбекистонда “Лукойл” шуъбаси нарх манипуляциясида айбдор топилди

Иллюстратив сурат
Иллюстратив сурат

Рақобатни ривожлантириш ва истеъмолчилар ҳуқуқларини ҳимоя қилиш қўмитасининг махсус комиссияси Россиянинг “Лукойл” ширкати шуъба корхонаси томонидан Ўзбекистон қонунчилиги бузилганини аниқлаган.

Икки ҳафта муқаддам Озодлик Ўзбекистонда нарх-наво манипуляциясида гумонланаётган Lukoil Overseas Supply and Trading Ltd ширкатига нисбатан иш қўзғатилгани ҳақида хабар қилган эди.

Ўшанда ширкат биржа савдолари орқали техник олтингугурт маҳсулотини реализация қилишда, шу жумладан биржа савдоларида маҳсулот ҳажмларини номувофиқ қўйиш каби манипуляция ҳолатлари орқали маҳсулот нархларини ошишига олиб келган ҳаракатларни амалга оширганликда гумонланаётгани айтилган.

Иддаога кўра, ширкат томонидан содир этилган мазкур манипулятив хатти-ҳаракатлар биржа савдоларида техник олтингугурт маҳсулоти нархларининг ўртача 10 фоиздан 50 фоизгача ошишига сабаб бўлган.

Бу борада текширув ўтказган Рақобат қўмитаси махсус комиссияси ширкат томонидан қонун бузилишига йўл қўйилганлиги натижасида асоссиз олинган маблағни қайтариш бўйича қарор қабул қилган.

Қўмита хабарномасида маълум қилинишича, махсус комиссия томонидан ширкатга қонун бузилишларини бартараф этиш ва кейинчалик йўл қўймаслик юзасидан бажарилиши мажбурий бўлган кўрсатма берилган.

Рақобат қўмитаси “махсус комиссия қароридан норози бўлган томон Қўмитанинг Апелляция кенгашига ёки судга мурожаат қилиш ҳуқуқига эга” эканини қўшимча қилган.

Ўзбекистон билан Қирғизистон ўртасида 15 дан зиёд ҳужжат имзоланди

Қирғизистон президенти Садир Жапаровнинг Ўзбекистонга икки кунлик ташрифи доирасида 16 та икки томонлама ҳужжат имзоланган.

Президент матбуот хизмати маълумотига мувофиқ, икки давлат президентларининг музокаралари якунида даставвал Шавкат Мирзиёев билан Садир Жапаров Кенг қамровли стратегик шериклик муносабатларини янада чуқурлаштириш ва кенгайтириш тўғрисидаги қўшма баёнотга қўл қўйишган.

Шундан сўнг мезбон ва меҳмон президентлар ҳузурида Қирғизистоннинг Иссиқкўл вилояти ҳудудида жойлашган курорт-ҳордиқ хўжалиги объектлари бўйича ҳукуматлараро битим, Фуқароларнинг ўзаро келиб-кетишлари тўғрисидаги ҳукуматлараро битимга ўзгартиришлар киритиш тўғрисида баённома, Ўзбекистоннинг ЖСТга аъзо бўлиши бўйича икки томонлама музокараларни якунлаш тўғрисида баённома, Қурилиш фаолияти соҳасидаги ҳамкорлик тўғрисида баённома, Меҳнат, аҳоли бандлиги ва миграция соҳасидаги ҳамкорлик тўғрисида баённома, Маданият ва санъат соҳасидаги ҳамкорлик тўғрисида баённома, Давлат хизмати соҳасидаги ҳамкорлик тўғрисида баённома, 2024-2030 йилларда ўзаро савдо ҳажмини ошириш бўйича чора-тадбирлар режаси, 2024-2026 йилларда жисмоний тарбия ва спорт соҳасидаги ҳамкорликни ривожлантириш бўйича амалий чора-тадбирлар режаси, 2024-2026 йилларда қишлоқ хўжалиги ва озиқ-овқат таъминоти соҳасидаги ҳамкорликни янада ривожлантириш бўйича "йўл харитаси", Ўзбекистон президенти ҳузуридаги Стратегик ва минтақалараро тадқиқотлар институти ҳамда Қирғизистон президенти ҳузуридаги Стратегик ташаббуслар миллий институти ўртасидаги меморандум ва бошқа ҳужжатлар имзоланган.

Қирғизистон президенти Садир Жапаров давлат ташрифини амалга ошириш учун Ўзбекистонга 18 июль куни эрталаб рафиқаси Айгул Жапарова билан биргаликда учиб келган. Меҳмонларни Тошкент халқаро аэропортида президент Шавкат Мирзиёев ва унинг рафиқаси Зироат Мирзиёева кутиб олишган.

Кўксарой қароргоҳида ўтказилган тантанали кутиб олиш маросими ортидан аввалига икки президентнинг тор доирадаги учрашуви бўлиб ўтган. Унда, жумладан, икки давлат ўртасида парламентлар, ҳукуматлар, ташқи сиёсат ва тармоқ идоралари даражасидаги мулоқотлар натижадорлигини ошириш, халқаро ва минтақавий майдонлар, жумладан, Бирлашган Миллатлар Ташкилоти, Жаҳон савдо ташкилоти, минтақа давлатлари раҳбарларининг маслаҳат учрашувлари, “Марказий Осиё плюс” форматлари доирасида ўзаро қўллаб-қувватлашни давом эттириш зарурлиги таъкидланган, ўзаро товар айирбошлаш ҳажмини яқин йилларда 2 миллиард долларга етказиш, қишлоқ ва сув хўжалиги, экология, хавфсизлик ва бошқа соҳаларда ўзаро манфаатли ҳамкорликни ривожлантириш, стратегик аҳамиятга эга минтақавий лойиҳаларни, жумладан, “Хитой - Қирғизистон - Ўзбекистон” темир йўли ва Қамбарота ГЭС-1 қурилишини тез фурсатда амалга ошириш масалалари муҳокама қилинган.

Икки мамлакат расмий делегациялари иштирокида кенгайтирилган таркибда ўтказилган музокараларда эса, президент матбуот хизмати қайдича, савдо, саноат кооперацияси, энергетика, транспорт, қишлоқ ва сув хўжалиги, хавфсизлик, маданият ва бошқа муҳим йўналишлардаги ҳамкорлик натижалари танқидий таҳлил қилинган. Музокаралар чоғида томонлар парламентлар, ҳукуматлар, вазирликлар, идоралар ва ҳудудлар, ишбилармонлар, экспертлар ва жамоатчилик даражасида фаол алоқаларни давом эттиришга келишиб олишган. Шунингдек, Давлатлараро кенгаш тузишга қарор қилинган.

Йиғилишда бош вазирлар ўринбосарларининг ҳисоботлари ва савдо-иқтисодий ҳамкорлик юзасидан аниқ таклифлари тингланган, музокаралар якунида эса президентлар қўшма “йўл харитаси”ни тайёрлаш ва эришилган келишувларни самарали амалга ошириш механизмларини йўлга қўйиш бўйича топшириқ беришган.

Икки томонлама музокаралардан сўнг Мирзиёев ва Жапаров видеоалоқа форматида йирик кооперация лойиҳаларини ишга тушириш маросимида иштирок этишган. Жумладан, президентлар Фарғона ва Наманган вилоятларида умумий қуввати 400 мегаватт бўлган иккита қуёш электр станцияси қурилишига старт беришган. Мазкур станцияларда ишлаб чиқариладиган электр энергияси Қирғизистонга етказиб берилиши кўзда тутилган. Шунингдек, Қирғизистоннинг Чуй вилоятида “Кобальт”, “Оникс” ва “Трекер” русумли енгил ҳамда юк автомобиллари йиғиладиган заводни ишга туширишган. Президентлар Қирғизистон Қораболта шаҳрида жойлашган тикув-трикотаж маҳсулотлари ва мато ишлаб чиқарадиган фабрикани ҳам онлайн тарзда очиб беришган.

Қирғизистон президентининг Ўзбекистонга давлат ташрифига оид тадбирлар 19 июль куни ҳам давом этади.

Мирзиёев Эроннинг янги президенти билан мулоқот қилди

Эроннинг янги президенти Масъуд Пезешкиён
Эроннинг янги президенти Масъуд Пезешкиён

Ўзбекистон президенти Шавкат Мирзиёев 17 июль куни Эроннинг янги сайланган президенти Масъуд Пезешкиён билан телефон орқали мулоқот қилган.

Президент матбуот хизмати маълумотига кўра, мулоқот аввалида Мирзиёев Пезешкиённи Эронда ўтказилган президент сайловидаги ғалабаси билан қутлаган.

Шундан сўнг икки президент Ўзбекистон-Эрон муносабатларини янада ривожлантириш, савдо, инвестиция ва транспорт соҳаларидаги амалий ҳамкорликни кенгайтириш масалалари муҳокама қилишган.

Мулоқот чоғида энергетика, кимё саноати, қишлоқ хўжалиги, озиқ-овқат ва бошқа тармоқларда кооперация лойиҳаларини илгари суриш муҳимлиги қайд этилган.

Хабарномада суҳбат чоғида Мирзиёев ва Пезешкиён минтақавий кун тартибидаги долзарб масалаларга ҳам тўхталишгани қўшимча қилинган.

Аввалроқ Озодлик Эронда 5 июль куни бўлиб ўтган президент сайловининг иккинчи босқичида ислоҳотчи номзод Масъуд Пезешкиён ғалаба қозонгани ҳақида хабар қилган эди.

Эронда президент давлат раҳбари бўлиб ҳисобланмайди, у айниқса ташқи сиёсатда анчагина чекланган ваколат эгаси бўлмиш ижроия ҳокимияти раҳбаридир. Шунга қарамай, президент дунёнинг турли мамлакатлари билан алоқалар оҳангига ўз таъсирини кўрсатиш имконига эга.

Ботир Зокиров қурилиш вазири лавозимидан кетди

Қурилиш ва уй-жой коммунал хўжалиги вазири Ботир Зокиров лавозимидан бўшатилди. Бу ҳақда 17 июль куни президент раислигида Тошкентда ўтказилган видеоселектор йиғилишида билдирилган.

Йиғилишда қайд этилишича, Ботир Зокиров ўз лавозимидан “соғлиги туфайли” озод этилган, унинг ўрнига эса вазирнинг биринчи ўринбосари Шерзод Ҳидоятов вазир вазифасини бажарувчи этиб тайинланган.

Ҳидоятов биринчи ўринбосар лавозимига тайинланган 2019 йилнинг сентябрига қадар Tashkent City Халқаро ишбилармонлик маркази қурилиши дирекциясини бошқарган, ундан аввал эса Тошкент шаҳрининг собиқ ҳокими Жаҳонгир Ортиқхўжаевга тегишли Akfa ширкатлар гуруҳида қурилиш бўйича директор вазифасида ишлаган.

Шу ой охирида 61 ёшга тўладиган Ботир Зокиров 2019 йилнинг сентябридан буён қурилиш вазири лавозимида ишлаб келаётган эди. Ишдан бўшатилган мулозимга бошқа бирор лавозим бериладими ёки у соғлиғини тиклаш билан машғул бўладими – ҳозирча маълум эмас.

Аввалроқ маҳаллий матбуотда қурилиш вазири Ботир Зокировга алоқадор “Трест-12” ширкатига миллионлаб долларлик қурилиш лойиҳалари бир неча марта тендерсиз берилгани ҳақида хабарлар чиққан эди.

Россия армияси сафида жанг қилишга шайланган яна бир ўзбекистонлик жазоланди

Иллюстратив сурат
Иллюстратив сурат

Қорақалпоғистоннинг Амударё туман суди Россия армиясида хизмат қилиш учун шартнома имзолаган, бироқ жанговар тайёргарликни тамомлагач, ҳарбий лагердан қочиб, Ўзбекистонга қайтган фуқаронинг озодлигини 3 йилга чеклаш ҳақида ҳукм чиқарган.

Газета.uz нашри қайдича, суд ҳукми 24 июнь кунида чиққан бўлишига қарамай, бу ҳақда жамоатчиликка эндигина маълум бўлган.

Маълумотларга кўра, 23 ёшли йигит 2023 йил декабрь ойида Россияга ишлаш учун кетган. У Москвада турли қурилиш майдонларида ишлаган, кейин тунги клубда буфетчи бўлган, бироқ маоши оила харажатларига етмаган.

Жорий йилнинг 5 февраль куни у Россия армиясида хизмат қилиш учун шартнома имзолашга қарор қилган. Шартномага мувофиқ, у Украина урушида қатнашгани учун бир марталик 195 минг рубль (тахминан 27,9 миллион сўм), сўнгра ВТБ банк картасига ойига 240 минг рублдан (34,3 миллион сўм) олиши керак бўлган.

У 24 нафар россиялик, ўзбекистонлик ва тожикистонлик билан биргаликда Москва вилоятидаги “Авангард” ҳарбий лагерида махсус жанговар тайёргарликдан ўтиб, оддий аскар ва ўқчи лавозимини эгаллаган. Бироқ йигит Украина урушида оёғидан жароҳат олган зобит ҳикоясини эшитиб, қўрқиб кетган ва отаси касал эканини айтиб, қисқа муддатга хизматдан бўшатишни сўраган. Шундан сўнг у Ўзбекистоннинг Москвадаги дипломатлари ёрдамида Ўзбекистонга қочиб кетган.

Суд йигитнинг қарамоғида вояга етмаган фарзанди борлиги, муқаддам судланмагани ва жанговар ҳаракатларда қатнашмаганини ҳисобга олиб, унга 3 йил муддатга озодликни чеклаш жазосини тайинлаган. Ҳукмга мувофиқ, унинг кечки соат 21:00 дан эрталабки 06:00 гача уйидан чиқиш тақиқланган.

Бу Украина урушида қатнашиш учун Россия армияси билан шартнома имзолаган шахснинг Ўзбекистон суди томонидан жазога тортилиши бўйича иккинчи ҳолатдир. Аввалроқ Озодлик Россиянинг “Вагнер” хусусий ҳарбий ширкати сафида ярим йил мобайнида Украинада жанг қилган Шавкат Йўлдошевга нисбатан Оҳангарон туман суди томонидан 2 йилу 6 ой муддатга ахлоқ тузатиш ишлари жазоси тайинлангани ҳақида хабар қилган эди.

Жапаров икки кунлик ташриф билан Ўзбекистонда бўлади

Ўзбекистон президенти Шавкат Мирзиёев қирғизистонлик ҳамкасби Садир Жапаров билан (архив сурати)
Ўзбекистон президенти Шавкат Мирзиёев қирғизистонлик ҳамкасби Садир Жапаров билан (архив сурати)

Қирғизистон президенти Садир Жапаров 18-19 июль кунлари Ўзбекистонга давлат ташрифини амалга оширади. Бу ҳақда Қирғизистон президенти маъмурияти ташқи сиёсат бўлими мудири Муратбек Азимбакиев маълум қилди.

Ташриф доирасида Садир Жапаров Ўзбекистон президенти Шавкат Мирзиёев билан икки томонлама музокараларни олиб боради. Томонлар ўзаро манфаатли бўлган барча йўналишлар бўйича икки томонлама ҳамкорликнинг долзарб масалаларини ҳамда қирғиз-ўзбек алоқаларини ривожлантириш истиқболларини муҳокама қилишади”, дея билдирган қирғиз мулозими.

Азимбакиев президент Жапаров Тошкентда Ўзбекистондаги Қирғизистон маданияти кунларини расмий очилиш маросимида, шунингдек, мезбон президент билан биргаликда икки томонлама лойиҳаларнинг онлайн очилиш маросимида иштирок этишини маълум қилган.

Бундан ташқари, Садир Жапаровнинг ташрифи чоғида Ўзбекистон-Қирғизистон бизнес-форуми ва икки давлат олий таълим муассасалари ректорларининг форуми бўлиб ўтиши кутилмоқда.

Қирғизистон президенти Ўзбекистонга сўнгги марта ўтган йилнинг ноябрь ойида сафар қилган эди.

Ўзбекистонда 10 та туман ва шаҳар ҳокими ишдан олинди

Ўзбекистон президенти Шавкат Мирзиёев Тошкентдаги видеоселектор йиғилишида, 2024 йил 17 июли (president.uz фотоси)
Ўзбекистон президенти Шавкат Мирзиёев Тошкентдаги видеоселектор йиғилишида, 2024 йил 17 июли (president.uz фотоси)

Ўзбекистонда фаолиятида тизимли камчиликларга йўл қўйган 10 та туман ва шаҳар ҳокими ишдан олинган. Бу ҳақда президент матбуот хизмати маълумот тарқатди.

Қораўзак, Тахиатош, Учқудуқ, Тошкент, Фурқат, Гурлан, Мирзаобод, Янгиариқ, Мингбулоқ туманлари ва Ғозғон шаҳри ҳокимларини ишдан олингани президент Шавкат Мирзиёев раислигида 17 июль куни ҳудудлар ва тармоқларда иқтисодий ўсиш суръатларини таъминлаш бўйича биринчи ярим йиллик таҳлили ва йил якунига қадар устувор вазифалар юзасидан видеоселектор йиғилиши чоғида эълон қилинган.

Йиғилишда бош вазир Абдулла Арипов таклифига кўра ишида тизимли нуқсонлар кузатилган 28 та туман-шаҳар ҳокимига нисбатан интизомий жазо чораларини кўрилиши ҳам очиқланган.

Парламент қуйи палатасига сайлов октябрь ойида ўтиши кутилмоқда

Иллюстратив сурат
Иллюстратив сурат

Мустақил Давлатлар Ҳамдўстлиги Парламентлараро ассамблеяси халқаро кузатувчилари жорий йилнинг октябрь ойида Ўзбекистон Олий Мажлиси Қонунчилик палатаси ва маҳаллий кенгашларга бўлиб ўтадиган сайловларни кузатишга таклиф қилинди. Бу ҳақда Олий Мажлис Сенати ахборот хизмати маълумот тарқатди.

Қайд этилишича, мазкур таклиф Сенат раиси Танзила Норбаева бошчилигидаги Ўзбекистон парламенти делегацияси томонидан ўтган ҳафта Россиянинг Санкт-Петербург шаҳрида бўлиб ўтган МДҲ ПА Кенгашининг йиғилишида очиқланган.

Ўзбекистонда келаётган кузда парламент ва маҳаллий кенгашларга сайлов ўтказилиши шу кунгача на Марказий сайлов комиссияси, на-да бошқа бир ваколатли идора томонидан расман тасдиқланган эмас.

Сайлов қонунчилигига киритилган сўнгги ўзгартишлар эътиборга олинса, сайлов 2024 йилнинг октябрь ойи учинчи ўн кунлиги биринчи якшанбасида бўлиб ўтиши керак.

Президент Шавкат Мирзиёев ўтган йил 6 мартида сиёсий партиялар ролини ошириш учун - мажоритар ва пропорционал сайлов тизимига ўтишни таклиф қилган.

Ушбу таклиф асосида 2023 йилнинг 18 декабрь куни “Ўзбекистон Республикасининг айрим қонун ҳужжатларига сайлов ва референдум ўтказиш тартибини янада такомиллаштиришга қаратилган ўзгартириш ва қўшимчалар киритиш тўғрисида”ги қонун қабул қилинган.

Ҳужжатга мувофиқ, бундан буён парламентдаги 150 ўриннинг ярми - пропорционал шаклда - партиявий рўйхатлар билан, ярми - мажоритар тизимда - номзодларга овоз бериш йўли билан тақсимланиши лозим.

Бундан ташқари, янги қонунчиликка кўра, Ўзбекистонда парламент ўзини ўзи тарқатиб юбориш ваколатига ҳам эга бўлган. Бу янгилик жамоатчилик орасида галдаги парламент сайлови жорий йилнинг “ё баҳор, ё куз”ида бўлиб ўтишига оид тахминлар урчишига сабаб бўлган, бироқ муддатидан илгари сайловларга оид тахминлар ҳам ўз тасдиғини топган эмас.

Тахминлар орасида тасдиқланиш эҳтимоли энг юқори бўлгани – бу галги сайловларда ҳам мухолифат вакилларининг сайловга қўйилмаслиги бўлиб турибди. Ўзбекистон қонунчилигига мувофиқ, парламент ва маҳаллий сайловларда фақат мамлакатда расмий рўйхатдан ўтган партияларгина иштирок этиши мумкин. Айни пайтда мамлакат бешта сиёсий партия рўйхатга олинган бўлиб, булар Ўзбекистон Халқ демократик партияси (ХДП), ЎзЛиДеП, “Миллий тикланиш”, “Адолат” ва Экологик партиялардир.

Ўзбекистонда ўтган асрнинг 90-йиллари бошида рўйхатга олинган “Бирлик” ва “Эрк” партияларини ўзбек расмийлари амалдаги партия ўлароқ тан олмай келишади. Лидерлари хорижда бўлган бу икки партия вакилларининг Ўзбекистон Адлия вазирлигида қайта рўйхатдан ўтишга ҳаракатлари ҳатто президент Шавкат Мирзиёев даврида ҳам ижобий натижа берган эмас. Шунингдек, профессор Хидирназар Аллақулов бошчилигидаги фаоллар томонидан янги бир партия тузиш бўйича 2021 йилдан буён амалга оширилган бир неча уриниш ҳам муваффақиятсиз якунланган.

Селдан жабр кўрган Ўшга Ўзбекистондан ёрдам етказилди

Ўзбекистондан йўлланган ва "Дўстлик" чегара масканидан ўтиб кетаётган гуманитар юкли автомашиналар (Андижон вилоят ҳокимлиги матбуот хизмати фотоси)
Ўзбекистондан йўлланган ва "Дўстлик" чегара масканидан ўтиб кетаётган гуманитар юкли автомашиналар (Андижон вилоят ҳокимлиги матбуот хизмати фотоси)

Ўзбекистон расмийлари 16 июль куни селдан зарар кўрган Қирғизистоннинг Ўш шаҳрига инсонпарварлик ёрдами йўллашган.

Андижон вилояти ҳокимлиги ахборот хизмати маълумотига кўра, юклар вилоят ҳокими Шуҳрат Абдураҳмонов бошчилигидаги делегация ҳамроҳлигида икки давлат ўртасидаги “Дўстлик” чегара-божхона масканидан олиб ўтилган.

Маълумотларга кўра, 13 та юк машинасига ортилган 200 тоннали гуманитар ёрдам ичига кийим-кечак, озиқ-овқат маҳсулотлари, хўжалик ва қурилиш моллари ҳамда бошқа ашёлар киради.

Аввалроқ Озодлик 14 июль куни Ўшда кузатилган сел тошқини бир неча кишини оқизиб кетгани, табиий офат қурбонларидан тўрт нафарининг (она ва унинг уч қизи) жасади Оқбура ва Шаҳрихонсойдан топилгани, тошқин туфайли юздан зиёд уй сув остида қолгани, 15 чоғли машина оқиб кетгани ҳақида хабар қилган эди.

Ўзбекистон аввалроқ Қирғизистоннинг селдан зарар кўрган Новқат туманига ҳам 95 тоннали гуманитар ёрдам юкини йўллаган эди.

Ўзбекистонда тожикча ёзадиган журналист айирмачиликда гумонланмоқда

Салим Иномзода
Салим Иномзода

Ўзбекистонда 58 ёшли журналист Салим Иномзода “жамоат хавфсизлигига таҳдид солувчи материаллар” тарқатганликка оид иш бўйича қўлга олинди. Бу ҳақда Озодлик радиосининг тожик хизмати уч манбадан олинган маълумотга таянган ҳолда хабар қилди.

Салим Иномзода “Овози Тожик” газетасида ишлаган. Шунингдек, у Facebook тармоғида 15 мингга яқин обуначига эга “Ўзбекистон тожиклари” гуруҳини тузган. Гуруҳда Ўзбекистон тожиклари маданияти ва тожик-ўзбек маданий алоқаларига оид материаллар эълон қилиб келинган.

Иддаога кўра, Иномзода 2022 йил октябрь ойида ижтимоий тармоқлардаги ўз саҳифаларида тожикистонлик қўшиқчи Афзалшў Шодиевнинг “Самарқанд ва Бухоро”га оид “диний характерга ва айирмачилик унсурларига эга” қўшиғини кўчириб босган. Унда, хусусан, Самарқанднинг тожиклар ва форслар ватани экани айтилади.

Озодликнинг тожик хизмати қайдича, қўшиқ 2013 йилда – Тожикистон ва Ўзбекистон ўртасидаги муносабатлар таранг бўлган ва мамлакатлар ўртасида виза тартиби амал қилган пайтда ёзилган.

Нашр суҳбатдошларидан бири куч ишлатар тузилмалар ходимлари “Ўзбекистон тожиклари” гуруҳи маъмурларини ҳам сўроққа чақиришганини маълум қилган.

Тошкентда ҳиндистонлик фуқаро ўз жонига қасд қилди

Тошкентнинг Яккасарой туманида 61 ёшни қоралаган ҳиндистонлик фуқаро хусусий фирма ҳудудида ўзини ўлдирган. Бу ҳақда маҳаллий нашрлар Ўзбекистон Бош прокуратураси матбуот хизматидан олинган маълумотга таянган ҳолда хабар қилишмоқда.

Қайд этилишича, ҳиндистонлик Ш. С. ўлими олдидан инглиз ва рус тилларида қолдирган хатида молиявий қийинчиликларга дуч келганини, ҳеч кимга эътирози йўқлигини ёзиб қолдирган. Шунингдек, Ш. С. ўз васиятида жасадини Ҳиндистонга етказишни сўраган.

Ҳиндистонлик шахс 12 июль куни туш вақтида ўзи ишлаган фирма ҳудудидаги ваннахонада томирларини кесиб, ўз жонига қасд қилгани айтилмоқда. Маълумотларга кўра, айни пайтда ҳолат юзасидан Яккасарой туман прокуратураси терговга қадар текширув ҳаракатларини олиб боряпти.

Давомини ўқинг

XS
SM
MD
LG