Линклар

Шошилинч хабар
01 июн 2020, Тошкент вақти: 04:05

Ўзбекистон хабарлари

Тўйга 200 дан ошиқ меҳмон чақирган мезбон $200, тўйхона эса $600 дан кўпроқ жарима тўлайди

25 февраль куни Олий Мажлис Қонунчилик палатаси депутатлари томонидан концептуал жиҳатдан қабул қилинган қонун лойиҳаси тўй-маросимларни ўтказишга оид ўтган йили қабул қилинган Низомни бузганлик учун жазо қўллашни кўзда тутади.

Парламент иккала палатаси томонидан 2019 йил 14 сентябрь куни қабул қилинган “Тўйлар, оилавий тантаналар, маърака ва маросимлар ўтказилишини тартибга солиш тўғрисидаги Низом”да бундай тадбирларни ўтказишнинг қатъий талаблари белгилаб берилган.

Хусусан¸ Низомда тўйлар, оилавий тантаналар, маърака ва маросимларни фақат бир кун (дафн этиш маросими бундан мустасно) соат 06:00 ва 23:00 оралиғида ўтказиш¸ уларга кўпи билан 200 нафаргача¸ ошга эса¸ 250 нафаргача меҳмон чақириш¸ тўй тадбирларида 3 тадан кўп бўлган енгил автомашинадан фойдаланмаслик каби чекловлар ўрнатилган.

25 февраль куни Маъмурий кодексга киритиш маъқулланган қўшимчалар ана шу талаб ва чекловларни бузганлик учун жавобгарлик жорий қилишга қаратилган.

Маҳаллий матбуотнинг ëзишича¸ қонун лойиҳаси тасдиқланса¸ Низом қоидаларини бузган тўй ўтказувчи шахсга базавий ҳисоблаш миқдорининг 10 баравари (ҳозирда 2 230 000 сўм) миқдорида¸ тўйхона эгаларига эса¸ базавий ҳисоблаш миқдорининг 30 баравари (6 690 000 сўм) миқдорида жарима солинади.

Бундай ҳуқуқбузарлик бир йил давомида такрор содир этилса¸ базавий ҳисоблаш миқдорининг 50 баравари (11 150 000 сўм) миқдорида жарима солинади.

Ўзбекистонда тўй ва маросимларни ихчам ва камхарж ўтказишга уриниш кўпдан давом этиб келаëтганига қарамай¸ ҳозирча бундай саъй-ҳаракатларнинг натижа бермай келаëтгани кузатилади.

Кун янгиликлари

1 июнга ўтар кечаси 77 киши коронавирусга чалингани хабар қилинди. 9 беморнинг аҳволи оғир (ИНФОГРАФИКА)

Коронавирусга чалинган 77 кишининг 38 нафари Навоий вилоятида аниқланган.

Соғлиқни сақлаш вазирлигининг билдиришича, 31 май соат 23:00 ҳолатига кўра,коронавирусга чалинганлар сони расман 3623 нафарга етди.

“Бугун мамлакатимизда коронавирус инфекцияси қайд этилган 77 ҳолатнинг 38 нафари Навоий вилоятидаги карантин муассасаларида тиббий кузатувда бўлган фуқаролар орасидан тасдиқланди. Шунингдек, 34 нафари карантин муассасаларида, 4 нафари (Бухоро вилоятида 3, Тошкент шаҳри 1) аҳоли орасидан ва 1 нафари халқаро юк ташувчи автомашина ҳайдовчисида аниқланди”, - дейилади хабарда.

Вазирлик кун давомида 54 нафар бемор соғайиб, реабилитацияга кузатилгани ҳақида ҳам маълум қилди.

Расмий хабарда таъкидланишича, айни пайтгача касалликка чалинган 3623 нафар бемордан 2837 нафари соғайиб, даволаниш даражаси 78 фоизни ташкил этмоқда. 771 нафар бемор 7 ҳудуддаги тиббиёт муассасаларида даволанмоқда. Улардан 8 нафари оғир, 1 нафари эса ўта оғир аҳволда.

Шу кунгача жами 416 118 нафар фуқаро карантинга олиниб, уларнинг 369 113 нафари карантиндан чиқарилган.

Ҳозирда уй карантинида 25 862 нафар, стационар карантинда эса 21 143 нафар фуқаро тиббий кузатувда бўлиб турибди.

Ўзбекистон Омбудсмани ИИВ тергов ҳибсхоналарида қийноқлар мавжудлигини тан олди

Ҳозиргача Ички ишлар вазирлиги бу хабарга бирон бир муносабат билдирмади.

Олий Мажлиснинг инсон ҳуқуқлари бўйича вакили (Омбудсман) Улуғбек Муҳаммадиев 29 май куни Бош прокуратурада ўтган брифингда маҳбусларга нисбатан қийноқ ИИВ тергов ҳибсхонларида содир этилишини тан олди. Бу ҳақда “Кун уз” 31 май куни хабар берди.

Омбудсман қийноқлар юзасидан келиб тушган мурожаатларга изоҳ берар экан:

“Бу ҳолатлар жазони ижро этиш муассасасида эмас, Ички ишлар вазирлигининг тергов тизими билан боғлиқ бўлган. Асосий қисми – 80-90 фоизи Ички ишларнинг тергов тизими билан боғлиқ бўлган мурожаатлар”,- деб айтган.

Айни пайтда Омбудсман йил давомида қийноқларга солингани тўғрисида арз қилган маҳбуслар ва маҳкумлар сони ҳақида аниқ рақамларни айтмаган.

Шу билан бир қаторда, Ички ишлар вазирлиги бошқарма бошлиғи Жамшид Султонов Омбудсманнинг сўзларини тасдиқлаган ҳолда, 2019 йилда қийноққа солиш бўйича жазони ижро этиш муассасаларининг бирорта ходими жавобгарликка тортилмаганини қўшимча қилди.

Унга кўра, бу ҳолат жазони ижро этиш муассасаларида қийноқлар деярли йўқлигини тасдиқлайди.

“Маҳкумлар томонидан қийноққа солиш бўйича Омбудсманга юборилган мурожаатларнинг жуда оз қисми уларнинг жазо муддатини ўташ даври билан боғлиқ. 2019 йилда маҳкумларни қийноққа солиш ёки тазйиқ ўтказиш билан боғлиқ ҳолат бўйича жазони ижро этиш тизими, жазони ижро этиш муассасасининг бирорта ходими жавобгарликка тортилмади”, - деб айтган расмий.

Жамшид Султоновнинг таъкидлашича, қийноқлар борасида йилдан йилга маҳкумлар томонидан мурожаатлар сони кескин кўпайгани “маҳкумларнинг ҳуқуқий онги ва маданияти ошиши билан ҳам боғлиқ”.

“Жазони ижро этиш муассасаларида ҳар биттасида омбудсман қутиси, прокурор қутиси жойлаштирилган, лекин мурожаат қилинмас эди. Бунинг сабаблари кўп бўлган, уларнинг асосийси маҳкумларда мурожаат қилган билан унинг ижобий ечим топишига ишонч бўлмаган. Сўнгги йилларда олиб борилган ишлар натижасида мурожаатлар сони ҳам кўпайяпти, зарур ҳолларда жазони ижро этиш тизими кўрмаётган ёки тергов, суд органларида эътиборидан четда қолаётган масалаларга эътибор бериб, улар келгусида содир этилмаслиги бўйича ишлар амалга ошириляпти”, деб айтган Жамшид Султонов.

Бош прокуратурада ўтган брифингда ИИВ ҳибсхоналарида қийноқлар мавжудлиги айтилган бўлсада, ҳозиргача Ички ишлар вазирлиги бу хабарга бирон бир муносабат билдирмади.

Ўзбекистон-Қирғизистон чегарасидаги жанжалда камида 31 одам жароҳатлангани айтилди

Қирғизистон Соғлиқни сақлаш вазирлиги 1 июнга ўтар кечаси Ўзбекистоннинг Сўх вилояти Чашма қишлоғидаги чегара ҳудудида чиққан жанжал оқибатида жароҳатланган 15 нафар фуқаро Ҳайдаркон шаҳар касалхонасига олиб келинганини билдирди.

Касалхонага олиб келинган қирғизистонликларнинг 4 нафари касалхонага ётқизилган, улардан икки нафарининг аҳволи оғир. Қолганларга тиббий ёрдам кўрсатилгач, уйларига қайтишга рухсат берилган.

Аввалроқ Озодликка можаро ҳақида хабар берган сўхликлардан бири жанжал оқибатида 16 нафар ўзбекистонлик турли жароҳатлар билан касалхонага ётқизилганини билдирган эди.

Бундан ташқари Ўзбек-Қирғиз чегарасидаги вазиятни икки давлат ҳамкорликда назорат қилишга келишиб олган.

Бу борада 31 май куни Ўзбекистон ва Қирғизистон маҳаллий ҳокимиятлари расмийлари учрашувида қарор қабул қилинди.

Музокарада Ўзбекистон томонидан Фарғона вилоят ҳокими Шуҳрат Ғаниев ва Сўх туман ҳокими иштирок этган. Қирғизистон томонидан эса ҳукуматнинг Боткен вилоятидаги мухтор вакилининг биринчи ўринбосари Жаркинбай Максутов ва Қадамжой тумани ҳокими қатнашган.

Қадамжой тумани ҳокими Алгинбай Имаровнинг Озодлик радиоси қирғиз хизматига айтишича, учрашувда томонлар чегарадаги вазиятни ҳамкорликда барқарорлаштириш масаласини муҳокама қилган. Шу мақсадда Ўзбекистон ва Қирғизистон ҳуқуқ-тартибот тузилмалари ҳамкорлиги режаси ишлаб чиқилган.

"Ўрикзор"даги сотувчининг ўғли ва қизида ҳам вирус аниқланди

Соғлиқни сақлаш вазирлигининг маълум қилишича, бир неча кун олдин “Ўрикзор” савдо мажмуасининг коронавирусга чалинган сотувчисининг ўғли ва қизида ҳам айни инфекция аниқланган.

Вазирлик сўнгги кунларда Самарқанд, Навоий, Тошкент вилоятлари қатори Тошкент шаҳридан ҳам аҳоли орасида коронавирус инфекциясига чалинганлар сони кун сайин ошиб бораётганини билдирди.

Вазирликнинг маълум қилишича, 30 майга қадар пойтахтимизда коронавирус инфекцияси аниқланган 11 фуқаронинг барчаси аҳоли орасидан касалликни юқтириб олган.

"Касалланиш кўрсаткичлари шу темпда ўсиб борса эпидемия авж олиш хавфи янада кучаяди. Бу эса аҳолидан янада ҳушёр бўлиб, ўзи ва яқинлари саломатлигига ўта масъулият билан ёндашишларини талаб этмоқда".

"Зарурат юзасидан кўчага чиқиб, уйга келганингизда ҳам қўлингизни совунлаб, қайта-қайта ювинг. Қўл бериб саломлашиш, қучоқ очиб кўришишдан тийилиш лозим. Энг муҳими, ижтимоий масофани сақланг, жамоат ва одамлар тўпланган жойлардан узоқроқ юринг, доимо тиббий ниқоб тақиб юришни унутманг", деб огоҳлантирди вазирлик.

Шахсий машинада вилоятлараро қатновга 1 сентябргача рухсат берилмайди

Махсус комиссиянинг 30 май куни эълон қилинган қарори билан 1 сентябргача шахсий автотранспорт воситаларининг вилоятлараро ҳаракатланишига рухсат берилмайдиган бўлди.

Бунда Тошкент шаҳридан Тошкент вилоятига ҳамда Тошкент вилоятидан Тошкент шаҳрига кириб-чиқиш мустасно қилинди.

Махсус комиссиянинг Ўзбекистонда карантин муддатини 15 июнга қадар узайтириш ҳамда айрим ҳудудларда карантин чораларини кучайтириш қарори шу йилнинг 26 май куни ўтказилган видеоселектор йиғилишидан сўнг қабул қилинди.

Ушбу йиғилишда президент Ш. Мирзиёев кейинги кунларда аксарият ҳудуд ва корхона раҳбарлари, фуқаролар карантин чораларининг юмшатилганини “касаллик тугади” деб, нотўғри қабул қилаётгани ҳақида гапирди.

Президент, айниқса, бозорлар, савдо комплекслари, банкларда ижтимоий масофага амал қилмаслик, кўча-кўйда тиббий ниқоб тақмаслик ҳолатлари кўпаяётгани ҳамда бундай салбий ҳолатлар касалликни аниқлаш, олдини олиш ва даволаш учун қилинаётган барча ҳаракатларни йўққа чиқариши мумкин, деб танқид қилганди.

Сўнгги бир ҳафта ичида коронавирусга чалинган янги шахсларнинг аҳоли орасидан аниқланиш ҳоллари кўпаймоқда.

Расмий баёнотлардан маълум бўлишича, вирус Самарқанд, Навоий, Бухоро, Наманган ва Тошкент шаҳарларида аҳоли орасидан аниқланмоқда.

31 май соат 10:00 ҳолатига кўра, Ўзбекистонда инфекцияга чалинганлар сони 3584, тузалганлар 3 минг кишига яқин, 14 бемор вафот этди.

Ўзбекистонда карантин муддати 15 июнгача узайтирилди. Мамлакат бўйлаб ижтимоий масофани сақлаш, ниқоб тақиш, дезинфекция мажбурий бўлиб қолмоқда.

Дунёда эса вирус юқтирганлар расмий сони 6 миллион 80 мингдан ошди, ўлганлар сони эса 369 мингдан ошиқ, тузалганлар 2 миллион 575 мингдан ошиқ.

Тошкентда аҳоли орасида бир кунда 9 та COVID-19 ҳолати аниқланди

Соғлиқни сақлаш вазирлигининг (ССВ) хабар қилишича, 2020 йил 30 май соат 17:00 ҳолатига кўра, Ўзбекистонда коронавирус инфекцияси қайд этилганлар сони 3523 нафарга етган ва янги ҳолатларнинг 9 таси Тошкентда аниқланган.

9 ҳолатнинг барчаси аҳоли орасидан аниқланган.

Буни маълум қилган ССВ вирусга чалинганлар Тошкентнинг қайси қисмидан аниқланганига ойдинлик киритмади.

Тошкентда 30 май кечга қадар аниқланган яна бир бемор Карантин марказидаги хориждан келган фуқаролардан биридир.

Сўнгги бир ҳафта ичида коронавирусга чалинган янги шахсларнинг аҳоли орасидан аниқланиш ҳоллари кўпаймоқда.

Расмий баёнотлардан маълум бўлишича, вирус Самарқанд, Навоий, Бухоро, Наманган ва Тошкент шаҳарларида аҳоли орасидан аниқланмоқда.

31 май соат 10:00 ҳолатига кўра, Ўзбекистонда инфекцияга чалинганлар сони 3584, тузалганлар 3 минг кишига яқин, 14 бемор вафот этди.

Ўзбекистонда карантин муддати 15 июнгача узайтирилди. Мамлакат бўйлаб ижтимоий масофани сақлаш, ниқоб тақиш, дезинфекция мажбурий бўлиб қолмоқда.

Дунёда эса вирус юқтирганлар расмий сони 6 миллион 80 мингдан ошди, ўлганлар сони эса 369 мингдан ошиқ, тузалганлар 2 миллион 575 мингдан ошиқ.

Прокуратура: Навоийда коронавирусга қарши кураш учун берилган 222 млн. сўм ўзлаштирилган

Навоий вилоятида COVID-19 инфекциясига қарши кураш учун ажратилган 222 миллион сўм маблағ ўзлаштириб юборилгани аниқланди.

Бош прокуратура ахборот хизмати раҳбари Ҳаёт Шамсутдиновнинг «Дарё»га маълум қилишича, маблағнинг катта қисми растрата йўли билан талон-торож қилингани аниқланган.

Нашрнинг хабар қилишича, Навоий вилояти санитария ва эпидемиологик осойишталик марказидаги "мансабдор шахслари ва бошқалар" ажратилган 5 миллиард сўм маблағнинг бир қисмини талон-торож қилган.

"Т." ва "И-П." МЧЖ дан кимёвий дезинфекция воситалари ҳамда инфекцияга қарши тиббий ҳимоя воситаларини қиммат нархларда харид қилиб, жами 222,3 миллион сўмни растрата қилиш йўли талон-торож қилган ҳолда давлат бюджетига жуда кўп миқдорда зарар етказган", дейилади хабарда.

Ҳозирда номи тилга олинган ташкилотлар раҳбарлари ва бошқаларга нисбатан Жиноят кодексининг тегишли моддаси билан жиноят иши қўзғатилган, тергов бошланган.

22 майда Бухоро вилоятида ҳам санитария ва эпидемиологик осойишталик маркази бош шифокори ўзига таниш бўлган ширкатдан дезинфекцияловчи воситаларни қиммат нархда сотиб олиб, 200 миллион сўмни талон-торож қилгани учун жиноят иши очилгани билдирилган эди.

21 майда эса Тошкент вилоятининг Оққўрғон туманида ҳомийлик маблағлари ўғирлангани тўғрисида хабарлар тарқалганди. Оққўрғон тумани ҳокими ўринбосари ҳамда "Маҳалла" хайрия жамоат фонди ҳисобчиси "Саховат ва кўмак" жамғармасига тушган маблағларни турли йўллар билан нақдлаштириб, жами 109,2 миллион сўм пулни ўзлаштиргани ҳақида Маҳалла вазирлигининг расмий изоҳи берилганди.

Ортиқова: 2019 йилда ДХХ ва ИИВ ходимлари бўлган 16 киши қийноққа солишда айбланиб қамалган

2019 йилда 16 киши қийноққа солишда айбланиб қамалган, уларнинг аксари ИИВ ва ДХХ ходимларидир.

Бу ҳақда Ўзбекистон Бош прокурори ўринбосари Светлана Ортиқова Тошкентда ўтказилган матбуот брифингида айтган.

"Сўнгги уч йилда ҳуқуқни муҳофаза қилувчи органлар ходимлари томонидан қийнаш, қўрқитиш ва бошқа тазйиқлар қилинганлиги юзасидан 757та (2019­ йилда 208та, 2018 йилда 352та, 2017 йилда 197та) ариза келиб тушган бўлса, уларнинг 33таси, яъни 4,4 фоизи бўйича жиноят иши қўзғатилган", деган Ортиқова.

Аммо, Ортиқова қийноққа солиш айби билан жазоланганлар айнан кимлар эканини очиқламаган.

БМТнинг Қийноққа қарши қўмитаси томонидан 2020 йил 14 январда билдирилган Ўзбекистоннинг бешинчи даврий ҳисоботи бўйича якуний эътирозларда қийноқнинг олдини олиш тизимини халқаро-ҳуқуқий ҳужжатлар талабларига мувофиқлаштириш, шунингдек қийноқнинг барвақт олдини олиш, қийноққа доир мурожаатларни қабул қилиш, кўриб чиқиш, қийноқдан жабрланганларни реабилитация қилиш бўйича самарали ҳуқуқий, институционал механизмларни жорий этиш бўйича қатор тавсиялар берилган.

"Ушбу тавсияларни ҳисобга олиш зарурати қийноқнинг олдини олиш бўйича миллий тизим самарадорлигини оширишга қаратилган норматив-ҳуқуқий ҳужжатлар лойиҳаларини ишлаб чиқиш, тезкор-қидирув, тергов ва жазони ижро этиш фаолиятида қийноқнинг олдини олиш тизимини такомиллаштиришни тақозо этади, деган Светлана Ортиқова.

Брифингда Ўзбекистонда сўнгги уч йилда қийноқнинг олдини олиш мақсадида вақтинча сақлаш, тергов ҳибсхоналари ва жазони ижро этиш муассасаларига 3 мингдан ортиқ аудио ҳамда видео ёзув ускуналари ўрнатилгани, тергов ҳибсхоналари ва жазони ижро этиш муассасаларида адвокатлар учун жиҳозланган 69та хона ташкил этилгани маълум қилинди.

Камида 4 нафар халқаро юк ташувчи ўзбек ҳайдовчисида коронавирус аниқланди

Ўзбекистон Соғлиқни сақлаш вазирлигига кўра, 27 май куни 2 нафар Россиядан, 28 май куни 1 нафар Қозоғистон ва яна 1 нафари Сирдарё вилоятиги «Гулистон» чегара пости орқали мамлакатга кириб келган халқаро юк ташувчи автомашина ҳайдовчиларида коронавирус аниқланган.

Бундан олдин Озодлик Россияга помидор олиб бориб қайтган ўзбекистонлик ҳайдовчи 22 май куни Қозоғистон-Ўзбекистон чегараси постидаги текширувда коронавирус аниқланганига қарамай, шериги билан Избоскан тумани (Андижон вилояти)даги уйигача етиб боргани ҳақида хабар қилган эди.

Бу эса кириб келиши билан ҳар бир фура ҳайдовчисини карантинга олиш лозиммасмиди?, деган саволларни ўртага чиқарди.

Ўзбекистонда ССВ маълумотига кўра, 2020 йил 30 май соат 10:00 ҳолатига кўра, коронавирус инфекцияси қайд этилганлар сони 25 кишига кўпайиб, 3513 нафарни ташкил этмоқда.

Янги касалланиш ҳолатларининг 2 нафари Тошкент шаҳри, 4 нафари Самарқанд вилояти, 2 нафари эса Наманган вилоятидан — жами 8 нафар аҳоли орасида қайд этилган.

Маълумот учун, шу кунгача беморларнинг 2728 нафари соғайиб, реабилитацияга кузатилган, 771 нафар бемор даволанишда қолмоқда. Улардан 7 нафари оғир, 1 нафари эса ўта оғир аҳволда. Мамлакатда ҳозирга қадар 14 киши эса инфекция асоратлари оқибатида вафот этган.

Мирзиёев мактаб дарсликлари савиясини танқид қилди

Ўзбекистон президенти Ш.Мирзиёев халқ таълими вазири Ш.Шерматов билан, Тошкент, 2020 йил 29 майи.

Ўзбекистон президенти Шавкат Мирзиёев мактаб дарсликлари савияси талабга мутлақо жавоб бермаслиги, ўқув дастурларини илғор хорижий билимлар асосида такомиллаштириш зарурлигини таъкидлади. Бу ҳақда у Тошкент шаҳри Сергели туманининг 5А мавзесида фойдаланишга топширилган 329-умумий ўрта таълим мактаби фаолияти билан танишиш чоғида 29 май куни билдирди.

Президент матбуот хизмати маълумотига кўра, мактабга ташриф чоғида Ш.Мирзиёев болаларга сифатли таълим бериш, шу билан бирга, 7-синфдан бошлаб касбга йўналтириш бўйича кўрсатмалар берган.

“Ўғил-қизлар ҳунар ўрганса, ўзига ишончи ортади, дунёқараши ҳам ўсади, ота-онасининг ҳам кўнгли тўқ бўлади. Кейинчалик ижтимоий муаммоларни бартараф этишга маблағ сарфламаслик учун бугун шу маблағни мактабларга беришимиз керак. Болаларимизни ватанпарвар, жамиятга керакли инсон қилиб тарбияламасак, келажакка хиёнат қилган бўламиз”, деган Шавкат Мирзиёев.

Қайд этилишича, Сергелида бунёд этилган 329-ўрта таълим мактаби 1680 ўқувчига мўлжалланган. Унга асос солишда 2019 йилда ташкил этилган Президент мактаблари тажрибасидан фойдаланилган.

Сардоба тошқинидан жабрланганларга Америка халқи номидан ёрдам йўлланди

Инсонпарварлик ёрдамининг топширилиш жараёни, Тошкент, 2020 йил 29 майи.

AҚШнинг Ўзбекистондаги элчиси Даниэл Розенблюм Сардобадаги фалокат ортидан 29 май куни “Соғлом авлод учун” нодавлат хайрия жамғармасига зарур воситаларни топширди. Ушбу инсонпарварлик ёрдами, АҚШнинг Ўзбекистондаги элчихонаси маълумотига кўра, тошқиндан жабрланган 2000 та оилага етказилади.

АҚШ ҳукумати Халқаро тараққиёт агентлиги (USAID) орқали тақдим этган инсонпарварлик ёрдами озиқ-овқат маҳсулотлари ва бошқа зурур нарсалардан (гигиена воситалари, кўрпа-тўшак, чойшаблар, сув тозалаш учун таблеткалар ва б.) ташкил топган. Буларнинг барчасини Ўзбекистондаги “Соғлом авлод учун” жамғармаси маҳаллий ишлаб чиқарувчилардан сотиб олиб, жабрланган ҳар оила учун алоҳида халталарга жойлаган. Жамғарма мазкур инсонпарварлик ёрдамини сув тошқини юз берган ҳудудларга етказиб беради ҳамда уни Сирдарё вилоятидаги ҳудудий филиали орқали тарқатади.

“Соғлом авлод учун” жамғармаси Сирдарё вилояти ҳокимияти билан ҳамкорликда ёрдамга муҳтож кишиларни аниқлаган ва AҚШ ҳукумати кўмаги ўз эгаларига етиб боришини кафолатлайди. Хайриядан мақсад эҳтиёжманд оилаларнинг хавфсизлиги, тинчлиги, санитария ҳимояси ва шахсий гигиенасини дастаклаш экани айтилмоқда.

15 суткага қамалган фарғоналик журналист 2 кунда қўйиб юбориладиган бўлди

Фарғоналик журналист Усмонжон Қодиров.

Фарғона вилоят телевидениеси мухбири Усмонжон Қодировга нисбатан чиқарилган 15 кунлик маъмурий қамоқ муддати 2 кунга алмаштирилди. Бу ҳақда Газета.uz нашри Ўзбекистон Олий суди матбуот хизмати маълумотига таянган ҳолда хабар қилди.

Қайд этилишича, 29 май куни Фарғона вилояти маъмурий суди кассация инстанцияси Фарғона вилоят телевидениеси мухбири Усмонжон Қодировга нисбатан Фарғона шаҳар маъмурий судининг 27 майдаги қарорини ўзгартирган.

Икки кун муқаддам У. Қодировга МЖтКнинг 54-моддаси 1-қисми, 183-моддаси ва 194-моддаси 1-қисми билан 15 сутка муддатга маъмурий қамоқ жазоси тайинланган, у Фарғона вилоят ҳокимлиги биноси олдида ниқоб тақмаганлик ва ИИБ ходимига қаршилик кўрсатганликда айбланган эди.

Газета. uz хабарига мувофиқ, кассация инстанцияси биринчи инстация суди Усмонжон Қодировга нисбатан жазо тайинлашда айбига иқрорлигини, чин кўнгилдан пушаймонлигини, оилада ягона боқувчи эканлигини инобатга олмай, бир мунча оғир жазо тайинлаганини эътироф этган.

Кассация инстанцияси қарорига кўра, 15 сутка қамоқ жазоси ўзгартирилиб, 2 сутка муддатга маъмурий қамоқ жазо тайинланган. Журналистга 29 май куни жавоб берилиши кутилмоқда. Усмонжон Қодиров маъмурий қамоқ харажатларидан ҳам озод қилинган.

“Яндекс” Ўзбекистонда ҚҚС тўловчиси сифатида рўйхатдан ўтди

'Яндекс' ширкатининг бош қароргоҳи, Москва, 2017 йил июни.

Ўзбекистонда ихтиёрий равишда ҚҚС тўловчиси сифатида рўйхатдан ўтган хорижий ширкатлар қаторига “Яндекс” ҳам қўшилди.

Давлат солиқ қўмитасига қарашли tax.uz сайти қайдига кўра, Швейцарияда рўйхатга олинган Yandex Europe AG 28 май куни рўйхатдан ўтган. Европа бозорида ишлаш учун йўналган бу шўъба ширкатини “Яндекс” 2012 йилда тузган.

Аввалроқ Google, Facebook, Apple, Netflix, Samsung, Booking.com каби йирик ширкатлар Ўзбекистонда ҚҚС тўловчиси сифатида рўйхатга олинганди.

Ўзбекистонда 2020 йил бошидан жисмоний шахсларга хизматларни электрон шаклда тақдим этадиган хориж компаниялари учун қўшилган қиймат солиғи тўлаш тартиби жорий этилганди.

Бу каби ширкатларни рўйхатга олиш учун ДСҚ томонидан махсус хизмат – Интернет-компанияларнинг ҚҚС-офиси – tax.uz сайти яратилган.

Қийноқларнинг олдини олиш қўмитаси ташкил этилади

Бош прокурор ўринбосари Светлана Ортиқова.

Ўзбекистонда тезкор-қидирув, тергов ва жазони ижро этиш фаолиятида қийноқнинг олдини олиш тизимини тубдан такомиллаштириш мақсадида Қийноқнинг олдини олиш қўмитасини ташкил этиш назарда тутилмоқда. Бу ҳақда Бош прокурор ўринбосари Светлана Ортиқова 29 май куни Тошкентда журналистлар учун ўтказилган брифингда билдирган.

Мулозимага кўра, қўмита тузиш режаси Ўзбекистон президентининг “Тезкор-қидирув, тергов ва жазони ижро этиш фаолиятида қийноқнинг олдини олиш тизимини тубдан такомиллаштириш чора-тадбирлари тўғрисида”ги қарори лойиҳасида акс этган.

Лойиҳага кўра, ушбу қўмита ҳуқуқни муҳофаза қилувчи алоҳида орган, яъни инсоннинг қийноқдан ҳимоя қилишга доир конституциявий ҳуқуқини таъминлаш бўйича республика давлат бошқаруви органи сифатида ўз ваколатларини мустақил ҳамда давлат органлари, уларнинг мансабдор шахсларига тобе бўлмаган тарзда амалга ошириши, шунингдек, ўз фаолиятида президент ва Олий Мажлис палаталарига ҳисоб бериши белгиланган.

Лойиҳада Қўмитанинг асосий вазифалари сифатида:

– жисмоний ва юридик шахсларнинг қийноққа доир мурожаатларини кўриб чиқиш;

– қийноқ ҳолатларига доир ишлар бўйича терговга қадар текширувни амалга ошириш;

– жиноят ишини юритиш чоғида ушлаб турилган шахсларнинг ягона электрон реестрини юритиш;

– қийноқдан жабрланган шахсларга етказилган моддий ва маънавий зарарнинг ўрни қопланишини таъминлаш, уларга ижтимоий, ҳуқуқий ва психологик ёрдам кўрсатиш;

– қийноқ ҳолатлари содир этилишига шароит яратган мансабдор шахсларнинг хатти-ҳаракатларига ҳуқуқий баҳо бериш ва жавобгарлик масаласи ҳал этилишини таъминлаш назарда тутилган.

Туроператорлар учун фоизсиз ссуда ажратилади

Жорий йил 1 июнидан 31 декабрига қадар бўлган даврда Ўзбекистондаги туроператорлар ва жойлаштириш воситаларига 12 ой муддатга бир марталик мақсадли фоизсиз ссудалар ажратилади. Бу ҳақда президент Ш. Мирзиёев томонидан 28 май куни имзоланган “Коронавирус пандемиясининг салбий таъсирини камайтириш учун туризм соҳасини қўллаб-қувватлашга доир кечиктириб бўлмайдиган чора-тадбирлар тўғрисида”ги фармонда билдирилган.

Қайд этилишича, йил охиригача туроператорларга 2019 йилдаги ўртача ойлик иш ҳақи фондининг (жорий йил биринчи чорагидаги ўртача ойлик номинал иш ҳақи - 2,5 млн сўм) 3 бараваридан ошмайдиган миқдорда, жойлаштириш воситаларига эса ҳар бир ётоқ ўрни учун базавий ҳисоблаш миқдорининг 5 баравари миқдорида (БҲМ шу кунда 223 000 сўмга тенг) фоизсиз ссуда берилади.

Фармонда 2020 йил 1 июнидан 2021 йил 31 декабрига қадар бўлган даврда янги туризм маҳсулотлари ва йўналишларини ишлаб чиқиш ва тарғиб қилишга гидлар учун 5 миллион сўм, туроператорлар учун 10 миллион сўм миқдорида грантлар ажратиш орқали қўшимча кўмак кўрсатилиши ҳам қайд этилган.

Адлия вазирлиги: "Прописка ёпилиши" тўғрисидаги миш-мишлар асоссиз

2020 йил 1 апрелдан бошлаб Тошкент шаҳри ва Тошкент вилоятида кўчмас мулкни олишда прописка талаб қилинмайди.

Адлия вазирлиги 28 май куни аҳоли орасида Тошкент шаҳри ва вилоятида “Прописка яқинда яна ёпиларкан, очилгани маълум муддат амал қилинадиган акция экан” қабилидаги миш-мишлар ассосиз эканини маълум қилди.

“Биринчидан, Президент Фармонлари билан 2020 йил 1 апрелдан бошлаб Тошкент шаҳри ва Тошкент вилоятида кўчмас мулкни олишда Ўзбекистон Республикаси фуқаролари учун ушбу ҳудудларда доимий пропискага эга бўлиш талаб қилинмаслиги белгиланди.

Шунга кўра, Тошкент шаҳри ва Тошкент вилоятидан кўчмас мулк сотиб олиш учун ушбу ҳудудларда доимий яшаш жойи бўйича рўйхатга олинганлиги шарти бутунлай бекор бўлган”, дейилади расмий хабарда.

Бундан ташқари вазирлик 21 майдан Тошкент шаҳри ва Тошкент вилоятида бирламчи бозордан янги қурилган уй-жой сотиб олишда шартнома суммасининг 5 фоизи миқдорида давлат божи тўлаш тартиби бекор бўлганини ҳам эслатган.

Вазирликнинг билдиришича,“Тошкент шаҳрида прописка ёпилиши ёки очилиши” масаласига кўчмас мулк олди-сотди шартномаларини расмийлаштиришнинг ҳеч қандай алоқаси йўқ.

Шофирконга кириш ва чиқиш тўхтатилди. Бир оиланинг 7 аъзосида коронавирус топилди

Шофирконда коронавирус 27 май куни аниқланган.

Бухоро вилоятининг Шофиркон тумани “қизил” ҳудуд тоифасига киритилди. Шу муносабат билан туманга кириш ва чиқиш тўхтатилди. Бу ҳақда “Дарё” нашри хабар берди.

Соғлиқни сақлаш вазирлиги 27 май куни Шофиркон туманидаги битта оиланинг 7 аъзосида коронавирус аниқлангани тўғрисида хабар берганди. Шу муносабат билан туманга кириб-чиқиш 28 майидан бошлаб тўхтатилган ва коронавирусга қарши кураш тезкор штаби тузилган.

Одамларнинг бемақсад кўчада юриши ва тўпланишининг олдини олиш, жамоат жойларида тиббиёт ниқобида юриш, COVID-19 вирусини юқтириб олишдан сақланиш учун назорат кучайтирилган.

ТИВ чегарадан ўтаётган ўзбекистонликларни "пулли хизмат"дан фойдаланмасликка чақирди

Ўзбек-қозоқ чегарасидаги Ғишткўприк (Черняевка) назорат-ўтказиш пункти.

Ўзбекистоннинг Олмаотадаги Бош консулхонаси 28 май куни Қозоғистон орқали уйларига қайтаётган мухожирларни пул эвазига чегарадан ўтказиб қўйишни таклиф қилаётганлар хизматидан фойдаланмасликка чақирди.

“Бош консулхона “Жибек Жоли” назорат-ўтказиш пунктига келаётган Ўзбекистон фуқароларини маълум тўлов эвазига давлатлараро чегарани кесиб ўтишда кўмаклашишни таклиф қилувчи турли шахсларга мурожаат қилмасликка яна бир бор чақиради”, - дейилади Ташқи ишлар вазирлиги тарқатган маълумотда.

Расмий хабарда айтилишича, Қозоғистоннинг қатор ҳудудларида карантин режимининг енгиллаштирилганлиги муносабати билан фуқаролар Ўзбекистон ҳудудига ўтиш мақсадида “Жибек Жоли” – “Ғишткўприк” назорат-ўтказиш пунктига келишмоқда.

Ўзбекистон Республикаси ва Қозоғистон Республикаси чегара ва санитар-эпидемиологик хизматларининг ҳамкорликдаги фаолияти натижасида ўзбекистонликлар мамлакат ҳудудига карантин чораларига амал қилган ҳолда ўтказилмоқда.

Вазирлик одатдаги тартибда фаолият кўрсатаётган “Жибек Жоли” – “Ғишткўприк” назорат-ўтказиш пунктида ҳозирда Олмаотадаги Бош консулхона ходими ишлаётгани ҳамда фуқароларга зарур консуллик-ҳуқуқий ва бошқа турдаги ёрдам кўрсатаётганини билдирди.

Ички туризмга 1 июндан бошлаб рухсат берилди

Хива манзараси.

Ўзбекистонда “яшил” ва “сариқ” тоифадаги ҳудудларда 1 июнидан ички туризмга рухсат берилди. Бу борада президент Шавкат Мирзиёевнинг “Коронавирус пандемиясининг салбий таъсирини камайтириш учун туризм соҳасини қўллаб-қувватлашга доир кечиктириб бўлмайдиган чора-тадбирлар тўғрисида”ги фармонида қайд этилди.

Ҳужжатга кўра, ички туризм белгиланган санитария-гигиена меъёрлари ва талабларига қатъий риоя этган ҳолда йўлга қўйилиши шарт. Бундан ташқари, фармонда Ўзбекистонга киришга рухсат этиладиган мамлакатлар рўйхатини белгилаб олган ҳолда ташқи туризмни босқичма-босқич қайта тиклашга доир таклифлар маъқулланди.

Туроператорлар, турагентлар, шунингдек жойлаштириш воситалари учун 2020 йил 1 июндан 31 декабрига қадар фойда солиғи ставкаси белгиланган ставкага нисбатан 50 фоизга камайтирилади.

2020 ва 2021 йил якунлари бўйича зарарларни Ўзбекистон Республикаси Солиқ кодексида назарда тутилган миқдор билан чекламаган тарзда ўтказиш ҳуқуқи берилади. 2021 йил 1 январгача бўлган даврда туристик (меҳмонхона) йиғимини ҳисоблаш ва тўлаш тўхтатилади.

Балиқчи ва Избосканда ҳайдовчи юз одамнинг карантинга олинишига сабабчи бўлди

Ҳайдовчилар белгиланган санитария қоидаларига риоя қилмаган.

Избоскан ва Балиқчи туманида коронавирусда гумонланган юк автомашинаси ҳайдовчиси билан мулоқотда бўлган юзга яқин одам 14 кунлик карантинга олинди. Бу ҳақда Соғлиқни сақлаш вазирлиги 28 май куни хабар берди.

Маълумотда айтилишича, 22 май куни Балиқчи туманида яшовчи 50 ёшли Р.Р., Избоскан туманида яшовчи шериги, 32 ёшли Б.Қ., билан биргаликда халқаро юк ташиш автомашинасида Россиядан Тошкент вилояти Қибрай тумани ҳудудидаги чегара-назорат постига етиб келган.

Шу куннинг ўзида ҳар икки ҳайдовчидан коронавирус инфекциясига суртма олинган. Эртасига, 23 май куни Б.Қ., да гумон натижа қайд этилганлиги учун такроран таҳлил топширган, Р.Р.да эса касаллик аниқланмаган.

Лекин ҳайдовчилар белгиланган санитария қоидаларига риоя қилмасдан, чегара-назорат пости автотураргоҳидан уйига чиқиб кетишган.

“Шундан сўнг ҳуқуқни муҳофаза қилувчи орган вакиллари билан ўтказилган тезкор қидирув ва эпидемиологик суриштирув натижасида ҳар икки ҳайдовчининг ҳам ўз уйларидан топилган. Шу орада дастлаб таҳлил натижалари гумон қилинган Б.Қ.да ҳам, у билан доимий мулоқотда бўлган иккинчи ҳайдовчи Р.Р.да ҳам коронавирус инфекцияси тасдиқланган”, - дейилади хабарда.

Эпидемиологик суруштирув натижасида Избоскан ва Балиқчи туманида Р.Р., ва Б.Қ., билан мулоқотда бўлган 100 нафарга яқин фуқаро 14 кунлик тиббий кузатувга олинган.

ИИВ: Фарғонада Хизб-ут-Таҳрир гуруҳи қўлга олинди

Расмий хабарда қўлга олинганлар сони айтилмаган.

Ички ишлар вазирлиги Фарғонада Хизб ут- Таҳрир ташкилотининг бир гуруҳ аъзолари қўлга олинганини билдирди. Вазирликнинг 28 май куни хабар беришича, қўлга олинганлар муқаддам Хизб ут-Таҳрир ташкилотига аъзо бўлганликлари учун жазо муддатини ўтаб чиққанлардир.

“Уларга кўрсатилаётган ижтимоий, ҳуқуқий ва маънавий кўмакка қарамасдан ҳамфикрлари билан жиноий тил бириктириб, аҳоли орасида Хизб ут-Таҳрир ғояларини ва адабиётларини тарқатиш, муқаддам жазо муддатини ўтаб чиққан “таҳрирчилар”ни жиноятга жалб қилиш орқали ташкилот сафини кенгайтиришга қаратилган хатти-ҳаракарларни содир этишган”, - дейилади расмий хабарда.

Ҳибсга олинган шахсларнинг уйларида экстремистик мазмундаги адабиётлар мавжудлиги аниқланган ва улар процессуал тартибда холислар иштирокида расмийлаштирилиб олиб қўйилган.

“Ҳозирда ушбу шахсларга нисбатан Ўзбекистон Республикаси Жиноят Кодексининг тегишли моддалари билан жиноят иши қўзғатилиб, уларнинг Андижон, Фарғона, Наманган, Тошкент, Сурхондарё вилоятлари ва Тошкент шаҳрида истиқомат қилаётган жиноий алоқаларини аниқлаш ва тергов ҳаракатларига жалб қилишга қаратилган суриштирув тадбирлари амалга оширилмоқда”, - дейилади хабарда

Вазирлик қўлга олинганларнинг сони, ёши ва бошқа тафсилотларни очиқламаган.

Мирзиёев рақобат муҳитини таъминлаш учун мутахассислар етишмаётгани ва стандартлар йўқлигидан баҳс этди

Ўзбекистон президенти Шавкат Мирзиёев.

Ўзбекистонда монополиядан чиқариш, рақобатни таъминлаш, истеъмолчилар ҳуқуқларини ҳимоя қилиш бўйича якдил йўналиш бўлиши керак. Бу ҳақда Ўзбекистон президенти Шавкат Мирзиёев иқтисодиётда рақобат муҳитини таъминлаш ва истеъмолчилар ҳуқуқини ҳимоя қилиш борасидаги устувор вазифалар муҳокамасига бағишланиб 28 май куни ўтказилган йиғилишда билдирди.

Президент матбуот хизмати маълумотига кўра, Мирзиёев Ўзбекистоннинг бозор иқтисодиётига қатъий ўтиши жараёнида рақобат масаласи принципиал аҳамиятга эга эканини таъкидлаган.

Йиғилишда корхоналарнинг бозордаги монопол мавқеини аниқлаш бўйича ёндашувларни қайта кўриб чиқиш, монопол товарлар рўйхатини кескин қисқартиришга қаратилган “йўл харитаси”ни тасдиқлаш вазифаси белгиланган.

Президент давлат иштирокидаги корхоналарда монополияга қарши комплаенс тизимини жорий этиш, Жаҳон банки, Европа тикланиш ва тараққиёт банки билан барча раҳбарларни рақобат асослари ва комплаенс бўйича ўқитиш муҳимлигини таъкидлаган.

Қачон рақобатга тайёр бўламиз? Соҳа ва тармоқларимиз тайёр бўлса. Соҳалар қачон тайёр бўлади? Мутахассислар бўлса. Энг заиф жойимиз: малакали мутахассислар етишмайди, технология йўқ, стандартлар йўқ. Шунинг учун бу соҳани деярли бошидан бошлашимиз керак”, деган Ш. Мирзиёев.

Йиғилишда Бизнес ва тадбиркорлик олий мактабида монопол корхоналарнинг раҳбарлари ва ҳокимлар учун рақобатни ривожлантириш йўналиши бўйича қисқа муддатли ўқув курсларини ташкил этиб, ўқув жараёнига ҳалқаро молия ташкилотларидан эксперт ва профессор-ўқитувчиларни жалб қилиш вазифаси қўйилган.

Шунингдек, президент рақобат соҳасига оид низоларнинг малакали кўриб чиқилишини таъминлаш мақсадида Тошкент юридик университетида шу йўналиш бўйича судьялар малакаси ошириш, судьяларни ушбу йўналишда ихтисослаштириш ва алоҳида суд коллегиясини ташкил этиш муҳимлиги таъкидлаган.

Айни пайтда у Монополияга қарши курашиш қўмитаси ҳузуридаги Истеъмолчилар ҳуқуқларини ҳимоя қилиш агентлигининг ваколатларини кенгайтириш муҳимлиги қайд этган.

Амир Темурнинг мунозараларга сабаб бўлган Деновдаги ҳайкали реконструкция қилинади

Денов тумани марказидаги хиёбонда ўрнатилган Амир Темур ҳайкали.

Денов тумани марказидаги хиёбонда ўрнатилган Амир Темур ҳайкали қайта реконструкция қилинади. Бу ҳақда Денов тумани ҳокимлиги ахборот хизмати маълумот тарқатди.

Ҳокимлик ўз расмий муносабатини туман марказидаги хиёбонда ўрнатилган Амир Темур ҳайкали бўйича ижтимоий тармоқларда авж олган баҳс-мунозара ортидан ёйинлаган. Тармоқ фойдаланувчилари ҳайкал қўлидаги буюм чангқоққичга ўхшаб қолганига айниқса кўп эътироз билдирганлар.

Ҳокимлик изоҳига кўра, соҳибқирон қўлида ушлаб турган ҳассадаги уч ҳалқа Темур ва Темурийлар салтанати байроғи, тамғаси ва тангаларида тасвирланганлиги тарихий манбаларда келтириб ўтилган. Шу важдан “қўлида уч ҳалқадан иборат белги бириктирилган ҳасса тутган Амир Темур ҳайкали унинг шон-шуҳрати, уч иқлимни бирлаштирган енгилмас машҳури замон бўлганлиги рамзидир”, дейилади хабарномада.

ХТВ мактабларда ота-оналардан ёппасига мажбурий пул йиғилмаслиги лозимлигини билдирди

Uzbekistan - school repaired

Халқ таълими вазирлиги Ўзбекистондаги умумтаълим мактабларида синф хоналарини янги ўқув йилига тайёрлаш учун ота-оналардан кўмак фақат ихтиёрий асосда олиниши лозимлигини урғуламоқда.

Вазирлик қайдича, агар кимдир ўз фарзандини ўқишига қўшимча шароит яратмоқчи, ниманидир таъмирламоқчи ёки мактабга яна қандайдир ёрдам бермоқчи бўлса, уни бемалол қилиши мумкин.

“Жойларда мактабларнинг моддий-техник аҳволи қандай эканлигини ота-оналар яхши билишади. Лекин ҳаммага бир хил ёндашиб, ота-оналардан мажбурий пул йиғиш ҳолатларини олдини олиш керак. Ҳозирги пандемия шароитида кўпчилик иқтисодий қийинчиликни бошидан ўтказмоқда. Шунинг учун ҳам бу масалада мактаб маъмуриятидан тўғри ёндашувни таъминлашни сўраймиз”, дейилади ХТВ хабарномасида.

Вазирлик мактаблар ҳомийларни жалб қилган ҳолда қўшимча маблағ топиши мумкинлигини қайд этган. Ҳомийлар турли корхона, собиқ битирувчилар, ўқувчиларнинг ота-оналаридан иборат бўлиши мумкин. Ҳомийлик эса ихтиёрий тарзда ва қонуний ташкил этилиши лозим, яъни пул маблағлари мактаб ҳисобига тушиши ва маблағни сарфланиши бўйича маълумот олиши учун шароит яратилиши керак.

“Ўзбекистон” меҳмонхонасининг 80 фоизлик давлат улуши Сингапур ширкатига сотилди

Тошкентдаги "Ўзбекистон" меҳмонхонаси, 2018 йил августи.

Тошкентдаги “Ўзбекистон” меҳмонхонасига 33 миллион долларга харидор чиқмаганидан кейин меҳмонхонанинг 80,1 фоиз давлат улушини Сингапур ширкати сотиб олди. Бу ҳақда Давлат активларини бошқариш агентлиги маълум қилади.

Қайд этилишича, Вазирлар Маҳкамасининг 2018 йил 14 августдаги "Меҳмонхона соҳасига қўшимча инвестицияларни жалб этиш чора-тадбирлари тўғрисида"ги қарорига кўра, "Otel Uzbekistan" МЧЖ ҚКнинг 80,1 фоиз давлат улуши оммавий савдоларда сотилиши белгиланган.

Шундан келиб чиққан ҳолда, агентлик томонидан "Otel Uzbekistan" МЧЖ ҚКнинг 80,1 фоиз давлат улуши дастлаб, 33 миллион АҚШ долларига танлов савдолари орқали сотувга чиқарилган.

Мазкур давлат улушини сотиш шартлари этиб харид тўловини тўлашдан ташқари:

а) 2 йил муддатда 100,0 млрд. сўм инвестиция киритиш;

б) давлат улушини сотиб олгандан сўнг 10 йил давомида асосий фаолият турини (меҳмонхона хизматини кўрсатиш) сақлаш;

в) ташқи фасадини ўзгартирмасдан меҳмонхонани таъмирлаш;

г) меҳмонхонани бошқаришга энг яхши менежерларни жалб қилиш белгиланганди.

“Юқорида кўрсатилган нархда (33,0 млн. АҚШ долларига) талабгорлардан мурожаат тушмаганлиги сабабли, давлат улушининг бошланғич нархи Ўзбекистон Республикаси Президентининг 2014 йил 3 июлдаги "Давлат мулки объектларини кичик бизнес ва хусусий тадбиркорлик субъектларига сотиш борасидаги қўшимча чора-тадбирлар тўғрисида" ПҚ–2200-сон қарорига асосан, 10 фоиздан босқичма-босқич 30 фоизгача пасайтирилган ҳолда 23,1 млн. АҚШ доллари нархида танлов савдоларига чиқарилди”, дейилади хабарномада.

Маълум қилинишича, давлат активларини бошқариш агентлиги томонидан салоҳиятли инвесторларни жалб этиш мақсадида меҳмонхона бизнеси ва туризм соҳасида фаолият юритаётган Буюк Британия, Туркия, Бирлашган Араб Амирликлари, Сингапур давлатларининг бу соҳадаги таниқли кампаниялари билан музокаралар олиб борилган.

Музокаралар якуни бўйича якуний таклиф берган 6 та компаниянинг таклифлари ўрганиб чиқилган.

Ўрганиш натижалари асосида "Otel Uzbekistan" МЧЖ ҚКнинг 80,13 фоиз давлат улушини сотиб олиш бўйича Сингапурнинг "Bashan investment group pte ltd" ширкатининг "24 ой мобайнида 23,2 млн доллар тўлаш, 1,5 йил ичида 100 млрд сўм инвестиция киритиш ва 4 юлдузли меҳмонхона ташкил этиш" таклифи Давлат тендер комиссияси томонидан маъқулланган.

Ушбу қарорга асосан Давлат активларини бошқариш агентлиги ва "Bashan investment group pte ltd" ширкати ўртасида юқорида кўрсатилган шартлар асосида "Otel Uzbekistan" МЧЖ ҚКнинг 80,13 фоиз давлат улушини сотиш бўйича шартнома имзоланган.

“Ўзбекистон” меҳмонхонаси 33 миллион долларга сотувга қўйилгани, бу баҳога харидор чиқавермаганидан кейин нарх арзонлатилгани ҳақида Озодлик аввал хабар қилган.

Давомини ўқинг

Кўрмай қолган бўлсангиз

XS
SM
MD
LG