Линклар

Шошилинч хабар
28 май 2020, Тошкент вақти: 06:07

Ўзбекистон хабарлари

Ўрта мактаб битирувчиларига аттестат топшириладиган муддатнинг энг сўнгги куни белгилаб қўйилди

Ҳукуматнинг 13 май кунги қарори билан Умумий ўрта таълим тўғрисида давлат намунасидаги расмий ҳужжатларни бериш тартиби тўғрисидаги низом тасдиқланди.

Бу ҳақда хабар қилган Адлия вазирлигига кўра, низомга мувофиқ, аттестат ва сертификатлар 20 июнгача топширилиши лозим ва уларни битирувчиларга топшириш қуйидаги босқичларда амалга оширилади:

ҳар йили 10 июнга қадар битирувчиларнинг баҳолари, ўқув-тарбия жараёни билан боғлиқ ҳужжатлар (синф журнали, баҳолар табели) ўрганилиб, аттестат ва сертификат билан тақдирланадиган битирувчилар рўйхати шакллантирилади ҳамда педагогик кенгашга тақдим этилади;

педагогик кенгаш ҳар йили 15 июнга қадар битирувчиларни аттестат ва сертификат билан тақдирлаш тўғрисида қарор қабул қилади;

битирувчиларга аттестат ва сертификат ҳар йили 20 июнга қадар тантанали равишда топширилади.

Психик ривожланишида нуқсони бўлган болалар учун ихтисослаштирилган мактаб (мактаб-интернат)ни тамомлаганлик тўғрисидаги сертификат берилади.

Кун янгиликлари

Бўкада ўқитувчиларни камситган ҳоким муовини 22 млн сўмдан кўпроқ жаримага тортилди

Халқ таълими вазири Назорат-ҳуқуқий хизмати ва Тошкент вилояти Бандлик бош бошқармаси Давлат меҳнат инспекцияси ҳамкорликда Бўка тумани ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари Анвар Хонтўраевни халқ таълими муассасалари фаолиятига асоссиз аралашуви, педагог кадрларнинг шаъни ва қадр-қиммати камситилишига, меҳнатга мажбурлаш, уларнинг касбий фаолияти билан боғлиқ бўлмаган ишларга жалб қилгани учун 22 миллион 300 минг сўмлик жаримага тортди.

Вазирлик ахборот хизмати маълумотига кўра, Бўка тумани ҳокимининг ўринбосари томонидан туманда жойлашган таълим муассасалари раҳбарларига ободонлаштириш ҳамда томорқа ишлари бўйича хатлов ўтказиш каби топшириқлар берилган.

Хусусан, А. Хонтўраев жорий йилнинг 19 апрель куни Вазирлар Маҳкамасининг 2020 йил 23 мартдаги 176-сонли қарорига зид равишда тумандаги 12-умумтаълим мактабида 53 нафар таълим муассасаси раҳбарлари ва маҳалла фаолларига йиғилиш ўтказиб, 12-мактаб директори М.Хакимованинг ўз вақтида томорқа бўйича аҳолини хатлов қилмаганлиги учун унинг касбий фаолиятига асоссиз аралашиб, унга тазйиқ ўтказиб, барчани олдида изза қилиб, шаъни ва қадр-қимматини камситиб, ҳуқуқларини поймол этиб ундан туман ҳокими номига тушунтириш хати ва жорий йилнинг 20 апрель кунидан ишдан бўшаш тўғрисида аризасини олган.

Бундан ташқари, 2020 йил 6-7 май кунлари ҳоким ўринбосари Хонтўраев туманда фаолият юритаётган 15-, 16-, 18-, 24-, 50-умумтаълим мактаб директорларига тазйиқ ўтказиб, туман марказидаги “Ёшлар майдони”га директорлар ва хўжалик ишлари бўйича ўринбосарларини, яъни 25 кишини майдонда ўсган ўтларни ўриш каби мажбурий меҳнатга жалб қилган.

ХТВ бу борада тўпланган ҳужжатларни қонуний баҳо бериш учун 15 май куни Тошкент вилояти Бандлик бош бошқармасига юборган.

Бошқарма Давлат меҳнат инспекцияси мазкур ҳолатларни ўрганиб чиққанидан сўнг Анвар Хонтўраевга нисбатан Ўзбекистон Республикаси Маъмурий жавобгарлик тўғрисидаги кодекснинг 51-моддаси 1-қисми билан 22,3 млн. сўм жарима жазоси қўлланилган.

Ўзбекистоннинг барча ҳудудларида Нуронийлар кенгаши тузилади

Ўтирғичда дам олаётган ўзбекистонлик оқсоқол.

Қорақалпоғистон Республикаси, вилоятлар, Тошкент шаҳар ҳамда туман ва шаҳарларда нуронийлар жамоатчилик кенгашлари (Нуронийлар кенгаши) ташкил этилади. Бу ҳақда Ўзбекистон ҳукуматининг 25 майдан кучга кирган “Қорақалпоғистон Республикаси, вилоятлар, Тошкент шаҳар ҳамда туман ва шаҳарларда нуронийлар жамоатчилик кенгашларини ташкил этиш чора-тадбирлари тўғрисида”ги қарорида айтилади.

Қарорда қайд этилишича, кексаларни қўллаб-қувватлаш соҳасига оид қонун ҳужжатларининг ижросини таъминлашга кўмаклашиш, нуронийларнинг ҳуқуқлари ва қонуний манфаатларига тааллуқли энг муҳим масалалар юзасидан Маҳалла ва оилани қўллаб-қувватлаш вазирлигининг ҳудудий бўлинмалари фаолияти ҳақида жамоатчилик, шу жумладан кексалар фикрини тизимли мониторинг ва ҳар томонлама таҳлил қилиш, ёлғиз кексалар, пенсионерлар, ногиронлиги бўлган нуронийларнинг муаммоларини комплекс ўрганиш ва бу борада таклифлар ишлаб чиқиш, маҳаллаларда нуронийларнинг билим ва бой ҳаётий тажрибасидан ёшлар маънавиятини юксалтириш, уларда ватанпарварлик руҳини мустаҳкамлаш масалаларида самарали фойдаланиш тизимини йўлга қўйишга кўмаклашиш ва шу кабилар Нуронийлар кенгашининг асосий вазифалари этиб белгиланган.

Қарорга мувофиқ, Нуронийлар кенгаши Маҳалла ва оилани қўллаб-қувватлаш вазирлигининг тегишли ҳудудий бўлинмаси раҳбари қарори билан ташкил этилади.

Нуронийлар кенгаши ўз ишини жамоатчилик асосида олиб борадиган, доимий фаолият юритувчи маслаҳат-кенгаш органи ҳисобланади.

Ҳукумат қарори билан Нуронийлар жамоатчилик кенгашлари тўғрисидаги намунавий низом тасдиқланган.

Нуронийлар кенгаши фаолияти моддий-техник жиҳатдан Маҳалла ва оилани қўллаб-қувватлаш вазирлиги ҳудудий бўлинмаси томонидан, шунингдек, қонун ҳужжатларида тақиқланмаган бошқа манбалар томонидан таъминланади.

Ишсизлик даражаси бўйича Самарқанд ва Сурхондарё вилоятлари олдинда бормоқда

Карантин ҳукм сураётган Самарқанд кўчаларидан бири.

Жорий йилнинг биринчи чорагида Ўзбекистонда ишсизлик даражаси 9,4 фоизни ташкил қилиб, энг юқори ишсизлик даражаси 9,8 фоиз билан Самарқанд ва Сурхондарё вилоятларида, 9,7 фоиз билан Жиззах, Қашқадарё, Сирдарё ва Фарғона вилоятларида қайд этилган бўлса, энг паст кўрсаткич Тошкент шаҳрида (7,8 фоиз) аниқланган. Бу маълумотлар молия вазири ўринбосари Дилшод Султоновнинг Давлат бюджети ва давлат мақсадли жамғармалари бюджетларининг 2019 йилдаги ижроси юзасидан ҳисоботида акс этган.

Мазкур ҳисоботни вазир ўринбосари, Олий мажлис Қонунчилик палатаси сайти маълумотига кўра, 26 май куни Ўзбекистон Либерал-демократик партияси фракцияси аъзоларига тақдим этган.

Мулозимга кўра, ҳисобот даврида ишга жойлаштиришга муҳтож меҳнат билан банд бўлмаган аҳоли (ишсизлар) сони 1 399,7 минг кишини ташкил этган.

Йиғилишда ишсиз шахсларни ҳақ тўланадиган жамоат ишларига кенг жалб этиш асосида аҳоли бандлигини таъминлаш учун, Ўзбекистон президентининг 2017 йил 24 майдаги тегишли Фармонига мувофиқ, Бандлик ва меҳнат муносабатлари вазирлиги ҳузуридаги Жамоат ишлари жамғармасини ташкил этиш муҳим қадам бўлгани қайд этилган.

Депутатлар аҳоли бандлигини тўлиқ таъминлаш ва меҳнатга муносиб ҳақ тўлаш, янги иш ўринларини яратиш, ишсизлик даражасини қисқартириш ҳозирги пандемия шароитида ҳар қачонгидан ҳам муҳимлигини айтишиб, оилавий тадбиркорлик, касаначилик, томорқа хўжалиги ва хусусий бизнесни қўллаб-қувватлаш ҳисобига аҳоли бандлигини таъминлаш ҳамда фуқаролар оилавий бюджети даромадларини ошириш мумкинлигини таъкидлаганлар.

Мақомчилар ва бахшилар учун алоҳида институт ташкил этилади

Иллюстратив сурат.

Ўзбекистон давлат консерваториясининг “Ўзбек мақом санъати факультети” ҳамда Ўзбекистон давлат санъат ва маданият институтининг тегишли таълим йўналишлари ва мутахассисликлари негизида мақом ижрочилиги, бахшичилик ва катта ашула йўналишлари бўйича кадрлар тайёрловчи таянч олий таълим муассасаси – Юнус Ражабий номидаги Ўзбек миллий мусиқа санъати институти ташкил этилади. Бу ҳақда, маҳаллий матбуот хабарига кўра, президент Ш. Мирзиёев томонидан куни кеча имзоланган “Ўзбекистон Республикасида маданият ва санъат соҳасини янада ривожлантириш чора-тадбирлари тўғрисида”ги фармонда айтилади.

Ҳужжатда давлат муассасаси шаклидаги Маданий мерос илмий-тадқиқот институти ташкил этилиши ҳамда Республика ихтисослаштирилган эстрада ва цирк мактаби Карим Зарипов номидаги Республика эстрада ва цирк коллежи этиб қайта ташкил этилиши ҳам қайд этилган.

Шунингдек, президент фармонига мувофиқ, В.Успенский ва Р.Глиэр номидаги Республика ихтисослаштирилган мусиқа академик лицейлари мактаб-интернатлар учун белгиланган имтиёзларни татбиқ қилган ҳолда тегишлича В.Успенский ва Р.Глиэр номидаги Республика ихтисослаштирилган мусиқа мактабларига айлантирилади.

Айни пайтда Ўзбекистон давлат консерваторияси ҳузуридаги Иқтидорли болалар академик лицейи ҳамда Тошкент ихтисослаштирилган маданият мактаби негизида Маданият вазирлиги тизимида Республика мусиқа ва санъат коллежи ташкил этилади.

Андижон вилояти ҳокимлиги Избоскандаги юриш қатъий назорат остида ўтганини иддао қилди

Избосканда уюштирилган оммавий тадбирдан лавҳа, 2020 йил 25 майи.

Жорий йилнинг 25 май куни Избоскан туманида ўтказилган акция карантин тартиб-қоидаларига қатъий риоя қилинган ҳолда, туман Давлат санитария эпидемиология осойишталик маркази мутахассисларининг махсус назорати остида ташкил этилди. Бу ҳақда Андижон вилояти ҳокимлигининг расмий муносабатида билдирилган.

Вилоят ҳокимлиги иддаосича, акция ўтказиладиган ҳудудда тадбир бошланишидан олдин зарарсизлантириш гуруҳи томонидан зарарсизлантириш ишлари олиб борилган. Шунингдек, тадбир аввалида барча иштирокчилар махсус тиббий кўрикдан ўтказилиб, антисептик воситалари билан дезинфекция қилинган ҳолда, акцияда иштирок этишига рухсат берилган.

Хабарномада 24 май куни Избоскан туманининг Жонобод МФЙ ҳудудида яшовчи фуқарода коронавирус инфекцияси аниқлангани ва шу куннинг ўзида ушбу ҳудуд тезкорлик билан карантинга олингани эътироф этилади.

Айни пайтда ҳокимлик Жонобод МФЙ туман марказидан 4 километр, акция ўтказилган ҳудуд (Куйган ёр МФЙ)дан 10 километр узоқликда жойлашгани, ташкил этилган пиёда юриш акциясида ушбу ҳудуддан ҳеч ким иштирок этмаганлигини қўшимча қилади.

Аввалроқ Озодлик коронавирус инфекцияси аниқланган Избосканда туман ҳокимлиги “Соғлом хаёт учун 5000 қадам” оммавий пиёда юриш акциясини ташкил этгани ҳақида хабар қилган эди. Мазкур ҳодиса ижтимоий тармоқларда кенг муҳокамаларга сабаб бўлган.

Тошкент-Андижон йўналиши бўйлаб қўшимча поезд қатнай бошлади

Жорий йилнинг 26 майидан Тошкент–Андижон–Тошкент йўналиши бўйлаб 62/61-сонли йўловчи поезди ҳаракати қайта тикланди.

“Ўзтемирйўлйўловчи”АЖ маълумотига кўра, мазкур поезд қатнови Республика махсус комиссияси томонидан тасдиқланган карантин даврида маҳаллий йўналишларда темир йўл қатновларини йўлга қўйишнинг Вақтинчалик тартибига риоя қилган ҳолда амалга ошириляпти.

Қайд этилишича, йўловчилар чипталарни электрон тарзда ҳам харид қилишлари мумкин, фақат поездга чиқишдан аввал улардан йўл варағини тўлдириш ва Вақтинчалик тартибга ҳамда санитария-гигиена қоидаларига қатъий риоя қилиш талаб этилади.

Коронавирусга чалинганлар сони бир суткада 43 кишига кўпайди

Ўзбекистонда коронавирусга чалинган 2636 нафар бутунлай соғайган.

Соғлиқни сақлаш вазирлигининг билдиришича, 27 май соат 10:00 ҳолатига кўра, Ўзбекистонда коронавирус инфекцияси қайд этилганлар сони камида 3333 нафарни ташкил этмоқда. Бу 26 май соат 23:00даги ҳолатдан 43 кишига кўпдир.

“Янги аниқланган касалланиш ҳолатларининг 31 нафари Навоий вилоятидан, 6 нафари Тошкент вилоятидан, 4 нафари Тошкент шаҳридан ҳамда 2 нафари Наманган вилоятидан. Уларнинг барчаси коронавирусга чалинганлар билан мулоқотда бўлгани учун гумонланиб, карантинга олинган фуқаролар орасида аниқланган”, дейилади хабарда.

Айни пайтда Ўзбекистонда коронавирусга чалинган 2636 нафар бутунлай соғайган. Касалхоналарда 683 нафар бемор даволанмоқда, улардан 4 нафарининг аҳволи оғир. 14 бемор вафот этди.

Япония қишлоқ аёлларини қўллаб-қувватлаш учун Ўзбекистонга 3 миллион доллар беради

Лойиҳа доирасида 3500га яқин аёл касбий таълим олиш имкониятига эга бўлади.

Япония ҳукумати Ўзбекистондаги қишлоқ аёлларининг иқтисодий имкониятлари ва ҳуқуқларини кенгайтириш лойиҳасини амалга ошириш учун 3 миллион доллар маблағ ажратди. Бу ҳақда Япониянинг Ўзбекистондаги элчихонаси маълум қилди.

Лойиҳа доирасида Фарғона, Жиззах ва Қашқадарё вилоятларида яшовчи 3500га яқин аёл касбий таълим олиш имкониятига эга бўлади. Бундан ташқари 300 та кичик ва ўрта корхонага бизнес юритиш учун маблағ олишга ёрдам беради, шунингдек, 1500 та янги иш ўрнини яратади.

Япония Ташқи ишлар вазирлиги ва Япония халқаро ҳамкорлик агентлиги (JICA) коронавирусга қарши кураш учун Ўзбекистонга тиббий ускуналарни беғараз ёрдам шаклида тақдим этишни ҳам режалаштирмоқда.

Япония элчихонасининг хабар беришича, лойиҳа учун ажратилган 3 миллион долларни ҳисобга олганда, ёрдамнинг умумий қиймати 10 миллион долларга етиши ёки ундан ошиши мумкин.

Россияда оғир аҳволда қолган 786 ўзбекистонликка молиявий ёрдам кўрсатилди

Ёрдам пулини олиш учун "Мехр.рф" сайти орқали мурожаат қилиш лозим.

Ўзбекистоннинг Россиядаги Элчихонаси ва бошқа дипломатик ваколатхоналари таъсис этган “Меҳр” хайрия лойиҳаси Россияда оғир аҳволга тушиб қолган 786 нафар ўзбекистонликка 4 миллион 900 минг рубль миқдорида бир марталик молиявий ёрдам кўрсатилди.

Ташқи ишлар вазирлигининг маълум қилишича, 14 майдан 22 майгача молиявий ёрдам олганларнинг 493 нафари Россия олий ўқув юртлари кундузги бўлимида таълим олаётган талаба.

Ёрдам олганлар орасида 5 нафар ногирон, қарамоғида 2 ёшгача фарзанди бўлган ҳамда ҳомиласи 7 ойликдан ошган 32 нафар аёл, COVID-19 инфекцияси тасдиқланган 13 киши ҳам бор.

Бундан ташқари Санкт-Петербургдаги консулхонаси 41 нафар ўзбекистонликнинг хостелда истиқомат қилиш ҳақини ҳам тўлаб берган.

18 майдан 23 майга қадар 202 та эҳтиёжманд оилага икки ҳафталик озиқ-овқат маҳсулотлари етказиб берилган.

“Келиб тушаётган мурожаатлар билан самарали ишлаш ва маблағларни тенг миқдорда тақсимлаш, шунингдек, «мехр.рф» портали барқарор ишлаши учун кунига 1000 (минг) та мурожаат қабул қилиш чеклови ўрнатилди”, дейилади хабарда.

Ўзбекистон элчихонаси Россияда оғир вазиятга тушиб қолган ватандошларга 2020 йил 14 майдан моддий ёрдам берилишини эълон қилган эди.

“Меҳр” хайрия лойиҳаси доирасида кўрсатиладиган молиявий ёрдам бир марталик экани билдирилган.

“Мазкур ёрдам Россияда белгиланган меҳнатга ҳақ тўлашнинг энг кам миқдоридан (12130 рубль) келиб чиққан ҳолда бир марталик пул маблағини фуқаронинг банк картасига ўтказиб бериш шаклида амалга оширилади”, дейилган баёнотда.

"Меҳр" хайрия акцияси қатор ҳомийлар ва ҳамкорлар кўмагида амалга оширилмоқда.

ОАВ: Нарпай ҳокими рўзадор ўқитувчиларга ҳожатхона тозалатди

Ўзбекистонда турли касб эгаларини тозалаш ишларига жалб қилиш анъанага айланган.

Самарқанд вилоятининг Нарпай тумани ҳокими Ботир Жабборов рўза пайтида тумандаги мактаб ўқитувчиларини мактаб ҳожатхоналарини тозалашга жалб қилган. Бу ҳақда “Дарё” нашри хабар берди.

Нашр, шунингдек, ҳожатхона тозалаётган ва таъмирлаётган ўқитувчилар фотосуратларини ҳам эълон қилган.

“Таъкидланишича, ҳоким топшириғига кўра, мажбурий тарзда ҳожатхона таъмирлашга жалб қилинган ўқитувчилар вилоятда карантин бўлишига қарамасдан, ўз имкониятларидан келиб чиқиб мактабга қатнаган. Ҳожатхоналар таъмири қандай кетаётганини аниқлаш мақсадида ҳоким ўринбосари Асқар Рустамов бошчилигидаги ХТБ мудири Мирзоҳид Йўлдошев, туман касаба уюшмаси раҳбари Муҳаммад Жумаевлардан иборат гуруҳ ҳар куни мактабларга бориб, ҳолатни ўрганган”, - дейилади хабарда.

Хабарда қайд этилиишча, 22 май куни тасвирга олинган видео ҳам таҳририятда мавжуд. Мазкур видеода 32-мактабда бўлганида ХТБ мудири Мирзоҳид Йўлдошев таъмирдан кўнгли тўлмай, мактаб директорини турткилаб ташлагани акс этган.

“Мактаб директори ўқитувчилар рўзадорлиги учун жисмоний меҳнатдан қийналаётганини айтган вақтда мудир ‘сен буюрилган ишни қил’ деб директорни туртган”, — деб иқтибос келтиради “Дарё” таҳририятга келган мурожаатдан.

Сўнгги 14 кунда 734 кишида коронавирус топилди, улардан 185 нафари хориждан келганлар

Шу кунгача 348 292 киши карантиндан чиқарилган.

Сўнгги 14 кунда Ўзбекистонда 734 кишида коронавирус аниқланди, 17та чартер рейс билан олиб келинган 4056 нафар, чегара ўтказиш постлари орқали кириб келган 11 216 нафар ҳамда мулоқотда бўлганлар билан биргаликда ҳисобланганда жами 20 035 нафаро фуқаро стационар карантинга олинди. Бу ҳақда соғлиқни сақлаш вазирлиги бошқарма бошлиғи Баҳромжон Игамбердиев берган маълумотларни вазирлик матбуот хизмати эълон қилди.

Таҳлилларга кўра, хориждан чартер рейслар билан олиб келинганлар орасида энг кўп касалланганлар 14 май куни Санкт-Петербург шаҳридан олиб келинган ўзбекистонликлар орасида аниқланиб, 86 нафарни ташкил этди.

Қозоғистоннинг “Ғишткўприк” чегара постидан кириб келган фуқаролар орасида эса 99 нафари коронавирусга чалингани аниқланган.

Баҳромжон Игамбердиевнинг айтишича, айни пайтда давлат бюджетидан стационар шароитда тиббий кузатувда бўлган ҳар бир фуқаронинг бир куни учун ўртача 153 минг 700 сўм сарфланмоқда.

Стационар ва уй карантинига олиш тадбирлари бошланган илк кунлардан айни пайтга қадар карантинга олинган жами 394 181 нафар фуқародан 348 292 нафари карантиндан чиқарилган. Шундан, уй карантинига олинган 305 044 нафар фуқародан 280 006 нафари чиқарилган. Стационар карантинга олинган 89 137 нафар фуқародан эса 68 286 нафари чиқарилган.

Хоразмда коронавирусга чалинган беморларнинг барчаси соғайди

26 май ҳолатига кўра, 29 нафар бемор тузалди.

Хоразмда 26 май куни коронавирусга чалинган сўнгги 3 киши тузалди. Соғлиқни сақлаш вазирлигининг билдиришича, бу билан вилоятда коронавирус инфекцияси қайд этилган жами 233 нафар беморнинг барчаси соғайди. Хоразм вилояти эса “яшил” ҳудудга айланди.

Бундан ташқари 26 май куни Наманган вилоятида 7 нафар ҳамда Самарқанд вилоятида 2 нафар, жами 12 нафар бемор бутунлай соғайиб, реабилитацияга кузатилди.

“Наманганда шифо топганларнинг барчаси ушбу вилоятдан (5 нафари Наманган шаҳри, Уйчи ва Наманган туманларидан 1 нафардан) бўлиб, 5 нафари эркак, 2 нафар аёл. Улар орасида ёши каттаси 75 ёшли онахон бўлса, ёши кичига 17 ёшда. Вилоятдан ани пайтга қадар 240 нафар бемор соғайган бўлса, эндиликда 247 нафарга етиб, даволанаётганлар 3 нафарни ташкил этмоқда. Ушбу вилоят ҳам коронавирусдан ҳоли ҳудуд бўлишга яқин турибди”, дейилади расмий хабарда.

Самарқандда тузалганлар ҳам (30 ёшли ва 24 ёшли эркак) ушбу вилоятдан бўлиб, Тойлоқ ва Самарқанд туманларидан. Эндиликда вилоятда соғайганлар 249 нафарга етиб, даволанаётганлар 89 нафарни ташкил қилмоқда.

26 май ҳолатига кўра, 29 нафар бемор тузалиб, коронавирус инфекциясидан бутунлай соғайганлар 2636 нафарни ташкил этмоқда.

14-ўлим: Коронавирусга чалинган самарқандлик 63 ёшли бемор оламдан ўтди

Самарқанд вилоятининг Пахтачи тумани яшаб келган, коронавирусга чалинган 63 ёшли (эркак) бемор 26 май куни оламдан ўтди. Бу ҳақда Соғлиқни сақлаш вазирлиги маълумот тарқатди.

ССВ хабарномасида самарқандлик И. шу йилнинг 19 май куни вилоят кўп тармоқли тиббиёт марказида оғир аҳволда ётқизилгани, ўтказилган таҳлиллар натижасида унда “Covid-19” инфекцияси тасдиқлангани айтилади.

Қайд этилишича, I-гуруҳ ногиронлиги бўлган бу бемор 3 йилдан буён сурункали буйрак етишмовчилиги ва анемия оғир даражаси ташхиси билан диспансер назоратида турган.

25 май куни беморнинг аҳволи ёмонлашган, бурундан ва ички қон кетиш белгилари пайдо бўлган ва реанимация бўлимига олинган.

Врачлар томонидан кўрсатилган реанимацион муолажаларга қарамасдан, сунъий нафас олиш аппаратида бўлган бемор ўткир нафас ва юрак қон-томир етишмовчилигидан вафот этган.

Пахтачилик бу бемор ва у яшаган Жона маҳалла фуқаролар йиғинида юзга келган вазият ҳақида Озодлик 21 май куни хабар қилганди.

Шу тариқа коронавирус инфекцияси юқтириб олгани ортидан оламдан ўтган ўзбекистонлик беморлар сони 14 нафарга етган.

ССВ, 2020 йил 26 май соат 23:00 ҳолатига кўра, Ўзбекистонда коронавирусга чалинганлар сони 3290 нафарга, соғайганлар сони эса 2636 нафарга етганини маълум қилган.

Мирзиёев пандемия борасида хотиржамликка берилишга ҳали эрта эканини таъкидлади

Ўзбекистон президенти Шавкат Мирзиёев.

Ўзбекистон фуқаролари қайтиб келаётган давлатлар ҳамда қўшни мамлакатлардаги вазиятнинг оғирлигини ҳисобга олиб, хотиржамликка берилиш мумкин эмас. Бу ҳақда Ўзбекистон президенти Шавкат Мирзиёев инвестиция масалалари муҳокамасига бағишлаб 26 май куни ўтказилган видеоселектор йиғилиши аввалида билдирди.

Президент матбуот хизмати маълумотига кўра, кейинги кунларда коронавирус билан касалланганлар сони Ўзбекистонда ҳам кўпайгани қайд этилаётганига эътибор қаратган Ш. Мирзиёев аксарият ҳудуд ва корхона раҳбарлари, фуқаролар карантин чораларининг юмшатилганини “касаллик тугади” деб, нотўғри қабул қилаётганини урғулади.

“Бугунгача чет элдан олиб келинган фуқароларимиз сони 47 мингтани ташкил этмоқда. Афсуски, уларнинг, айниқса кейинги икки ҳафта давомида кириб келганларнинг аксариятида коронавирус аниқланган. Беморларнинг қарийб 50 фоизини ҳам хориждан келган фуқаролар ташкил этади”, деди президент.

Унга кўра, кейинги 10 кунда 3,5 минг одам ҳаво йўллари, 7 мингга яқин фуқаро чегара постлари орқали Ўзбекистонга кириб келиши кутиляпти. Бунга қўшимча яна 100 минг нафардан ортиғи ватанга қайтиш истагини билдириб, навбат кутмоқда.

Мирзиёевнинг қайд этишича, бозорлар, савдо комплекслари, банкларда ижтимоий масофага амал қилмаслик, кўча-кўйда тиббий ниқоб тақмаслик, бемалол ва хотиржам бўлиб, уйларда турли тадбирлар ўтказиш ҳолатлари кўпаймоқда.

“Бундай салбий ҳолатлар касалликни аниқлаш, олдини олиш ва даволаш учун қилаётган барча ҳаракатларимиз, бюджетдан олинаётган триллионлаб харажатларимиз натижадорлигини йўққа чиқариши мумкин”, деди президент.

Йиғилишда Ш. Мирзиёев Республика комиссияси вилоят ҳокимлари билан бирга бир кун муддатда эпидемиологик вазият ёмонлашган ҳудудларнинг тоифасини қайта кўриб чиқиши ҳамда карантин чораларини кучайтириш бўйича таклиф киритиши бўйича топшириқ берган.

Екатеринбургдан Тошкентга 278 нафар ўзбекистонлик қайтарилди

Россиянинг Екатеринбург шаҳрида Тошкентга 25 май куни махсус рейс билан 278 киши олиб келинган. “Областная газета” онлайн нашри хабарига кўра, кеча юртига қайтган ўзбекистонликлар орасида 10 нафар бола ҳам бор.

Қайд этилишича, Ўзбекистоннинг Екатеринбургдаги бош консули Абдусалом Ҳотамов юртдошларини ватанига қайтаришда кўмаклашган россиялик дипломатлар ҳамда Кольцово аэропорти ходимларига миннатдорчилик изҳор қилган.

Маълумотларга кўра, Екатеринбургдаги ўзбекистонликлар “Uzbekistan Airways” авиаширкати учоғи билан қайтарилган.

Коронавирус инфекцияси аниқланган Избосканда туман ҳокимлиги оммавий юриш ташкил этди

Избоскан тумани ҳокимлиги томонидан уюштирилган пиёда юришдан лавҳа, 2020 йил 25 майи (туман ҳокимлиги фотоси).

Андижон вилоятининг Избоскан туманида 25 май куни расмийлар томонидан “Соғлом ҳаёт учун 5000 қадам” шиори остида пиёда юриш ташкил этилган. Бу ҳақда Избоскан тумани ҳокимлиги ўз Телеграм-канали орқали маълумот тарқатди.

Ҳокимлик мазкур тадбир “Ўзбекистон президентининг Андижон вилоятига ташрифи чоғида андижонлик фаоллар билан ўтказган йиғилишида аҳоли саломатлигини сақлаш, уларни соғлом турмуш тарзига риоя қилишлари учун “Андижон намунаси” асосида ҳар куни кечки юришни ташкил этиш бўйича берган топшириқ ижросини таъминлаш, туман аҳолисини саломатлигини янада яхшилаш мақсадида” уюштирилганини билдирган.

Андижон вилояти Избоскан туманида яшовчи бир фуқарода 23 май куни коронавирус инфекцияси аниқланган, бу борада туман санитария-эпидемиологик осойишталик маркази маълум қилганди.

Қайд этилишича, избосканлик бемор билан мулоқотда бўлган 51 киши карантинга олинган.

Ўзбекистонда кунига 6 млн ниқоб ва 45 минг комбинезон ишлаб чиқарилмоқда

Ўзбекистонда 275 та корхона томонидан ҳар куни 6 миллиондан зиёд тиббий ниқоб ва 45 мингта ҳимоя комбинезони ишлаб чиқариляпти. Бу ҳақда Наманган вилояти ҳокимлиги матбуот хизмати маълум қилди.

Ниқоблар ишлаб чиқариш бўйича Наманган (36 та корхона), Андижон (28), Тошкент (26) вилоятлари ва Тошкент шаҳри (29) етакчилик қилаётгани айтилган. Мазкур корхоналар улушига ишлаб чиқарилаётган маҳсулотларнинг 75 фоиздан кўпроғи тўғри келган.

Қайд этилишича, 1,7 миллион дона ниқоб ва 1,2 миллион дона комбинезон гуманитар ёрдам сифатида жўнатилган, 13,4 миллион дона ниқоб эса экспортга йўналтирилган.

Ўзбекистонда “қизил”, “сариқ” ва “яшил” тоифага кирувчи ҳудудларда жамоат жойларида ниқоб тақиб юриш ҳалигача мажбурий бўлиб, бунга амал қилмаган шахслар маъмурий жавобгарликка тортилади.

Озодлик хабари ортидан Бухородаги 300 йиллик масжид сақлаб қолинди

Бухородаги "Файзихон" масжиди ва унга осилган лавҳа.

Бухоро вилоят Хонобод МФЙ Хонобод кишлоғида жойлашган 1717 йилда қурилган "Файзихон" масжиди сақлаб қолинди. Бу ҳақда Озодликка Ўзбекистон Маданият вазирлиги Маданий мерос департаментининг Бухоро бошқармаси раҳбари Шерзод Маҳмудов билдирди.

Мулозимга кўра, эндиликда масжид тўлиқ Маданият вазирлиги Маданий мерос департаменти Бухоро бошқармаси ҳисобида туради.

Бухоро туманида 300 йиллик тарихга эга жомеъ масжиди новвойхонага айлантирилгани ҳақида Озодлик 22 май куни хабар қилганди. Мақолада Маданий мерос департаментининг қадимий обидалар рўйхатига кирмагани, Мусулмонлар идорасида эса масжид сифатида рўйхатга олинмаган бу бино Хонобод МФЙ балансидаги кўчмас мулк сифатида қайд қилингани урғуланганди.

Маълум бўлишича, Озодлик хабари ортидан Маданий мерос департаменти вакиллари Хонобод қишлоғига бориб, масжиддаги новвойхона фаолиятини тугатиб, бино пештоқидаги “Хонобод МФЙ Хонобод 1 қишлоқ нонвойхонаси” деб ëзилган кўк рангдаги лавҳани олдириб келганлар.

Тошкентни Фарғона водийси билан боғловчи пуллик автомобиль йўли лойиҳасига тендер эълон қилинади

"Қамчиқ" довони йўли.

“Қамчиқ” довонида муқобил туннель қурилишини ўз ичига олувчи “Тошкент-Андижон” пуллик автомобиль йўли лойиҳаси бўйича тендер эълон қилинади. Бу ҳақда президент Шавкат Мирзиёев раислигида транспорт соҳасининг барқарор ишлашини таъминлаш ва изчил ривожлантириш масалалари бўйича 25 май куни ўтказилган йиғилишда билдирилди.

Президент матбуот хизмати маълумотига кўра, йиғилишда Ш.Мирзиёев ички йўллар масаласига алоҳида тўхталиб, уларнинг ҳолати ёмонлиги, одамлар бундан норози эканини қайд этган. 80 минг километр ички йўлларни реконструкция қилиш, бу борада бутун дунёда қўлланиб келинаётган “фойдаланувчи тўлайди” тизимини жорий этиш зарурлиги таъкидлаган.

Йиғилишда автотранспортда халқаро юк ташувчи корхоналарни қўллаб-қувватлаш масаласига ҳам эътибор қаратилган.

Сўнгги уч йил ичида Ўзбекистонда халқаро юк ташувчи транспортлар сони 3 баравар ошгани, юкларни ташишда маҳаллий корхоналарнинг ташқи савдодаги улуши 37 фоиздан 48 фоизга етгани урғуланган.

Маҳаллий ташувчиларнинг қатновлар сонини янада ошириш, ташқи савдода уларнинг улушини 60 фоизга етказиш чора-тадбирлари белгиланган. Битта юк транспорти беш нафаргача аҳоли бандлигини таъминлаши, бу тармоқда 30 мингта янги иш ўрни яратиш мумкинлиги қайд этилган.

Қорақалпоғистон Республикаси ва вилоятларда ички йўналишларда қатнайдиган автобусларни янгилаш, бундай корхоналарни барқарор молиявий ресурс билан таъминлаш юзасидан кўрсатмалар берилган.

Карантин туфайли Қирғизистонда қолиб кетган 50 аёл Ўзбекистонга ўтказилди

Ўз уйларига қайта олмаётган аёллар 21 май куни Қирғизистон ТИВнинг Ўшдаги ваколатхонасига келиб ёрдам сўраган эдилар.

Қирғизистондан Ўзбекистонга турмушга чиққан 50 нафар аёл оиласи бағрига қайтди. Бу ҳақда Қирғизистон Чегара хизмати 26 май куни хабар берди.

Аввалроқ Ўзбекистондан Қирғизистонга яқинларини кўриш учун келган 50 аёл коронавирус туфайли чегаралар ёпилгани ортидан уйларига қайта олмаётгани хабар қилинган эди.

Қирғизистон Чегара хизматининг хабар беришича, Ўзбекистон томони уларни 23 май куни ўз ҳудудига ўтказишга рухсат берган. Шу куни аёлларниг барчаси Ўшдаги “Дўстлик” чегара пункти орқали Ўзбекистонга қайтган.

Ўз уйларига қайта олмаётган мазкур аёллар 21 май куни Қирғизистон Ташқи ишлар вазирлигининг Ўшдаги ваколатхонасига келиб ёрдам сўраган эдилар.

Яна 46 кишида коронавирус аниқланди. Уларнинг барчаси Россиядан келганлардир

Шу кунгача 2607 нафар бемор соғайди.

Соғлиқни сақлаш вазирлигининг билдиришича, 26 май соат 10:00 ҳолатига кўра, Ўзбекистонда коронавирус инфекцияси қайд этилганлар сони 3261 нафарни ташкил этмоқда. Бу 25 май соат 23даги ҳолатга нисбатан беморлар сони 46 нафарга кўпайганини англатади.

Янги аниқланган беморларнинг асосий қисми хориждан қайтганида карантинга олинганлар орасида аниқланган. Жумладан, уларнинг 44 нафари Россиядан Қозоғистон орқали ватанига қайтган мухожир, қолган икки нафари Россиядан кириб келган халқаро юк ташувчи автомашинаси ҳайдовчисидир. Уларнинг 1 нафари Сирдарё вилоятига, яна 1 нафари Тошкент вилоятига кириб келган.

Вазирликнинг қайд этишича, шу кунгача 2607 нафар бемор соғайди. Касалхонада 641 нафар бемор қолмоқда. Улардан 2 нафарининг аҳволи оғир, 1 нафарининг аҳволи эса ўта оғир.

Самарада Ўзбекистонга қайтмоқчи бўлган муҳожирлар тўпланишда давом этмоқда

Россия-Қозоғистон чегарасида тўпланган ўзбек муҳожирлари вақтинча яшаши учун лагерлар ташкил қилинган эди.

Россиядан Қозоғистон орқали уйига қайтиш истагида бўлган ўзбекистонликлар Россия—Қозоғистон чегараси яқинида, Самара вилоятида тўпланиши давом этмоқда. Бу ҳақда 25 май куни Ташқи ишлар вазирлиги Телеграм каналида маълум қилинди.

Расмий хабарда айтилишича, Самара вилояти Большая Черниговка тумани ҳудудида 280 нафарга яқин ўзбекистонлик тўпланган. Қозон шаҳридаги Ўзбекистон бош консулхонасининг билдиришича, Самара вилояти маъмурияти чегарада тўпланган ўзбекистонликларни иш, ётоқ жой ва озиқ-овқат билан таъминлашга тайёрлигини билдирган. Бироқ улардан 25 нафаригина бу таклифни қабул қилган, қолганлари эса турган жойларини тарк этишни истамаган.

“Ишга жойлашишни истамаган ва чегара яқинида қолаётган ватандошларимизни ўзларининг вақтинча/доимий яшаш жойларига қайтишларини ҳамда чартер рейсларни кутишларини, Россия ҳудудида бўлиб турган Ўзбекистон фуқароларидан Россия—Қозоғистон давлатлараро чегарасини кесиб ўтиш нуқталарига боришга уринмасликларини, яшаш жойларида қолишларини ва карантин чораларига қатъий амал қилишларини сўраймиз”, — дейилган элчихона ва консулхонанинг ахборотида.

Ўзбекистоннинг Москва шаҳридаги элчихонаси ҳамда Қозон шаҳридаги бош консулхонаси 2020 йилнинг 18 ва 19 май кунлари Россия—Қозоғистон чегараси орқали фуқароларнинг Ўзбекистонга олиб кетилиши истисно тариқасида ва дипломатик ваколатхоналарнинг аввалдан шакллантирган рўйхати асносида икки давлат билан билан келишилган ҳолда амалга оширилганини эслатиб, қўшимча рўйхатлар тузилиши кўзда тутилмаганини маълум қилди.

18-19 май кунлари Россия- Қозоғистон чегарасининг Оренбург вилояти ҳудудидан ўтувчи қисмида тўпланиб турган 1100 нафар ўзбекистонлик автобусларда ватанига олиб кетилган эди.

Қозоғистон чегарада икки ҳафтадан буён уйига қайтиш учун тўпланиб турган ўзбекистонликлар учун истисно тариқасида транзит йўлаги очиб берган эди.

Фавқулодда вазиятлар вазирлиги Туркманистондан келиши кутилаётган чигиртка таҳдидига қарши курашмоқда

Чигирткага қарши кураш командаси иш бошлаш олдидан.ФВВ сайтидан олинган сурат.

Ўзбекистонда 640қа яқин мутахассис чигирткага қарши курашга жалб қилинди. Улар 148та трактор, 325 та қўлпуркагич, 8 та мотоделътаплан ва 26 та махсус машина воситасида бу жараённи амалга оширмоқда. Бу ҳақда Фавқулодда вазиятлар вазирлиги 25 май куни хабар берди.

Вазирликка кўра, чигирткага қарши кураш “Агрокимёҳимоя” АЖ, Ўсимликларни ҳимоя қилиш илмий-текшириш институтининг “Чигирткаларни ўрганиш лабораторияси” билан ҳамкорликда Ўзбекистоннинг турли ҳудудларида давом этмоқда.

“Тадбирларда зарарли чигирткалар тарқалган майдонларни аниқлаш, кимёвий ишловдан ўтказиш талаб этиладиган майдонларни белгилаш ҳамда зарур бўладиган кимёвий препаратлар, техникалар ва ёрдамчи воситалар билан махсус ишлов бериш ишларини амалга оширилмоқда”, - дейилади расмий билдирувда.

Аввалроқ Фавқулодда вазиятлар вазирлиги чигирткага қарши кураш жараёни Қашқадарё, Сурхондарё, Наманган ва Фарғона вилоятларида ўтказилаётгани ҳақида маълум қилганди. Билдирилишича, 600 минг гектардан ортиқ экин майдонларига кимёвий моддалар билан ишлов берилади ва чигирткага қарши кураш июнь ойигача давом этади.

Жорий йилнинг 7 майида Озодлик радиоси Туркманистондан Ўзбекистонга “чигирткалар хуружи таҳдид солаётгани” ҳақида хабар берган эди.

Қашқадарёнинг Нишон, Ғузор, Деҳқонобод туманларидаги фермерларга кўра¸ май ойи бошида қўшни Туркманистондан учиб келаётган чигирткалар тўдаси ўз экинзорларида пайдо бўлган.

Озодлик туркман хизмати хабарига кўра, чўл чигирткалари Туркманистоннинг Ўзбекистонга чегарадош Лебаб вилоятида кўпайган.

6 май ҳолатига қадар чигирткалар Лебаб вилоятининг Карки туманида 35 минг гектардан ортиқ майдонда экилган буғдой, шоли ва бошқа экинларни еб битирган.

Тўрткўлда 13 ёшли ўғлини сотаётган аёл қўлга олинди

Ўғлини сотаётган аёл қўлга олинган пайтда олинган сурат. ИИВ сайтидан олинди.

Қорақалпоғистоннинг Тўрткўл туманида 13 ёшли ўғлини сотаётган аёл қўлга олингани ҳақида 25 май куни Ички ишлар вазирлиги маълум қилди.

Расмий хабарда таъкидланишича, 19 май куни 43 ёшли М.П., Беруний тумани ИИБ га ариза билан мурожаат қилган. У ўз аризасида Тўрткўл туманида яшовчи “Қундуз” исмли аёл ноқонуний равишда ўз фарзандини сотмоқчи бўлиб юрганлигини маълум қилан.

Ўша куни унинг аризасига асосан соат 21:00 да Беруний тумани ИИБ ходимлари томонидан ўтказилган тезкор тадбирда, Тўрткўл туманида жойлашган намунали уйда ижарада яшаб келаётган 38 ёшли Қундуз К., ўзининг вояга етмаган 13 ёшли иккинчи фарзанди Д.О., ни фуқаро С.Э., га 15.000 АҚШ доллари эвазига сотаётган вақтида ушланган.

"Ҳодиса содир бўлган жойдан кимёвий ишлов берилган 400 АҚШ доллари ҳамда қолган 14.600 АҚШ доллари миқдоридаги пуллар аниқланиб, ашёвий далил тариқасида ўрнатилган тартибда олинган. Ҳолат юзасидан Тўрткўл тумани ИИБ ҳузуридаги Тергов бўлими томонидан Қундуз. К., га нисбатан Ўзбекистон Республикаси Жиноят кодексининг 135-моддаси 3-қисми «а» банди (одам савдоси) банди билан жиноят иши қўзғатилган, ҳозирда дастлабки тергов ҳаракатлари олиб борилмоқда”, - дейилади хабарда.

Коронавирусга чалинганларни даволаш ва карантин учун 209 миллиард пул сарфланди

Коронавирусга қарши дезинфекция олиб бораётган санитарлар.

Ўзбекистонда коронавирусга чалинганлик бўйича илк ҳолат аниқланган 15 мартдан 23 майгача мазкур вирусни юқтирганларни даволаш ва карантинга жойлаштирилганларни таъминлаш учун 209 миллиард сўмдан кўпроқ пул сарфланди. Бу ҳақда 25 май куни АОКАда ўтган брифингда Санитария-эпидемиология назорати давлат инспекцияси бошлиғи Нурмат Отабеков маълум қилди.

Унинг айтишича, беморлар даволаниб чиқиши учун 109 миллиард сўмдан ортиқ ва карантинга жойлаштирилганлар учун 100 миллиард сўмдан ортиқ харажат қилинган. Нурмат Отабеков бу маблағларнинг айнан нималарга сарфланганини қуйидаги тарзда ифодалаб берди.

Расмий 23 май ҳолатига кўра, Ўзбекистонда коронавирус юққан 2492 нафар бемор даволаниб чиққанини ва ҳар бир даволаниб чиққан бемор учун давлат бюджетидан 32 миллион 300 минг сўмдан пул сарфланганини билдирди. Отабековнинг қайд этишича, бунинг учун 80 миллиард сўмдан ошиқ маблағ кетган.

Айни пайтда, 23 май ҳолатига кўра, аҳволи ўта оғир бўлган 50 беморнинг ҳар бирига 64 миллион 400 минг сўмдан, жами 3,2 миллиард сўм сарфланган.

Реабилитацияга ўтказилган 2492 беморнинг ҳар бирига яна 2 миллиард 800 минг сўмдан, жами 6 миллиард 977 миллион сўм маблағ ажратилган.

Отабеков ҳозирда карантинда сақланаётган 45 455 кишининг ҳар бири учун 2 миллион 200 минг сўмдан ажратилганини айтди. Унга кўра умумий ҳисобда бу маблағ 100 миллиард сўмдан ортади.

Давомини ўқинг

OzodTa'sir

Кўрмай қолган бўлсангиз

XS
SM
MD
LG