Линклар

Шошилинч хабар
23 феврал 2020, Тошкент вақти: 12:20

Халқаро хабарлар

Япон миллиардери Илон Маск ракетасида ойга учадиган биринчи йўловчи бўлади

Япониялик 42 яшар миллиардер Юсаку Маезава

Таниқли кашфиëтчи Илон Маск (Elon Musk)нинг SpaceX ширкати ўз ракетасида биринчи бўлиб ойга учиши кутилаëтган хусусий йўловчининг япониялик 42 яшар миллиардер Юсаку Маезава (Yusaku Maezawa) эканини эълон қилди.

SpaceX эълон қилган баëнотга кўра¸ мода дунëсида танилган япон тадбиркорининг Илон Маск ҳали қуриб битирмаган Big Falcon (BFR) ракетасида 2023 йили ойга учиши режаланмоқда.

SpaceX баробарида Tesla электр машиналари ишлаб чиқариш ширкати асосчиси бўлган Маск¸ 17 сентябрь кунги баëнотида Маезавани “бундай саëҳатга жазм қилган ниҳоятда жасоратли одам” деб атади.

Ҳозирча Маск ойга учадиган биринчи хусусий йўловчисининг бу саëҳат учун қанча тўлашини эълон қилмади. Аммо Маезаванинг ўзи Reuters агентлигига ойга учиш учун Жан Мишель Баския суратига тўлаганидан анча кўп тўлашини билдирди. Япон миллиардери Баскиянинг 1982 йилги картинасини 110 миллион долларга сотиб олган эди.

Айтилишича¸ Маезава ойга учадиган ëлғиз йўловчи бўлишни истамаëтгани боис¸ рассом¸ архитектор ва дизайнерлардан иборат ижодкорлар гуруҳини ўзи билан бирга саëҳатга таклиф қилмоқчи.

SpaceX ширкатидан ташқари Amazon асосчиси Жефф Безос( Jeff Bezos) га қарашли Blue Origin ҳамда Ричард Брансон (Richard Branson)нинг Virgin Galactic ширкатлари ҳам фазога хусусий парвоз уюштириш режаси устида ишламоқда.

Ҳолливуд актëри Леонардо ДиКаприо ва қўшиқчи Жастин Бибер Virgin Galactic билан орбита бўйлаб 90 минутлик саëҳат қилиш учун шартнома имзолаган. Бу саëҳат нархининг 250 минг доллар экани айтилмоқда.

Кун янгиликлари

Германия Ички ишлар вазири Ханаудаги ҳужумни "ирқий адоват негизида содир этилган теракт" деб атади 

Ханаудаги ҳужум жойидан топилган ўқ.

Германия Ички ишлар вазири Хорст Зеехофер 19 февраль куни Ханау шаҳрида 11 одам ўлимига сабаб бўлган ҳужумни "ирқий адоват негизида содир этилган теракт" деб атади.

Берлин шаҳридаги матбуот анжуманида Зеехофер ўнгчи радикал экстремизм ва антисемитизм таҳдидлари мамлакатда жуда юқорилигини ҳам қўшимча қилди.

Ички ишлар вазирига кўра, ирқий адоват негизидаги ҳужумларга нишон бўлиши мумкин бўлган жойлар, айниқса масжидлар атрофида кузатув кучайтирилган.

Ханаудаги ҳужум бўйича қирқдан ортиқ киши сўроқ қилинган.

19 февраль куни 43 ёшли Тобиас Р исмли шахс Ханау шаҳридаги иккита чилимхона ва букмекерлик идорасига ҳужум қилган, оқибатда тўққиз киши ҳалок бўлган, тўрт киши яраланганди.

Жиноятчи шундан сўнг уйига келиб онасини, кейин ўзини отиб ўлдирган.

Ханау шаҳридаги ҳужум оқибатида ўлганларнинг аксари муҳожирлар бўлган. Ўлганлар орасида Болгария ва Туркия ватандошлари ҳам бор.

Эронда коронавирусдан бешинчи ўлим қайд этилди

Эрон Соғлиқни сақлаш вазири Киануш Жаҳонпур 22 февраль куни телевидение орқали мамлакатда коронавирусдан бешинчи одам нобуд бўлганини маълум қилди, лекин ўлим тафсилотларига тўхталмади.

Бир кун аввал Эронда коронавирусдан икки одам, ўтган ҳафта тағин икки одам ўлгани хабар қилинганди.

Соғлиқни сақлаш вазирига кўра, ҳозирда касалликка чалинган икки бемор Теҳрондаги касалхонада, саккиз бемор Ком шаҳридаги шифохонада даволанмоқда.

Вазирлик расмийлари касалликни Эронга Ком шаҳрида қуёш электр станцияси қураётган хитойлик ишчилар олиб келган бўлиши мумкинлигини таҳмин қилмоқда.

Хитойни ўзида шу пайтгача коронавирусдан 2 минг 200дан зиёд одам ўлди. Касалликка чалинганлар сони 75 мингдан ошди.

Сурияда тўқнашувлар авж олиши ортидан Россия ва Туркия ўртасидаги зиддият кучаймоқда

Россия қўллаб келаётган Сурия армияси кейинги кунларда мамлакат шимолидаги исёнчи гуруҳларга қарши ҳужумларини кучайтирди.

Россия қўллаб келаётган Сурия ҳукумати кучлари ҳамда Туркия қўллаётган суриялик исёнчилар ўртасидаги тўқнашувлар Москва ва Анқарани Суриядаги можарога тобора чуқурроқ аралашишга мажбурламоқда.

20 февраль куни Сурия президенти Башар Асадга қарши исёнчилар бошқарувидаги сўнгги ҳудудда содир бўлган тўқнашувлар 27 нафар киши умрига зомин бўлди.

Қароргоҳи Лондонда жойлашган Сурия инсон ҳуқуқлари ҳимоячилари гуруҳининг хабар қилишича, жангларда камида 11 нафар Сурия ҳукумати жангчиси, 14 нафар исёнчи ҳамда икки нафар турк аскари ҳалок бўлган.

Туркия расмийларининг маълум қилишича, Идлиб вилоятида содир бўлган тўқнашувлар давомида Россия ҳарбийлари «Су-24» қирувчи учоқлари билан ҳужум қилган. НАТО аъзоси Туркия эса ўз қирувчи учоқлари билан жавоб қайтарган.

Ҳар икки тараф душманни тор-мор қилганини иддао қилди. Хусусан, Туркия Мудофаа вазирлиги Сурия ҳукумати аскарларидан 50 ка яқини ҳалок бўлганини иддао қилди.

Эскалация ортидан Туркия мудофаа вазири Ҳулуси Акар Анқара Россиядан сотиб олган «С-400» ракета тизимларини ишга солишини айтиб, таҳдид солди.

Қозоғистон ҳукумати Азаттиқ радиоси икки журналистини аккредитациядан ўтказишдан бош тортди

Қозоғистон. Полиция ҳодимлари норозилик акциясини ёритаётган Азаттиқ радиоси журналисти Пётр Трошченкони ушлаб олиб кетмоқда. 2019, 9 июнь.

Озод Европа/Озодлик Радиоси (РСЕ/РС) медиакорпорацияси Қозоғистон ҳукуматини радионинг қозоқ хизмати- Азаттиқнинг икки журналистини аккредитациядан ўтказишдан бош тортганини танқид қилди, ҳамда буни медиаресурс ишига навбатдаги аралашиш сифатида баҳолади.

Аккредитациядан мухбирлар ​ Санат Урналиев ва Мария Мельниковалар ўтказилмади..

19 февралда Ташқи ишлар вазири Мухтар Тлеуберди номига ёзган мактубида РСЕ/РС президенти Жейми Флай аккредитациядан ўтказиш рад этилишини журналистларга нисбатан «ўзбошимчалик» ва «ноқонуний ҳаракатларнинг охирги намунаси» дея атади. Флайнинг таъкидлашича, аккредитация олмаган репортерлардан бири Санат Урналиев халқаро даражада тан олинган журналист ҳисобланади ва Азаттиқ таҳририятида 2014 йилдан бери ишлаб келади.

Корпорация раҳбарининг расмий мактубида таъкидланишича, мамлакат ичкарисида ишлаш учун рухсат берилмаслиги Азаттиқнинг Қозоғистон аҳолисига ўта муҳим бўлган хабарларни етказишдаги миссиясига тўсқинлик қилади.

Жейми Флайнинг фикрича, 2019 йилда Азаттиқ журналистларининг таъқиб қилиниши "ўта жиддий ва кўп сонли" бўлиб, Қозоғистон президенти Касим-Жомарт Тоқаев маъмурияти, Бош прокуратура ва хукуматнинг айрим аъзоларига расмий шикоят қилиш учун асос бўлди.

У шунингдек, Азаттиқ журналистларининг шикоятларига эътибор қаратмаган Қозоғистон полициясини «атайлаб ва такрорий ҳаракатсизлик»да айблади. Бу мурожаатларга корпорация жавоб олмади.

Қозоғистон ташқи ишлар вазири номига йўлланган мактубда таъкидланишича, давлат ОАВ кўп ҳолда маълумот бермаган ёки беришни хоҳламаганида РСЕ/РСнинг қозоқ таҳририяти рус ва қозоқ тилларида ахборот тарқатиш ва шу билан бирга эркин фикр алмашиш минбари бўлиб хизмат қилмоқда. 2019 йилда azattyq.org сервисининг сайтига 27,8 миллион киши кирган ва 42,6 миллион киши унинг саҳифаларини кўрган. 764 мингдан ортиқ киши унинг YouTube каналига обуна бўлди, 413 минг киши эса унинг Instagram даги саҳифасига обуна бўлди.

Ўтган йили Азаттиқ журналистлари бир неча бор иғвогарларнинг ҳаракатлари билан тўқнаш келди. Юзларига ниқоб тақиб олган кишилар камералар объективларини қоғоз ва соябонлар билан тўсиб қўйишди, мухбир ва операторларни чалғитишди ва уларни калтаклашди.

РСЕ/РС — таҳририят сиёсатида мустақил медиакорпорация бўлиб, USAGM орқали АҚШ конгрессининг молиявий гранти билан таъминланади.

Якшанба куни Афғонистонда «зўравонликни озайтириш» ҳафтаси бошланади

Толибон вакиллари 2019 йилнинг 22 октябрида Москвада ўтказилган музокараларда.

21 февраль куни юқори лавозимли Афғонистон расмийси ҳамда Толибон етакчилари якшанба куни бир ҳафтага чўзилувчи «зўравонликни озайтириш» ҳафтаси бошланишини маълум қилишди.

Бу чора 2018 йилда Қатарда АҚШ ва Толибон вакиллари ўртасида бошланган тинчлик музокаралари доирасида тайёрланган тинчлик келишувини имзолаш олдидан кўрилган чора эканлиги айтилмоқда. Агар тинчлик келишуви имзоланса, АҚШ ҳарбийлари мамлакатдан олиб чиқиб кетилиши мумкин.

Афғонистон Миллий хавфсизлик кенгаши матбуот котиби Жавед Файсал:

- Режага биноан, Толибон ҳамда халқаро ва Афғонистон хавфсизлик кучлари ўртасида зўравонликни озайтириш бир ҳафта давом этади, — деди.

Файсалнинг сўзларига кўра, ҳафта давомида Афғонистон ҳукумати кучлари «Ислом давлати» каби бошқа жангари гуруҳларга қарши амалиётларини давом эттиради.

- Умид қиламизки, бу чора узайтирилади ҳамда Афғонистондаги тарафлар ўртасидаги музокаралар тинчлик келишуви билан якунланишига замин яратади, — дея қўшимча қилди котиб.

АҚШ расмийлари ҳали мазкур ҳолатни изоҳлагани йўқ.
Reuters агентлиги уч Толибон расмийси якшанба куни кечки соат 12:00 дан бошлаб зўравонликни озайтиришга келишиб олинганини тасдиқлаганини хабар қилди.

Эронликлар парламент сайловида консерватив руҳонийлар танловидан ўтган номзодлар учун овоз бермоқда

21 февраль куни Эронда парламент сайловлари бўлиб ўтмоқда.
Парламентдаги 290 ўринга даъвогар барча номзодларни консерватив руҳонийлар танлаган. Ислоҳот тарафдорлари ҳамда мўътадил қарашларга эга номзодларга эса сайловда қатнашишга изн берилмади.

Инқилоб посбонлари кенгашининг консерватив аъзолари 7148 нафар номзодни маъқуллади, 9000 мингга яқин даъвогар арзини эса рад этди.

Номзодликка даъвоси қабул қилинмаганларнинг 90 нафари ҳозирги ҳукумат аъзоларидир.

Сайлов арафасида АҚШ номзодлар арзларини кўриб чиққан Инқилоб посбонлари кенгашининг беш аъзосига қарши санкция жорий қилди.

АҚШ Давлат департаментининг Эрон бўйича махсус вакили Браян Ҳук бу расмийлар «Эрон халқини очиқ ва адолатли сайловлардан маҳрум қилгани учун уларга қарши санкция жорий қилинганини» айтди.

Санкцияга йўлиққанлар орасида Инқилоб посбонлари кенгашининг котиби, ультра консерватив Аҳмад Жаннатий бор.

АҚШ давлат котиби Майк Помпео «Жаннатий каби руҳонийлар Эрон халқини сўнгги 41 йилдан бери танлов ҳуқуқидан маҳрум қилиб келади», деди.

Сайлов маҳаллий вақт билан соат 8:00 да бошланди ва кечки 6:00 гача давом этади.

АҚШда президент Трампнинг собиқ маслаҳатчиси қамалди

Рожер Стоун.

АҚШ суди 20 февраль куни президент Трампнинг собиқ маслаҳатчиси Рожер Стоунни 3 йилу 4 ойга озодликдан маҳрум этиш ҳақида ҳукм чиқарди. Аввалроқ у Конгрессга ёлғон маълумотлар тақдим этганлик, одил судловга тўсқинлик қилганлик ва гувоҳларга босим ўтказганликда айбдор, деб топилганди.

Стоунга нисбатан айблов махсус прокурор Роберт Мюллернинг АҚШдаги сайловларга Россиянинг эҳтимолий аралашувига оид суриштируви билан боғлиқ. Бу суриштирув асосида аввалроқ Трамп штабининг бир неча собиқ ходими ҳам судланган. Аммо айбловларнинг Россия билан ҳамкорликка алоқаси йўқ.

Стоунга қўйилган асосий айблов, тергов иддаосича, Намояндалар палатасидаги тингловда ўзининг WikiLeaks сайти билан алоқаси тўғрисида ёлғон маълумот бергани билан боғлиқ. Бу сайт Демократлар партияси серверини бузиб кириш (бу иш россиялик ҳакерлар томонидан амалга оширилгани тахмин қилинади) орқали олинган материалларни ёйинлаганди. Стоун WikiLeaks таҳририятида Демократлар партияси Миллий қўмитаси серверидан ҳакерлар томонидан ўғирланган ҳужжатлар борлигини билгани аниқланган.

Прокурорлар 67 ёшли Стоунга 7 йилдан 9 йилгача қамоқ жазоси сўраганлар. Бу тавсия Стоуннинг эски дўсти бўлган президент Трампни дарғазаб қилган. Бош прокурор Вильям Барр айблов хулосасидаги тавсияларни қайта кўриб чиқишни топширган, шундан сўнг бу ишни юритган тўрт нафар прокурор истеъфога чиққан.

Демократлар Трампни одил судлов жараёнига аралашганликда айблаганлар. Бош прокурор президентнинг твитларидан норози эканини билдирса-да, унга босим ўтказилмаганини урғулаган. Трамп эса мазкур ишни изоҳлашда давом этган. У судьяларни нохолисликда айбламоқда.

Москвада экстремизмда гумонланган олти нафар қирғизистонлик қўлга олинди

Россия пойтахти Москвада олти нафар қирғизистонлик экстремизм гумони билан қўлга олинди, дея хабар қилади ТАСС суд матбуот хизмати маълумотларига таянган ҳолда.

Москванинг Мешчанск туман суди эҳтиёт чораси сифатида қўлга олинганларни 17 мартга қадар ҳибсда тутиб туриш бўйича қарор қабул қилган. Қирғизистонликлар экстремистик руҳдаги ҳамжамият ташкил этганликда гумонланмоқда.

Қирғизистоннинг Россиядаги элчихонаси қўлга олинганларнинг фуқаролигига оид маълумотлар ва вазият ўрганилаётганини билдирган.

Хитой коронавирусни юқтираётганлар сони озая бошлагани тўғрисида баёнот берди

Хитой янги коронавирусга чалинганлар сони ўсиш суръати секинлай бошлаганини хабар қилди. Аммо касалликдан вафот этганлар сони ўсиб бормоқда.

20 февраль куни Хитой Миллий соғлиқни сақлаш комиссияси эпидемия эпицентри Хубэй вилоятида сўнгги 24 соат ичида 628 нафар киши, мамлакатнинг бошқа ҳудудларида 45 одам вирусни юқтирганини, касалликка чалинишлар сони сўнгги уч кун давомида озаяётганини билдирди.


Бу орада Эронда икки киши коронавирус туфайли ҳалок бўлгани хабар қилинди. Японияда эса Diamond Princess круиз кемасида саёҳат қилган катта ёшдаги икки киши ҳалок бўлди.

Жаҳон соғлиқни сақлаш ташкилотининг минтақавий директори Ричард Бреннан Хитой қисқа муддат ичида йирик натижаларга эришаётгани, аммо бўҳрон ўз якунига етмаганини айтди.

Хитой расмийлари вирус тарқалиши олдини олиш мақсадида 60 миллиондан ошиқ одам истиқомат қиладиган шаҳарларни изоляция қилган.

Сўнгги хабарларга кўра, COVID-19 деб номланган коронавирусдан ўлганлар сони 2100 дан ошди, касалликни юқтириб олганлар сони эса 75 минг кишидан ошди.

АҚШ давлат котиби Саудия Арабистонига хизмат сафари билан борди

Саудия Арабистони. АҚШ давлат котиби Майк Помпео Эр-Риёдга 19 февралда келди.

20 февраль куни АҚШ давлат котиби Майк Помпео Саудия Арабистони етакчилари билан учрашади. Икки тараф Эрон масаласини муҳокама қилиши кутилмоқда.

АҚШ Давлат департаменти расмийлари Помпео Саудия қироли Салмон, унинг ўғли валиаҳд шаҳзода Муҳаммад бин Салмон ҳамда ташқи ишлар вазири Файсал бин Фарҳан билан учрашишини маълум қилди.

Эр-Риёдга ташрифи олдидан Помпео:

- Хавфсизлик масалалари, хусусан, Эрон Ислом Республикаси масаласи ҳақида узоқ сўзлашамиз, — деди.

АҚШ президенти Дональд Трамп дунёнинг етакчи давлатлари билан Эрон ўртасида унинг ядро дастури бўйича 2015 йилда эришилган битимдан АҚШни чиқариб, Эронга нисбатан санкцияларни ва босимни оширган. Шу сабаб Вашингтон ва Теҳрон ўртасидаги танглик кучайди.

Сунний Саудия Арабистони эса шиа Эронни минтақадаги асосий рақиби деб билади.

Помпеонинг Эр-Риёдга ташрифидан олдин АҚШ армияси Эрон Ямандаги исёнчиларни қурол билан таъминлашда давом этаётганини билдирган эди. Саудия Арабистони эса Яманнинг жорий ҳукуматини қўллаб келади.

Помпео учрашувлар давомида иқтисод ва инсон ҳуқуқлари каби масалаларни ҳам муҳокама қилишини айтди.

Генерал Дўстум ўз тарафдорларини президент сайлови натижаларини тан олмасликка чақирди

Генерал Абдул Рашид Дўстум.

Афғонистон вице-президенти Абдул Рашид Дўстум ўз тарафдорларини президент Ашраф Ғанининг қайта президент этиб сайланишига қарши норозилик намойишига чиқишга чақирди.

Аммо Дўстумнинг чақириқларига қарамасдан, Афғонистонда ҳеч қандай йирик намойиш бўлмади.

18 февраль куни Ғани сайловда ғолиб чиққани эълон қилинди. Сайлов қоғозлари қайта-қайта саналгани ҳамда қонунбузарликлар ҳақидаги иддаолар туфайли Афғонистон расмийлари беш ой деганда сайловнинг якуний натижаларини эълон қилди.

Сайлов натижаларини президент Ғанининг рақиби Абдулла Абдулла ҳамда унинг шериги генерал Дўстум тан олмади.

18 февраль куни Абдулла алоҳида ҳукумат тузишни ваъда қилди. 19 февраль куни, шунингдек, Абдулла Қобулдаги хориж давлат элчихоналарига сайлов натижаларини тан олмасликка чақириб, мактуб ёзди.

Дўстум эса Жўзжон вилоятида Абдулла ва уни қўлловчиларни сайлов натижаларини тан олмасликка ва норозилик намойишларига чиқишга чақирди.

Жанубий Кореянинг собиқ президенти 17 йилга қамалди

Ли Мён Бак (ўртада).

Сеул апелляция суди Жанубий Кореянинг коррупцияда айбланган собиқ президенти Ли Мён Бакни 17 йилга озодликдан маҳрум қилиш ҳақида ҳукм чиқарди. 78 ёшли сиёсатчи пора олиш ва маблағ ўзлаштиришда айбдор, деб топилган.

Аввалроқ у айни шу иш бўйича 15 йиллик қамоқ жазосига ҳукм қилинган, аммо саломатлиги ёмонлашгани боис гаров эвазига озод этилганди.

Ли Жанубий Кореяга 2008 йилдан 2013 йилга қадар раҳбарлик қилган. У жиноий жавобгарликка тортилган учинчи президент бўлди. Суд маълумотига кўра, Ли президент лавозимида бўла туриб амалда автомобиллар учун деталь ишлаб чиқарадиган компанияга раҳбарлик қилган ҳамда ўз мақомидан фойдаланган ҳолда акаси номига расмийлаштирилган мазкур компания бизнесини ривожлантиришда иштирок этган.

Прокурор Лига 23 йиллик қамоқ жазоси сўраган. Сиёсатчи ўзига қўйилган айбловни рад қилган.

Унинг салафи Но Му Хён коррупцияда айбланганидан сўнг истеъфога чиққанидан бир йил ўтиб ўз жонига қасд қилган. Лидан кейинги яна бир президент Пак Кин Хе ҳам коррупция айблови билан қамоққа ҳукм қилинган.

Қозоғистонда миллий низо бўйича 90 га яқин жиноят иши очилди

Масанчи овули. Тўқнашувдан кейинги вазият. 2020, 8 февраль.

Қозоғистон расмийлари 7-8 февраль кунлари Жамбул вилоятида содир бўлган ва 11 одам умрига зомин бўлган миллатлараро низо бўйича 90 га яқин жиноят иши очди.

19 февраль куни Ички ишлар вазири ўринбосари Марат Қожаев юзлаб одам аллақачон сўроқ қилинганини, терговлар икки ой давом этиши кутилаётганини айтди.

- Бошқа гумонланувчилар, жумладан, зўравонликни бошлаган шахслар ҳақида маълумот кейинроқ тергов давомида тарқатилади, — деди Қожаев.

Қожаев полиция уч нафар этник дунган ака-укани ҳибсга олганини тасдиқлади. Қозоғистон прокуратурасига кўра, полиция ходимлари 7 февралда Сўртўбе қишлоғида автомобиль йўлида содир бўлган жанжал ортидан дунган шахс ҳайдаб кетаётган автомобилни тўхтатган.

Ҳайдовчилик гувоҳномаси ва автомобилнинг давлат рўйхатидан ўтган ҳужжатлари бўлмагани учун унга полиция участкасига бориш тайинланган. Аммо у қаршилик кўрсатиб, укалари олдига қочган. Уч ака-ука сўнгра полицияга ташланган.

Қозоғистон ҳокимият идоралари олдинроқ йўлдаги қаттиқ муштлашув маҳаллий қозоқлар билан кам сонли дунган этник гуруҳига мансуб Қозоғистон фуқаролари ўртасида катта зўравонликка айланиб кетганини билдирган эди. Дунганлар асли хитой миллатига мансуб мусулмонлардир.

Сўртўбе, Масанчи, Ауқатти ва Булан-Батир қишлоқларида рўй берган тўқнашувлар оқибатида 11 киши ҳалок бўлди, ўнлаб қишилар, жумладан, полиция ходимлари яраланди.

Эрдўғон: Россия билан Сурия бўйича музокаралар қониқарли ўтмади

Туркия президенти Ражаб Тоййиб Эрдўғон.

Туркия президенти Ражаб Тоййиб Эрдўғон Сурия президенти Башар Асад қўшинлари Туркия ҳарбий позицияларидан ортга чекинмаса, Анқара Идлибда ҳарбий амалиёт бошлаши муқаррар эканлигини айтди.

Президентнинг бу билдирувини Москва дарҳол танқид қилди.

Сурия армияси Россия ҳарбийлари кўмаги билан Идлибда бошлаган ҳарбий амалиёт минглаб одамни ўз уйини тарк этишга мажбурлади.

19 февраль куни Эрдўғон AK партияси аъзолари олдида қилган чиқишида Россия билан музокаралар давомида келишувга эришилмаганини айтди. Туркия Асадга қарши исёнчиларни қўллаб келади.

Президент Туркиянинг Идлибни «хавфсиз зонага» айлантириш нияти қатъий эканлигини айтди.

- Туркия Идлибда ўз режасини амалга ошириш учун тайёргарликни якунлади. Очиғини айтсам, Идлибда амалиёт бошлашимиз фақат вақт масаласидир, — деди Эрдўғон.

Президентнинг бу шарҳлари ортидан Кремль матбуот котиби Дмитрий Песков Москва бундай амалиётга қарши эканлигини, Идлибдаги вазият янада кескинлашишига йўл қўймаслик учун Москва Анқара билан мулоқотда эканлигини айтди.

Россия ташқи ишлар вазири Сергей Лавров эса Москвада 17-18 февраль кунлари ўтказилган музокараларда бирор келишувга эришилмаганини билдирди.

ЕХҲТ Украина шарқида тарафларни зўравонликни тўхтатишга чақирди

Украина армияси аскари Луганск вилоятидаги фронт чизиғидаги окопда турибди. 2020, февраль.

Европада хавфсизлик ва ҳамкорлик ташкилоти (ЕХҲТ) расмийлари Украина шарқида зўравонлик кучайганидан хавотир изҳор қилди.

Украина расмийларига кўра, 18 февраль куни содир бўлган отишмада бир нафар Киев аскари ҳалок бўлган, тўрт нафари жароҳат олган.

Луганск айирмачи региони етакчиси Яков Осадчий эса тўрт жангчиси ҳалок бўлганини ва яна тўрт нафари жароҳат олганини билдирди.

ЕХҲТнинг амалдаги раиси Эди Рама ҳамда бош котиб Томас Гремингер ҳалок бўлганлар ҳақидаги хабарлардан қайғуда эканлигини айтиб, тарафларни зўравонликни тўхтатишга чақирди.

Ўтган йилнинг декабрида Парижда россияпараст айирмачилар ва Киев кучлари ўт очишни тўхтатишга келишиб олган эди.

Рама Минск ва Парижда эришилган келишувларда белгиланган шартларга қарамасдан, ҳар куни тўқнашувлар содир бўлаётганини айтди.Расмий кейинги ойларда эришилган ижобий натижалар бекор қилинмаслиги кераклигини қўшимча қилди.

Бу орада айирмачилар билан Киевга содиқ кучлар бир-бирини келишув шартларини бузишда айблади.

Қирғизистон коронавирусга қарши курашаётган Хитойга инсонпарварлик ёрдами йўллади

Қирғиз-хитой чегарасидаги Тўруғарт назорат-ўтказиш маскани.

Қирғизистон коронавирусга қарши курашни дастаклаш мақсадида Хитойга инсонпарварлик ёрдамини юборди.

Фавқулодда вазиятлар вазирлиги матбуот хизмати маълумотига кўра, Хитойга Қирғизистондан асосан антисептик ва дезинфикация воситалари, шахсий тиббий ҳимоя воситаларидан иборат бўлган 7 тоннага яқин юк жўнатилган.

Аввалроқ Озодлик Ўзбекистон ҳам Хитойга инсонпарварлик ёрдами жўнатгани ҳақида хабар қилган.

Сўнгги маълумотларга кўра, Хитойнинг Ухан шаҳрида қайд этилган вирусдан ўлганлар сони 2000 нафардан ошган.

Коронавирус қурбонлари сони 2000 нафардан ошди

Иллюстратив сурат.

Хитойда янги коронавирус туфайли нобуд бўлганлар сони 2004 кишига етди. Бу ҳақда Хитой Соғлиқни сақлаш миллий комиссияси маълумот тарқатди.

Хабарларга кўра, касалликни юқтириб олганлар сони 74 минг нафардан ошган.

Хасталардан 11 минг 977 нафарининг аҳволи оғирлиги айтилмоқда. Айни пайтда 14 минг 376 киши соғайгани муносабати билан шифохонадан чиқарилган.

Хитой расмийлари коронавирус тарқалишининг олдини олиш мақсадида мамлакатда 10 дан ортиқ шаҳарни ёпиб қўйганлар.

Вирус туфайли қатор мамлакатлар Хитой билан транспорт ва авиақатновлар учун чекловлар жорий қилган.

Bellingcat: Чечен айирмачи қўмондони ўлдирилишида ФСБ қўли бор

Зелимхан Хангошвили.

Bellingcat суриштирув журналистлари гуруҳи собиқ чечен айирмачи қўмондони Зелимхан Хангошвилини Берлинда ўлдиришни Россия Федерал Хавфсизлик хизмати (ФХХ) режалаштириб, амалга оширган, деган хулосага келди.

Иккинчи чечен урушида русларга қарши жанг қилган рота командири Хангошвили ўтган йилнинг августида Берлинда отиб ўлдирилган эди.

Германия расмийлари қўлга киритилган далиллар қатл Россия ҳукумати ёки Чеченистон расмийлари буюртмаси билан амалга оширилганини кўрсатишини маълум қилган. Москва эса бу иддаоларни кескин рад этиб келади.

Қатл ортидан кўп ўтмай ҳужумни амалга оширишда гумонланиб Россия фуқароси қўлга олинди. Айни дамда у Германия қамоқхонасида ушлаб турилибди.

Декабрь ойида Bellingcat гуруҳи гумонланувчи Вадим Красиков эканлигини эълон қилди. Айни шахс 2013 йил Москвада ўлдирилган тадбиркор ўлдирилиши билан боғли ишда гумонланувчидир.

Кузатувчилар Хангошвилининг ўлдирилишини 2018 йилда Лондонда собиқ жосус Сергей Скрипалнинг заҳарланишига қиёслади.

Бир ойга чўзилган суриштирув ортидан Bellingcat Хангошвилини ўлдиришга тайёргарлик ишларини собиқ спецназ зобитлари учун тузилган «Вимпел» хайрия фонди раиси Эдуард Бендерский шахсан назорат қилганини хулоса қилди.

Хаага суди Россияга «ЮКОС» сармоядорларига 50 миллиард доллар товон тўлаш мажбуриятини юклади

Михаил Ходорковский

Нидерландия апелляция суди Россия зиммасига собиқ нефть ширкати «ЮКОС» сармоядорларига 50 миллиард доллар товон тўлаш мажбуриятини юклади. Суд бу ҳукми билан бундан 4 йил олдинги ҳукмни бекор қилди.

2016 йилда Хаага туман суди мазкур иш Россия имзолаган, аммо ратификация қилмаган энергетика келишувига таянганини, шунинг учун Арбитраж доимий суди чиқарган қарор асоссиз эканлигини айтиб, товон тўлашга доир ҳукмни бекор қилган эди.

Россия Адлия вазирлиги дарҳол суднинг сўнгги қарори устидан шикоят қилишини билдирди.

Хаага аппеляция суди 2016 йилги қарор нотўғри эканлигини, ундан олдин чиқарилган қарор ўз кучида қолишини билдирди.

Арбитраж суди қарорида 2003 йили Москва «ЮКОС»га улкан солиқлар солиб, уни қўлга олгани айтилади: «Ҳукумат “ЮКОС”ни банкрот қилиб, унинг мулкларини эгаллаб олиш учун “ЮКОС” ва унинг эгаларига кенг кўламли ҳужум қилган, айни дамда Жаноб Ходорковскийни сиёсий саҳнадан сиқиб чиқарган»

Россия ҳукуматининг «ЮКОС»га қарши чоралари ширкат директори, президент Владимир Путиннинг ашаддий рақиби Михаил Ходорковскийни йўқ қилишни кўзлагани айтиб келинади.

Ходорковский 2003 йилда қўлга олинган. Россия қамоғида 10 йил ўтказганидан кейин афв этилиб, мамлакатни тарк этган.

Украина Хитойдан фуқароларини эвакуация қилиш учун учоқ юборади

18 февраль куни Украина 49 фуқароси ҳамда 25 нафар бошқа давлат фуқаросини эвакуация қилиш учун Хитойга учоқ юборилишини маълум қилди.

Бунга Хитойда янги коронавирусдан ҳалок бўлганлар ва вирусга чалинганлар сони ошиб бораётгани туртки бўлди.

Сўнгги хабарларга кўра, Хитойда коронавирусдан ҳалок бўлганлар сони 1900 га етди, унга чалинганлар сони эса 72 минг нафардан ошди.

Киевда соғлиқни сақлаш вазири Виктор Ляшко йўловчилар эпидемия ўчоғи Ухан шаҳридан олиб чиқиб кетилишини айтди.

Ляшко фақат вирус симптомлари йўқ бўлган шахсларгина эвакуация қилинишини билдирди. Шунингдек, вазир йўловчилар Киевда икки ҳафта назорат остида бўлишини қўшимча қилди.

- Саросимага тушишга ўрин йўқ, фақат соғлом шахсларни Украинага олиб келамиз, — деди Ляшко.

Украинанинг Хитойдаги элчихонаси 11 февраль куни мамлакат фуқаролари эвакуация қилинишини эълон қилган эди. Аммо бу режа икки марта кейинга қолдирилди.

Ляшко ҳозирча Япония портида карантинга олинган Diamond Princess круиз кемаси бортидаги 25 нафар украиналикни эвакуация қилиш режаси йўқлигини айтди.

Тожик расмийлари “Хўжа-командир”нинг Дубайдан ватанига экстрадиция қилинганини тасдиқлади

Тожикистон Ички ишлар вазирлиги фуқаролар уруши даврида Халқ фронти дала қўмондони бўлган Хўжа Каримов Бирлашган Араб Амирликларидан экстрадиция қилинганини тасдиқлади.

"Хўжа-командир" ўтган йил июлида Дубайда қўлга олинган, бироқ у экстрадиция иши кўриб чиқилгунгача тилхат асосида уч ҳафтадан сўнг озод қилинган эди.

Вазирлик матбуот марказига кўра, “фуқаро Каримов Хўжа Раҳимович («Хўжа-командир»)… бир қатор жиноятлар: босқинчилик, қотиллик, қийноққа солиш, гаровга олиш ва қонунга зид равишда қурол сақлаганлик жиноятларини содир этганликда гумон қилиниб, расман қидирувда бўлган" ва “Тожикистон ИИВнинг хориждаги субъектлар билан ҳамкорлиги натижасида 2020 йил 16 февраль куни ватанига экстрадиция қилинган”.

Манбаларга кўра, айни дамда Хўжа Каримов сўроқ қилинмоқда.

Тожикистон ва БАА ўртасида Жиноятчиларни топшириш тўғрисида шартнома имзолаган. Бир неча йил муқаддам БАА Тожикистон Халқ фронтининг бошқа бир машҳур дала қўмондони - собиқ генерал Ғаффор Мирзоевнинг укаси Абдурасул Мирзоевни ҳибсга олган ва Душанбега топширган эди.

“Хўжа-командир” 1999 йилда Тожикистондан қочиб кетганидан кейин Малайзияда яшаган ва бизнес билан шуғулланган. У 2008 йил охирида Интерпол линияси бўйича халқаро қидирувга берилган.

Фуқаролар уруши даври гувоҳларига кўра, Хўжа Каримов бошқа дала қўмондонларидан ўзининг шафқатсизлиги билан ажралиб турган.

"Хўжа-командир” тожик парламентининг икки депутатини ўлдирганликда айбланади. Тергов Сияршо Шоев ва Саидшо Шоевни, шунингдек, судья Тағай Шукуровнинг ўлдирилишида унинг қўли борлигини исботловчи далилларга эга", деганди аввалроқ Озодликнинг тожик хизмати билан суҳбатда истеъфодаги полковник Маҳди Собир.

Малайзияга қочиб кетишдан аввал Хўжа Каримов Тожикистон Мудофаа вазирлигининг махсус бригадаси қўмондони биринчи ўринбосари ва Тожикистон Футбол Федерацияси раиси сифатида фаолият кўрсатган.

Трамп Россияни Сурияда "ваҳшийликларни" қўллашни бас қилишга чақирди

АҚШ президенти Дональд Трамп.

16 февраль куни АҚШ президенти Дональд Трамп телефон орқали Туркия президенти Ражаб Тоййиб Эрдўғон билан мулоқот давомида Суриянинг Идлиб шаҳридаги зўравонликлар юзасидан хавотир изҳор қилди.

Бу ҳақда хабар қилган Оқ уй матбуот котиби Жад Дирга кўра, Трамп Россияни Сурия ҳукуматининг зўравонликларини қўллаб-қувватлашни бас қилишга, шунингдек, Суриядаги можарога сиёсий ечим топишга чақирган.

17 февраль куни Сурияда қарама-қарши тарафларни қўллаб келаётган Анқара ва Москва музокара ўтказади.

Россия ҳарбийлари қўллаб келаётган Сурия ҳукумати кучлари 16 февраль куни Ҳалаб вилоятида исёнчилар бошқарувидаги сўнгги ҳудудларни қўлга киритди.

Асад ҳукуматини ағдариш истагидаги исёнчиларни қўллаб келаётган Туркия Россияни Идлибдаги ҳужумларни тўхтатишга чорламоқда. Хусусан, Анқара Сурия кучлари ой охиригача чекинмаса, ҳарбий куч ишлатишини айтиб, таҳдид солмоқда.

Қароргоҳи Лондонда жойлашган Сурия инсон ҳуқуқлари гуруҳи 16 февраль куни кеч Сурия ҳукумати 2012 йилдан бери илк маротаба Ҳалаб атрофидаги барча шаҳар ва қишлоқлар бошқарувини қўлга киритганини билдирди.

Қрим суди Азов денгизида қўлга олинган украиналик балиқчиларни 10 кунга қамади

16 февраль куни Россия бошқарувидаги Қрим суди Азов денгизида қўлга олинган тўрт нафар украиналик балиқчига 10 кунлик қамоқ жазоси тайинлади.

Россия Федерал хавфсизлик хизматининг чегара кучлари балиқчилар Қрим соҳиллари яқинида қўлга олинганини, улар «сувдаги биологик ресурсларни тутиш қоидаларини бузганликда» айбланаётганини билдирди.

Қрим омбудсмени Лариса Опанасюк балиқчилар ёнида ҳужжатлари бўлмаганини ҳамда балиқларни ноқонуний тарзда овлашганини айтди.

2003 йилда Россия ва Украина имзолаган келишув Керчь бўғози ва Азов денгизидан тўсиқсиз фойдаланишни кафолатлайди.

2018 йилнинг 25 ноябрида Керчь бўғозида Россия кучлари чегара бузилганини иддао қилган ҳолда Украина ҳарбий-денгиз кучларига қарашли учта кема ва улардаги 24 нафар денгизчини қўлга олиб, қамаб қўйган эди. Денгизчилар ўн ой деганда маҳбус алмашинуви бўйича эришилган келишув ортидан Украинага қайтди.

Россия 2014 йилда Қримга бостириб кириб, уни аннексия қилиб олган.

Европа Иттифоқи: Болқон давлатларининг иттифоққа қўшилиши эҳтимолдан холи эмас

Европа Иттифоқи комиссияси президенти Урсула фон дер Ляйен.

16 февраль куни Европа Иттифоқи етакчилари Болқон давлатлари билан мустаҳкам алоқа ўрнатиш тарафдори эканини изҳор қилди. Ўтган йилда Албания ва Шимолий Македониянинг иттифоққа қўшилиш умидлари барбод бўлган эди.

16-17 февраль кунлари Брюсселда Европа Иттифоқи ҳамда Ғарбий Болқон давлатлари вакиллари ўртасида норасмий йиғин ўтказилмоқда. Учрашувда қатнашаётган Европа Иттифоқи комиссияси президенти Урсула фон дер Ляйен:

- Ўйлайманки, Ғарбий Болқон давлатларини Европа Иттифоқига иложи борича яқин ушлаш барчамизнинг умумий геостратегик манфаатларимизга мос келади, - деди.

Европа кенгаши президенти Шарль Мишель олти Болқон давлати етакчилари билан «самимий ва очиқ» музокара олиб боришни интиқиб кутаётганини айтди.

Европа Иттифоқи давлатлари Албания ва собиқ Югославиянинг блокка қўшилмаган аъзоларини Ғарбий Болқон давлатлари деб атайди. Октябрь ойида Албания ва Шимолий Македония амалга оширган ислоҳотларга қарамасдан, уларни блокка қўшиб олиш бўйича музокаралар кейинга қолдирилди.

Кейинги ойларда иттифоқ аъзо давлатларни қўшиб олиш стратегиясини ўзгартирмоқда. Фон дер Ляйен янги методология ҳукумат ислоҳотларига урғу беришини, улар келажакда Болқон давлатларига блокка қўшилиш имконини беришини айтди.

Қозоғистон президенти интернетдаги узилишларни бартараф қилиш ҳақида топшириқ берди

Иллюстратив сурат.

Якшанба, 16 февраль куни Қозоғистонда айрим сайтлар, жумладан, Озодлик қозоқ хизматининг сайти, ижтимоий тармоқлар, Youtube платформаси ва Google сервисида узилишлар кузатилди.

Фойдаланувчилар Интернет тезлигининг пастлигидан шикоят қилмоқда. Бир неча кундан бери Telegram мессенжерига кириш билан боғлиқ муаммо кузатилаяпти. Айни пайтда мессенжер VPN орқали узилмасдан ишламоқда.

Қозоғистон президенти матбуот котиби Берик Уали Facebook’даги ўз саҳифасида айни пайтда Германия сафарида бўлган Қ. Тоқаев “барча ахборот ресурслари ишини тиклаш юзасидан топшириқ бергани” ҳақида ёзди.

Қозоғистонда интернет блокировкаси, хусусан, ижтимоий тармоқлар блокировкаси аввалги йилларда асосан тун пайтида кузатиларди. Қозоқ расмийлари бунга “техник муаммо” дея жавоб бериш билан чекланишар, провайдерлар эса тармоқда носозлик борлигини рад этишарди.

Қозоғистонда кенг кўламли интернет блокировкаси ўтган йилнинг 9 май ва 9 июнь кунлари тинч намойиш иштирокчиларининг оммавий қўлга олиниши қабатида кузатилган.

Қозоғистонда куч ишлатар тузилмалар фавқулодда вазиятлар, жумладан, “ижтимоий” ва техноген характердаги ҳолатлар чоғида Интернет ва алоқа воситаларини зудлик билан блоклаш ҳуқуқига эга.

Давомини ўқинг

Кўрмай қолган бўлсангиз

XS
SM
MD
LG